Julani

Lutani pa vo ve mukati

 MBIRI YA UMOYU WANGU

Pakwamba Ndenga Mukavu Kweni Sonu Nde Wakukhupuka

Pakwamba Ndenga Mukavu Kweni Sonu Nde Wakukhupuka

Ndinguwiya munyumba yamathabwa yambula chipinda mutawuni ya Liberty, muchigaŵa cha Indiana ku U.S.A. Pa nyengu yo ndawiyangaku apapi ŵangu ndipu abala kali ŵana atatu, munthulumi yumoza ndi anthukazi ŵaŵi. Ini ndati ndawaku angubala so ŵana atatu, anthulumi ŵaŵi ndi munthukazi yumoza.

Nyumba ya mathabwa yo ndinguwiyamu

PA NYENGU yo ndasambiranga sukulu, palivi cho chingusintha pa sukulu ndi mutawuni yidu. Pa sukulu yo ndasambiranga, ŵana wo ndingwamba kusambira nawu mu sitandadi 1 ndiwu ndingumaliza nawu. Mwakuti ndaziŵanga ŵanthu anandi mutawuni yidu ndipu nawu andiziŵanga.

Ndenga mwana wanambala 4 mubanja la ŵana 7 ndipu ndingusambira vinandi vakukwaskana ndi ulimi ndeche mwana

Mutawuni ya Liberty ŵanthu anandi ŵenga alimi ndipu ayanjanga kulima vingoma. Pa nyengu yo ndawiyangaku, ada agwiranga ntchitu kumunda wa munthu munyaki. Ndati ndafika vyaka va pakati pa 13 ndi 19 ndingusambira kwendesa gandaganda. Ndinguziŵa so vinthu vinyaki vakukwaskana ndi ulimi.

Pa nyengu yo ndawiyangaku, ada ŵenga ndi vyaka 56 ndipu ama ŵenga ndi vyaka 35. Chinanga kuti ada ŵenga ara, kweni ŵenga anthazi ndipu atamangatamanga cha. Yiwu ayanjanga kugwira ntchitu ndipu angusambiza so taŵana kuti tiyanjengi kugwira ntchitu. Asaniyanga ndalama zinandi cha, kweni awonesesanga kuti te ndi pakugona, vakurya ndi vakuvwara ndipu nyengu zosi achezanga nasi. Ada angufwa ndi vyaka 93 ndipu ama angufwa ndi vyaka 86. Kweni pengavi yo wanguteŵetiyapu Yehova. Mvurwa wangu yumoza pe ndiyu wateŵete Yehova mwakugomezgeka. Iyu wangwamba kuteŵete nge mura kwambiya kukwamba kwa vyaka va m’ma 1970.

 PA NYENGU YO NDENGA MWANA

Ama ayanjanga kupemphera. Yiwu alutanga nasi ku tchalitchi la Babatisiti pa Sabata peposi. Ndingwamba kuvwa kuti kwe chiuta dada, chiuta mwana ndi chiuta mzimu po ndenga ndi vyaka 12. Mwaviyo, ndingufumba ama kuti: “Kumbi Yesu wangaja wuli Mwana ndi Da pa nyengu yimoza?” Ndikumbuka mo angundimukiya. Yiwu anguti: “Vakusuzga kuvwisa mwana wangu. Taŵanthu tingavivwisa cha.” Ini ndavwisanga nadi cha chinanga nkhamanavi. Chinanga kuti venga viyo, ndingubatizika ndati ndafika vyaka 14 mu kamsinji ko kenga pafupi ndi ko tajanga. Angundibizga katatu mumaji. Venivi vamiyanga chiuta dada, chiuta mwana ndi chiuta mzimu.

