Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  March 2016

Mwaŵana—Kumbi Munganozeke Wuli Ubatizu?

Mwaŵana—Kumbi Munganozeke Wuli Ubatizu?

“Ndikondwa kuchita khumbu linu, Chiuta wangu, dangu linu le mukati mumtima wangu.”—SUMU 40:8.

SUMU: 51, 48

1, 2. (a) Ntchifukwa wuli ubatizu ndi nkhani yikulu? (b) Kumbi munthu watenere kuchitanji wechendabatiziki, ndipu ntchifukwa wuli?

KUMBI ndimwi wachinyamata ndipu mukhumba kubatizika? Asani ndi viyo, ndikwesa mwasankha chinthu chamampha ukongwa kuluska chinthu chinyaki chechosi. Kweni nge mo nkhani yajumpha yingukambiya, ubatizu ndi nkhani yikulu. Ubatizu ulongo kuti munthu wakujipatuliya kwaku Yehova kuti wamuteŵetiyengi kwa umoyu waki wosi. Kweniso wachitengi khumbu laku Chiuta m’malu mwa vakukhumba vaki. Mutenere kubatizika pijapija asani mufiska vo vikhumbika, mwakhumba mwija kweniso asani muziŵa vo kujipatuliya kung’anamuwa.

2 Wuli asani muwona kuti mwe akunozeka cha kubatizika? Pamwenga wuli asani imwi mukhumba kubatizika kweni apapi ŵinu akhumba kuti mukuweku dankha? Mwe mosi mo vingaŵiya, mungagongowanga cha. M’malu mwaki, lutirizani kusambira kuti paleki kujumpha nyengu yitali mwechendabatiziki. Pa nyengu iyi,  mutenere (1) kukhorwa ndi vo mugomeza, (2) kulongo mu vakuchita vinu kuti mukhumba kubatizika, ndipuso (3) kuwonga.

KUKHORWA NDI VO MUGOMEZA

3, 4. Kumbi ŵana angasambiranji kwaku Timote?

3 Kumbi mungamuka wuli mafumbu yanga: Ntchifukwa wuli ndigomeza kuti Chiuta waliku nadi? Ntchifukwa wuli ndigomeza kuti Bayibolu ndi Mazu Ngaku Chiuta? Ntchifukwa wuli ndiwona kuti kuvwiya fundu zaku Chiuta nkhwamampha kuluska kulondo fundu za charu? Chilatu cha mafumbu yanga nkhukhumba kuti muyambi kukayikiya cha. Kweni ngangakuwovyani kuti mulondo mazu nga wakutumika Paulo ngakuti: ‘Muziŵi khumbu laku Chiuta, lamampha ndi lakuzomerezeka ndi laurunji.’ (Ŵar. 12:2) Kweni ntchifukwa wuli Akhristu a ku Roma akhumbikanga kuziŵa vinthu vo agomezanga kali?

4 Mwakuyeruziyapu, Timote wangaziŵanga umampha Malemba. Anyina ndi ambuyaki angumusambiza kutuwa pa unamana waki. Chinanga kuti venga viyo, Paulo wangumuchiska kuti: “Ulutirizi mu vinthu vo ukusambira ndi kuvigomeza pavuli pakukhorwa navu.” (2 Tim. 3:14, 15) Buku linyaki likamba kuti mazu ngakuti ‘kukhorwa’ ngang’anamuwa “kusimikiza kuti chinthu chinyaki ntchaunenesa.” Mwaviyo, Timote wangukhorwa kuti wasaniya unenesa. Iyu wanguchita kuchichizgika ndi anyina pamwenga ambuyaki cha kuti wazomeri unenesa. Kweni wanguzomera chifukwa wanguŵanaŵanipu vo wangusambira ndipu wangukhorwa navu.Ŵerengani Ŵaroma 12:1.

5, 6. Ntchifukwa wuli mukhumbika kugwirisiya ntchitu lusu lakuŵanaŵana mweche ŵana?

5 Nanga imwi? Akhumba pajumpha nyengu yitali kutuliya po mukusambiriya unenesa. Asani ndi viyo, mungachita umampha kujifufuza kuti muziŵi vifukwa vo mugomeze vo mukusambira. Ivi vikuwovyeningi kuti muje ndi chivwanu chakukho. Kweniso kuti muleki kupingika bweka ndi anyinu, charu chaku Satana, pamwenga vakukhumba vinu.

