Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda  |  Na. 5 2017

 NKHANI YAPACHIKONKHOMBI | KUMBI BAYIBOLU LIKAMBANJI VAKUKWASKANA NDI ANGELU?

Kumbi Angelu Angakuwovyani Wuli?

Kumbi Angelu Angakuwovyani Wuli?

Angelu akugomezgeka akhumbisiska kuziŵa vinthu vo vititichitikiya ndipu atesesa kugwira ntchitu zakovya kuti khumbu laku Yehova lifiskiki. Chiuta wati walenga charu chapasi, angelu “angudaniriza pamoza mwakukondwa, ndipu ŵana ŵaku Chiuta wosi angukambura ndi chimwemwi.” (Jobu 38:4, 7) Kwamba kali, angelu akhumbisiska ‘kulingizga’ mu vinthu vo Chiuta wakulayizga kuziya mwa achimi vakukwaskana ndi charu chapasi.—1 Petro 1:11, 12.

Bayibolu lilongo kuti nyengu zinyaki angelu avikiliya ateŵeti aku Chiuta kuti khumbu laki lifiskiki. (Sumu 34:7) Mwakuyeruzgiyapu:

  • Pa nyengu yo Yehova wananganga misumba yiheni ya Sodomu ndi Gomora, angelu anguwovya Lote yo wenga murunji ndi banja laki kuti athaŵi.—Chiyambo 19:1, 15-26.

  • Achinyamata atatu a Chihebere ŵati aponyeka mung’anju ya motu ku Babiloni, Chiuta “wangutuma mungelu waki ndi kutaska ateŵeti ŵaki.”—Danyele 3:19-28.

  • Danyele wati wagona zuŵa limoza muzenji la nkharamu zo zenga ndi nja ukongwa, wangukamba kuti wangupona chifukwa “Chiuta . . . wangutuma mungelu waki ndi kujara milomu ya nkharamu.”—Danyele 6:16, 22.

Angelu akwamba kali kuwovya ŵanthu akugomezgeka

ANGELU AWOVYANGA AKHRISTU A MUNYENGU YA AKUTUMIKA

Nyengu zinyaki, angelu aku Chiuta aseleriyangapu asani mphakwenere kuti awovyi Akhristu akwambiriya ndi chilatu chakuti khumbu laku Yehova lifiskiki. Mwakuyeruzgiyapu:

  • Mungelu wangujula visasa va jeri, ndipu wangukambiya akutumika wo ŵenga mujeri kuti akalutirizi kupharazga munyumba yakusopiyamu.—Machitidu 5:17-21.

  • Mungelu wangukambiya Filipu kuti waluti ku msewu wa muchipululu wo watuwanga ku Yerusalemu kuluta ku Gaza kuti wakapharazgiyi munthu wa ku Etiopia yo wanguluta ku Yerusalemu kuchipemphera.—Machitidu 8:26-33.

  • Nyengu yaku Chiuta yakuti ŵanthu wo ŵenga Ayuda cha aje Akhristu yati yakwana, mungelu wanguwoneke kwaku Kornelio yo wenga mura wa asilikali Achiroma. Mungelu uyu wangukambiya Kornelio kuti wadaniyi Petro kunyumba kwaki.—Machitidu 10:3-5.

  • Wakutumika Petro wati wamangika, mungelu wangumuwoneke ndipu wangumutuzga mujeri.—Machitidu 12:1-11.

 KUMBI ANGELU ANGAKUWOVYANI WULI?

Palivi ukaboni wo ulongo kuti mazuŵa nganu, Chiuta wagwirisiya ntchitu angelu kuti wawovyi ŵanthu mwakuziziswa munthowa zo zikonkhoseka m’Bayibolu. Kweni pakukamba za mazuŵa nganu, Yesu wangukamba kuti: “Uthenga wamampha uwu wa Ufumu, wazamupharazgika pacharu chosi chapasi kuti uje ukaboni ku ŵanthu amitundu yosi, ndipu pavuli paki umaliru uzengi.” (Mateyu 24:14) Kumbi muziŵa kuti akusambira aku Khristu achita ntchitu iyi mwakulongozgeka ndi angelu?