Pa nyengu yo ndenga ndi vyaka 17 ŵechendandidani ku usilikali mu 1952

Ku sekondale ndenga ndi munyangu yo wachitanga masaza nga nkhonyu. Vo wangukamba vingundikhorweska mwakuti ndingwamba kusambira masaza yanga. Ndinguchilembesa ku wupu wo wawoneriyanga masaza nga nkhonyu. Ndenga mujira kupuma. Mwaviyo, ndinguleka ndati ndapumanapu ndi ŵanthu amanavi. Pavuli paki, angundidana kuti nkhayambi usilikali ndipu angunditumiza ku Germany. Wo atiwoneriyanga angunditumiza kusukulu ya asilikali ya Noncommissioned Officers Academy. Yiwu anguchita viyo chifukwa aŵanaŵananga kuti ndingalongozga umampha asilikali anyangu. Akhumbanga kuti ndije msilikali umoyu wangu wosi. Kweni ini ndakhumbanga cha. Mwaviyo, ndati ndamaliza vyaka viŵi vo angundilangiya, ndinguleka usilikali mu 1956. Kweni pati pajumpha nyengu yimanavi, ndingwamba usilikali wamtundu unyaki.

Ndenga msilikali wa charu cha United States kwa vyaka viŵi, kwambiya mu 1954 mpaka mu 1956

MO NDINGUSAMBIRIYA UNENESKA

Ndechendasambiri uneneska, ndaŵanaŵananga kuti munthulumi watenere kuŵa wavinthazi. Ndaŵanaŵananga viyo chifukwa cha mafilimu ngo ndawoneriyanga ndipuso ŵanthu wo ndachezanga nawu. Ndawonanga kuti ŵanthu wo apharazganga ŵenga akupepera timaliŵavu. Kweni ndingwamba kusambira vinthu vo vingusintha umoyu wangu. Zuŵa linyaki po ndayendesanga galimotu yangu mutawuni, asungwana ŵaŵi angundibayibisa. Asungwana yaŵa ndaŵaziŵanga. Ŵenga azichi a mulamu wangu yo wanguto mzichi wangu mura. Yiwu ŵenga Akaboni aku Yehova. Nyengu yinyaki angundipaska Chigongwi cha Alinda ndi Jani Masu! Kweni ini ndawonanga kuti Chigongwi cha Alinda ntchakusuzga ukongwa kuchivwisa. Pa zuŵa ili angundidaniya ku Sambiru la Buku la Mpingu lo achitiyanga munyumba yawu. Ndinguŵakambiya kuti panyaki ndizengi. Uku amwemwete, asungwana yaŵa angundifumba kuti, “Uneneska?” Ndinguŵamuka kuti, “Hinya, ndineneska.”

Ndakhumbanga cha kuluta, kweni chifukwa chakuti ndinguŵalayizga kali, ndinguwona kuti ndingasintha cha. Mwaviyo, ndinguluta. Ŵana ndiwu angundikondwesa ukongwa pa sambiru ili. Yiwu aziŵanga vinandi vakukwaskana ndi Bayibolu! Chinanga kuti ndalutanga ku tchalitchi ndi ama pa Sabata peposi, kweni ndaziŵanga vimanavi ukongwa vakukwaskana ndi Bayibolu. Pa nyengu iyi ndakhumbanga kuziŵa vinandi. Ndinguzomera kusambira Bayibolu. Ndati ndayamba ŵaka kusambira, ndinguziŵa kuti zina laku Chiuta Wanthazizosi ndi Yehova. Vyaka vakuvuli, ndingufumba ama za Akaboni aku Yehova. Yiwu angundimuka kuti, “Apemphera munthu munyaki wakukota zina laki Yehova.” Kweni pa nyengu iyi ndinguwona kuti ndayamba kujulika kumasu!

