Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  May 2017

Umampha Wakuja ndi Umoyu Wambula Kukhumba Vinthu Vinandi

Umampha Wakuja ndi Umoyu Wambula Kukhumba Vinthu Vinandi

DANIEL NDI MIRIAM angutolana mu September, m’chaka cha 2000. Ŵati atolana ajanga mu tawuni ya Barcelona m’charu cha Spain. Daniel wangukamba kuti: “Tajanga umoyu wo ŵanthu atiwuwona kuti ngwamampha. Ntchitu yo tagwiranga yatichitisanga kuti tiryengi ku marestilanti ngapachanya, tilutengi ku vyaru vinyaki ndipuso tivwalengi vakuvwala vamampha ukongwa. Kweniso nyengu zinandi tapharazgiyanga limoza.” Kweni vinthu vingusintha.

Pa unganu wachigaŵa wo unguchitika m’chaka cha 2006, Daniel wangukwaskika ukongwa ndi nkhani yinyaki yo yingukambika pa unganu uwu. Mu nkhani iyi mwenga fumbu lakuti: “Kumbi tichita vosi vo tingafiska kuti tiwovyi ‘wo ambendyambendya kuluta kuchibayika?” (Nthanthi 24:11) Nkhani iyi yakambanga za udindu wo te nawu wakupharazgiya ŵanthu uthenga wa m’Bayibolu wakutaska umoyu. (Mac. 20:26, 27) Daniel wangukamba kuti, “ndingujivwa nge kuti Yehova wakambiya ini.” Nkhani iyi, yingukamba so kuti tija akukondwa ukongwa asani tichita vinandi pakuteŵete Yehova. Daniel wanguziŵa kuti uwu mbuneneska. Pa nyengu iyi ndipu Miriam wayamba kali kuchita upayiniya ndipu wakondwanga ndi vitumbiku vo wasaniyanga.

Daniel wangukamba kuti, “Ndinguwona kuti ndakhumbikanga kusintha vinthu vinandi pa umoyu wangu.” Ndipu ndivu wanguchita. Iyu wangwamba kugwira ntchitu kwa maola ngamanavi ndi chilatu chakuti wachitengi upayiniya. Pavuli paki wanguŵanaŵaniya vitumbiku vo iyu ndi Miriam angasaniya asani angaluta kuchiteŵete ko kukhumbika Apharazgi anandi a Ufumu.

MASUZGU KWENISO NKHANI YAKUKONDWESA

M’chaka cha 2007, Daniel ndi Miriam anguleka ntchitu yo agwiranga kuti aluti ku charu cha Panama ko angulutaku kali. Yiwu apharazganga mu chigaŵa cha Bocas del Toro cho che mu nyanja ya Caribbean. Chigaŵa ichi che ndi vilwa vinandi. Ŵanthu anandi wo aja kwenuku akutuliya ku charu chinyaki cha ndipu mba mtundu wa chiguyami. Daniel ndi Miriam anguwona kuti ndalama zo angusunga, zingaŵawovya kuti ateŵete ku Panama kwa myezi 8.

Yiwu ayendanga pa boti asani atuwa pa chilwa chinyaki kuluta pa chilwa chinyaki. Asani afika ayendanga pa njinga. Yiwu akumbuka ulendu wakwamba wo angwenda pa njinga. Angwenda makilomita 32 kujumpha mapiri ngakugodoboka, kweniso mu chilumwi. Daniel wanguja kamanavi kufwa chipoyu chifukwa chakuvuka. Ŵanthu a mtundu wa Chiguyami wo akumananga nawu aŵalondiyanga umampha. Yiwu angwamba kuŵalonde umampha ukongwa ŵati aziŵaku mazu nganyaki nga mu chineneru chawu. Pati pajumpha nyengu yimanavi, achitisanga masambiru nga Bayibolu 23.

Ndalama zati zaŵamaliya, Daniel ndi Miriam ŵenga ndi chitima ukongwa. Daniel wangukamba kuti: “Masozi nge mumasu, tingwamba kuŵanaŵaniya zakuwere ku Spain. Tingudandawula ukongwa kuti tilekengi masambiru ngidu nga Bayibolu.” Kweni pati pajumpha mwezi umoza, anguŵakambiya nkhani yakukondwesa ukongwa. Miriam wanguti: “Angutikambiya kuti titeŵetiyengi nge apayiniya apade. Tingukondwa ukongwa kulutiriza kuteŵete kwenuku.”

CHINTHU CHAKUKONDWESA UKONDWA

Chifukwa chakusintha kwa vinthu mu gulu laku Yehova mu 2015, Daniel ndi Miriam anguŵakambiya kuti aleki upayiniya wapade ndipu alutirizi kuteŵete nge apayiniya a nyengu zosi. Kumbi anguchita wuli? Yiwu angugomeza layizgu lo le pa Sumu 37:5 po pakamba kuti: “Ponyiyani Yehova masuzgu nginu, mumugomezengi ndipu iyu wakuwovyeningi.” Yiwu angusaniya ntchitu kuti yiŵawovyengi po achita upayiniya ndipu sonu ateŵete mumpingu wo we muchigaŵa cha Veraguas ku Panama.

Daniel wangukamba kuti: “Te ku Spain, taziŵanga cha kuti tingafiska kuja ndi umoyu wambula kukhumba vinthu vinandi. Kweni ndiwu tija sonu ndipu palivi cho tisoŵa.” Kumbi ntchinthu wuli cho akondwa nachu ukongwa? Yiwu angukamba kuti, “Kuwovya ŵanthu akujiyuyuwa kuziŵa Yehova ntchinthu chakukondwesa ukongwa kuluska chechosi!”