Julani

Lutani pa vo ve mukati

 NKHANI YAKUSAMBIRA YA NAMBALA 41

Muzilutirizgi Kuja Akugomezgeka pa “Chisuzgu Chikulu”

Muzilutirizgi Kuja Akugomezgeka pa “Chisuzgu Chikulu”

“Yanjani Yehova mosi yimwi mwe akugomezgeka kwaku iyu! Yehova wavikiliya ŵanthu akugomezgeka.”​—SUMU 31:23.

SUMU 129 Tilutirizengi Kukunthiyapu

VO TISAMBIRENGI MU NKHANI IYI *

1-2. (a) Kumbi alongozgi a vyaru akambengenji pambula kuswera yapa? (b) Kumbi tikambiskanengi mafumbu nanga mu nkhani iyi?

YERUZGIYANI kuti alongozgi a vyaru akamba mazu ngo Bayibolu lingukambiya limu ngakuti “chimangu ndi kuvikilirika.” Pa nyengu iyi, yiwu angazikamba kuti charu chapasi ntchakuvikilirika ukongwa kuphara kuvuli kosi. Alongozgi a vyaru azamukhumba kuti ŵanthu aŵanaŵanengi kuti yiwu amaliska masuzgu ngosi pacharu. Kweni angazilekeska cha vo vazamuchitika pavuli paki! Ntchifukwa wuli tikamba viyo? Mwakukoliyana ndi uchimi wa mu Bayibolu, “pharanyiku lamabuchibuchi lazakuŵawiya, . . . ndipu azamuthaŵa cha.”​—1 Ate. 5:3.

2 Pe mafumbu ngakukhumbika ngo ngatenere kumukika. Mafumbu ngaki ngakuti: Kumbi ndi vinthu wuli vo vazamuchitika pa “chisuzgu chikulu”? Kumbi Yehova wakhumba kuti isi tizichitengenji pa nyengu iyi? Kumbi titenere kuchitanji sonu kuti tizilutirizgi kuja akugomezgeka pa chisuzgu chikulu?​—Mate. 24:21.

KUMBI NDI VINTHU WULI VO VAZAMUCHITIKA PA “CHISUZGU CHIKULU”?

3. Mwakukoliyana ndi Chivumbuzi 17:5, 15-18, kumbi Chiuta wazakumubwanganduwa wuli “Babiloni Mukulu”?

3 Ŵerengani Chivumbuzi 17:5, 15-18. “Babiloni Mukulu” wazamubwangandulika! Nge mo takambiyapu kali, alongozgi a vyaru angazilekeska cha vo vazamuchitika pa nyengu yeniyi. Ntchifukwa wuli tikamba viyo? Chifukwa ‘Chiuta wazamuŵika venivi mumitima yawu kuti achiti khumbu laki.’ Kumbi khumbu  laki ndakuti wuli? Iyu wakhumba kuti wabwanganduwi visopa vosi vaboza, kusazgapu matchalitchi ngo ngakamba kuti Ngachikhristu. Chiuta wazamuŵika maŵanaŵanu ngaki mumtima mwa “masengwi 10” nga “chinyama chakofya chiyera ukongwa.” Masengwi 10 ngamiya maboma ngosi ngo ngakoliyana ndi “chinyama chakofya” cho chimiya wupu wa United Nations. (Chivu. 17:3, 11-13; 18:8) Asani maboma ngandali ngenanga ngaziyukiya chisopa chaboza, chisuzgu chikulu chazamukwamba. Venivi vazamuchitika mwamabuchibuchi kweniso vazamuja vakofya ukongwa.

4. (a) Kumbi maboma ngatenere kuti ngazakuvibwanganduliyanji visopa vaboza? (b) Kumbi ŵanthu anyaki wo ŵenga muvisopa venivi atenere kuti azamuchitanji?

