Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  March 2016

Ezekiele wanguzomera kuyeruziya nge kuti wayukiya Yerusalemu

Yezani Achimi

Yezani Achimi

KUMBI pe vinthu vinyaki vo muyanana ndi achimi a mu nyengu yakali? Kamutu kakuti “Mazu nga M’Bayibolu ngo Ngakonkhoskeka” ko ke mu Baibulo la Dziko Latsopano la Chingelezi la 2013, kakamba kuti mchimi “ndi munthu yo waziŵisa ŵanthu vo Chiuta wakhumba kuchita. Achimi alongoronga m’malu mwaku Chiuta. Yiwu akambanga vinthu vo vichitikengi, visambizu vaku Yehova, marangu ndi vyeruzu vaki.” Chinanga kuti mulosa vo vichitikengi kunthazi cha, kweni mulongoro m’malu mwaku Chiuta, ndipu mupharazga mazu ngaki.Mat. 24:14.

Ndi mwaŵi wapade ukongwa kukambiyaku anyidu vaku Chiuta ndi kuŵasambiza vo iyu wakhumba kuzichitiya ŵanthu. Tigwira ntchitu iyi pamoza ndi ‘angelu wo awuluka mude.’ (Chiv. 14:6) Kweni tingakumana ndi masuzu ngo ngangachitisa kuti tileki kuwona kuti kupharazga ndi mwaŵi wapade. Kumbi masuzu nganyaki ndi nanga? Tingavuka, kususika pamwenga kuwona kuti ndisi ambula kukhumbika. Achimi akali nawu akumananga ndi masuzu ngenanga, kweni angugongowa cha. Ndipu Yehova wanguŵawovya kuti afiski uteŵeti wawu. Tiyeni tikambisanepu za achimi anyaki ndi kuwona mo tingaŵayeze.

ANGUJIPEREKA NDI MTIMA WOSI

Nyengu zinyaki tingavuka ndi ntchitu zo tichita zuŵa lelosi ndipu tingachita mphwayi kusere mu uteŵeti. Mbunenesa kuti tikhumbika kupumuwa, ndipu Yesu ndi akutumika nawu apumuwanga. (Marko 6:31) Kweni ŵanaŵaniyani zaku Ezekiele ndi ntchitu yo wangutumika kwa Ayisraele wo ŵenga ku ukapolu ku Babiloni. Nyengu yinyaki, Chiuta wangukambiya Ezekiele kuti wato ntcherwa ndi kujambulapu msumba wa Yerusalemu. Wangumukambiya so kuti wayeruziyi kuti watiwuyukiya mwakugone kumazge kwa mazuŵa 390. Pavuli paki, wagone kumaryi kwa mazuŵa 40. Yehova wangukambiya Ezekiele kuti: “Ndikumangengi ndi  vingwi kuti uleki kung’anamukiya kunyaki mpaka po wamaliziya mazuŵa ngaku ngakuyukiya msumba wo.” (Ezek. 4:1-8) Ayisraele wo ŵenga ku ukapolu atenere kuti angukwasika ukongwa ndi venivi. Kuchita ivi kwenga kwakuvukisa ukongwa. Kweni Ezekiele wakhumbikanga kuvichita kwa chaka chimoza ndi myezi. Kumbi mchimi uyu wangufiska wuli uteŵeti uwu?

Ezekiele wanguvwisa chifukwa cho Chiuta wangumutumiya kuti waje mchimi. Pakumutuma, Chiuta wangumukambiya kuti: “Kwali [Ayisraele] amuvwiya pamwenga cha . . . , azamuziŵa mbwenu kuti mchimi wenga pakati pawu.” (Ezek. 2:5) Ezekiele wangukumbuka chilatu cha uteŵeti waki. Mwaviyo, wanguchita ndi mtima wosi vo Chiuta wangumutuma. Iyu wangulongo kuti wenga mchimi waunenesa. Ayisraele angulonde uthenga wakuti: “Msumba wabwangandulika!” Ŵati alonde uthenga uwu, Ayisraele angukumbuka kuti mchimi wenga pakati pawu.Ezek. 33:21, 33.

Mazuŵa nganu, titcheŵesa ŵanthu kuti charu chaku Satana chibwangandulikengi pambula kuswera. Chinanga kuti tivuka, kweni tiyesesa kupharazga Mazu Ngaku Chiuta, kupanga maulendu ngakuweliyaku kweniso kuchitisa masambiru nga Bayibolu. Po mauchimi ngakukwasana ndi kumala kwa charu ngafiskika, tikondwa chifukwa chakuziŵisa “ŵanthu vo Chiuta wakhumba kuchita.”

ANGUKUNTHIYAPU

Mzimu waku Yehova utitiwovya kupharazga ndi mtima wosi. Kweni nyengu zinyaki tingadandawula chifukwa cha vo ŵanthu achita ndi uthenga widu. Tingachita umampha kukumbuka vo mchimi Yeremiya wanguchita. Iyu wasusikanga ndi kunyozeka chifukwa chakupharazgiya Ayisraele uthenga waku Chiuta. Ndipu nyengu yinyaki, wangukamba kuti: “Ndizumbuwengi so cha vaku iyu, ndipu ndikambengi cha mu zina laki.” Yeremiya wenga munthu nge isi. Kweni wangulutiriza kupharazga uthenga waku Chiuta. Chifukwa? Iyu wangukamba so kuti: “Kweni mu mtima mwangu muchita nge mwe motu wakukole wo wajarikiya mu viwanga vangu, ndipu ndinguvuka kuwusunga mukati, viyo ndingutondeka kujiko.”Yer. 20:7-9.