Ndinguswera cha kuluta panthazi mwauzimu chifukwa ndinguziŵa kuti ndasaniya uneneska. Ndingubatizika mu March, 1957. Pangujumpha myezi 9 pe kutuliya po ndingulutiya ku sambiru la buku kakwamba. Ndingusintha mo ndawoniyanga vinthu. Kali ndaŵanaŵananga  kuti munthulumi watenere kuja wavinthazi. Kweni chifukwa chakuti ndikusambira Bayibolu, ndikondwa ukongwa kuti ndiziŵa mo munthulumi wanthazi watenere kujaliya. Yesu wenga wambula ubudi. Iyu wenga wanthazi kuphara munthulumi weyosi. Kweni wapumananga ndi ŵanthu cha. Mumalu mwaki ‘wanguzomera kutambuzgika,’ nge mo Malemba ngangukambiya. (Yesa. 53:2, 7) Ndinguziŵa kuti wakusambira waku Yesu “wakhumbika kuja wakuzika ku ŵanthu wosi.”—2 Timo. 2:24.

Ndingwamba upayiniya mu 1958 kweni ndinguleka kwa nyengu yimanavi chifukwa ndinguto munthukazi zina laki Gloria. Iyu wenga yumoza wa asungwana wo angundidaniya ku sambiru la buku. Ndidandawula cha chifukwa cha kuto Gloria. Iyu wenga wakutowa pa nyengu yo ndipu weche wakutowa mpaka sonu. Kwaku ini Gloria ngwakuzirwa ukongwa kuluska mwa wa dayamondi. Ndikondwa ukongwa kuti ndikumuto. Uli ndimupaski mwaŵi kuti wakukambiyenipu vimanavi vakukwaskana ndi iyu:

“Mu banja mwidu tengamu ŵana 17. Ama ŵenga Kaboni wakugomezgeka. Yiwu angufwa nde ndi vyaka 14. Pa nyengu iyi ndipu ada angwambiya kusambira Bayibolu. Ama ŵati ŵafwa, Ada angupempha mura wa pasukulu yo tasambiranga kuti ini ndi mku wangu, tisinthanengi pakuluta kusukulu. Pa nyengu iyi, mku wangu ndipu waja kamanavi kuti wamalizi sukulu ya sekondale. Asani ini ndaluta musanawale iyu walutanga mawa laki. Ivi vawovyanga kuti yo waja panyumba waphweriyengi ŵana ndi kubika chakurya Ada ŵechendawe ku ntchitu. Mura wa pasukulu wanguzomereza ndipu tachitanga viyo mpaka po mku wangu wangumaliziya sukulu. Mabanja ngaŵi nga Akaboni ngasambiranga nasi Bayibolu ndipu taŵana 11 tinguja Akaboni aku Yehova. Ndayanjanga kupharazga chinanga kuti ndenga ndi soni. Sam wangundiwovya kuti ndileki kuchita soni.”

Ini ndi Gloria tingutolana mu February, 1959 ndipu tachitiyanga limoza upayiniya. Mu July chaka chenichi tingulemba fomu yakupempha uteŵeti wa pa Beteli ku likulu lidu. Mubali Simon Kraker ndiyu watifumbanga mafumbu. Iyu wangutikambiya kuti pa Beteli akhumbanga ŵanthu akutorana cha pa nyengu iyi. Takhumbanga mbwenu kuchiteŵete pa Beteli kweni pangujumpha nyengu yitali kuti ivi vichitiki.

Tingupempha ku likulu lidu kuti atitumizi ko kukhumbika apharazgi anandi. Yiwu angutikambiya kuti tiluti mutawuni ya Pine Bluff ku Arkansas. Pa nyengu iyi mutawuni ya Pine Bluff mwenga mipingu yiŵi, wazungu pe ndi wafipa pe. Isi angutitumiza ku mpingu wafipa wo wenga ndi apharazgi 14 pe.