4 Tiziŵa cha chifukwa cho maboma ngandali ngazamuyukiya Babiloni Mukulu. Panyaki ngazamukamba kuti visopa vaboza ndivu vichitiska kuti pacharu chosi paŵevi chimangu ndipuso kuti viseleriyapu pa nkhani zandali. Pamwenga ngazamukamba kuti visopa venivi vakhupuka ukongwa. (Chivu. 18:3, 7) Kweni vingazichitika kuti maboma ngenanga ngazamubaya ŵanthu wosi cha a muvisopa vaboza. Mumalu mwaki, viwoneka kuti ngazamumaliska visopa vosi vaboza venivi. Asani visopa venivi vazibwangandulika, ŵanthu anyaki wo ŵenga muvisopa ivi azamuziŵa kuti alongozgi ŵawu aŵakoleskanga waka chimwa ndipu panyaki azamukana kuti ŵenga muvisopa venivi.

5. Kumbi Yehova wakulayizganji vakukwaskana ndi chisuzgu chikulu, ndipu ntchifukwa wuli wazamuchita viyo?

5 Bayibolu likamba cha kuti vazamuto nyengu yitali wuli kuti Babiloni Mukulu wabwanganduliki. Kweni cho tiziŵa ntchakuti venivi vazamuchitika liŵiliŵi ukongwa. (Chivu. 18:10, 21) Yehova wakulayizga kuti ‘wazamudumulizgaku mazuŵa’ ngachisuzgu chikulu kuti chisopa chauneneska kweniso “akusankhika” azitaskiki. (Mariko 13:19, 20) Kumbi Yehova wakhumba kuti isi tizichitengenji kutuwa pa nyengu yachisuzgu chikulu kuzifika pa nkhondu ya Aramagedoni?

 KOLESKANI KUSOPA KWAUNENESKA

6. Ntchifukwa wuli kutuwamu ŵaka mu visopa vaboza nkhwakukwana cha?

6 Nge mo tingusambiriya mu nkhani ya sabata yamala, Yehova wakhumba kuti ateŵeti ŵaki atuwemu mu Babiloni Mukulu. Kweni kutuwamu ŵaka nkhwakukwana cha. Tikhumbika cha kuchitaku chechosi chakukwaskana ndi chisopa chaboza. Mumalu mwaki, titenere kukoleska kusopa kwauneneska. Tiyeni tikambiskani nthowa ziŵi zo tingachitiya venivi.

Tingalekanga cha kuwungana chinanga tingakumana ndi masuzgu ngakulu wuli (Wonani ndimi 7) *

7. (a) Kumbi tingalongo wuli kuti tingangamiya ku fundu za urunji zaku Yehova? (b) Kumbi pa Aheberi 10:24, 25 palongo wuli kuti kuwungana nkhwakukhumbika ukongwa sonu?

7 Chakwamba, titenere kungangamiya ku fundu za urunji zaku Yehova. Tikoliyana nazu cha fundu zo charu chitende. Mwakuyeruzgiyapu, tizomerezga cha malusu ngaheni ngakugonana, nge kugonana pakati pa anthulumi pamwenga anthukazi pe. (Mate. 19:4, 5; Aro. 1:26, 27) Chachiŵi, tikhumbika kulutirizga kusopa ndi Akhristu anyidu. Tichita venivi kwali kungaŵa ku Nyumba ya Ufumu, kunyumba za abali pamwenga mwakubisa. Mwemosi mo vingaŵiya, tingaleka cha kuwungana ndi abali kuti tisopi Yehova. Mwakuti tikhumbika kuwungana pamoza, ‘ukongwa sonu po tiwona kuti zuŵa lo le pafupi.’​—Ŵerengani Aheberi 10:24, 25.

