Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  October 2016

“Mungaluwanga Cha Kulonde Alendu”

“Mungaluwanga Cha Kulonde Alendu”

“Mungaluwanga cha kulonde alendu.”—ŴAH. 13:2.

SUMU: 50, 53

1, 2. (a) Kumbi ŵanthu anandi wo aluta kucharu chinyaki akumana ndi masuzgu nanga mazuŵa nganu? (Wonani chithuzi cho che pachanya.) (b) Kumbi wakutumika Paulo wangupereka ulongozgi nuwu, ndipu ndi mafumbu nanga ngo tikambisanengi?

VYAKA 30 vo vajumpha, Osei, [1] wa ku Ghana wanguluta ku Europe. Pa nyengu yeniyi iyu wenga Kaboni cha. Osei wangukamba kuti: “Ndati ndafika ŵaka, ndinguwona kuti ŵanthu anandi anditoliyangaku kanthu cha. Nyengu ya kwenuku yenga yakupambana ndi kwidu. Ndati ndatuwa pachiŵaza cha ndegi kweniso ndati ndayamba kuvwa kuzizira ukongwa, ndingwamba kuliya chifukwa chakuti kenga kakwamba kuvwa kuzizira kwaviyo.” Osei wachiziŵanga cha chineneru cha mucharu cho ndipu vinguchitisa kuti pajumphi chaka wechendasaniyi ntchitu yamampha. Chifukwa chakuti wajanga kutali ndi banja laki, wasoŵanga wakucheza nayu kweniso wakhumbiranga kwawu.

2 Ŵanaŵaniyani vo imwi mungakhumba kuti ŵanthu akuchitiyeni asani mwe alendu mucharu chawu. Kumbi mungakondwa cha asani abali ndi azichi angakulondiyani umampha ku Nyumba ya Ufumu chinanga kuti mutuliya mucharu chinyaki kweniso mupambana nawu  mtundu? Bayibolu lichiska Akhristu kuti: “Mungaluwanga cha kulonde alendu.” (Ŵah. 13:2) Mazu ngachigiriki ngo ngakufwatulikiya kuti ‘kulonde alendu,’ ngang’anamuwa kuchitiya lisungu ŵanthu ambula kuŵaziŵa. Mwaviyo, tiyeni tikambisani mafumbu yanga: Kumbi Yehova watiŵawona wuli ŵanthu a mitundu yinyaki? Ntchifukwa wuli tikhumbika cha kuchitiya sankhu ŵanthu a mitundu yinyaki? Kumbi tingachita wuli kuti ŵanthu wo atuliya mucharu chinyaki afwatukengi mumpingu widu?

MO YEHOVA WAWONE ŴANTHU A MITUNDU YINYAKI

3, 4. Mwakukoliyana ndi lemba la Chituwa 23:9, kumbi Ayisraele akhumbikanga kuŵawona wuli ŵanthu a mitundu yinyaki, ndipu ntchifukwa wuli?

3 Yehova wati wawombo Ayisraele ku Egipiti, wanguŵapasa marangu ngo ngalongonga kuti waŵanaŵaniyanga ŵanthu a mitundu yinyaki wo ajanga nawu. (Chit. 12:38, 49; 22:21) Chifukwa chakuti kanandi alendu aŵangavi vinthu, Yehova waŵapasanga vo akhumbikanga. Iyu wangupereka dangu lakuti atongi vakurya vo vajaliya muminda.—Ŵal. 19:9, 10.

4 Yehova waŵachichizanga cha Ayisraele kuti atumbikengi alendu, m’malu mwaki wanguŵakambiya kuti akumbukengi vo nawu vinguŵachitikiya ku Egipiti ko ŵenga. (Ŵerengani Chituwa 23:9.) Yiwu aziŵanga ‘mo viŵiya kuja mulendu.’ Chinanga mphanyengu yo Ayisraele ŵenga akapolu cha, Aegipiti atenere kuti achitiyanga nawu vinthu limoza cha chifukwa chakuti apambananga mtundu ndi chisopa. (Chiy. 43:32; 46:34; Chit. 1:11-14) Ayisraele angukumana ndi masuzgu ngakulu chifukwa chakuti ŵenga alendu ku Egipiti ndichu chifukwa chaki Yehova wakhumbanga kuti awonengi alendu nge Ayisraele anyawu.—Ŵal. 19:33, 34.

5. Ntchinthu wuli cho chingatiwovya kuti tiŵanaŵaniyengi ŵanthu a mitundu yinyaki nge mo Yehova wachitiya?

5 Mazuŵa nganu napu, Yehova wakhumba kuti tiŵanaŵaniyengi ŵanthu a mitundu yinyaki wo atuza ku maunganu nga mpingu. (Mar. 10:17-19; Mal. 3:5, 6) Asani tingaziŵa masuzgu ngo akumana nangu nge sankhu pamwenga kuleka kuziŵa chineneru, tingasaniya nthowa zo tingaŵalongore lisungu.—1 Pet. 3:8.

