Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  June 2017

Jani Kuchigaŵa cha Ulamuliru Waku Yehova!

Jani Kuchigaŵa cha Ulamuliru Waku Yehova!

“Wakwenere ndimwi Yehova Chiuta widu kulonde unkhankhu, ulemu ndipuso nthazi, chifukwa mukulenga vinthu vosi, ndipu chifukwa cha khumbu linu vikuŵaku kweniso vikulengeka.”—CHIV. 4:11.

SUMU: 2, 49

1, 2. Kumbi weyosi watenere kusimikizanji? (Wonani chithuzi cho che pachanya.)

NGE mo nkhani yajumpha yingukambiya, Dyaboli wakamba kuti Yehova ngwakwenere cha kulamuliya ndipu ŵanthu angaja umampha asani angajilamuliyanga ŵija. Kumbi Satana waneneska? Tiyeruzgiyi kuti ŵanthu wo asankha kujilamuliya ŵija afwengi cha ndipu ajengi kwamuyaya. Kumbi vinthu vingaŵayende umampha kwambula Chiuta? Kumbi imwi mungakondwa ukongwa asani mungaja kwamuyaya ndipuso kwambula Chiuta?

2 Palivi yo wangakumukiyani mafumbu yanga. Weyosi watenere kuyiŵanaŵaniya ukongwa nkhani iyi. Asani tichitengi viyo, tilongongi ukaboni wakuti Chiuta ndiyu ngwakwenere kulamuliya kweniso ulamuliru waki ngwamampha ukongwa. Tikhumbika so kuja kuchigaŵa cha ulamuliru waki ndi mtima widu wosi. Bayibolu lititikambiya vifukwa vo titenere kuchitiya viyo. Ŵanaŵaniyani vo Malemba ngakamba pa nkhani yakuti Yehova ndiyu ngwakwenere kulamuliya.

YEHOVA NDIYU NGWAKWENERE KULAMULIYA

3. Ntchifukwa wuli Yehova ndiyu ngwakwenere kulamuliya?

3 Yehova ndiyu ngwakwenere kulamuliya chilengedu chosi  chifukwa ndi Chiuta wanthazizosi kweniso Mulengi. (1 Mik. 29:11; Mac. 4:24) Pa lemba la Chivumbuzi 4:11, Akhristu a 144,000 wo amulamuliya ndi Yesu kuchanya akamba kuti: “Wakwenere ndimwi Yehova Chiuta widu kulonde unkhankhu, ulemu ndipuso nthazi, chifukwa mukulenga vinthu vosi, ndipu chifukwa cha khumbu linu vikuŵaku kweniso vikulengeka.” Hinya, chifukwa Yehova ndiyu wakulenga vinthu vosi, iyu ngwakwenere kulamuliya ŵanthu kweniso angelu.

4. Ntchifukwa wuli kugarukiya ulamuliru waku Chiuta nkhugwiriskiya ntchitu uheni wanangwa wo wakutipasa?

4 Palivi cho Satana wakulenga. Mwaviyo, ngwakwenere cha kulamuliya ŵanthu. Mwakugalukiya ulamuliru waku Yehova, Satana ndi ŵanthu akwamba anguchita vinthu mwakujikuzga. (Yer. 10:23) Pakuti yiwu ŵenga ndi wanangwa wakusankha vakuchita, atingi asankhengi kujilamuliya ŵija kwambula Chiuta. Kweni kumbi wanangwa uwu waŵapasanga mazaza ngakuchitiya viyo? Awa. Wanangwa wo Chiuta wakutipasa utitipasa mwaŵi wakusankha vinthu vinandi vamampha zuŵa lelosi. Chinanga kuti ve viyo, titenere cha kugalukiya ulamuliru waku Yehova yo wakutipasa umoyu. Kuchita viyo, nkhugwirisiya ntchitu uheni wanangwa widu. Taŵanthu tingajilongozga cha tija, tikhumbika ulamuliru waku Yehova.

