Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  June 2017

Kumbi Mukumbuka?

Kumbi Mukumbuka?

Kumbi mukuŵerenga magazini nga Chigongwi cha Alinda ngo ngatuwa pambula kuswera yapa? Asani ndi viyo, yesani kumuka mafumbu yanga:

Kumbi akuwonere madera kweniso ŵara mumpingu akhumbika kuchitanji asani gulu laku Chiuta lapereka ulongozgi?

Abali yaŵa atenere kuvwiya mwaliŵi. Yiwu angajifumba kuti: ‘Kumbi ini nditovya abali ndi azichi kuti ayanjengi Chiuta? Kumbi ndizomera liŵi kweniso ndikoliyana ndi ulongozgi wakutuliya kwa abali wo atitilongozga?’—w16.11, peji 11.

Kumbi ndi zukwanji po Akhristu anguja akapolu a Babiloni Mukulu?

Ivi vinguchitika pati pajumpha nyengu yimanavi kutuliya po wakutumika wakumaliya wangufwiya. Pa nyengu yeniyo, angujalikisa kagulu ka alongozgi. Tchalitchi ndi Boma vinguzomereza chisopa chaboza ndipu vakhumbanga kuti Akhristu akusankhika wo ŵenga nge tirigu, amali. Mu vyaka vakuvuli, chaka cha 1914 chechendafiki, Akhristu akusankhika angwamba kutuwamu mu Babiloni Mukulu.—w16.11, papeji 23-25.

Ntchifukwa wuli ntchitu yo wangugwira Lefèvre d’Étaples yenga yakukhumbika?

Kukwamba kwa vyaka va m’ma 1520, Lefèvre wangufwatuliya Bayibolu mu Chifurenchi kuti ŵanthu ambula kusambira ukongwa aje nalu. Mo Lefèvre wangufwatuliya Bayibolu, vinguwovya Martin Luther, William Tyndale ndi John Calvin.—wp16.6, papeji 10-12.

Kumbi “kuŵika maŵanaŵanu pa vinthu va liŵavu kupambana wuli ndi kuŵika maŵanaŵanu pa vinthu va mzimu”? (Ŵar. 8:6)

Munthu yo waŵika maŵanaŵanu pa vinthu vakuliŵavu wachita makhumbiru ngaliŵavu, nyengu zosi wakamba za vinthu vakuliŵavu kweniso wativiwona kuti vakukhumbika ukongwa. Mkhristu yo waŵika maŵanaŵanu pa vinthu va mzimu, walongozgeka ndi mzimu utuŵa ndipu wachita vinthu mwakukoliyana ndi vo Chiuta wakhumba kweniso vo waŵanaŵana. Kuŵika maŵanaŵanu pa vinthu va liŵavu, kulongozge ku nyifwa kweni kuŵika maŵanaŵanu pa vinthu va mzimu, kulongozge ku umoyu wamuyaya.—w16.12, papeji 15-17.

Kumbi ndi vinthu vinyaki nivi vo mungachita kuti muleki kufipa mtima ukongwa?

Muchitengi dankha vinthu vakukhumbika ukongwa, muchitengi vo mungafiska, mujengi ndi nyengu yakupumuwa zuŵa lelosi, mujengi ndi nyengu yakuwona vo Chiuta wakulenga, muyanjengi kuseka, muchitengi masaza kaŵikaŵi ndipuso mugonengi mwakukwana.—w16.12, papeji 22-23.

Kumbi Enoke “wangusamusika” wuli kuti “waleki kuwona nyifwa”? (Ŵah. 11:5)

Viwoneka kuti Chiuta wangusamusa Enoke kutuwa ku umoyu kuluta ku nyifwa. Iyu wanguziŵa cha kuti watufwa.—wp17.1, papeji 12-13.

Ntchifukwa wuli tikhumbika kuja akujiyuyuwa?

Kujiyuyuwa kung’anamuwa kujiwona mwakwenere ndipuso kuziŵa kuti pe vinthu vinyaki vo tingatondeka kuchita. Tikhumbika kuziŵa mo jalidu lidu lingakwaskiya so ŵanthu anyaki ndipu titenere cha kujiwona kuti ndisi akhumbika ukongwa.—w17.01, peji 18.

Kumbi pe ukaboni wuli wakuti Chiuta walongozganga wupu wakulongozga wa mu nyengu ya akutumika kweniso kuti walongozga Wupu Wakulongozga wa mazuŵa nganu?

Mzimu utuŵa waŵawovyanga kuvwisa uneneska wa m’Malemba. Yiwu awovyekanga ndi angelu pakuwonere ntchitu yakupharazga ndipu agomezanga Mazu ngaku Chiuta asani apereka ulongozgi. Venivi ndivu so vichitika mazuŵa nganu.—w17.02, papeji 26-28.

Kumbi ndi vinthu nivi vitikuchitisani kuti muwonengi kuti sembi yo Yesu wakupereka njakuzirwa?

Pe vinthu vinayi: Yo wakukupasani, chifukwa cho wakukupasiyani, vinthu vo iyu wakuchita kuti wakupaseni kweniso vinthu vo sembi yo yikufiska. Titenere kuŵanaŵaniya mo vinthu ivi vikuwovye.—wp17.2, papeji 4-5.

Kumbi Mkhristu wangasintha maŵanaŵanu ngaki pa vinthu vo wasankha kali?

Titenere kufiska vo tasankha. Nyengu zinyaki tingakhumbika kuŵanaŵaniyapu techendasankhi vakuchita. Ŵanthu a ku Nineve ŵati alapa Chiuta wangusintha vo wakhumbanga kuŵachitiya. Nyengu yinyaki, tingasintha vinthu vo tingusankha kali asani pachitika vinthu vinyaki pamwenga nkhani zinyaki.—w17.03, papeji 16-17.

Kumbi kukamba vinthu viheni vakukwaskana ndi Mkhristu munyidu nkhwakofya wuli?

Kukamba vinthu viheni va Akhristu anyidu kungachitisa kuti masuzgu ngo ngakuwi ndipu venivi vingachitisa kuti vinthu vinangikiyi limu. Kumbukani kuti kaya Mkhristu munyidu watinangiya nadi pamwenga cha, kukamba vinthu viheni vaku iyu kungasintha vinthu cha.—w17.04, peji 21.