Angelu atovya pa ntchitu yakupharazga uthenga wamampha pacharu chosi chapasi

Buku la Chivumbuzi lilongo kuti angelu agwira mwaphamphu ntchitu yakovya ŵanthu pacharu chosi chapasi kuti aziŵi Yehova Chiuta ndi vo wakhumba kuchitiya ŵanthu. Wakutumika Yohane wangulemba kuti: “Ndinguwona mungelu munyaki wachiphululuka mude. Iyu wenga ndi uthenga wamampha wamuyaya, wakuti waupharazgi ku ŵanthu wo aja pacharu chapasi, ku mtundu wewosi, fuku lelosi, lilimi lelosi ndipuso ku ŵanthu wosi. Iyu wakambanga ndi mazu ngakudaniriza kuti: ‘Opani Chiuta ndi kumupaska unkhankhu, chifukwa ora lacheruzgu lafika. Mwaviyo, sopani Yo wakupanga kuchanya, charu chapasi, nyanja ndipuso akasupi a maji.’” (Chivumbuzi 14:6, 7) Vinthu vinandi vakukondwesa vo vichitika mazuŵa nganu pa ntchitu yakupharazga Ufumu, mbukaboni wakulongo kuti angelu atovya pa ntchitu yeniyi yo yichitika pacharu chosi chapasi. Hinya, asani munthu yumoza wakubuda walapa ndi kuwere kwaku Yehova, “angelu aku Chiuta akondwa ukongwa.”—Luka 15:10.

Ntchinthu wuli cho chazamuchitika asani ntchitu yakupharazga yazimala? “Magulu ngakuchanya” nga angelu ngazamuwovya Yesu Khristu yo ndi Fumu ya mafumu pa “nkhondu ya zuŵa likulu laku Chiuta Wanthazizosi” ya Aramagedoni. (Chivumbuzi 16:14-16; 19:14-16) Angelu anthazi azamupereka chilangu pa nyengu yo Yesu Khristu ‘wazamuweze ŵanthu wo . . . aleka kuvwiya uthenga wamampha wakukwaskana ndi Yesu, Ambuyafwi.’—2 Ŵatesalonika 1:7, 8.

Mwaviyo, mungakayikanga cha kuti Angelu atikuŵanaŵaniyani. Yiwu atiŵafipiya mtima ŵanthu wo akhumbisiska kuteŵete Chiuta ndipu kanandi Yehova watiŵagwirisiya ntchitu kuti wachiski ndi kuvikiliya ateŵeti ŵaki akugomezgeka pacharu chapasi.—Ŵahebere 1:14.

Pa nyengu yinu, weyosi waku isi wakhumbika kusankha yija cho wachitengi. Kumbi tivwiyengi uthenga wamampha wo upharazgika pacharu chosi chapasi? Akaboni aku Yehova a muchigaŵa cho muja mbakunozgeka kukuwovyani kuti muyanduwi ndi chovyu cha angelu anthazi aku Chiuta.

 

Ziŵani Vinandi

UTHENGA WAMAMPHA WAKUTULIYA KWAKU CHIUTA

Kumbi Mungaja Wuli pa Ubwezi ndi Chiuta?

Ziŵani asani Chiuta watuvwa marombu ngosi, mo tingarombe kweniso vo tingachita kuti tije pa ubwezi ndi Chiuta.

CHIGONGWI CHA ALINDA

Viwona Vakukwaskana ndi Wo ŵe Kuchanya

Kumbi Malemba ngakambanji vakukwaskana ndi Yehova Chiuta, Yesu Khristu ndipuso angelu akugomezeka?