Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda  |  Na. 4 2016

 BAYIBOLU LISINTHA ŴANTHU

Ndinguyesa Kanandi Waka Kuti Ndisinthi Mijalidu Yiheni

Ndinguyesa Kanandi Waka Kuti Ndisinthi Mijalidu Yiheni
  • NDIKUWA MU: 1953

  • CHARU CHO NDIKUWIYA: AUSTRALIA

  • MBIRI YANGU: NDAWONELIYANGA VINTHU VAKUSIKUWA

UMOYU WANGU WAKALI:

Ada angusama ku Germany kuluta ku Australia mu 1949. Yiwu angusama kuti akapenji ntchitu mumigodi kweniso kukampani yamagesi ndipu ajanga kumizi ya ku Victoria. Kwenuku ndiku angutoliyana nthengwa ndi ama. Ini ndinguwaku mu 1953.

Pati pajumpha vyaka vimanavi, ama angwamba kusambira Bayibolu ndi Akaboni aku Yehova. Ivi vinguchitisa kuti ndiziŵi vo Bayibolu lisambiza ndeche munamana. Kweni ada ayanjanga cha kusambira vakukwasana ndi chisopa. Yiwu angwamba kuchita vinthu vankhaza ndipuso kuwofyeza mwakuti ama ajanga mwamantha ukongwa. Ama angulutiliza kusambira Bayibolu mwakubisa ndipu aviyanjanga ukongwa vo asambiranga. Asani Ada atuwapu, ama atikambiyangaku vo asambiranga. Yiwu atikambiyanga kuti charu chazamuja paradayisu. Atikambiyanga so kuti tingakondwa ukongwa asani tingavwiya vo Bayibolu likamba.—Sumu 37:10, 29; Yesaya 48:17.

Pa nyengu yo ndenga ndi vyaka 18, ndingusama panyumba chifukwa chakuti Ada andichitiyanga nkhaza. Chinanga kuti ndagomezanga vo Ama angundisambiza vakukwasana ndi Bayibolu, kweni ndawonanga kuti vakukhumbika cha. Mwaviyo, ndavigwirisiyanga ntchitu cha. Ndingwamba kugwira ntchitu ya magesi mumigodi. Ndinguto munthukazi ndati ndafika vyaka 20. Mwana widu wakwamba wanguwaku pati pajumpha vyaka vitatu. Pa nyengu iyi ndingwamba kuŵanaŵaniya vinthu vo vingandiwovya pa umoyu wangu. Ndinguwona kuti Bayibolu lingawovya banja langu. Mwaviyo, ndingwamba kusambira Bayibolu ndi Akaboni aku Yehova. Kweni muwolu wangu waŵatinkhanga ukongwa Akaboni aku Yehova. Ndati ndaluta ku maunganu nga Akaboni aku Yehova kakwamba, wangundikambiya kuti ndisankhepu chimoza, nthengwa pamwenga kusambira Bayibolu. Chifukwa chakopa kuti nthengwa yingamala, ndinguvwiya ndipu ndinguleka kusambira Bayibolu ndi Akaboni aku Yehova. Kweni pati pajumpha nyengu ndingwamba kujimba mulandu chifukwa chakutondeka kuchita vinthu vo ndaziŵanga kuti vamampha.

Zuŵa linyaki ŵanthu wo ndagwiranga nawu ntchitu angundilongo vinthu vamsiku. Vinthu venivi vawonekanga vakukopa kweni venga vaukazuzi. Ivi vinguchitisa kuti ndiyambi kujimba mulandu. Ndati ndayamba kuŵanaŵaniya vo ndingusambira m’Bayibolu, ndinguwona kuti Chiuta wandilangengi chifukwa cha vo ndachita. Chifukwa cha kuviwonere kaŵikaŵi ndingwamba kuwona nge palivi suzu kuviwonere. Pati pajumpha nyengu, ndingwamba kuviyanja ukongwa ndipu ndakhumbanga cha kuvileka.

 Pati pajumpha vyaka 20, ndinguluwiya limu fundu zo ama andisambizanga. Nkharu yangu yalongonga vo venga mumtima mwangu. Ndalongoronga vinthu viheni kweniso ndayanjanga kukamba myati yakutuka. Nkhani yakugonana ndingwamba kuyiwona mwambula kwenere. Chinanga kuti ndenga ndi muwolu wangu, kweni ndachitanga so vibwezi ndi anthukazi anyaki. Zuŵa linyaki ndajilelesanga pagilasi ndipu ndingwamba kujiwona kuti nde wambula kukhumbika. M’malu mwakujiwona kuti nde wakukhumbika ndingwamba kujiwona kuti nde munthu muheni ukongwa.

Nthengwa yangu yingumala, ndipu nkharu yangu yingunangikiya limu. Ndingupemphera kwaku Yehova mwakutuliya pasi pa mtima. Ndingwamba so kusambira Bayibolu ndi Akaboni aku Yehova chinanga kuti pa nyengu iyi ndipu pajumpha vyaka 20 kutuliya po ndinguleke kusambira. Pa nyengu iyi ndipu ada atayika, kweni ama ndipu abatizika nge Kaboni waku Yehova.

