Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda  |  Na. 2 2016

Kuvwiya Chenjezu Kungataska Umoyu Winu!

Kuvwiya Chenjezu Kungataska Umoyu Winu!

PA December 26, 2004, pachilumba cha Simeulue ku Indonesia panguchitika chidiririsi chikulu ukongwa. Ŵanthu wosi azizwanga ndi vo vachitikanga kunyanja. Nyanja yinguvunduka ukongwa. Ŵanthu angwamba kuthaŵiya kumapiri ndipu adanilizanga kuti, “Tsunami! Tsunami!” Pati pajumpha waka maminiti 30, mayiŵa ngakulungakulu ngangubwanganduwa nyumba zinandi.

Tsunami mwenuyu wenga wanthazi ukongwa ndipu ndiyu wenga wakwamba kuchitika munyanja iyi. Tsunami mwenuyu wangukwasa ŵanthu 78,000 pachilumba cha Simeulue, kweni ŵanthu 7 pe ndiwu angufwa pa chilumba ichi. Ntchifukwa wuli pangufwa ŵanthu amanavi? * Ŵanthu wo aja pachilumba ichi atanja kukamba kuti: ‘Asani panyanja pachitika chidiririsi chikulu, thaŵiyani kumapiri, chifukwa maji ngaja nge ngaphwa, kweni pambula kuswera, ngafuziya kumutunda.’ Chifukwa cha vo vikuŵachitikiyapu, ŵanthu a pachilumba ichi aziŵa kuti kuchitikengi tsunami asani awona kuti nyanja yasintha. Ŵanthu wo anguvwiya chenjezu angupona.

Bayibolu likamba za soka lo lichitikengi pambula kuswera yapa. Likamba kuti kuchitikengi “chisuzu chikulu chakuti chechendachitikepu kutuliya po charu chikulengeke mpaka sonu ndipu chazamuchitikapu so cha.” (Mateyu 24:21) Chisuzu ichi chazamuchitika ndi ŵanthu pamwenga masoka ngachilengedu cha. Kweniso ching’anamuwa kunangika kwa Charu chayichu cha, chifukwa Chiuta wakhumba kuti chiŵepu mpaka muyaya. (Wakutaula 1:4) M’malu mwaki, Chiuta ndiyu wazamuchitisa chisuzu ichi kuti “wazibayi wosi wo ananga charu.” Uwu wazamuja umaliru wa vinthu vosi viheni ndipuso masuzu. (Chivumbuzi 11:18; Nthanthi 2:22) Ivi vazamuja vakukondwesa ukongwa!

Tsunami, chidiririsi ndipuso kuphulika kwa mapiri vibaya ŵanthu aheni ndi amampha viyo. Kweni chisuzu chikulu chazamubaya ŵanthu aheni pe. Bayibolu likamba kuti “Chiuta ntchanju.” Kweniso, Chiuta yo zina laki ndi Yehova wakamba kuti “ŵanthu arunji azamuhala charu ndi kuja mwenimo kwamuyaya.” (1 Yohane 4:8; Sumu 37:29) Kumbi mungachita wuli kuti muzitasiki pa chisuzu chikulu ndipuso kuti muzilonde vitumbiku vo Yehova wakukamba? Fundu yikulu njakuti: Mukhumbika kuvwiya chenjezu!

JANI MASU NDI VO VICHITIKA M’CHARU

Tiziŵa cha zuŵa lo masuzu ndipuso vinthu viheni vimaliyengi. Chifukwa Yesu wangukamba kuti: “Kukamba za zuŵa ndi ola laki, palivi yo waziŵa chinanga mbangelu kuchanya ndipuso Mwana, kweni Ada pe.” Kweni Yesu wangukamba kuti “jani masu.” (Mateyu 24:36; 25:13) Ntchifukwa wuli tikhumbika kuja masu? Bayibolu likonkhosa vinthu vo vichitikengi m’charu umaliru wechendazi. Ŵanthu pachilumba cha Simeulue anguziŵa kuti kuchitikengi tsunami ŵati awona mayiŵa  ngakulungakulu munyanja. Nasi tiziŵa kuti umaliru wepafupi chifukwa tiwona vinthu vikuluvikulu vo vichitika pacharu chapasi. Bokosi lo le papeji 12 lilongo vinthu vikuluvikulu vo vichitika m’charu vo Bayibolu likukambiya limu.

