Julani

Lutani pa vo ve mukati

Kumbi Yesu Wangufwiya Nadi Ini?

Kumbi Yesu Wangufwiya Nadi Ini?

MU Bayibolu mwe mazu ngakutuliya pasi pa mtima nga ŵanthu wo ‘ŵenga nge isi.’ (Yako. 5:17) Mwakuyeruzgiyapu, tingavwisa vo Paulo wang’anamuwanga pakukamba mazu ngo nge pa Aroma 7:21-24. Iyu wanguti: “Asani ndikhumba kuchita cho ntchamampha, chiheni chija mwaku ini. . . . Ndamunthu wakusuzgika ini!” Mazu yanga, ngatitichiska asani tilimbana ndi vinthu vo tinangisa.

Paulo wangukamba so mazu nganyaki ngo ngalongo mo wavwiyanga. Pa Agalatiya 2:20, wangukamba mwakusimikiza kuti Yesu ‘wamuyanjanga ndipu wakujipereka chifukwa chaku [iyu]!’ Kumbi ndimu namwi muvwiya? Kweni akhumba ndimu muvwiya cha nyengu zinyaki.

Asani tiwona kuti ndisi ambula kwenere chifukwa cha vinthu viheni vo tachitanga kali, nyengu zinyaki tingaŵanaŵana kuti Yehova wangatiyanja cha pamwenga kutigowoke. Venivi vingachitiska so kuti tileki kuwona sembi yaku Yesu nge mphasu yo wakutipaska pakutija. Kumbi Yesu wakhumba kuti tiwonengi sembi yaki nge mphasu yo wakutipaska pakutija? Asani ndimu wakhumbiya, ntchinthu wuli cho chingatiwovya kuti tiyiwonengi viyo? Tiyeni tikambiskani mafumbu ngenanga.

MO YESU WAWONE SEMBI YAKI

Yesu wakhumba kuti tiwonengi sembi yaki nge mphasu yo wakupereka ku munthu weyosi pakuyija. Kumbi tiziŵa wuli venivi? Wonani nkhani yo ye pa Luka 23:39-43. Munthu munyaki wangukhomeka pa chimiti pafupi ndi Yesu. Iyu wangukamba kuti wangukhomeka chifukwa cha vinthu viheni vo wanguchita. Munthu uyu watenere kuti wangunanga chinthu chikulu ukongwa, chifukwa chilangu cho wangupaskika chaperekekanga ku ŵanthu wo achita vinthu viheni ukongwa. Chifukwa cha chitima, iyu wangupempha Yesu kuti: “Uzindikumbuki asani wazisere mu Ufumu waku.”

Kumbi Yesu wangumumukanji? Ŵanaŵaniyani urwirwi wo wavwanga pa nyengu yo wang’anamukiyanga ku munthu mwenuyu kuti wamumuki. Chinanga kuti wavwanga urwirwi, Yesu watenere kuti wangumwemwete ndi kumukambiya kuti: “Nditikukambiya msanawale, wazamuja ndi ini mu Paradayisu.” Mazu yanga ngatenere kuti ngangukumbusa munthu uyu kuti ‘Mwana wa munthu wakuza . . . kuzipereka umoyu waki sembi yakuwombole ŵanthu anandi.’ (Mate. 20:28) Kweni wonani kuti pa lemba ili, Yesu wangudidimiza fundu yakuti wangufwiya munthu weyosi pakuyija. Iyu wangulongoro nayu mwaubwezi ndipu wangugwiriskiya ntchitu mazu ngakuti “wazamuja” kweniso ngakuti “ini.” Ndipu wangulongo kuti wakambiyanga munthu uyu pakuyija kuti wazamuja mu paradayisu pacharu chapasi.

Tikayika cha kuti Yesu wakhumbanga kuti munthu uyu wawonengi kuti sembi yaki nayu yimukwasengi pakuyija. Asani Yesu wawonanga kuti wangufwiya chigeŵenga ichi cho chateŵetiyanga Chiuta cha, tikayika cha kuti wawona so viyo ndi Mkhristu wakubatizika yo wateŵete Chiuta. Kumbi ntchinthu wuli cho chingatiwovya kuti tiwonengi kuti Yesu wakutifwiya pakutija chinanga kuti kuvuli tinguchitapu vinthu vinyaki viheni?