TIKHUMBIKA CHA KUCHITA SANKHU

6, 7. Ntchinthu wuli cho chilongo kuti Akhristu a munyengu ya akutumika angumalisa sankhu?

6 Akhristu a munyengu ya akutumika angusambira kuti akhumbika cha kuchita sankhu nge mo Ayuda anyaki achitiyanga. Pa Pentekoste, mu chaka cha 33 C.E., Akhristu wo ajanga mu Yerusalemu aŵagaŵiyangaku vinthu ŵanthu wo angutuliya muvyaru vakupambanapambana, wo angusintha kuja Akhristu. (Mac. 2:5, 44-47) Chifukwa chakuti Akhristu achiyuda anguŵalongo chanju Akhristu anyawu wo angutuliya muvyaru vinyaki, angulongo kuti aziŵanga kuti “kulonde alendu,” kung’anamuwa “kuchitiya lisungu ŵanthu ambula kuŵaziŵa.”

7 Mpingu wachikhristu wati wayamba kukuwa, viwoneka kuti mumpingu mungwamba kuchitika sankhu. Ayuda wo alongoronga Chigiriki angwamba kudandawula kuti vyoko vawu, aviwovyanga cha. (Mac. 6:1) Kuti nkhani iyi yimali, akutumika angusankha anthurumi 7 kuti awonesesengi kuti atovya weyosi. Anthurumi ŵenaŵa ŵenga ndi mazina ngachigiriki. Panyaki akutumika anguchita viyo kuti amalisi mphindanu zo zengapu pakati pa Akhristu akwambiriya pa nkhani ya sankhu.—Mac. 6:2-6.

8, 9. (a) Kumbi ndi mafumbu nanga ngo ngangatiwovya kuziŵa asani te ndi sankhu pamwenga tiwona kuti mtundu widu ngwapachanya? (b) Kumbi tingachita wuli kuti tileki kuchita sankhu? (1 Pet. 1:22)

8 Kwali tiziŵa pamwenga cha, tichita vinthu mwakutole midawuku yidu. (Ŵar. 12:2) Kanandi, tituvwa ŵanthu wo tija nawu pafupi, wo tigwira nawu ntchitu kweniso wo tisambira nawu sukulu achikamba vinthu viheni vakukwaskana ndi ŵanthu a mucharu chinyaki, fuku linyaki pamwenga wo apambana nawu kawonekeru ka khungu. Kumbi nasi titoliyaku jalidu la sankhu lenili? Kumbi tichita wuli asani munthu munyaki watitiseka  chifukwa cha charu cho tituliya pamwenga wakamba vinthu viheni vakukwaskana ndi midawuku yidu?

9 Kwa kanyengu, wakutumika Petro wachitiyanga sankhu ŵanthu wo ŵenga Ayuda cha kweni kamana ndi kamana wangusambira kuti wakhumbika kutuzgamu sankhu mumtima mwaki. (Mac. 10:28, 34, 35; Ŵag. 2:11-14) Mwakuyanana ŵaka, asani taziŵa kuti tayamba sankhu pamwenga tayamba kuwona kuti mtundu widu ngwapachanya, tikhumbika kuyesesa kutuzamu maŵanaŵanu ngenanga mumtima widu. (Ŵerengani 1 Petro 1:22.) Titenere kuŵanaŵaniya fundu yakuti, kwali tituliya charu nichi, tosi te akwenere cha kutaskika chifukwa chakuti te ambula kufikapu. (Ŵar. 3:9, 10, 21-24) Mwaviyo, palivi chifukwa chakujiwone kuti te apachanya kuluska ŵanthu anyaki. (1 Ŵakor. 4:7) Tikhumbika kuwona vinthu nge mo wakutumika Paulo waviwoniyanga. Iyu wangukambiya Akhristu akusankhika anyaki kuti ‘ŵenga so alendu cha pamwenga ŵanthu ambula kuziŵika kweni . . . ŵenga ŵanthu a mu banja laku Chiuta.’ (Ŵaef. 2:19) Asani titesesa kuleka kuchitiya sankhu ŵanthu a mitundu yinyaki, vitiwovyengi kuvwara wunthu wasonu.—Ŵakol. 3:10, 11.

MO TINGALONGOLE LISUNGU KU ŴANTHU A MTUNDU UNYAKI

10, 11. Kumbi vo Boazi wanguchitiya Ruti vingulongo wuli kuti wawonanga ŵanthu a mitundu yinyaki nge mo Yehova watiŵawone?