KUSANKHANA MTUNDU

Panyaki mungajifumba kuti, ‘Ntchifukwa wuli mumipingu ya Akaboni aku Yehova mwenga sankhu?’ Kumuka nkhwakuti tatingi tichitiyengi munyaki cha pa nyengu iyi. Boma lingujalikiska marangu kuti ŵanthu a mitundu yakupambana angawungananga pamoza cha ndipu asani ivi vachitika, paŵanga viwawa. Mumalu nganandi, abali awopanga kuti asani mitundu yiŵi yingawungana pamoza, mbwenu ŵanthu awiskengi Nyumba ya Ufumu. Nyengu zinyaki venivi vachitikanga. Asani afipa apharazga muchigaŵa cho mwajanga azungu, aŵamanganga ndipu nyengu zinyaki aŵapumanga. Mwaviyo, kuti ntchitu yakupharazga yilutiriyi, tavwiyanga marangu nga boma ndipu tagomezganga kuti kunthazi vinthu vazamuja umampha.

Takumananga ndi masuzgu mu uteŵeti. Asani tipharazga, nyengu zinyaki tagogodanga panyumba ya azungu kwambula kuziŵa. Takhumbikanga kuŵaŵerenge lemba mwaluŵi pamwenga kuŵapepesa ŵaka ndi kuluta. Ivi ndivu vachitikanga mumalu nganyaki.

Takhumbikanga kugwira ntchitu mwaphamphu kuti tisaniyi ndalama zakutiwovya pakuchita upayiniya. Ntchitu zinandi zo tagwiranga talondiyanga ndalama zimanavi. Gloria wagwiranga ntchitu ya munyumba ku ŵanthu anandi. Kunyumba yinyaki ko wagwiranga ntchitu angundizomereza kumuwovya kuti wamalizengi liŵi. Angutipaska chakurya cha msana ndipu tingugaŵana ini ndi Gloria. Sabata yeyosi Gloria wasitanga malaya nga banja linyaki. Ini ndagwiranga ntchitu za pabwalu, kupuputa mawindu ndi ntchitu zinyaki zawuliwuli. Panyumba yinyaki ya mzungu tapuputanga mawindu. Ini ndapuputanga kubwalu ndipu Gloria wapuputanga mukati. Tingugwira ntchitu iyi kwa zuŵa losi lamphumphu. Mwaviyo, angutipaska chakurya cha msana. Gloria waryiyanga munyumba kweni pakuyija ndipu ini ndaryiyanga kubwalu mugaraja. Ndingudandawula cha ndi venivi chifukwa chenga chakurya chamampha ukongwa. Banja ili lenga lamampha ukongwa. Yiwu achitanga ŵaka vo ŵanthu wosi achitanga. Ndikumbuka vo vinguchitika nyengu yinyaki tati tama pakumwese mafuta galimotu. Tati tamaliza kumwesa mafuta galimotu yidu,  ndingupempha yo wagulisanga mafuta asani muwolu wangu wangaluta kunyumba yikulu. Iyu wangundileleska ŵaka kumasu batata ndi kukamba kuti, “Ntchakujala.”

VINTHU VAMAMPHA VO ABALI ATICHITIYANGA

Chinanga kuti takumananga ndi masuzgu yanga, kweni takondwanga asani takumana ndi abali ndi azichi. Kweniso tawuyanjanga ukongwa uteŵeti widu! Tati tafika mutawuni ya Pine Bluff, tingufikiya kunyumba ya mubali yo wenga mteŵeti wa mpingu (sonu wadanika kuti wakukumaniska ntchitu za wupu wa ŵara.) Pa nyengu iyi, muwolu waki wenga Kaboni cha ndipu Gloria wangwamba kusambira nayu Bayibolu. Ini ndasambiranga ndi mwana wawu munthukazi ndi mulumu waki. Muwolu wa mubali uyu ndipuso mwana wawu munthukazi angusankha kuteŵete Yehova ndipu angubatizika.