MO BAYIBOLU LINGUSINTHIYA UMOYU WANGU:

Vo ndachitanga vapambananga ukongwa ndi vo Bayibolu lisambiza. Kweni pa nyengu iyi ndipu ndasimikiza mtima kuti ndiyambi kusambira Bayibolu kuti ndisaniya likondwa. Ndinguleka kulongoro vinthu viheni kweniso kukwiya liŵi. Kweniso ndingusimikiza mtima kuti ndileki mijalidu yiheni ya ureŵi, chinyengu, kumwa ukongwa moŵa ndipuso kubiya ŵanthu wo ndagwirangaku ntchitu.

Ŵanthu wo ndagwiranga nawu ntchitu avwisisanga cha chifukwa cho ndingusinthiya viyo. Kwa vyaka vitatu, anguyesesa kundichichiza kuti ndiyambi so kuchita vinthu viheni. Yiwu akondwanga ukongwa asani ndayamba so kuchita vinthu vinyaki vo ndachitanga kali pamwenga kukwiya waka ukongwa. Ndipu andikambiyanga kuti: “Ahaa, yo ndiyu Joe tiziŵa!” Mazu yanga ngandiŵaŵanga ukongwa ndipu ndajiwonanga kuti nde wakutondeka.

Ko ndagwiranga ntchitu kwasanilikanga vinthu vamsiku vinandi. Vinyaki vasanilikanga mumanyuzipepala ndipuso mumakompyuta. Wo ndagwiranga nawu ntchitu anditumiziyanga vithuzi vamsiku pa kompyuta nge mo achitiyanga kali. Ndayesesanga kuti ndileki kuwonere vamsiku kweni yiwu achitanga vinthu vakuti nditondeki. Ndinguluta kwaku yo wandisambizanga Bayibolu kuti wakandiwovyi kweniso kundichiska. Iyu wandivwisiyanga ndichikonkhosa. Wangundiŵerenge malemba ngo ngangandiwovya kuti ndileki kuwonere vinthu vamsiku ndipu wangundichiska kuti ndipempherengi kwaku Yehova nyengu zosi.—Sumu 119:37.

Zuŵa linyaki ndingudana wo ndagwiranga nawu ntchitu kuti ndikambisani nawu. Ŵati aza ndinguŵakambiya kuti apereki moŵa ku ŵanthu ŵaŵi wo akuwuleka chifukwa chakuti awulekanga cha asani ayamba kumwa. Wosi angundihohote kuti: “Tingachita cha venivo! Ŵanthu yaŵa asuzika ukongwa kuti aleki kumwa moŵa asani ayambapu kumwa!” Ndinguŵamuka kuti: “Munenesa nadi, venivo ndivu so vitindichitikiya ini.” Kutuliya pa nyengu yeniyi, yiwu anguziŵa kuti ndasimikiza mtima kuti ndiviwoneriyengi so cha vinthu va msiku ndipu nawu anguleka kundichichiza.

Pati pajumpha nyengu, ndipuso chifukwa cha kuwovyeka ndi Yehova ndinguleke limu kuwonere vinthu vamsiku. Mu 1999, ndingubatizika nge Kaboni waku Yehova ndipu ndingukondwa ukongwa chifukwa ndingwamba so kuja umoyu wamampha kweniso walikondwa.

Sonu ndivwisa chifukwa cho Yehova watinkhiya vinthu vo ndachitanga. Pakuti iyu ndi Da wachanju, wakhumbanga kundivikiliya ku vinthu viheni vo vichitika chifukwa cha kuwonere vinthu vamsiku. Mazu nga pa lemba la Nthanthi 3:5, 6 ngaunenesa. Pa lemba ili pe mazu ngakuti: “Gomeza Yehova ndi mtima waku wosi, ndipu ungathembanga zeru zaku cha. Umukumbukengi munthowa zaku zosi, ndipu iyu wanyorosengi nthowa zaku.” Fundu za m’Bayibolu zandivikiliya kweniso zandiwovya kuti vinthu vindiyendiyengi umampha ukongwa pa umoyu.—Sumu 1:1-3.

MO NDAYANDULIYA:

Kali ndakondwanga cha ndi vo ndachitanga kweni sonu nditijiwona kuti ndewakukhumbika ukongwa ndipu nde ndi chimangu cha mumtima. Ndichita vinthu vamampha ndipu ndikondwa kuti Yehova wakundigowoke kweniso kuti watindiwovya. Mu chaka cha 2000, ndingutolana ndi Karolin, munthukazi wakutowa yo wayanjanga ukongwa Yehova nge ini. Tija mwachimangu ndi muwolu wangu. Tiwona kuti ndi mwaŵi ukulu ukongwa kuja mugulu lapacharu chosi chapasi la ŵanthu wo ŵe ndi mijalidu yamampha kweniso wo atanjana ukongwa.

Ziŵani Vinandi

PEMPHANI SAMBIRU LA BAYIBOLU

Kumbi Sambiru la Bayibolo Lichitika Wuli?

Pacharu chosi chapasi Akaboni aku Yehova aziŵika ndi nchitu yakusambiza ŵanthu Bayibolo. Wonani mo achitiya.

UTHENGA WAMAMPHA WAKUTULIYA KWAKU CHIUTA

Kumbi Marangu Ngaku Chiuta Ngatitiwovya Wuli?

Yesu wangukonkhoska chifukwa cho titenere kulunguchizgika ndipuso wangukamba fundu ziŵi za m’Bayibolu zo zingatiwovya.