10 Mwambula kukayika, vo Boazi wanguchitiya Ruti wa ku Moabu, vingulongo kuti wanguchita vinthu mwakukoliyana ndi mo Yehova wawone ŵanthu a mitundu yinyaki. Wati waza kuziyendere minda yaki pa nyengu yakuvuna, Boazi wanguwona Ruti yo wakunkhanga mwaphamphu muvuli mwa ŵanthu wo avunanga. Iyu wati wavwa kuti munthukazi yo wangupempha kuti wakunkhi mumunda chinanga kuti wenga ndi wanangwa wakuchita viyo, Boazi wanguzomereza kuti a ntchitu ŵaki amusoloriyengi baleri mu ntchinda zo anguwunjika kuti iyu wakunkhengi.—Ŵerengani Ruti 2:5-7, 15, 16.

11 Vo Boazi wangukambisana ndi a ntchitu ŵaki vingulongo kuti waŵanaŵaniyanga Ruti chifukwa chakuti wenga mulendu ndipuso wengavi munthu wakumuvikiriya. Boazi wangukambiya Ruti kuti waje ndi a ntchitu ŵaki anthukazi kuti a ntchitu ŵaki anthurumi angamuchitiyanga nkhaza. Iyu wanguwonesesa kuti Ruti wapasika chakurya kweniso maji ngakukwana nge mo venge ndi ŵanthu wo wanguŵalemba ganyu. Kusazgiyapu pa venivi, Boazi wangulongoro mazu ngaheni cha kwaku Ruti yo wenga wamtundu unyaki kweni wangumuchiska.—Ruti 2:8-10, 13, 14.

12. Ntchinthu wuli cho chingachitika asani tichitiya lisungu ŵanthu wo atuwa mucharu chinyaki?

12 Boazi wanguchitiya lisungu Ruti chifukwa chakuti wayanjanga apongozi ŵaki kutuliya pasi pa mtima ndipuso chifukwa chakuti wangwamba kusopa Yehova. Kuziya mwaku Boazi, Yehova wangulongo Ruti chanju chambula kumala chifukwa wanguza ‘kuzibisama mumapapa ngaku Chiuta wa Yisraele.’ (Ruti 2:12, 20; Nthanthi 19:17) Mwakuyanana ŵaka, asani tichita vinthu mwalisungu, tiwovyengi “ŵanthu a mitundu yosi” kuti aziŵi uneneska kweniso awoni kuti Yehova watiŵayanja.—1 Tim. 2:3, 4.

Kumbi titiŵapasa moni ŵanthu a mitundu yinyaki wo ŵaza pa Nyumba ya Ufumu? (Wonani ndimi 13 ndi 14)

13, 14. (a) Ntchifukwa wuli tikhumbika kuyesesa kutawuza ŵanthu a mitundu yinyaki wo ŵaza ku Nyumba ya Ufumu? (b) Kumbi mungachita wuli kuti muleki kuchita soni kukambisana ndi ŵanthu a mitundu yinyaki?

13 Tingalongo kuti titanja ŵanthu a mitundu yinyaki wo atuwa kucharu chinyaki, asani titiŵatawuza mwalikondwa pa Nyumba ya Ufumu. Nyengu zinyaki, ŵanthu wo atuliya muvyaru vinyaki, achita soni ndipuso asoŵa ŵanthu akucheza nawu. Yiwu angajiwona nge kuti mbakusika ku ŵanthu a mtundu unyaki pamwenga a mucharu cho alutaku chifukwa cha mo akulereke ndipuso mo awoneke. Mwaviyo, tikhumbika kwamba ndisi kuŵalongo kuti titiŵaŵanaŵaniya. Asani mu chineneru chinu mwe pulogilamu yakusambiriya chineneru (JW Language), yingakuwovyani kuziŵa  mo mungataŵuziya ŵanthu a mitundu yinyaki mu chineneru chawu.—Ŵerengani Ŵafilipi 2:3, 4.

14 Nyengu zinyaki mungachita soni kukambisana ndi ŵanthu a mtundu unyaki. Kuti muleki kuchita soni, mungaŵakambiya vinthu vinyaki vakukwaskana ndi imwi. Muwonengi kuti pe vinthu vinandi vo muyanana kuphara vo mupambana ndipuso kuti ŵanthu a mtundu wewosi ŵe ndi vo achita umampha kweniso vo atondeka kuchita umampha.

AWOVYENI KUJIVWA KUTI MBAKULONDEREKA

15. Ntchinthu wuli chingatiwovya kuŵavwisa ŵanthu wo asintha vinthu vinyaki kuti akoliyani ndi vo vichitika mucharu cho azamu?