8. Kumbi titenere kuti tizamupharazga uthenga wuli kunthazi?

8 Pa nyengu ya chisuzgu chikulu, uthenga wo tipharazga wazamusintha. Mazuŵa nganu, tipharazga uthenga wamampha wa Ufumu ndipu tiyesesa kusambiza ŵanthu kuti aje akusambira aku Yesu. Kweni pa nyengu ya chisuzgu chikulu, titenere kuti tazamupharazga uthenga wakuŵaŵa nge mya ya matalala. (Chivu. 16:21) Panyaki tazamupharazganga kuti kwaja kamanavi kuti charu chaku Satana chimali. Kunthazi uku tazamuziŵa uthenga wo tazamupharazga kweniso mo tazakuwupharazgiya. Kumbi tazamugwiriskiya ntchitu nthowa zo taja tichipharazgiya kwa vyaka vakujumpha 100? Pamwenga tazamugwiriskiya ntchitu nthowa zinyaki? Tikhumbika kulindizga. Kwali tazamupharazga uthenga wuli, kweni viwoneka kuti tazamupharazga uthenga wa cheruzgu mwachiganga!​—Ezeki. 2:3-5.

9. Kumbi ŵanthu azamuchita wuli ndi uthenga widu, kweni ndi vinthu wuli vo tikayika cha?

9 Uthenga widu utenere kuti wazamukwiyiska ŵanthu ndipu azamuyesesa kuti alekeske limu ntchitu yidu yakupharazga. Nge mo tithembe Yehova mu uteŵeti sonu, ndimu so tazamuchitiya pa nyengu yeniyi. Tikayika cha kuti Chiuta wazakutipaska nthazi kuti tizifiski kuchita khumbu laki.​—Mika 3:8.

MUNOZGEKIYENGI KUYUKILIKA

10. Nge mo pakambiya pa Luka 21:25-28, kumbi ŵanthu anandi azamuchita wuli ndi vo vazamuchitika pa chisuzgu chikulu?

10 Ŵerengani Luka 21:25-28. Pa nyengu ya chisuzgu chikulu, ŵanthu azamuzizwa asani aziwona kuti vinthu vo aŵanaŵananga kuti vingamala cha vayamba kubwanganduka. Yiwu ‘azamukweŵeka’ mumtima ndipu azamuwopa kuti afwengi pa nyengu yakusuzga ukongwa yeniyi. (Zefa. 1:14, 15) Pa nyengu iyi, umoyu utenere kuti wazamuja wakusuzga ukongwa ndi kwa ateŵeti aku Yehova viyo. Chifukwa chakuti te a charu cha, tingazikumana ndi masuzgu nganyaki ndipuso tingaziŵavi vinthu vinyaki vakukhumbika pa umoyu.

11. (a) Ntchifukwa wuli vyaru vazamulimbana ndi Akaboni aku Yehova? (b) Nanga ntchifukwa wuli tikhumbika cha kopa chisuzgu chikulu?

11 Ŵanthu wo visopa vawu vazamubwangandulika pa chisuzgu chikulu, azamukwiya  ukongwa chifukwa azamuwona kuti Akaboni ŵechekusopa Yehova. Vyaru vosi limoza ndi mlongozi wawu Satana, azakutitinkha chifukwa chisopa chidu pe ndichu chazamujaku. Yiwu azamuwona kuti atondeka kufiska khumbu lawu lakutuzgapu visopa vosi pacharu chapasi. Mwaviyo, azamulimbana nasi. Pa nyengu iyi, vyaru vazamuja Gogi wa ku Magogi. * Vyaru venivi vazamukoliyana kuti viyukiyi ŵanthu aku Yehova. (Ezeki. 38:2, 14-16) Tingayamba kufipa mtima asani tiŵanaŵaniya venivi chifukwa tiziŵa vosi cha vo vazamuchitika. Kweni tikhumbika cha kopa chisuzgu chikulu chifukwa Yehova wazakutikambiya vo tingazichita kuti tizitaskiki. (Sumu 34:19) Pa nyengu yeniyi, ‘tazamukuma ndi kuyunuska mitu yidu’ chifukwa tazamuziŵa kuti ‘utaski widu we pafupi.’ *