Mwakuyanana waka, asani tagongowa chifukwa chakuti ŵanthu avwisiya cha uthenga widu, titenere kuŵanaŵaniya uthenga wo tipharazga. Ivi vingawovya kuti timalani ndi maŵanaŵanu ngaheni ngenanga. Uthenga wo tipharazga ungaja nge ndi ‘motu wakukole wo wajarikiya mu viwanga vidu.’ Kuŵerenga Bayibolu zuŵa lelosi kungawovya kuti motu uwu ulutiriyi kukole mwaku isi.

ANGUMALANA NDI MAŴANAŴANU NGAHENI

Akhristu anyaki afipa mtima asani apasika uteŵeti chifukwa aziŵa cha mo angawuchitiya. Viwoneka kuti ndimu mchimi Hoseya wanguchitiya. Yehova wangumukambiya kuti: “Luta ukato munthukazi muhuli ndipu uŵi ndi ŵana auhuli.” (Hos. 1:2) Tiyeruziyi kuti mukhumba kuto, mbwenu Chiuta watikukambiyani kuti muto huli. Kumbi mungavwa wuli mumtima? Hoseya wanguzomera uteŵeti uwu. Iyu wanguto Gomere ndipu wangubaliyapu mwana munthurumi. Pavuli paki, munthukazi uyu wangubala so mwana munthukazi ndi munthurumi. Viwoneka kuti ŵana ŵaŵi yaŵa wangubaliya mu chigololu. Yehova wangukambiya Hoseya kuti munthukazi yo wazamuto wazamutchimbiriya anthurumi wo wahulanga nawu. Wonani kuti yapa akamba kuti ‘anthurumi’ kulongo kuti ŵenga anandi. Ndipu pavuli paki wazamukhumba kuwere kwaku Hoseya. Asani mwenga imwi, kumbi mwatingi mumuweriyengi munthukazi uyu? Ivi ndivu Yehova wangukambiya Hoseya kuti wachiti. Mchimi uyu wanguchita kumugula ndi ndalama zinandi Gomere kuti wamuwere.Hos. 2:7; 3:1-5.

Hoseya watenere kuti wakayikiyanga asani uteŵeti waki wenga ndi phindu lelosi. Kweni vo wanguchita vititiwovya kuvwisa mo Yehova wanguvwiya Ayisraele ŵati amukana. Ndipu Ayisraele a mtima wamampha anguwere kwaku Chiuta.

Mazuŵa nganu, Chiuta wakambiya munthu cha kuti ‘wato munthukazi muhuli.’ Kweni tingasambirapu kanthu kwaku Hoseya chifukwa chakuti wanguzomera ndi mtima wosi uteŵeti wo wangupasika. Chakwamba ntchakuti tikhumbisisengi  kupharazga uthenga wamampha wa Ufumu ‘kunyumba ndi nyumba’ chinanga kuti tingawona kuti nkhwakusuza. (Mac. 20:20) Akhumba nthowa zinyaki zakupharazgiya zitikusuzani. Ŵanthu anandi wo asambiranga Bayibolu ndi Akaboni aku Yehova akambanga kuti akondwanga kusambira Bayibolu, kweni alutanga cha kuchipharazga kunyumba ndi nyumba. Kweni pavuli paki anandi aku yiwu angwamba kuchita vinthu vo pakwamba awonanga kuti angachita cha. Kumbi mwayiwona fundu yo tisambirapu?

Tingasambira so fundu yinyaki kwaku Hoseya. Iyu wanguzomera uteŵeti wakusuza. Wenga ndi vifukwa vinandi vakugwenthe uteŵeti wo wangupasika. Palivi munthu yo watingi waziŵengi kuti Chiuta wamupasa uteŵeti. Kweni tiziŵa chifukwa chakuti wakuyilemba nkhani iyi. Nasi tingaŵa ndi mwaŵi wakukambiya ŵanthu vaku Yehova kwambula munthu weyosi kuziŵa kuti tenga ndi mwaŵi wenuwu. Ndivu vinguchitikiya Anna yo wasambira pa sekondale yinyaki ku United States. Musambizi waki wangukambiya kilasi losi kuti weyosi walembi nkhani yo watanja ndipu wazikonkhose kilasi. Anna watingi wagwenthengi mwaŵi wenuwu. Kweni wanguwona kuti uwu ndi mwaŵi wo Chiuta wamupasa. Chifukwa chakuziŵa vo vingachitika, wangupemphera kwaku Yehova. Pavuli paki, wangugwirisiya ntchitu mpata wenuwu. Wangulemba nkhani yo yakonkhosanga kuti vamoyu vikuchita kusambuka cha.

Achinyamata ayeza achimi. Amiya Yehova Mulengi widu kwambula mantha

Anna wangukonkhose kilasi vo wangulemba. Kweni msungwana munyaki yo wagomezanga kuti vamoyu vikuchita kusambuka, wangwamba kumufumba mafumbu nganandi. Anna wangumuka mafumbu ngosi. Musambizi waki wangukondwa ndipu wangumupasa mphotu chifukwa cha kukonkhosa fundu zakuvwika. Anna wangulutiriza kukambisana nkhani iyi ndi msungwana yo wamususanga. Chifukwa chakuzomera “uteŵeti” wo Yehova wangumupasa, Anna wangukamba kuti: “Sonu ndipharazga uthenga wamampha kwambula mantha.”

Chinanga kuti te achimi chayiwu cha, kweni asani tingayeza achimi nge Ezekiele, Yeremiya ndi Hoseya, nasi tingachita khumbu laku Yehova mazuŵa nganu. Pakusopa kwa pabanja pamwenga asani musambira pakumwija, muŵerengengi nkhani za achimi anyaki akali ndi kuŵanaŵaniya mo mungaŵayeze.