15 Kuti muwovyi ŵanthu a mitundu yinyaki kuti afwatukengi mumpingu, mungajifumba kuti, ‘Asani ndenga mulendu mucharu chinyaki, kumbi ndatingi ndikhumbengi kuti ŵanthu andichitiyenji?’ (Mat. 7:12) Muzizipizengi ndi ŵanthu wo asintha vinthu vinyaki pa umoyu wawu kuti akoliyani ndi vo vichitika mucharu cho azamu. Pakwamba, tingavwisa cha mo aŵanaŵaniya kweniso mo achitiya vinthu. M’malu mwakukhumba kuti achitengi vinthu mwakukoliyana ndi midawuku yidu, tikhumbika kuŵavwisa mo yiwu aliri.—Ŵerengani Ŵaroma 15:7.

16, 17. (a) Kumbi ndi vinthu nivi vo tingachita kuti tiyanjanengi ndi ŵanthu a mitundu yinyaki? (b) Kumbi tingachita wuli kuti tiwovyi ŵanthu a mitundu yinyaki wo ŵe mumpingu widu?

16 Asani tingaziŵa vinthu vakukwaskana ndi charu kweniso midawuku ya ŵanthu a mitundu yinyaki, tingasuzgika cha kucheza nawu. Pa kusopa kwa pabanja tingafufuza vinthu vakukwaskana ndi mtundu wa ŵanthu wo tileka kuŵaziŵa umampha mumpingu widu pamwenga muchigaŵa cho tipharazgamu. Nthowa yinyaki yo yingatiwovya kuŵaziŵa umampha ŵanthu a mitundu yinyaki, nkhuŵadaniya kunyumba kwidu kuti tiziryi nawu chakurya. Pakuti Yehova ‘wajuliya khomu ŵanthu a mitundu yinyaki kuti aje ndi chivwanu,’ nasi tikhumbika kujuliya khomu alendu wo “te nawu limoza mu chivwanu.”—Mac. 14:27; Ŵag. 6:10; Jobu 31:32.

Kumbi titiŵalonde ŵanthu wo atuliya muvyaru vinyaki? (Wonani ndimi 16 ndi 17)

 17 Asani ticheza ndi ŵanthu a mucharu chinyaki, tiziŵengi kuti atesesa kusintha vinthu vinyaki kuti akoliyani ndi midawuku yidu. Tiwonengi kuti akhumbika kuŵawovya kuti aziŵi chineneru chidu. Tingaŵawovya kuti asaniyi ntchitu kweniso nyumba yakujamu. Kuchita ivi kungawovya Akhristu anyidu kuti ajengi ndi umoyu wamampha.—Nthanthi 3:27.

18. Kumbi ŵanthu wo atuliya mucharu chinyaki, angalondo chakuwoniyapu chaku yani?

18 Kukamba uneneska, ŵanthu wo atuwa muvyaru vinyaki, akhumbika kuyesesa kusintha vinthu vinyaki kuti akoliyani ndi midawuku ya mucharu cho aja. Ruti wangulongo chakuwoniyapu chamampha pa nkhani yeniyi. Chakwamba, iyu wangulongo kuti watumbika midawuku ya mucharu cho wanguzamu chifukwa wangupempha kuti wakunkhi mumunda. (Ruti 2:7) Wanangwa wakukunkha wanguwuwona mwakupepuka cha ndipu wanguŵanaŵanapu cha kuti wenga udindu wa ŵanthu wo kuti amupasengi vinthu. Chachiŵi, wanguwonga chifukwa chakuti angumuchitiya lisungu. (Ruti 2:13) Asani ŵanthu wo atuliya mucharu chinyaki awonga, ŵanthu a mucharu cho ajamu ndipuso Akhristu anyawu aŵatumbikengi.

19. Ntchifukwa wuli tikhumbika kulonde ŵanthu a mitundu yinyaki wo ŵaza kuziwungana nasi?

19 Vakukondwesa ukongwa kuti chifukwa cha lisungu laki, Yehova wazomereza ŵanthu a mitundu yosi kuti avwi uthenga wamampha. Vingachitika kuti anyaki awusaniyanga cha mwaŵi wakusambira Bayibolu pamwenga wakuwungana ndi ŵanthu aku Yehova po ŵenga mucharu cho atuliya. Tikhumbika kuŵawovya kuti angajiwonanga nge alendu cha pa nyengu yo awungana nasi. Chinanga kuti tingaŵa ndi vinthu vimanavi pamwenga tingaŵapasa chovyu chimana, asani tingaŵalongo lisungu aziŵengi kuti Yehova watiŵayanja. Mwaviyo, chifukwa chakuti ‘tilondo Chiuta,’ tiyeni tiyesesi kulonde ŵanthu a mitundu yinyaki wo ŵaza kuziwungana nasi.—Ŵaef. 5:1, 2.

^ [1] (ndimi 1) Zina lasinthika.