Julani

Lutani pa vo ve mukati

Watingi Wayanjikengi ndi Chiuta

Watingi Wayanjikengi ndi Chiuta

TITEŴETE Yehova ndipu tikhumba kuti watiyanjengi, asi viyo? Kweni kumbi tikhumbika kuchitanji kuti Chiuta watiyanjengi ndi kutitumbika? Ŵanthu anyaki wo akulembeka mu Bayibolu, Chiuta waŵayanjanga chinanga kuti nyengu yinyaki anguchitapu maubudi ngakulu. Anyaki ŵenga ndi mijalidu yamampha kweni pakumaliya Chiuta wanguleka kuŵayanja. Mwaviyo, tingajifumba kuti, “Kumbi Yehova wakhumbanji kwaku isi?” Vo vinguchitikiya Rehobowamu fumu ya Ayuda, vingatiwovya kumuka fumbu ili.

WANGWAMBA UMAMPHA CHA

Awisi aku Rehobowamu a Solomoni anguwusa Ayisirayeli kwa vyaka 40. (1 Ŵakaro. 11:42) Solomoni wangufwa mu 997 B.C.E. Pavuli paki, Rehobowamu wangutuwa ku Yerusalemu kuluta ku Sekemu kuti akamuvwaliki ufumu. (2 Miko. 10:1) Panyaki Rehobowamu wachitanga mantha kuja fumu chifukwa cha kuŵanaŵaniya zeru zinandi zo awisi a Solomoni ŵenga nazu. Iyu wakhumbikanga kulongo kuti nayu we ndi zeru zakumaliskiya nkhani zakusuzga.

Ayisirayeli awonanga kuti akandirizgikanga ndipu angutuma ŵanthu kuti akakambiyi Rehobowamu vo yiwu akhumbanga kuti wachiti. Yiwu angukamba kuti: “Awusu angutipingiza goli lizitu. Kweni asani iwi ungapepusaku ntchitu zizitu za awusu, ndi kupepusa goli lizitu lo angutipingiza, tikuteŵetiyengi.”—2 Miko. 10:3, 4.

Rehobowamu wangusoŵa chakuchita. Asani wanguvwiya vo ŵanthu akhumbanga, iyu ndi banja laki atingi aŵengevi vinthu vinyaki vo ŵanthu aŵachitiyanga. Kweni asani wangukana, ŵanthu atingi amugarukiyengi. Kumbi Rehobowamu wanguchita wuli? Pakwamba wanguluta kwa arara wo apangizanga fundu Solomoni kuti amuwovyi. Pavuli paki, Rehobowamu wanguchifumba ku nthanga zaki. Iyu wangusankha kusuzga Ayisirayeli chifukwa wanguvwiya vo a nthanga zaki angumukambiya. Wanguŵamuka kuti: “Ada anguzitisa goli linu ndipu ini ndisazgiyengeku uzitu waki. Ada akukwechuwaningi ndi maliswazu kweni ini ndikukwechuweningi ndi vikoti vaminga.”—2 Miko. 10:6-14.

Kumbi tisambiranjipu? Mazuŵa nganu, te ndi arara anandi wo ateŵete Yehova kwa vyaka vinandi ndipu angatiwovya kuti tisankhi umampha vakuchita. Mwaviyo, tikhumbika kuŵavwiya.—Jobu 12:12.

“ANGUVWIYA MAZU NGAKU YEHOVA”

Rehobowamu wanguwunganiska asilikali ŵaki kuti wakachiti nkhondu ndi mafuku ngo ngangugaruka. Kweni Yehova wanguseleriyapu kuziya mwa mchimi Shemaya. Iyu wangukamba kuti: “Mungalutanga cha kuchichita nkhondu ndi abali ŵinu  Ayisirayeli. Weyosi waku yimwi watenere kuwere kunyumba kwaki, chifukwa chinthu ichi chatuliya kwaku ini.”—1 Ŵakaro. 12:21-24. *

Kumbi chenga chipusu kuti Rehobowamu wavwiyi Yehova? Iyu wangukambiya ŵanthu kuti waŵakwechuwengi “ndi vikoti vaminga.” Kweni ŵati agaruka iyu wakhumbikanga kuŵaleka ŵaka. Kumbi ŵanthu atingi amuwonengi wuli? (Yeruzgiyani ndi 2 Mikoka 13:7.) Rehobowamu wengavi navu ntchitu vakuti ŵanthu amuwonengi wuli. Mumalu mwaki, iyu ndi asilikali ŵaki “anguvwiya mazu ngaku Yehova ndipu anguwere kunyumba zawu nge mo Yehova wangukambiya.”

Kumbi tisambiranjipu? Tikhumbika kuvwiya Chiuta chinanga kuti nyengu zinyaki ŵanthu angatinyoza. Nyengu zosi Chiuta watitumbikengi asani timuvwiyengi.—Mara. 28:2.

Kumbi Rehobowamu wangutumbikika chifukwa chakuvwiya Chiuta? Wati waleka kuchita nkhondu ndi mafuku ngo ngangumugarukiya, wangwamba kuzenga matawuni mu vigaŵa va mafuku nga Yuda ndi Benjamini ngo wenga weche kungalamuliya. Matawuni nganandi ‘wangungakhoreska ukongwa.’ (2 Miko. 11:5-12) Chakukondwesa ntchakuti kwa kanyengu wanguvwiya marangu ngaku Yehova. Chifukwa chakuti ufumu wa mafuku 10 wasopanga achiuta aboza, anandi “angukoliyana ndi Rehobowamu” ndipu alutanga ku Yerusalemu kuchisopa Chiuta wauneneska. (2 Miko. 11:16, 17) Mwaviyo, chifukwa chakuti Rehobowamu wanguvwiya Yehova, ufumu waki ungukho.