Kukamba unenesa, vinyaki mwa vinthu vo vakonkhoseka mubokosi vikwamba kali kuchitika. Kweni Yesu wangukamba kuti asani muwona “vinthu venivi,” ziŵani kuti umaliru wepafupi ukongwa. (Mateyu 24:33) Jifumbeni kuti, ‘Kumbi vosi vo vikambika pa lemba ili (1) vikuchitikapu zukwanji pacharu chosi, (2) vikuchitikapu zukwanji pa nyengu yimoza, kweniso (3) ndi zukwanji po vinthu vingwamba kunangika ukongwa?’ Viwoneke limu kuti te mu nyengu yo vinthu ivi vichitikiya.

CHIUTA WALONGO KUTI WATITIYANJA UKONGWA

Munthu munyaki yo wenga pulezidenti ku U.S wangukamba kuti, “Ŵanthu apona asani achenjezeka liŵi.” Tsunami wati wachitika mu 2004, chigaŵa cho kunguchitika tsunami akuŵikapu makina ngakuziŵiya asani kuchitikengi tsunami. Yiwu awopanga kuti ŵanthu angazifwa so anandi asani kungazichitika tsunami munyaki kunthazi. Mwakuyanana waka, Chiuta watitichenjeze limu umaliru wechendazi. Bayibolu likukambiya limu kuti: “Uthenga wamampha uwu wa Ufumu wazamupharazika pacharu chosi chapasi kuti uje ukaboni ku ŵanthu a mitundu yosi ndipu pavuli paki umaliru uzengi.”—Mateyu 24:14.

Chaka chamala pe, Akaboni aku Yehova angupharaza kwa maola 1.9 biliyoni, muvyaru 240 ndipuso mu vineneru vakujumpha 700. Uwu mbukaboni ukulu wakuti umaliru wepafupi. Akaboni aku Yehova alimbikiya kugwira ntchitu yakutcheŵesa ŵanthu kuti Chiuta wepafupi kuyeruza ŵanthu. Yiwu achita ivi chifukwa atanja ŵanthu. (Mateyu 22:39) Uthenga wenuwu ungakuwovyani kuti muzitasiki, ndipu uwu mbukaboni wakuti Yehova watikuyanjani. Ziŵani  kuti “[Chiuta] wakhumba cha kuti munthu weyosi wazibayiki, kweni wakhumba kuti ŵanthu wosi alapi.” (2 Petro 3:9) Kumbi muvwiyengi chenjezu laku Chiuta?

THAŴANI KUTI MUTASKIKI

Kumbukani kuti ŵanthu wo ajanga pachilumba cha Simeulue anguthaŵiya kumapiri ŵati awona waka kuti nyanja yavunduka. Yiwu angulindiza cha kuti ayambengi kuthaŵa asani awona maji ngafuziya kumtunda. Yiwu angupona chifukwa chakuti anguthaŵa mwaliŵi. Nasi tikhumbika kuchitapu kanthu mwaliŵi kuti tiziponi pa chisuzu chikulu. Kumbi tingachita wuli? Chiuta wangukambiya Yesaya kuti walembi vo ŵanthu azamukhumbika kuchita mu “mazuŵa ngakumaliya” nganu. Mazu ngaki ngakuti: “Tiyeni tiluti kuphiri laku Yehova . . . Iyu wakutisambiza nthowa zaki ndipu isi tazamuyenda munthowa zenizo.”Yesaya 2:2, 3.

Kuthaŵiya pachanya paphiri kungakuwovyani kuti mutasiki ku soka. Mazuŵa nganu napu ŵanthu mamiliyoni nganandi asambira Bayibolu ndipu aziŵa vo Yehova wakhumba. Ivi vaŵawovya kuti asinthi mijalidu yawu yiheni. (2 Timote 3:16, 17) Yiwu ayamba “kwenda panthowa yaku [Chiuta],” ndipu watiŵavikiliya.

Kumbi muthaŵiyengi kuphiri laku Yehova kuti wakuvikiliyeni mu mazuŵa nganu ngakumaliya? Titikupemphani kuti muŵerengi malemba ngo ngalongo kuti te mu “mazuŵa ngakumaliya,” pabokosi lo le papeji 12 ndi 13. Akaboni aku Yehova a muchigaŵa chinu angakuwovyani kuti muvwisi malemba ngo nge munkhani iyi kweniso mo mungangagwirisiya ntchitu. Mungasaniya so kwamuka kwa mafumbu nginu pa webusayiti yidu ya www.jw.org/tog. Wonani pamutu wakuti ZIMENE BAIBULO LIMAPHUNZITSA > KUYANKHA MAFUNSO A M’BAIBULO.

^ ndimi 3 Tsunami yo wanguchitika mu 2004 wangubaya ŵanthu 220,000. Tsunami mwenuyu wenga wanthazi ukongwa kuluska Atsunami wosi wo achitikapu panyanja iyi.