Tenga ndi anyidu mumpingu wa azungu. Yiwu azanga kuzitito kuti tikaryi chakurya kunyumba kwawu, kweni azanga ndi usiku kuti ŵanthu aleki kuŵawona. Penga wupu unyaki wo wadanikanga kuti Ku Klux Klan (KKK). Wupu uwu wachiskanga ŵanthu kuti asankhanengi mtundu ndi kuchitiyana nkhaza. Zuŵa linyaki ndi mazulu ndinguwona munthu yo wanguja pakhondi la nyumba yaki. Iyu wanguvwara nge mo avwaliyanga a gulu la KKK. Kweni abali anguleka cha kuchitiyana vinthu vamampha chifukwa cha vinthu ivi. Nyengu yinyaki takhumbanga ndalama kuti tiluti ku unganu mwaviyo tingukambiya mubali munyaki kuti waguli galimotu yidu. Iyu wanguzomera kuti wagulengi. Zuŵa linyaki pati pajumpha mwezi umoza, tinguvuka ukongwa chifukwa chakupharazga mu lumwi ndi kusambira Bayibolu ndi ŵanthu. Tati tafika panyumba, tinguzizwa ukongwa kuwona Galimotu yidu ayimika kumasu kwa nyumba yidu. Pagilasi la kunthazi la galimotu angulembapu kuti: “Galimotu yinu yo, ndakupaskani nge mphasu. Ndini mubali winu.”

Ndingukwaskika ukongwa ndi lisungu lo mzichi munyaki wangundilongo. Mu 1962, angundidana ku Sukulu ya Uteŵeti wa Ufumu yo yinguchitikiya kumwera kwa tawuni ya Lansing, ku New York. Sukulu iyi yenga ya ŵara, akuwonere dera ndi akuwonere chigaŵa. Yenga ya mwezi wamphumphu. Pa nyengu yo ndingudanikiya, ndenga pa ulova ndipu ndalama yandisuzganga. Kweni kampani ya mafoni ku Pine Bluff yingundifumba mafumbu kuti yiwoni asani ndenga wakwenere kugwira ntchitu pa kampani iyi. Asani ndingusere, ndatingi nkhajengi mufipa wakwamba kugwiraku ntchitu. Angundikambiya kuti anditongi. Kumbi ndatingi ndichitengi wuli? Ndengavi ndalama zakulutiya kusukulu ku New York. Ndinguŵanaŵana kuti ndiyambi ntchitu mumalu mwakuluta kusukulu. Pa nyengu yo ndenga pafupi kulemba kalata yakuziŵisa abali kuti ndilutengeku cha kusukulu, panguchitika chinthu chinyaki cho ndiluwengi cha.

Zuŵa linyaki mzichi munyaki wa mumpingu widu wanguza kunyumba kwidu ndi mlenjilenji. Iyu wangundipaska nevulupu ndipu mu nevulupu yeniyi, mwenga ndalama zinandi. Mulumu wa mzichi uyu wenga Kaboni cha. Mzichi uyu ndi ŵana ŵaki anyaki ayukanga ndi mlenjilenji kuchilimiliya thonji. Yiwu achitanga viyo kuti asaniyi ndalama zakuti ini ndilutiyi kusukulu ku New York. Iyu wangundikambiya kuti: “Luta kusukulu kuti ukasambiri ndipu ukazi so kuti uzitisambizi vo wamusambira!” Ndingupempha kampani ya  mafoni kuti ndiziyambi ntchitu asani pajumpha masabata ngankhondi kutuliya pa zuŵa lo angundikambiya kuti nkhayambi ntchitu. Yiwu angukana. Kweni ndingudandawula cha chifukwa ndipu ndasankha kali chakuchita. Ndikondwa ukongwa chifukwa ndingusere cha ntchitu iyi.

Gloria wakumbuka mo uteŵeti wayendiyanga ku Pine Bluff. Avwani vo wakambengi: “Ndachiyanjanga ukongwa chigaŵa cho tapharazgangaku! Nyengu zinyaki ndasambiranga Bayibolu ndi ŵanthu 15 pamwenga 20. Ndi mulenji tapharazga kunyumba ndi nyumba. Pavuli paki tachitiskanga masambiru nga Bayibolu. Nyengu zinyaki tafikanga 11 koloku usiku. Uteŵeti wandikondwesanga ukongwa! Ndatingi ndidandawulengi cha asani ndenga ndeche kuteŵete kwenuku. Ndakhumbanga cha kusintha uteŵeti wangu ndi kwamba uteŵeti wakuwonere dera. Kweni Yehova wangutisungiya chinthu chinyaki.” Wangutisungiya nadi chinthu chinyaki.