12. Kumbi “kapolu wakugomezgeka ndi wazeru” watitikambiyanji kuti tinozgeke vo vazamuchitika kunthazi?

12 “Kapolu wakugomezgeka ndi wazeru,” watitikambiya vo tingachita sonu kuti tizije akugomezgeka asani chisuzgu chikulu chaziyamba. (Mate. 24:45) Iyu wachita ivi munthowa zakupambanapambana. Yimoza mwa nthowa izi ndi maunganu nga chigaŵa ngo nganguchitika mu 2016 mpaka 2018. Maunganu ngenanga ngangutichiska kuti tije ndi mijalidu yo tikhumbika kuŵa nayu penipo zuŵa laku Yehova liŵandika. Tiyeni tikambiskani mijalidu yeniyi mwakudumuwa.

JANI AKUGOMEZGEKA, AKUKUNTHIYAPU NDIPUSO ACHIGANGA

Munozgekiyengi kweche sonu kuti muzitaskiki pa “chisuzgu chikulu” (Wonani ndimi 13-16) *

13. Kumbi tingachita wuli kuti tije akugomezgeka kwaku Yehova, ndipu ntchifukwa wuli titenere kuchita viyo sonu?

13 Kugomezgeka: Mutu wa unganu wachigaŵa wa 2016 wenga wakuti “Lutirizani Kuja Akugomezeka Kwaku Yehova!” Pa unganu uwu tingusambira kuti tingaja akugomezgeka kwaku Yehova asani te nayu pa ubwezi wakukho. Tingukumbusika kuti tingaja pa ubwezi ndi Yehova asani tipemphera kutuliya pasi pamtima kweniso asani tifwiyapu kusambira Mazu ngaki. Kuchita venivi kungatiwovya kumalana ndi masuzgu chinanga ngangaŵa ngakulu wuli. Penipo umaliru wa charu uŵandika, tikumanengi ndi masuzgu ngakulu ukongwa ngo ngangayesa kugomezgeka kwidu kwaku Chiuta ndi Ufumu waki. Ŵanthu atenere kuti azamulutirizga kutinyoza. (2 Petu. 3:3, 4) Chifukwa chimoza cho azamuchitiya viyo ntchakuti tichitaku cha va charu. Titenere kuja akugomezgeka sonu kuti tizilutirizgi kuja akugomezgeka pa nyengu ya chisuzgu chikulu.

14. (a) Kumbi ndi vinthu wuli vo vazamusintha pa nkhani ya abali wo azamulongozga? (b) Ntchifukwa wuli tazamukhumbika kuja akugomezgeka pa chisuzgu chikulu?

14 Pa chisuzgu chikulu vinthu vazamusintha pa nkhani ya abali wo azamulongozga. Pa nyengu yinyaki asani chisuzgu chikulu chaziyamba, akusankhika wosi wo ŵeche pacharu chapasi azamuluta kuchanya kuti akarwi nkhondu ya Aramagedoni. (Mate. 24:31; Chivu. 2:26, 27) Ivi ving’anamuwa kuti pacharu chapasi pazamuŵavi abali a mu Wupu Wakulongozga. Kweni a mzinda ukulu azamulutirizga kuchita vinthu mwakulongosoka. Abali wo mbakwenere azamulongozganga pa nyengu yeniyi. Tingazilongo kuti te akugomezgeka asani tazamukoliyana nawu  kweniso asani tazamuvwiya ulongozgi wakutuliya kwaku Chiuta wo azakutipaska. Venivi vazakutiwovya kuti tizitaskiki!