6 Asani mwasambira kugwirisiya ntchitu “lusu lakuŵanaŵana” mweche ŵana, vikuwovyeningi kuti muŵamukengi umampha anyinu asani atikufumbani mafumbu nge yanga: ‘Kumbi muziŵa wuli kuti Chiuta waliku nadi? Ntchifukwa wuli Chiuta wachanju wazomereza vinthu viheni? Kumbi vingachitika wuli kuti Chiuta waje wambula chiyambi ndi umaliru?’ Asani mwe akunozeka, mafumbu ngaviyo ngadewezengi chivwanu chinu cha. Kweni ngakuwovyeningi kuti musambirengi Mazu Ngaku Chiuta mwaphamphu.

7-9. Kumbi nkhani za pa jw.org zo ze pa mutu wakuti “Kodi Baibulo Limaphunzitsa Chiyani?” zingakuwovyani wuli kuti musimikizi kuti vo mugomeza vaunenesa?

7 Kusambira Mazu Ngaku Chiuta pakumwija kungakuwovyani kumuka mafumbu kweniso kuti muleki kukayikiya vo mugomeza. (Mac. 17:11) Gulu lititipasa vinthu vinandi kuti vitiwovyi kusambira Bayibolu. Anandi atanja kuŵerenga mabuku ngidu ngo ngakonkhosa vakukwasana ndi Mulengi ndipuso vo wakulenga. Kweniso ŵana anandi ayanduwa asani aŵerenga vo ve pa mutu wakuti “Kodi Baibulo Limaphunzitsa Chiyani?” pa jw.org/ny. Wonani pa mutu wakuti ZIMENE BAIBULO LIMAPHUNZITSA. Nkhani zo ze pa mutu wakuti “Kodi Baibulo Limaphunzitsa Chiyani?” zingakuwovyani kuti chivwanu chinu chikho pa nkhani yinyaki ya m’Bayibolu.

8 Imwi mutiliziŵa kali Bayibolu. Mwaviyo, mungamuka mwaliŵi mafumbu ngo nge mu nkhani izi. Kweni ntchifukwa wuli musimikiza kuti vo mumuka vaunenesa? Nkhani zo ze pa mutu wakuti Kodi Baibulo Limaphunzitsa  Chiyani? zitovya kuti muŵanaŵaniyepu malemba ngakupambanapambana kweniso kulemba vo mwavwapu. Kweniso zingakuwovyani kunozeke mo mungakonkhose vo mugomeza kwa anyinu. Nkhani izi zitovya ŵana anandi kuti asimikizi kuti vo agomeza vaunenesa. Asani mwe ndi mwaŵi wakuluta pa jw.org, mungachita umampha kugwirisiya ntchitu nkhani zenizi asani musambira Bayibolu pakumwija.

9 Mutenere kusimikiza kuti vo mugomeza vaunenesa. Ivi vikuwovyeningi kuti munozeke ubatizu. Msungwana munyaki wangukamba kuti: “Ndechendabatiziki ndasambiranga Bayibolu ndipu ndinguwona kuti Akaboni aku Yehova asambiza unenesa. Chivwanu changu chikuwa zuŵa lelosi.”

VAKUCHITA VINU

10. Ntchifukwa wuli Mkhristu wakubatizika wakhumbika kuchita vinthu vakukoliyana ndi chivwanu chaki?

10 Bayibolu likamba kuti: “Chivwanu pakuchija, kwambula ntchitu, ntchakufwa.” (Yak. 2:17) Asani mwe ndi chivwanu chakukho, chiwoneke mu vakuchita vinu. Vakuchita nivi? Bayibolu likamba za ‘nkharu yakupaturika ndipuso ntchitu zo zilongo kuti mukujipereka kwaku Chiuta.’Ŵerengani 2 Petro 3:11.

11. Kumbi mazu ngakuti “nkharu yakupaturika” ngang’anamuwanji?

11 Kumbi mazu ngakuti “nkharu yakupaturika” ngang’anamuwanji? Ngang’anamuwa kuja ndi mijalidu yamampha. Kumbi imwi muchita wuli pa nkhani iyi? Mwakuyeruziyapu, ŵanaŵaniyani vo mwachita myezi 6 yo yajumpha. Kumbi vo mwachita mu myezi iyi vilongo kuti muziŵa kupambanisa pakati pa chiheni ndi chamampha? (Ŵah. 5:14) Kumbi mukumbuka nyengu yo mungukana chiyesu pamwenga vo anyinu akuchichizaningi? Kumbi mwe ndi mbiri yamampha kusukulu? Kumbi mugomezeka kwaku Yehova pamwenga muchita vo anyinu achita kuti aleki kukusekani? (1 Pet. 4:3, 4) Mbunenesa kuti tosi te akubuda. Chinanga mbanthu wo ateŵete Yehova kwa nyengu yitali, achita mantha kukamba vo agomeza pa gulu. Kweni munthu yo wakujipereka kwaku Yehova wamalika kuziŵika ndi zina laki ndipu walongo ivi mu vakuchita vaki.