 VO VINGUWOVYA PAULO

Paulo waziŵanga kuti Yesu wangumufwiya chifukwa cha uteŵeti wo wangumupaska. Ntchifukwa wuli tikamba viyo? Paulo wangukamba kuti: “Ndiwonga Khristu Yesu Ambuyafwi, yo wakundipaska nthazi, chifukwa wangundiwona kuti nde wakugomezgeka pakundipaska uteŵeti, chinanga kuti kali ndenga wakunyoza, wakutombozga ndipuso ndenga munthu waganyavu.” (1 Timo. 1:12-14) Chinanga kuti pakwamba Paulo wachitanga vinthu viheni kweni uteŵeti wo wangupaskika ungumuwovya kuziŵa kuti Yesu ngwalisungu, ngwachanju kweniso watimuthemba. Mwakuyanana waka, nasi Yesu wakutipaska uteŵeti, weyosi pakuyija. (Mate. 28:19, 20) Kumbi uteŵeti wakupharazga wo Yesu wakutipaska utitiwovya kuziŵa kuti iyu wakutifwiya?

Albert wangusezgeka kwa vyaka pafufupi 34. Wati waweriyamu wangukamba kuti: “Nyengu zosi ndiŵanaŵaniya ubudi wo ndinguchita. Kweni asani ndipharazga, ndituvwa kuti Yesu wandipaska uteŵeti nge mo wakutumika Paulo wavwiyanga. Venivi vitindikondwesa ukongwa ndipu ndija ndi maŵanaŵanu ngamampha ngakukwaskana ndi umoyu wangu kweniso vo ndilindizga kunthazi.”—Sumu 51:3.

Penipo musambira Bayibolu ndi ŵanthu akupambanapambana, muŵasimikiziyengi kuti Yesu ngwalisungu kweniso watiŵayanja

Allan wenga chigeŵenga kweniso wandewu wechendasambiri uneneska. Iyu wangukamba kuti: “Ndeche kukumbuka nkhaza zo ndachitiyanga ŵanthu. Nyengu zinyaki ndisuzgika ukongwa maŵanaŵanu. Kweni ndiwonga Yehova kuti watindizomereza kukambiyaku anyangu uthenga wamampha chinanga kuti nde munthu wakubuda. Asani ndiwona mo ŵanthu achitiya ndi uthenga wamampha, vitindikumbusa kuti Yehova ngwamampha kweniso ngwachanju. Ndiwona kuti iyu watindigwiriskiya ntchitu kuti ndiwovyi ŵanthu wo achita vinthu viheni.”

Kupharazga kutitiwovya kuti tiŵanaŵanengi ndi kuchita vinthu vamampha. Uteŵeti wenuwu utitiwovya so kuziŵa kuti Yesu ngwalisungu, ngwachanju ndipuso watitithemba.

YEHOVA NDI MUKULU KULUSKA MITIMA YIDU

Mtima widu ungalutirizga kutisuska chifukwa cha vinthu viheni vo tinguchita mpaka po charu chaku Satana chazamutuzikiyapu. Kumbi ntchinthu wuli cho chingatiwovya kuti mtima widu uleki kutisuska?

Kanandi Jean wasuzgika maŵanaŵanu chifukwa cha vinthu viheni vo wachitanga pa unamana. Iyu wangukamba kuti: “Fundu yakuti ‘Chiuta ndi mukulu kuluska mitima yidu,’ yitindichiska ukongwa.” (1 Yoha. 3:19, 20) Nasi tingachiskika asani tingaziŵa kuti Yehova ndi Yesu aziŵa umampha ubudi widu kuluska taŵeni. Tingaluwanga cha kuti akupereka sembi ku ŵanthu akufikapu cha, kweni ku ŵanthu akubuda wo alapa.—1 Timo. 1:15.

Tisimikiziya mitima yidu kuti Yesu wakufwiya isi pakutija asani tiŵanaŵaniya mo wachitiyanga ndi ŵanthu akubuda kweniso asani tichita vosi vo tingakwanisa kuti tifiski uteŵeti wo wakutipaska. Asani tichitengi viyo, tikambengi nge mo Paulo wangukambiya kuti: “[Yesu] wakundiyanja ndipu wakujipereka chifukwa chaku ini.”