15. Kumbi tingachita wuli kuti tikunthiyengepu mayeseru, ndipu ntchifukwa wuli kuchita viyo nkhwakukhumbika sonu?

15 Kukunthiyapu: Mutu wa unganu wachigaŵa wa 2017 wenga wakuti “Mungaweriyanga Vuli Cha!” Unganu uwu, ungutiwovya mo tingachitiya kuti tikunthiyengepu mayeseru. Tingusambira kuti tingakunthiyapu asani tithemba Yehova ndipu tichita viyo kaya vinthu ve umampha pa umoyu widu pamwenga cha. (Aro. 12:12) Tingaluwanga cha vo Yesu wakulayizga. Iyu wanguti: “Yo wazamukunthiyapu mpaka pakumaliya, wazamutaskika.” (Mate. 24:13) Layizgu ili ling’anamuwa kuti titenere kuja akugomezgeka kwali tingakumana ndi masuzgu wuli. Asani tikunthiyapu mayeseru sonu, chivwanu chidu chijengi chakukho, chisuzgu chikulu chechendayambi.

16. Kumbi tingaziŵa wuli kuti te ndi chiganga, nanga tingachita wuli kuti tije ndi chiganga sonu?

16 Chiganga: Mutu wa unganu wachigaŵa wa 2018 wenga wakuti “Jani ndi Chiganga!” Unganu uwu ungutikumbusa kuti tingaja cha ndi chiganga pakutija kweni tikhumbika kuthemba Yehova kuti tije ndi jalidu lenili. Kumbi tingachita wuli kuti timuthembengi ukongwa Yehova? Tikhumbika kuŵerenga Mazu ngaki zuŵa lelosi ndi kuŵanaŵaniya mo Yehova wataskiyanga ŵanthu ŵaki kuvuli. (Sumu 68:20; 2 Petu. 2:9) Asani vyaru vazitiyukiya pa chisuzgu chikulu, tazamukhumbika kuja ndi chiganga ndi kugomezga Yehova kuphara kali. (Sumu 112:7, 8; Ahe. 13:6) Asani tithemba Yehova sonu, tazamuja ndi chiganga asani Gogi wazitiyukiya. *

MULINDIZGENGI UTASKI WINU

Pambula kuswera yapa, Yesu ndi asilikali ŵaki akuchanya azamuchita nkhondu ya Aramagedoni kuti azibayi arwani wosi aku Chiuta! (Wonani ndimi 17)

17. Ntchifukwa wuli tikhumbika cha kopa nkhondu ya Aramagedoni? (Wonani chithuzi cho che pachikonkhombi.)

17 Nge mo tingusambiriya mu nkhani ya sabata yamala, tanandi aku isi tikuwiya mu mazuŵa ngakumaliya. Kweniso tilindizga kuzijumpha amoyu mu chisuzgu chikulu. Nkhondu ya Aramagedoni yazamuja umaliru wa mugonezi wunu. Kweni palivi chifukwa chakuchitiya mantha. Ntchifukwa wuli tikamba  viyo? Chifukwa iyi yazamukuŵa nkhondu yaku Chiuta. (Nthanthi 1:33; Ezeki. 38:18-20; Zeka. 14:3) Asani Yehova wazilamura, Yesu Khristu wazamulongozga asilikali aku Chiuta kuti achiti nkhondu. Iyu wazamukuŵa ndi Akhristu akusankhika kweniso angelu pakuchita nkhondu iyi. Yiwu azamupumana ndi Satana, viŵanda vaki ndi asilikali a pacharu chapasi.​—Danye. 12:1; Chivu. 6:2; 17:14.

18. (a) Kumbi Yehova wakulayizganji? (b) Kumbi lemba la Chivumbuzi 7:9, 13-17, lititiwovya wuli kuti tileki kuchita mantha ndi vo vichitikengi kunthazi?

