Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  September 2016

Kuyanduwa ndi Ulongozgi Waku Yehova Mazuŵa Nganu

Kuyanduwa ndi Ulongozgi Waku Yehova Mazuŵa Nganu

MSUNGWANA WA KU POLAND WANGUSANKHA VINTHU MWAZERU

“NDATI ndafika vyaka 15, ndingubatizika ndipu pati pajumpha myezi 6, ndingwamba upayiniya wakovya. Pati pajumpha chaka ndingwamba upayiniya wa nyengu zosi. Ndati ndamaliza sukulu ya sekondale ndingupempha kuti nkhateŵetiyengi ko kwakhumbikanga apharazgi anandi a Ufumu. Ndakhumbanga kutuwamu mutawuni yo ndajanga kweniso kuti ndilekani ndi ambuya anthukazi wo ndajanga nawu, wo ŵenga Akaboni cha. Ndinguguŵa ukongwa wakuwonere dera wati wandikambiya kuti ndipharazgengi mutawuni yeniyi, yo ndikuwiya. Ndinguyesesa kuti ndingalongonga cha mo ndavwiyanga. Ndingutuwapu mwakuguŵa kuti nkhaŵanaŵaniyi vo iyu wangundikambiya. Ndingukambiya yo ndapharazganga nayu kuti: ‘Ndiwona kuti ndayamba kuchita vinthu nge Yona. Kweni pavuli paki Yona wanguluta ku Nineve. Naniso nditeŵetiyengi muchigaŵa cho ndapasika.’”

“Ndachita upayiniya mutawuni yidu kwa vyaka 4 ndipu ndawona kuti ndinguchita umampha kuvwiya ulongozgi wo ndingupasika. Suzgu yangu yikulu yenga yakuti ndawonanga vinthu mwambula kwenere. Sonu ndikondwa ukongwa. Mwezi unyaki ndinguchitisa masambiru nga Bayibolu 24. Ndiwonga Yehova chifukwa ndikwamba kusambira Bayibolu ndi ambuya anthukazi wo andisuskanga.”

VINTHU VAMAMPHA VO VINGUCHITIKA KU FIJI

Munthukazi munyaki ku Fiji wasambiranga Bayibolu. Iyu wakhumbikanga kusankha kuluta ku unganu wachigaŵa pamwenga kuluta ndi murumu waki ku phwandu lakukumbukiya zuŵa lakuwiya la mubali wa murumu waki. Munthukazi yo wati wapempha, murumu waki wangumuzomereza kuti waluti ku unganu. Iyu wangukambiya murumu waki kuti wakumusaniya asani waweku. Wati waweku, wanguwona kuti asani wangaluta ku phwandu, wamuchitaku vinthu vo vingatimbanyiza ubwezi waki ndi Chiuta. Mwaviyo, wangulutaku cha.

Munthurumi yo, wangukambiya abali ŵaki kuti muwolu waki wazengi asani wawe ku unganu wa Akaboni. Yiwu angukamba kuti, “Wazengi cha chifukwa chakuti Akaboni aku Yehova akondwere cha zuŵa lakuwiya!” *

Munthurumi wangukondwa ukongwa kuti muwolu waki wanguchita vinthu mwakukoliyana ndi vo wagomezanga kweniso njuŵi yaki. Chifukwa chakuti munthukazi uyu wangugomezeka, pavuli paki wangukonkhose murumu waki kweniso ŵanthu anyaki vo Bayibolu likamba. Nanga ntchinthu wuli chinguchitika? Murumu waki wanguzomera kusambira Bayibolu ndipu angwamba kulutiya limoza ku maunganu.

^ ndimi 7 Wonani nkhani yakuti, “Vo Akuŵerenga Afumba” mu Chigongwi cha Alinda cha Chichewa cha December 15, 2001.