Julani

Lutani pa vo ve mukati

Kumbi Mungachita Wuli Kuti Mukondwengi?

Kumbi Mungachita Wuli Kuti Mukondwengi?

ZUŴA linyaki palivi munthu yo wazamutama, kukota pamwenga kufwa ndipu namwi mukhoza kuzija ndi umoyu waviyo! Chinanga kuti ve viyo, mazuŵa nganu weyosi wakumana ndi masuzgu nganandi. Kumbi ntchinthu wuli cho chingakuwovyani kuti mukondwengi? Bayibolu le ndi ulongozgi wo ungakuwovyani kuti mukondwengi kweniso kuti mukhorwengi ndi umoyu. Ŵanaŵaniyani masuzgu nganyaki ngo ŵanthu akumana nangu kweniso mo Bayibolu lingakuwovyiyani.

MUKHORWENGI

Ulongozgi wa m’Bayibolu: “Umoyu winu uje wambula kwanja ndalama, kweni mukhorwengi ndi vo mwenavu pasonu panu.”​Aheberi 13:5.

Mazuŵa nganu, charu chichiska kuti taŵanthu tijengi ndi vinthu vinandi. Kweni Bayibolu likamba kuti ‘tikhorwengi ndi vo tenavu pasonu panu.’ Kweni kumbi tingachita wuli venivi?

Lekani “kwanja ndalama.” Ŵanthu azomereza kuchita chechosi cho angafiska chifukwa cha “kwanja ndalama,” chinanga kuti kuchita viyo kungananga liŵavu lawu, banja lawu, mijalidu yawu, ubwezi wawu ndi ŵanthu anyaki kweniso kugomezgeka kwawu. (1 Timote 6:10) Kweni nkhupusa kuchita viyo, chifukwa pakumaliya paki munthu yo watanja chuma ‘wagutiskika cha.’​—Wakutaula 5:10.

Muwonengi kuti ŵanthu mbakuzirwa kuphara katundu. Vinthu vakuliŵavu vingaja vakukhumbika nadi. Kweni vinthu venivi, vingatiyanja cha pamwenga kutilumba, m’malu mwaki ŵanthu ndiwu achita viyo. Mwaviyo, kuja ndi ‘bwezi lo lititanja’ ndiku kungatiwovya kuti tikhorwengi ndi vo tenavu pa umoyu.​—Nthanthi 17:17.

TINGAJA MWAKUKONDWA ASANI TILONDO ULONGOZGI WA M’BAYIBOLU

MUKUNTHIYENGEPU ASANI MUTAMA

Ulongozgi wa m’Bayibolu: “Mtima walikondwa ndi munkhwala wamampha.”​Nthanthi 17:22.

Nge mo “munkhwala wamampha” utovye munthu, likondwa nalu lingatiwovya kukunthiyapu masuzgu nge matenda. Kumbi tingasaniya wuli likondwa asani titama?

Muwongengi. Asani tiŵanaŵaniya waka masuzgu ngidu, “mazuŵa ngosi”ngaja ngaheni. (Nthanthi 15:15) M’malu mwaki muchitengi vo Bayibolu likamba kuti, “longoni kuti muwonga.” (Akolose 3:15) Muwongengi vinthu vamampha vo mwakumana navu pa umoyu winu chinanga kuti vingaŵa vimanavimana. Ndipu tikondwa asani tiwona kutowa kwa lumwi asani lisere, kamphepu kakuzizira umampha kweniso asani wakwanjiwa widu wamwemwete.

Muwovyengi ŵanthu anyaki. Chinanga kuti panyaki titama, kweni “kupaska kuchitiska kuti munthu wakondwengi ukongwa kuluska kulonde.” (Machitidu 20:35) Tikondwa asani ŵanthu anyaki atitiwonga chifukwa cha vamampha vo tachita. Ndipu venivi vititiwovya kuluwaku masuzgu ngidu. Tingaja mwakukondwa asani titesesa kuwovya ŵanthu anyaki kuti akondwengi.

 VO MUNGACHITA KUTI NTHENGWA YINU YIJE YAKUKHO

Ulongozgi wa m’Bayibolu: “Musimikizi kuti vinthu vakukhumbika ukongwa ndi nivi.”​Afilipi 1:10.

Ŵanthu akutorana wo acheza kwa nyengu yimanavi angatimbanyizga nthengwa yawu. Mwaviyo, ŵanthu akutorana akhumbika kuwona kuti nthengwa yawu njakukhumbika ukongwa pa umoyu wawu.

Muchitiyengi vinthu limoza. M’malu mwakuchita vinthu pakumwija, mukhumbika kunozga ndondomeku yakuti muchitiyengi vinthu limoza. Bayibolu likamba kuti: “Ŵaŵi aluska yumoza.” (Wakutaula 4:9) Mwaviyo, muchitiyengi limoza vinthu nge kugwira ntchitu za pakhomu, kuchita masaza kweniso kucheza.

Mulongongi kuti mutimuyanja yo mukutorana nayu. Bayibolu lichiska ŵanthu akutorana kuti ayanjanengi kweniso kutumbikana. (Aefeso 5:28, 33) Kuti nthengwa yinu yije yakukho muchitengi tinthu timanatimana nge kumwemwete, kuvumbatiyana kweniso kupasana mphasu. Kweniso, mbanthu akutorana pe wo akhumbika kulongorana chanju mwakugonana.​—Aheberi 13:4.