12. Kumbi ‘ntchitu zo zilongo kuti mukujipereka kwaku Chiuta’ ndi nizi, ndipu mutenere kuziwona wuli?

12 Nanga ‘ntchitu zo zilongo kuti mukujipereka kwaku Chiuta’ ndi nizi? Ndi vinthu vo muchita pa mpingu nge kuwungana ndi kupharazga. Vinyaki vingaŵa vo ŵanthu aleka kuviwona nge kupemphera ndi kusambira Bayibolu pakumwija. Munthu yo wakujipereka kwaku Yehova wawona kuti kuchita vinthu ivi nkhwakufyo cha. Kweni watuvwa nge mo Fumu Davidi yinguvwiya yo yingukamba kuti: “Ndikondwa kuchita khumbu linu, Chiuta wangu, dangu linu le mukati mumtima wangu.”Sumu 40:8.

13, 14. (a) Kumbi ndi vinthu wuli vo vingakuwovyani kuti muchitengi ‘ntchitu zo zilongo kuti mukujipereka kwaku Chiuta’? (b) Kumbi achinyamata anyaki ayanduwa wuli ndi vinthu venivi?

13 Buku la Mayankho a Zimene Achinyamata Amafunsa, Buku Lachiwiri, papeji 308 ndi 309 pe mafumbu ngo ngangakuwovyani kuti muje ndi vilatu. Pasi pa mafumbu ngenanga pe malu ngo mungalembapu kumuka kwa mafumbu nge ngakuti “Asani mupemphera, kumbi muzumbuwa vinthu vo mukhumba? Nanga mapempheru nginu ngalongo kuti mutanja Yehova?” “Kumbi muchitanji asani musambira pakumwija?” “Kumbi musere mu uteŵeti asani apapi ŵinu aja?” Kweniso pe malu ngo mungalembapu vo mukhumba kuchita pa nkhani ya pempheru, sambiru lakumwija ndi uteŵeti.

14 Achinyamata anandi wo akhumba kubatizika  awona kuti mafumbu ngo nge papeji 308 ndi 309 mubuku la Achinyamata Amafunsa, Buku Lachiwiri ngakovya ukongwa. Msungwana munyaki zina laki Tilda wangukamba kuti: “Ndagwirisiyanga ntchitu mafumbu yanga asani ndikhumba kusankha vakuchita. Kamana ndi kamana ndafiskanga vo ndakhumbanga. Ndipu pati pajumpha pafupifupi chaka, ndingubatizika.” M’bali munyaki wachinyamata zina laki Patrick nayu wanguyanduwa ndi mafumbu ngenanga. Iyu wangukamba kuti: “Ndaziŵanga kali vo ndakhumbanga, kweni kuvilemba kungundiwovya kuti ndiyesesi kuvifiska.”

Kumbi mulutirizengi kuteŵete Yehova asani apapi ŵinu angaleka kumuteŵete? (Wonani ndimi 15)

15. Ntchifukwa wuli munthu watenere kusankha yija kuti wabatiziki?

15 Papeji 309 pe fumbu lakukhumbika ukongwa lakuti: “Kumbi mulutirizengi kuteŵete Yehova asani apapi ndi mabwezi nginu angaleka kumuteŵete?” Kumbukani kuti asani munthu wajipatuliya ndi kubatizika, wazamumuka yija kwaku Yehova. Muteŵete Yehova chifukwa cha ŵanthu cha, chinanga angaŵa apapi ŵinu. Nkharu yinu yakupaturika ndipuso vinthu vo muchita kulongo kuti mukujipereka kwaku Chiuta, mbukaboni wakuti mukukhorwa kuti mukusaniya unenesa kweniso kuti mukhumba kubatizika.

KUWONGA

16, 17. (a) Ntchifukwa wuli munthu watenere kubatizika? (b) Kambani chakuyeruziyapu cho chingatiwovya kuti tiwongengi sembi yaku Yesu.