18 Yehova wakulayizga kuti: “Palivi chidya cho chapangikiya yiwi cho chazamuchita kanthu.” (Yesa. 54:17) A “mzinda ukulu” ‘azamutuwa amoyu mu chisuzgu chikulu’! Pavuli paki, azamulutirizga kumuchitiya uteŵeti wakupaturika Yehova. (Ŵerengani Chivumbuzi 7:9, 13-17.) Bayibolu lititipaska vifukwa vinandi vakugomezge kuti tazamutaskika kunthazi! Tiziŵa kuti “Yehova wavikiliya ŵanthu akugomezgeka.” (Sumu 31:23) Wosi wo atanja Yehova ndi kumuthamika azamukondwa asani iyu wazitoweska zina laki lakupaturika.​—Ezeki. 38:23.

19. Kumbi tilindizganji pambula kuswera yapa?

19 Kumbi muwona kuti lemba la 2 Timote 3:2-5, latingi lilembekengi wuli asani lakonkhoskanga ŵanthu wo azamuja mucharu chifya chambula kulandizgika ndi Satana? (Wonani bokosi lakuti “ Mijalidu yo Ŵanthu Azamukuŵa Nayu mu Paradayisu”) Mubali George Gangas, * yo wanguteŵetiyapu mu Wupu Wakulongozga, wangukamba kuti: “Ŵanaŵaniyani ŵaka mo charu chazamuŵiya asani pacharu pazija abali ndi azichi pe! Pambula kuswera yapa, tiserengi mucharu chifya. Chifukwa chakuti Yehova wangafwa cha nasi tazamukufwa cha. Tazamuja ndi umoyu kwamuyaya.” Tilindizga vinthu vamampha ukongwa!

SUMU 122 Jani Akukho, Ambula Kunderezeka!

^ ndimi 5 Tiziŵa kuti pambula kuswera yapa, kuzengi “chisuzgu chikulu.” Kumbi ndi vinthu wuli vo vazamuchitikiya ateŵeti aku Yehova pa nyengu yeniyi? Kumbi Yehova wakhumba kuti isi tizichitengenji pa nyengu iyi? Kumbi tikhumbika kuja ndi mijalidu niyi sonu kuti tizilutirizgi kuja akugomezgeka pa chisuzgu chikulu? Nkhani iyi, yimukengi mafumbu ngenanga.

^ ndimi 11 VO MAZU NGANYAKI NGANG’ANAMUWA: Gogi wa ku Magogi (mwakudumuwa, Gogi) ndi vyaru vo vazamukoliyana kuti viyukiyi ŵanthu wo asopa Yehova mwauneneska pa chisuzgu chikulu.

^ ndimi 11 Kuti muziŵi vinandi vo vazamuchitika asani kwaja kamanavi kuti nkhondu ya Aramagedoni yiyambi, wonani mutu 21 mubuku lakuti Ufumu Waku Chiuta Uwusa! Kweniso kuti muziŵi vinandi vakukwaskana ndi mo Gogi wa ku Magogi wazamuyukiya ŵanthu aku Chiuta ndipuso mo Yehova wazamuvikiliya ŵanthu ŵaki pa nkhondu ya Aramagedoni, wonani mutu 17 ndi 18 mubuku la Chingerezi lakuti, Pure Worship of Jehovah​Restored At Last!

^ ndimi 16 Unganu wachigaŵa wa 2019 wenga ndi mutu wakuti “Chanju Chimala Cha!” Unganu uwu ungutiwovya kuziŵa kuti tingaja akuvikilirika chifukwa chakuti Yehova watitivikiliya.—1 Akori. 13:8.

^ ndimi 19 Wonani nkhani ya mutu wakuti ‘Zochita Zake Zimtsata,’ mu magazini ya Chichewa ya Chigongwi cha Alinda ya December 1, 1994.

^ ndimi 64 CHITHUZI: Akaboni achitiya unganu kudondu pa nyengu ya chisuzgu chikulu.

^ ndimi 66 CHITHUZI: Mzinda ukulu wa ateŵeti akugomezgeka aku Yehova wazamutuwa wamoyu kweniso wakukondwa mu chisuzgu chikulu!