5. Ntchifukwa wuli tisimikiza kuti vo Chiuta wasankha kuchita vaurunji?

5 Pe so chifukwa chinyaki cho tikambiya kuti Yehova ngwakwenere kulamuliya. Iyu walamuliya mwaurunji. Chiuta wanguti: “Ndini Yehova, yo walongo lisungu, cheruzgu chakunyoroka ndi urunji, pakuti vinthu ivi ndivu ndikondwa navu.” (Yer. 9:24) Iyu watende marangu nga ŵanthu ambula urunji cha pakusankha cho ntchamampha ndi chiheni. Chifukwa chakuti Yehova ndi murunji, wakupaska ŵanthu marangu. ‘Fawundeshoni ya mpandu [waki] wachifumu mburunji.’ Mwaviyo, tikayika cha kuti marangu ngaki, fundu zaki ndi vo wasankha kuchita vaurunji. (Sumu 89:14; 119:128) Chinanga kuti Satana wakamba kuti ulamuliru waku Yehova ngwambula urunji, iyu watondeka kuzisa urunji pa charu chapasi.

6. Kambani chifukwa chimoza cho tikambiya kuti Yehova ndiyu ngwakwenere kulamuliya charu.

6 Yehova ngwakwenere so kulamuliya chifukwa waziŵa vinthu kweniso we ndi zeru zakuphwere ŵanthu ndi charu. Mwakuyeruzgiyapu, Chiuta wangupasa nthazi Mwana waki zakuchizgiya matenda ngo madokotala ngatondekanga kuchizga. (Mat. 4:23, 24; Marko 5:25-29) Kwaku Yehova, ivi venga vakuziziswa cha. Iyu waziŵa mo liŵavu ligwiriya ntchitu ndipu wangachizga nthenda yeyosi pa liŵavu la munthu. Yehova we so ndi nthazi za kuyuska akufwa ndi kulekesa masoka ngachilengedu.

7. Kumbi zeru zaku Yehova ziluska wuli za ŵanthu?

7 Ŵanthu mucharu ichi ŵeche kufufuza nthowa zakujalikisiya chimangu pa mphindanu zo zichitika muvyaru vawu ndipuso muvyaru vinyaki. Kweni ndi Yehova yija yo we ndi zeru zakujalikisa chimangu pacharu chapasi. (Yes. 2:3, 4; 54:13) Asani tisambira zeru zaku Yehova, nasi tingajivwa nge mo Paulo wanguchitiya. Iyu wanguti: “Mbunandi waki cha wa chuma chaku Chiuta, zeru zaki zapachanya ukongwa ndipu waziŵa vinthu ukongwa! Palivi yo wangafiska kufufuza vyeruzgu vaki kweniso palivi yo wangabowozga nthowa zaki!”—Ŵar. 11:33.

ULAMULIRU WAKU YEHOVA NDIWU NGWAMAMPHA UKONGWA

8. Kumbi ntchinthu wuli chitikukondwesani ndi mo Yehova walamuliya?

8 Nge mo tawone, Bayibolu lilongo kuti Yehova ndiyu ngwakwenere kulamuliya. Kweniso lilongo chifukwa cho ulamuliru waki ngwamampha kuluska ulamuliru unyaki wewosi.  Chifukwa chimoza ntchakuti iyu walamuliya mwachanju. Kukamba uneneska, tikwaskika asani tiŵanaŵaniya mo Yehova walamuliya. Iyu ndi “Chiuta walisungu ndi wawezi, wambula kukwiya liŵi ndipuso wachanju chikulu ndi uneneska.” (Chit. 34:6) Chiuta watiŵatumbika ŵanthu. Iyu watitiphwere ukongwa kuluska mo tichitiya taŵeni. Mwakupambana ndi vo Dyaboli wakamba, Yehova watiŵanola cha vinthu vamampha ateŵeti ŵaki akugomezgeka. Iyu wakutipasa Mwana waki kuti tizilonde umoyu wamuyaya!—Ŵerengani Sumu 84:11; Ŵaroma 8:32.

