Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda  |  Na. 2 2017

 NKHANI YAPAPEJI LAKWAMBA | KUMBI MUWONGA MPHASU YAKUZIRWA YAKUTUWA KWAKU CHIUTA?

Mphasu Yakuphara Mphasu Zosi

Mphasu Yakuphara Mphasu Zosi

JORDAN wakoleze mutchini wakusongore pensulu wo uwoneka nge sitima. Ŵanthu angawona nge kuti mutchini wenuwu ngwambula ntchitu, kweni iyu watiwuwona kuti ngwakuzirwa ukongwa. Iyu wangukamba kuti: “Russell, yo wenga mubwezi wa banja lidu ndiyu wakundipasa mutchini uwu ndeche mwana.” Russell wanguŵachitiya vinthu vakukhumbika ukongwa apapi aku Jordan kweniso ambuyaki. Iyu wanguŵawovya ukongwa pa nyengu yo akumananga ndi masuzgu. Jordan wanguziŵa venivi Russell wati wafwa. Iyu wangukamba kuti: “Pakuti sonu ndaziŵa vinandi vakukwaskana ndi Russell, mphasu yimana yeniyi njakuzirwa ukongwa kwaku ini.”

Nge po tawone mu nkhani yaku Jordan, anyaki angawona nge kuti mphasu yo munthu wapasika njambula kuzirwa. Kweni yo walonde, watiyiwona kuti njakuzirwa ukongwa. Bayibolu likonkhosa mphasu yinyaki yo njakuzirwa ukongwa. Ilu likamba kuti: “Chiuta wanguchiyanja ukongwa charu mwakuti wangupereka Mwana waki wapade, kuti weyosi yo wavwana mwaku iyu wangafwanga cha kweni waje ndi umoyu wamuyaya.”—Yohane 3:16.

Mphasu yeniyi yingapasa munthu umoyu wamuyaya! Kumbi yingaŵapu mphasu yinyaki yakuzirwa ukongwa kuphara yeniyi? Chinanga kuti ŵanthu anyaki angawona kuti mphasu yeniyi njambula kukhumbika, kweni Akhristu atiyiwona kuti “njakuzirwa.” (Sumu 49:8; 1 Petro 1:18, 19) Ntchifukwa wuli Chiuta wangupereka umoyu wa Mwana waki nge mphasu ku ŵanthu wosi?

Wakutumika Paulo wamuka fumbu lenili mumazu yanga: “Kuziya mwa munthu yumoza ubudi ukuseremucharu ndipu nyifwa yikuza chifukwa cha ubudi, mwaviyo nyifwa yikusapaliya ku ŵanthu wosi.” (Ŵaroma 5:12) Munthu wakwamba Adamu, wangubuda chifukwa wanguleke dala kuvwiya Chiuta ndipu pavuli paki wangufwa. Kuziya mwaku Adamu, nyifwa yikusapaliya ku ŵanthu wosi.

 “Malipiru nga ubudi ndi nyifwa, kweni mphasu yo Chiuta wapereka ndi umoyu wamuyaya kuporote mwaku Khristu Yesu Ambuyafwi.” (Ŵaroma 6:23) Chiuta wangutuma mwana waki Yesu Khristu kuzipereka umoyu waki wambula ubudi kuti waziwombo ŵanthu wosi ku nyifwa. Ŵanthu wosi wo avwana mwaku Yesu azamulonde umoyu wamuyaya chifukwa cha ‘sembi yakuwombo’ yeniyi.—Ŵaroma 3:24.

Pakukamba za vitumbiku vosi vo Chiuta wazamupasa ŵanthu kuziya mwaku Yesu Khristu, Paulo wangukamba kuti: “Tiwonga Chiuta chifukwa cha mphasu yaki yambula makambika.” (2 Ŵakorinte 9:15) Sembi yaku Yesu njakuzirwa ukongwa mwakuti titondeka kuyikonkhosa. Pe mphasu zinandi zamampha zo Chiuta wapasa ŵanthu. Sonu ntchifukwa wuli sembi yaku Yesu ndiyu yakuzirwa ukongwa? Kumbi mphasu yeniyi, yipambana wuli ndi mphasu zinyaki zosi zo Chiuta wapereka? * Nanga tingalongo wuli kuti tiwonga? Titikupemphani kuti muŵerengi nkhani ziŵi zakulondopu kuti muwoni vo Bayibolu limuka.

^ ndimi 8 Ndi mtima waki wosi, Yesu “wangupereka umoyu waki chifukwa chaku isi.” (1 Yohane 3:16) Chinanga kuti ve viyo, nkhani izi zikonkhosa udindu waku Chiuta yo wakutipaska sembi yeniyi kuti wafiski khumbu laki.