UTEŴETI WAKUWONERE DERA

Pa nyengu yo tenga ku Pine Bluff, tingusayina fomu yakupempha upayiniya wapade. Takayikanga cha kuti atizomerezengi kuja apayiniya apade. Tikamba viyo chifukwa wakuwonere chigaŵa wakhumbanga kuti tikawovyi mpingu unyaki wo wenga muchigaŵa cha Texas. Iyu wakhumbanga kuti tiluti kwenuku nge apayiniya apade. Nkhani iyi yenga yakukondwesa ukongwa kwaku isi. Tingulindizga kwa nyengu yitali kuti atimuki kweni tingulonde kalata yeyosi cha. Kuvulivuli tingulonde kalata ndipu angutipaska uteŵeti wakuwonere dera. Ivi vinguchitika mu January 1965. Mubali Leon Weaver nayu angumupaska uteŵeti wakuwonere dera pa nyengu yeniyi. Sonu mubali Weaver ndiyu wawonere ntchitu za Komiti ya Nthambi ya United States.

Ndawopanga kuja wakuwonere dera. Chaka chimoza kuvuli ivi vechendachitiki, mubali James A. Thompson yo wenga wakuwonere chigaŵa, wangundifumba mafumbu kuti wawoni asani ndenga wakwenere kuja wakuwonere dera. Iyu wangundikambiya vo ndakhumbikanga kunozga kuti ndije wakuwonere dera wamampha. Ndati ndachita uteŵeti uwu kwa nyengu yimanavi, ndinguziŵa kuti ulongozgi waki wenga wakukhumbika nadi. Mubali Thompson ndiyu wenga wakuwonere chigaŵa wakwamba kuteŵete nayu ndati ndaŵikika kuja wakuwonere dera. Ndingusambiraku vinandi kwa mubali wakugomezgeka mwenuyu.

Ndiwonga mo abali akugomezgeka angundiwovye

Pa nyengu iyi akuwonere dera asambiranga vinthu vinandi cha. Ndingwenda ndi wakuwonere dera kwa sabata yimoza kuti ndiwoni mo wachitiya asani wachezesa mpingu. Tati taluta ku mpingu unyaki, iyu wawonanga ŵaka mo ini ndachitiyanga. Wangundipaska masachizgu ndi ulongozgi. Kweni pavuli paki wangutileka tija. Zuŵa linyaki ndingukambiya Gloria kuti, “Mbwenu viyo penapa wamala kundisambiza?” Kweni pati pajumpha nyengu ndinguziŵa chinthu chinyaki chakukhumbika ukongwa. Nyengu zosi patuŵa abali  wo angatiwovya asani titiŵazomereza kuti atiwovyi. Ndeche kuwonga mo mubali J. R. Brown ndi mubali Fred Rusk angundiwovye. Pa nyengu iyi Mubali Brown wenga wakuwonere dera ndipu Mubali Rusk wateŵetiyanga pa Beteli.

Kusankhana mitundu yenga suzgu yikulu ukongwa pa nyengu iyi. Zuŵa linyaki, a wupu wa KKK agubanga mutawuni yinyaki po tacheziyanga mpingu muchigaŵa cha Tennessee. Nyengu yinyaki te mu uteŵeti, abali ndi azichi anguma pa resitilanti kuti aryi chakurya cha mlenji. Ndinguluta kunyumba yikulu kuti nkhajiwovyi. Munthu munyaki yo wangujilembalemba muliŵavu wandilondonga ndipu wawonekanga wakofya. Munthu uyu wawonanga kuti azungu mbapachanya kuphara mitundu yinyaki. Kweni mubali munyaki yo wenga mukhomi ukongwa kuphara ini ndipuso yo wandilondonga, wazanga muvuli mwidu. Mubali uyu wangundifumba kuti, “Pe suzgu lelosi Mubali Herd?” Munthu wakofya yo wandilondonga wangutuwapu nyengu yeniyo kwambula kusere munyumba yikulu. Pa umoyu wangu, ndawona kuti ŵanthu asankhana mitundu chifukwa cha kupambana khungu cha, kweni chifukwa cha ubudi wo tikuyambuwa kwaku Adamu. Ndasambira kuti mubali ndi mubali chinanga mungasiyana khungu. Iyu wangatifwiya asani mphakwenere kuchita viyo.