WANGUBUDA KWENI WANGULAPA

Kweni Ufumu waku Rehobowamu wati wakho, iyu wanguchita chinthu chinyaki chambula zeru. Wanguleka kuvwiya Yehova ndipu wangwamba kusopa achiuta aboza. Ntchifukwa wuli wanguchita viyo? Kumbi wangulandizgika ndi anyina wo ŵenga a mtundu wa Amoni? (1 Ŵakaro. 14:21) Tiziŵa cha kuti wangulandizgika ndiyani kweni cho tiziŵa ntchakuti ŵanthu wosi angumulondo. Mwaviyo, Yehova wanguzomereza Fumu Shishaki kubwanganduwa matawuni nganandi nga Yuda ngo ngenga ndi mipanda yakukho yo Rehobowamu wanguzenga.—1 Ŵakaro. 14:22-24; 2 Miko. 12:1-4.

Maji ngangufika mukhosi Sheshaki wati wafika ku Yerusalemu kweniko Rehobowamu walamuliyanga. Pa nyengu iyi, mchimi Shemaya wangukambiya Rehobowamu ndi nduna zaki uthenga waku Chiuta. Iyu wanguti: ‘Mwandijowo ini, nani so ndakulekani mu janja laku Sheshaki.’ Kumbi Rehobowamu wanguchitanji wati wavwa uthenga uwu? Iyu wanguchitapu kanthu mwaliŵi. Bayibolu likamba kuti: ‘Nduna za ku Isirayeli ndi fumu angujiyuyuwa, anguti, “Yehova ndi murunji.”’ Mwaviyo, Yehova wangutaska Rehobowamu ndipu Yerusalemu wangubwangandulika cha.—2 Miko. 12:5-7, 12.

Pavuli paki, Rehobowamu wangulutirizga kulamuliya ufumu wakumwera wa Yuda. Iyu wechendafwi wangupereka mphasu ku ŵana ŵaki wosi anthurumi. Panyaki wanguchita ivi kuti aleki kuyukiya mubali wawu Abija yo wangusere mu malu mwaki. (2 Miko. 11:21-23) Yapa Rehobowamu wanguchita vinthu mwazeru ukongwa kuluska po wanguchitiya pakwamba.

KUMBI REHOBOWAMU WENGA MUNTHU WAMAMPHA PAMWENGA MUHENI?

Chinanga kuti Rehobowamu wanguchita vinthu vinyaki vamampha kweni Bayibolu likamba kuti: “Wanguchita vinthu viheni.” Chifukwa wuli? ‘Chifukwa wangupenja Yehova ndi mtima wosi cha.’—2 Miko. 12:14..

Mwakupambana ndi Davidi, Rehobowamu wangutondeka kuja pa ubwezi wamampha ndi Yehova

Kumbi tingasambiranji pa vo Rehobowamu wanguchita? Nyengu zinyaki iyu wavwiyanga Chiuta ndipu waŵachitiyanga vinthu vamampha ŵanthu ŵaki. Kweni wangutondeka kuja pa ubwezi wamampha ndi Yehova ndipu wamuteŵetiyanga ndi mtima wosi cha. Ndichu chifukwa chaki wangwamba kuchita vinthu viheni ndi kusopa achiuta aboza. Mungajifumba kuti: ‘Pa nyengu yo Rehobowamu wavwiyanga Chiuta, kumbi wachitanga viyo kutuliya pasi pa mtima pamwenga wachichizgikanga ŵaka ndi anyaki?’ (2 Miko. 11:3, 4; 12:6) Pavuli paki, wangwamba so kuchita vinthu viheni. Iyu wenga wakupambana ukongwa ndi ambwiyaki a Davidi! Mbuneneska kuti Davidi wanangiskanga vinthu vinyaki, kweni wayanjanga Yehova, wajiperekanga pakusopa  kwa uneneska ndipu walapanga ndi mtima wosi asani wabuda.—1 Ŵakaro. 14:8; Sumu 51:1, 17; 63:1.

Tingasambira vinandi kwaku Rehobowamu. Tikhumbika kusaniriya banja lidu vinthu vakukhumbika ndi kuyesesa kufiska vinthu vinyaki. Kweni kuti Yehova walutirizgi kutiyanja, titenere kumusopa mwauneneska ndipu tingalekanga cha kuchita viyo.

Kuti tichiti viyo, tikhumbika kumuyanja ukongwa Yehova. Motu uzimwa asani tileka kusonkhaku. Mwakuyanana ŵaka, kuti tilutirizgi kwanja Chiuta, tikhumbika kusambira Mazu ngaki kaŵikaŵi, kuŵanaŵaniyapu vo tiŵerenga ndi kufwiyapu kupemphera. (Sumu 1:2; Aro. 12:12) Asani timuyanjengi ukongwa Yehova, tikhumbisiskengi kumukondwesa mu vakuchita vidu vosi. Kwanja Yehova kutichitiskengi so kuti tilapengi ndi mtima wosi asani tabuda. Mwakupambana ndi Rehobowamu tilekengi cha kusopa kwa uneneska.—Yuda 20, 21.

^ ndimi 9 Chifukwa chakuti Solomoni wanguvwiya cha, Chiuta wangukambiya limu kuti ufumu waki wazamugaŵikana.—1 Ŵakaro. 11:31.