9. Kumbi tiziŵa wuli kuti Chiuta waphwere munthu weyosi pakuyija?

9 Yehova waphwere ŵanthu wosi nge gulu. Iyu waŵanaŵaniya so weyosi pakuyija. Mwakuyeruzgiyapu, kwa vyaka 300 Yehova wangusankha akuyeruzga ndi kuŵapasa nthazi kuti ataskengi Ayisraele ku ŵanthu wo aŵasuzganga. Pa nyengu iyi, iyu wanguleka cha kuziŵa vo munthu munyaki yo wenga Muyisraele cha zina laki Ruti wachitanga. Ruti wanguleka vinthu vinandi kuti wayambi kusopa Yehova. Yehova wangumutumbika Ruti. Wangumupasa munthurumi ndi mwana. Kweni wangutumbikika so munthowa yinyaki. Asani Ruti waziyuskika, wazamuziŵa kuti Mesiya wangutuliya mumphapu yaki. Ŵanaŵaniyani mo iyu wazamuvwiya kuziŵa kuti mbiri ya umoyu waki yingulembeka m’Bayibolu mubuku lo liziŵika ndi zina laki.—Ruti 4:13; Mat. 1:5, 16.

10. Ntchifukwa wuli tingakamba kuti Yehova walamuliya mwankhaza cha?

10 Yehova walamuliya mwankhaza cha kweniso ngwakukandiliza cha. Mu ulamuliru waki ŵanthu aja mwawanangwa kweniso akondwa. (2 Ŵakor. 3:17) Davidi wangukamba kuti: “Ukuru ndi unkhankhu ve pamasu paki [paku Chiuta]; nthazi ndi chimwemwe ve pamalu ngaki ngo waja.” (1 Mik. 16:7, 27) Mwakuyanana ŵaka, Etani yo wakulembaku buku la Sumu wangulemba kuti: ‘Mbakukondwa ŵanthu wo adaniriza mwalikondwa. Wo atenda mu ukweru wa chisku chinu, Imwi Yehova. Yiwu akondwa mu zina linu zuŵa losi ndipu akwezeka mu urunji winu.’—Sumu 89:15, 16.

11. Kumbi tikhumbika kuchitanji kuti tileki kukayika kuti ulamuliru waku Yehova ngwamampha?

11 Asani nyengu zosi tiŵanaŵaniya umampha waku Yehova, tikayikiyengi cha kuti ulamuliru waki ngwamampha ukongwa. Tingajivwa nge mo wanguchitiya yo wakulembaku buku la Sumu. Iyu wanguti: “Kuja zuŵa limoza munyumba yinu nkhwamampha ukongwa kuluska kuja kunyaki vyaka masauzandi.” (Sumu 84:10) Yehova Mulengi widu waziŵa vo tikhumbikiya kuti tikondwengi ndipu watitipasa vakukhumbika vosi pa umoyu. Tiyanduwa ndi marangu ngosi ngo iyu wakutipasa, chinanga kuti nyengu zinyaki tingakhumbika kuleka vinthu vo titanja kuti tichiti vo Yehova wakhumba.—Ŵerengani Yesaya 48:17.

12. Kumbi chifukwa chikulu cho tijaliya kuchigaŵa cha ulamuliru waku Yehova ntchakuti wuli?

12 Bayibolu lilongo kuti pavuli pa Ulamuliru Waku Yesu wa Vyaka 1000, ŵanthu anyaki azamugalukiya ulamuliru waku Yehova (Chiv. 20:7, 8) Kumbi ntchinthu wuli cho chazamuchitisa kuti achiti viyo? Asani Dyaboli wazifwatulika wazamulandizga ŵanthu kuti aleki kuvwiya Yehova. Iyu waja wachichita ivi kwamba kali. Dyaboli wazamuchita chechosi kuti ŵanthu avwani kuti angaja kwamuyaya kwambula kuvwiya Yehova. Fundu yeniyi njaboza. Kweni tikhumbika kujifumba kuti: “Kumbi isi tazamulandizgika ndi boza ili? Asani titanja Yehova ndi kumuteŵete chifukwa chakuti ngwamampha kweniso ngwakwenere kulamuliya, tisuskengi maboza ngaku Satana. Tikhumbengi so ulamuliru unyaki cha kuluska waku Yehova chifukwa tiziŵa kuti iyu ngwakwenere kulamuliya kweniso ngwachanju.

