Julani

Lutani pa vo ve mukati

2 Lingakuwovyani Kumalana ndi Masuzgu

2 Lingakuwovyani Kumalana ndi Masuzgu

Masuzgu nganyaki ngo taŵanthu tikumana nangu ngaja kwa nyengu yitali, nyengu zinyaki kwa vyaka vinandi. Kweniso pangajumpha nyengu kuti tingaziŵi. Kumbi Bayibolu le ndi ulongozgi wazeru wo ungatiwovya kuti timalani ndi masuzgu ngenanga? Tiyeni tiwoni vakuyeruzgiyapu vimanavi.

KUSUZGIKA UKONGWA MAŴANAŴANU

Rosie wangukamba kuti: “Kanandi ndafipanga mtima ndi vinthu vakuti vechendachitiki, ndipu venivi vachitisanga kuti ndisuzgikengi ukongwa maŵanaŵanu.” Kumbi ndi malemba nanga ngo ngangumuwovya? Lemba limoza lenga la Mateyu 6:34 lo likamba kuti: “Lekani kufipiya mtima vamawa, chifukwa la mawa le ndi vakufipiska mtima vaki. Zuŵa lelosi le ndi masuzgu ngaki.” Pavuli paki, Rosie wangukamba kuti mazu ngenanga ngo Yesu wangukamba ngangumuwovya kuti walekengi kufipiya mtima vamawa. Iyu wangukamba so kuti: “Zuŵa lelosi ndakumananga ndi masuzgu ndipu ndinguleka kufipiya mtima vinthu vo vechendachitiki pamwenga vo panyaki vingachitika so cha.”

Yasmine wasuzgikanga maŵanaŵanu. Iyu wangukamba kuti: “Nyengu zinyaki patonga mazuŵa ndichiliya ndipuso usiku ndatondekanga kugona. Ndawonanga kuti maŵanaŵanu ngaheni ngatindichitisa kuti ndilekengi kukondwa.” Kumbi ndi lemba nili lo lingumuwovya? Iyu wanguŵerenga lemba la 1 Peturo 5:7 lo likamba kuti: ‘Muponyiyeni Chiuta vosi vo vitikufipiskani mtima, chifukwa iyu watikuphweriyani.’ Yasmine wangukamba kuti: “Nyengu zosi ndapempheranga kwaku Yehova ndipu iyu wamukanga mapempheru ngangu. Ndajivwanga nge kuti munthu munyaki watuzgapu chinthu chizitu ukongwa cho chenga paphewa langu. Chinanga kuti maŵanaŵanu ngaheni ngatindiziya nyengu zinyaki, kweni sonu ndiziŵa mo ndingangamalisiya.”

 KUZIŴANIZA KUCHITA VINTHU VAKUKHUMBIKA UKONGWA

Munthukazi munyaki zina laki Isabella wangukamba kuti: “Ndiwona kuti ndingutole kwa ada kuti ndiziŵanizengi kuchita vinthu chifukwa ndivu nawu achita. M’malu mwakuchita vinthu vinyaki vakukhumbika, ndatoliyangaku kanthu cha ndipu ndapumuwanga ŵaka pamwenga kuwonere TV. Kweni kuchita viyo nkhwamampha cha chifukwa kuchitisa kuti munthu wasuzgikengi maŵanaŵanu kweniso vichitisa kuti ntchitu yo yileki kugwirika nge mo yakhumbikiyanga.” Fundu yo yisanirika pa lemba la 2 Timote 2:15 ndiyu yingumuwovya. Lemba ili likamba kuti: “Yesesa kuja wakuzomerezeka ndi Chiuta, wantchitu wambula chifukwa chakuchitiya soni.” Isabella wangukamba kuti: “Ndakhumbanga cha kuti Yehova wachiti soni pamwenga waguŵi ndi ntchitu yo ndagwira chifukwa chakuti ndinguziŵaniza kuyigwira.” Isabella wakusintha ukongwa.

Mwakuyanana ŵaka, Kelsey nayu wangukamba kuti: “Ndaziŵanga zuŵa lo nditenere kumaliziya ntchitu yo ndapasika kweni ndaziŵanizanga kuyigwira mpaka po kwaja mazuŵa ngamanavi ukongwa. Chifukwa cha venivi, ndaliyanga, ndatondekanga kugona kweniso ndafipanga mtima. Ndipu venivi vandichitisanga kuti ndilekengi kukondwa.” Kelsey wanguwovyeka ndi lemba la Nthanthi 13:16 lo likamba kuti: “Munthu wakuchenje wachita vinthu mwazeru, kweni muzereza walongo uzereza waki.” Kelsey wangukamba vo wangusambira wati waŵanaŵaniya ukongwa lemba ili. Iyu wanguti: “Ndi zeru kuchita vinthu pa nyengu yaki kweniso kupangiya limu pulanu. Sonu, ndija ndi ndondomeku pa thebulu langu yo yitindiwovya kuziŵa ntchitu yo ndigwirengi kunthazi. Ndondomeku yeniyi yitindiwoya kuti ndigwirengi ntchitu yeyosi pa nyengu yaki m’malu mwa kuziŵaniza mpaka po kwaja mazuŵa ngamanavi ukongwa.”