SONU NDE WAKUKHUPUKA

Ndinguchita uteŵeti wakuwonere dera kwa vyaka 12 ndipu kwa vyaka 21 ndenga wakuwonere chigaŵa. Ivi venga vyaka vakukondwesa ukongwa. Kweni penga so vitumbiku vinyaki vo Chiuta wangutisungiya. Mu August 1997, vinthu vo takhumbanga kwanyengu yitali vingufiskika. Tingudanika kuti tikateŵetiyengi pa Beteli ya ku United States. Pangujumpha vyaka 38 kutuliya po tingusayiniya fomu yakupemphe uteŵeti uwu. Tingwamba kuteŵete pa Beteli mu September. Ndaŵanaŵananga kuti abali akhumbanga kuti nkhaŵawovyi kwa nyengu yimanavi, kweni ndimu venge cha.

Gloria wenga wakutowa pa nyengu yo ndingumutole ndipu weche wakutowa mpaka sonu

Ndati ndafika ŵaka angundiŵika ku dipatimenti yakuwonere uteŵeti. Ndingusambira vinandi ku dipatimenti iyi. Abali a mu dipatimenti iyi aphwere nkhani zakusuzga kutuliya ku mawupu nga ŵara ndipuso kwa akuwonere madera mu charu chosi cha United States. Ndiwonga ukongwa kuti abali anguzikira nani pakundisambiza. Kweni ndiwona kuti asani ndingawere so ku dipatimenti iyi, ndamuja nge ndayamba ŵaka sonu.

Ini ndi Gloria titanja uteŵeti wapa Beteli. Nyengu zosi tiyuka ndi mlenjilenji ndipu kuchita viyo kutitiwovya ukongwa pa Beteli. Pati pajumpha chaka chimoza, ndingwamba kovya mu Komiti ya Uteŵeti ya Wupu Wakulongozga. Mu 1999, ndingusankhika kuti nditeŵetiyengi mu Wupu Wakulongozga. Ndasambira vinandi ukongwa pa uteŵeti uwu. Kweni chinthu chakukhumbika ukongwa cho ndasambira ntchakuti Yesu Khristu ndiyu mutu wa mpingu, munthu munyaki weyosi cha.

Ndateŵete mu Wupu Wakulongozga kwambiya mu 1999

Asani ndikumbuka vo ndakumana navu pa umoyu wangu, nyengu zinyaki ndituvwa nge mo wangukambiya mchimi Amosi. Yehova wangukweza muliska wakujiyuyuwa mweniyu yo wachitanga ntchitu ya wuliwuli yakuphwere nkhuyu. Mtundu wa nkhuyu zo Amosi waphweriyanga aryanga akavu pe. Kweni Chiuta wangumusankha kuti waje mchimi. Iyi yenga ntchitu yakuzirwa ukongwa. (Amosi 7:14, 15) Mwakuyanana ŵaka, Yehova wangundisankha, mwana wa munthu mukavu wa mutawuni ya Liberty, muchigaŵa cha Indiana ndi kundipaska vitumbiku vinandi vakuti ndingafiska cha kukonkhoska. (Nthanthi 10:22) Ndenga mukavu nadi pakwamba, kweni sonu nde wakukhupuka mwauzimu. Ndaŵanaŵaniyangaku cha kuti ndingaja wakukhupuka viyo!