 JANI AKUGOMEZEKA KU ULAMULIRU WAKU CHIUTA

13. Kumbi tingalongo wuli kuti te kuchigaŵa cha ulamuliru waku Chiuta?

13 Tikhumbika nadi kuja kuchigaŵa cha ulamuliru waku Yehova ndi mtima widu wosi. Nge mo tawone, iyu ngwakwenere kulamuliya ndipu ulamuliru waki ngwamampha ukongwa. Tingaja kuchigaŵa cha ulamuliru waki asani tilutirizengi kumuteŵete mwakugomezeka. Kumbi tingalongo so wuli kuti te kuchigaŵa chaku Yehova? Tingachita viyo asani tichita vinthu nge mo iyu wachitiya. Ivi vingalongo kuti titanja ulamuliru waki kweniso te kuchigaŵa chaki.—Ŵerengani Ŵaefeso 5:1, 2.

14. Kumbi ŵara ndi mitu ya mabanja angamuyezga wuli Yehova?

14 Asani tiŵerenga Bayibolu tisambira kuti Yehova walamuliya mwachanju. Mitu ya mabanja ndi ŵara mumpingu wo atanja ulamuliru waki nawu akhumbika kuchita vinthu mwankhaza cha. M’malu mwaki, akhumbika kuyezga Yehova. Wakutumika Paulo wayezganga Chiuta ndi Mwana waki. (1 Ŵakor. 11:1) Paulo walengesanga anyaki cha pamwenga kuŵachichizga kuti achiti vinthu vamampha. M’malu mwaki, wachitanga kuŵaŵeyere. (Ŵar. 12:1; Ŵaef. 4:1; Fil. 8-10) Umu ndimu Yehova wachitiya vinthu. Mwaviyo, wosi wo ŵe kuchigaŵa cha ulamuliru waki atenere kuchita viyo.

15. Kumbi tilongo wuli kuti te kuchigaŵa cha ulamuliru waku Yehova?

15 Kumbi isi tichita nawu wuli ŵanthu wo Chiuta waŵapaska udindu wakulongozga? Asani tichita vinthu mwakukoliyana nawu, tilongo kuti te kuchigaŵa cha ulamuliru waku Yehova. Chinanga kuti tingaleka kuvwisa pamwenga kukoliyana ndi vo wo alongozga asankha, tikhumbika mbwenu kuŵavwiya. Ivi vipambana ukongwa ndi mo ŵanthu a mucharu achitiya kweni ndimu atenere kuchitiya ŵanthu wo ŵe kuchigaŵa cha ulamuliru waku Yehova. (Ŵaef. 5:22, 23; 6:1-3; Ŵah. 13:17) Tiyanduwa ukongwa asani tichita viyo, chifukwa ndivu Chiuta wakhumba kuti tichitengi.

16. Kumbi ŵanthu wo ŵe kuchigaŵa cha ulamuliru waku Chiuta asankha wuli vakuchita?

 16 Tingalongo so kuti te kuchigaŵa cha ulamuliru waku Chiuta pa vinthu vo tisankha. Yehova watitipasa marangu pa chechosi cha. M’malu mwaki watitikambiya maŵanaŵanu ngaki kuti watilongozgi. Mwakuyeruzgiyapu, wakutipasa marangu cha pa nkhani ya vakuvwala. Kweni wakamba ŵaka kuti tijitowesengi mwaulemu kweniso tisankhengi vakuvwala vakwenere Mkhristu. (1 Tim. 2:9, 10) Iyu wakhumba so cha kuti tichitengi vinthu vo vingaguŵisa anyidu. (1 Ŵakor. 10:31-33) Asani pakusankha vinthu titende maŵanaŵanu ngaku Yehova, m’malu mwakwende vo isi titanja, tilongo kuti te kuchigaŵa cha ulamuliru waki.