KUSOŴEKA MABWEZI

Kirsten wangukamba kuti: “Murumu wangu wangumalisa nthengwa ndipu wangundisiya ndi ŵana anamana anayi.” Kumbi ndi fundu niyi ya m’Malemba yo yingumuwovya ukongwa? Ndi lemba la Nthanthi 17:17 lo likamba kuti: “Bwezi litanja nyengu zosi, ndipu ndilu mubali yo wakuwiya kuti wakuwovyi pa nyengu ya masuzgu.” Kirsten wangupempha Akaboni aku Yehova anyaki kuti amuwovyi. Kumbi ŵanthu ŵenaŵa angumuwovya wuli? Iyu wangukamba kuti: “Mabwezi ngangu ngangundiwovya munthowa zakupambanapambana. Anyaki andisiliyanga vinthu ndi maluŵa pa khomu. Katatu kosi, ŵanthu anyaki a mumpingu widu angutiwovya kunyamuwa vinthu pa nyengu yo tasamanga. Munthu munyaki wangundiwovya kuti ndisaniyi ntchitu. Ŵanthu ŵenaŵa andiwovyanga nyengu yeyosi yo ndakhumbikiyanga chovyu.”

Delphine yo tamuzumbuwa kali, nayu so wasoŵekanga mabwezi. Iyu wakumbuka mo wavwiyanga mumtima wati wakumana ndi masuzgu. Iyu wanguti: “Ndawonanga kuti ŵanthu anyaki wosi akondwa kweni ini ndajivwanga kuti nde ndija ndipu ndakondwanga cha.” Lemba linyaki lo lingumuwovya lenga la Sumu 68:6 lo likamba kuti: “Chiuta wapaska nyumba ŵanthu wo ŵe ŵija kuti ajemu.” Delphine wanguti: “Ndinguziŵa kuti lemba ili lang’anamuwanga nyumba yakujamu pe cha. Kweni lang’anamuwanga so kuti Chiuta watitipaska mpingu waki ngeningo ndi malu ngakuvikilirika. Malu ngenanga ngatitiwovya kuti tikoliyanengi kweniso tija pa ubali wamampha ndi anyidu wo atanja Yehova. Kweni kuti ndije pa ubwezi ndi anyangu ndakhumbikanga kwamba dankha kuja pa ubwezi ndi Yehova. Lemba la Sumu 37:4 lingundiwovya ukongwa pa nkhani yeniyi. Lemba ili likamba kuti: ‘Saniya likondwa mwaku Yehova, ndipu iyu wazakukupaska vosi vo mtima waku ukhumba.’”

Pakumaliya Delphine wangukamba kuti: “Ndinguziŵa kuti ndakhumbikanga kuja pa ubwezi wakukho ndi Yehova chifukwa iyu ndi bwezi lamampha ukongwa. Pavuli paki, ndingulemba vinthu vo ndakhumbanga kuti ndichitiyengi limoza ndi ŵanthu anyaki kuti ndiyanjanengi ndi ŵanthu wo atanja ukongwa Yehova. Ndingusambira kuwona vinthu vamampha mwa ŵanthu anyaki kweniso kuleka kuŵanaŵaniya ukongwa vinthu vo yiwu anangisa.”

Kukamba uneneska, ŵanthu wo ateŵete Chiuta nawu mbambula kufikapu. Akaboni aku Yehova akumana ndi masuzgu mwakuyanana ndi weyosi. Kweni kusambira Bayibolu kutiŵachitisa kuti awovyengi anyawu wo akumana ndi masuzgu. Vingaŵa umampha asani mungasaniya mabwezi ngaviyo. Kweni kumbi fundu za m’Bayibolu zingatiwovya so kukunthiyapu masuzgu ngo tingangamalisa cha, nge kutama kwa nyengu yitali kweniso kuja ndi chitima?

Kugwirisiya ntchitu ulongozgi wa m’Bayibolu kungakuwovyani kuti musaniyi mabwezi ngamampha