16 Munthu munyaki yo wangaziŵanga umampha Marangu ngaku Mosese wangufumba Yesu kuti: “Kumbi dangu likulu ukongwa pa marangu ngosi ndi nili?” Yesu wangumuka kuti: “Uyanjengi Yehova Chiuta waku ndi mtima waku wosi, ndi umoyu waku wosi, ndi maŵanaŵanu ngaku ngosi.” (Mat. 22:35-37) Yesu wangukamba kuti munthu watenere kubatizika chifukwa cha kwanja ukongwa Yehova. Nthowa yimoza yo yingawovya kuti chanju chinu paku Yehova chisazikiyeku nkhuŵanaŵaniya mphasu yikulu yo wakutipasa. Mphasu iyi ndi sembi ya Mwana waki. (Ŵerengani 2 Ŵakorinte 5:14, 15; 1 Yohane 4:9, 19.) Asani muchitengi viyo, vikuwovyeningi kuti muwongengi sembi iyi.

17 Tiyeruziyi kuti mwabira mumaji, mbwenu munthu munyaki wakutaskani. Kumbi mungaluta waka kunyumba kwambula kumuwonga? Kumbi mungaluwa vo wakuchitiyani? Awa! Mumuwongengi nyengu zosi. Mwakuyanana waka, titenere kumuwonga ukongwa Yehova Chiuta ndi Yesu Khristu. Asani kwengavi sembi, mphanyi tikutaskika cha ku ubudi ndi  nyifwa. Kweni chifukwa cha sembi iyi, sonu tilindiza umoyu wamuyaya mu paradayisu.

18, 19. (a) Ntchifukwa wuli mutenere cha kopa kujipatuliya kwaku Yehova? (b) Kumbi kuteŵete Yehova kungakuwovyani wuli kuti vinthu vikuyendiyeningi umampha?

18 Kumbi muwonga vo Yehova wakukuchitiyani? Asani ndi viyo, mbwe mutenere kujipatuliya kwaku Yehova ndi kubatizika. Kumbukani kuti kujipatuliya kung’anamuwa kulayiza Yehova kuti mumuteŵetiyengi kwa umoyu winu wosi, mwemosi mo vingaŵiya. Kumbi mutenere kopa kujipatuliya? Awa. Kuluwa cha kuti Yehova watikukhumbiyani vamampha, ndipu “wapereka mphotu kwaku wo atimupenja ndi mtima wosi.” (Ŵah. 11:6) Kujipatuliya kwaku Yehova ndi kubatizika kuchitisa kuti vinthu vileki kukuyendiyani cha. Kweni kutovya kuti vinthu vikuyendiyeningi umampha. M’bali munyaki wa vyaka 24 wangubatizika wechendakwanisi vyaka 13. Iyu wangukamba kuti: “Asani ndingubatizika nde mura, ndatingi ndiziŵengi vinthu vinandi vauzimu, kweni kubatizika liŵi kungundivikiriya ku vinthu va charu.”

19 Yehova watikukhumbiyani vamampha. Kweni Satana watikukhumbiyani vamampha cha. Palivi chamampha cho wangakupasani asani mungaja kuchigaŵa chaki. Ndipu kamampha wangatuwanaku pani iyu, pakuti nayu palivi chamampha cho walindiza? Kumbi wangakupasani wuli chinthu cho iyu walivi? Satana wakubayiseningi waka chifukwa nayu walindiza nyifwa!Chiv. 20:10.

20. Kumbi wachinyamata wangachita wuli kuti wajipatuliyi ndi kubatizika? (Wonani so bokosi lakuti “ Nkhani zo Zingakuwovyani Kuti Mukuwi Mwauzimu.”)

20 Kujipatuliya kwaku Yehova ndichu chinthu chakukhumbika ukongwa cho mungachita. Kumbi mwe akunozeka kujipatuliya? Asani ndi viyo, mungaweliyanga vuli cha. Kweni asani muwona kuti mwechendanozeki, gwirisiyani ntchitu fundu zo ze mu nkhani iyi kuti mulutirizi kuluta panthazi. Paulo wangulembe Akhristu a ku Filipi kuti: “Mo talutiya panthazi, tiyeni tilutirizi kwenda mwakwenere munthowa yeniyi.” (Ŵaf. 3:16) Asani mungalondo ulongozi uwu, mbwenu pambula kuswera mujipatuliyengi kwaku Yehova ndi kubatizika.