Muchitengi vinthu vakulongo kuti mwe ku chigaŵa cha ulamuliru waku Chiuta pa vinthu vo tisankha kweniso vo tichita mubanja lidu (Wonani ndimi 16-18)

17, 18. Kumbi ndi nthowa nizi zo ŵanthu akutolana angalongore kuti ŵe kuchigaŵa cha ulamuliru waku Yehova?

17 Tiyeni tiwoni nthowa yimoza yo Akhristu akutorana angalongole kuti avwiya marangu ngaku Yehova kweniso ŵe kuchigaŵa cha ulamuliru waki. Tiyeruzgiyi kuti mu nthengwa yinu mwe masuzgu ngakulu ngo mwaŵanaŵaniyangaku cha kuti mungakumana nangu. Asani muwona kuti masuzgu ngo mukumana nangu ngakulu, mungachita umampha kuŵanaŵaniya mo Yehova wachitiyanga ndi Ayisraele. Iyu wajiyeruzgiyanga kuti wenga murumu wa Ayisraele. (Yes. 54:5; 62:4) “Nthengwa” iyi yenga ndi masuzgu! Kweni Yehova wanguŵaleka liŵi cha Ayisraele. Waŵagowokiyanga mwakuwerezawereza ndipu wangugomezeka ku phanganu lo wanguchita nawu. (Ŵerengani Sumu 106:43-45.) Kumbi isi tikwaskika cha ndi chanju cho Yehova walongonga?

18 Mwakuyanana ŵaka, ŵanthu akutorana wo atanja marangu ngaku Yehova ayesesa kuti amuyezgengi. Asani akumana ndi masuzgu, agwirisiya ntchitu nthowa zambula kukoliyana ndi Malemba cha kuti amalisi nthengwa. Yiwu aziŵa kuti Yehova ndiyu wakuŵamanga pamoza. Aziŵa so kuti iyu wakhumba kuti angalekananga cha. Malemba ngakamba kuti nthengwa yingamala pijapija asani munyaki wachita chigololu. Ndipu asani ivi vachitika, munyaki wangaŵa ndi wanangwa wakuyirwa pamwenga kuto. (Mat. 19:5, 6, 9) Asani ŵanthu akutorana achita vosi vo angafiska kuti vinthu viyendengi umampha mu nthengwa yawu, alongo kuti ŵe kuchigaŵa cha ulamuliru waku Yehova.

19. Kumbi tikhumbika kuchitanji asani tabuda?

19 Chifukwa chakuti te akubuda, nyengu zinyaki tingachita vinthu vo vingakwiyisa Yehova. Iyu waziŵa venivi ndichu chifukwa chaki wakutipasa sembi yaku Khristu. Mwaviyo, asani tabuda, titenere kupempha Yehova kuti watigowoke. (1 Yoh. 2:1, 2) M’malu mwakusuzgika maŵanaŵanu ndi vinthu viheni vo tikuchita, tikhumbika ŵaka kusambirapu kanthu. Asani tilutirizengi kuja pa ubwezi ndi Yehova, watigowokiyengi ndipu watiwovyengi kuti tileki kusuzgika maŵanaŵanu. Iyu wazakutiwovya kumalana ndi suzgu yakuyanana waka kunthazi.—Sumu 103:3.

20. Ntchifukwa wuli sonu tikhumbika kulongo kuti te kuchigaŵa cha ulamuliru waku Chiuta?

20 Mucharu chifya tosi tazamuja kuchigaŵa cha ulamuliru waku Yehova ndipu tazamusambira nthowa zaki zaurunji. (Yes. 11:9) Chinanga ndi sonu napu, Yehova watitisambiza vinthu vinandi. Nkhani yakukwaskana ndi yo ngwakwenere kulamuliya ye pafupi kumala. Mwaviyo, sonu ndi nyengu yakuti tichiti vosi vo tingafiska kuti tilongo kuti te kuchigaŵa cha ulamuliru waku Chiuta. Tingachita ivi asani titimuvwiya, titimuteŵete mwakugomezeka ndi kuyesesa kumuyezga mu vakuchita vidu vosi.