Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  July 2017

Mungavikiliya Maŵanaŵanu Nginu

Mungavikiliya Maŵanaŵanu Nginu

ZIŴANI kuti mwe pa nkhondu! Murwani winu mura Satana, wagwirisiya ntchitu chidya chakofya ukongwa kuti wakuthereskeni. Kumbi wagwirisiya ntchitu chidya wuli? Iyu wagwirisiya ntchitu nkhani zaboza. Satana wagwirisiya ntchitu chidya ichi kuti wapweteki liŵavu linu cha kweni maŵanaŵanu nginu.

Paulo waziŵanga kuti nkhani zaboza zaku Satana zenga zakofya kweni Akhristu anyaki aziŵanga cha. Mwakuyeruzgiyapu, Akhristu anyaki mumpingu wa ku Korinte ajithembanga chifukwa aŵanaŵananga kuti mbakukho mu uneneska ndipu angawa cha. (1 Ŵakor. 10:12) Ndichu chifukwa chaki Paulo wanguŵatcheŵeska kuti: “Nditopa kuti panyaki nge mo njoka yingunyenge Eva ndi uryarya waki, maŵanaŵanu nginu nganganangika ndi kuleka uneneska kweniso kuja akutowa, vo vitenere Khristu.”—2 Ŵakor. 11:3.

Vo Paulo wangukamba vilongo kuti tikhumbika cha kujithemba. Kuti mupundi nkhondu iyi, mutenere kuziŵa kofya kwa nkhani zaboza ndi kujivikiliya.

KUMBI NKHANI ZABOZA ZAKOFYA WULI?

Nkhani zaboza zilandizga ŵanthu, zitiŵatimbanyizga maŵanaŵanu ndi vakuchita vawu. Buku linyaki likamba kuti nkhani zaboza “ziheni, zakofya kweniso zakwanjiya.” Ŵanthu akamba kuti nkhani zenizi ‘zikamba vinthu vauneneska cha, zitimbanyizga maŵanaŵanu nga ŵanthu kweniso zitiŵalandizga.’—Propaganda and Persuasion.

Kumbi nkhani zaboza zakofya wuli? Nkhani izi zakofya chifukwa zingananga maŵanaŵanu ngidu kamanakamana kwambula kuziŵa. Izu ze nge mphepu yiheni yo titiyiwona cha pamwenga kuvwa fungu laki. Chifukwa chakuti ziziŵika cha, munthu munyaki zina laki Vance Packard wangukamba kuti: “Tanandi tilongozgeka ndi kulandizgika ndi nkhani zenizi kwambula kuziŵa.” Munthu munyaki wangukamba so kuti chifukwa cha nkhani zaboza, anthurumi ndi anthukazi anyaki “achita vinthu vakofya ukongwa,” nge ‘nkhondu, kubayanga ŵanthu chifukwa chakupambana nawu  mtundu, kutinkhana ndi ŵanthu a mtundu unyaki, kusuzga ŵanthu chifukwa cha chisopa chawu ndipuso vinthu vinyaki viheni.’—Easily Led—A History of Propaganda.

Asani ŵanthu angatilandizga ndi nkhani zawu zaboza kwe uli Satana? Iyu waziŵa jalidu la ŵanthu chifukwa waja wachiwona vakuchita vawu kutuliya po akulengeke? Kweniso “charu chosi” walamuliya ndiyu. Mwaviyo, wangagwirisiya ntchitu chechosi cha m’charu ichi kuti wawandisi maboza ngaki. (1 Yoh. 5:19; Yoh. 8:44) Satana ‘wabulumutizga maŵanaŵanu nga ŵanthu’ ndipu sonu ‘walandizga charu chosi chapasi.’ (2 Ŵakor. 4:4; Chiv. 12:9) Kumbi mungachita wuli kuti muleki kulandizgika ndi nkhani zaki zaboza?

JANI NDI CHIVWANU CHAKUKHO

Yesu wangukamba fundu yo yingawovya munthu kuti waleki kupusikika ndi maboza ngaku Satana. Iyu wanguti: “Muziŵengi uneneska ndipu uneneska ukufwatuweningi.” (Yoh. 8:31, 32) Asani kwe nkhondu, kanandi msilikali wakhumbika kuziŵa nkhani zauneneska chifukwa arwani angawandisa nkhani zaboza kuti amulandizgi. Kumbi ndi nunkhu ko mungasaniya uneneska? Yehova watipasa Mazu ngaki Bayibolu. Mwenumu mungasaniyamu uneneska wo ungakuwovyani kuti muleki kulandizgika ndi maboza ngaku Satana.—2 Tim. 3:16, 17.

Satana waziŵa fundu iyi. Mwaviyo, wagwirisiya ntchitu vinthu va m’charu kuti tilekengi kuŵerenga ndi kusambira Bayibolu. Mungalandizgikanga cha ndi mauryarya ngaki. (Ŵaef. 6:11) Mukhumbika ‘kuvwisa umampha ukongwa’ uneneska kuti muleki kulandizgika. (Ŵaef. 3:18) Kuti muchiti ivi, mukhumbika kuŵikapu mtima. Noam Chomsky wangukamba kuti: “Palivi yo wangaŵika uneneska mu mutu winu. Mukhumbika kusambira mwija kuti muwuziŵi.” ‘Mungasambira uneneska pakumwija’ asani muŵikapu mtima ‘kufufuza Malemba zuŵa lelosi.’—Mac. 17:11.

Kuti muvikiriyi maŵanaŵanu nginu, mukhumbika kuziŵa kofya kwa nkhani zaboza ndi kuchitapu kanthu

Satana wakhumba cha kuti muŵanaŵaniyengepu pamwenga kuvwisa fundu zo mwavwa. Chifukwa wuli? Buku linyaki likamba kuti nkhani zaboza “zija zakukopa ukongwa asani ŵanthu aleka kuŵanaŵaniyapu.” (Media and Society in the Twentieth Century) Mwaviyo, mungagomezganga cha vo mwavwa kwambura kuŵanaŵaniyapu. (Nthanthi 14:15) Mugwirisiyengi ntchitu lusu linu lakuŵanaŵana lo  Chiuta wakukupasani kuti muje ndi chivwanu chakukho.—Nthanthi 2:10-15; Ŵar. 12:1, 2.

SATANA WANGATIGAŴANISANGA CHA

Asilikali angagwirisiya ntchitu nkhani zaboza kuti agongowesi arwani ŵawu kweniso kuti aŵevi nthazi zakuchitiya nkhondu. Yiwu angachitisa kuti arwani ŵawu apumani ŵijaŵija pamwenga kujipatuwa ku gulu la asilikali anyawu. Vivwika kuti mura wa Asilikali ku German, wangukamba kuti chifukwa chimoza cho anguthereskeke pa Nkhondu Yakwamba ya Pacharu Chosi, chenga chakuti ŵanthu angutimbanyizgika maŵanaŵanu ndi nkhani zaboza za arwani.” Mwakuyanana waka, Satana wangatigaŵanisa mumpingu. Mwakuyeruzgiyapu, iyu wangachitisa kuti abali ndi azichi alekengi kukoliyana pamwenga ajipatuwi ku gulu laku Yehova chifukwa cha vinthu vinyaki vo yiwu awona kuti vambula urunji pamwenga vitenda umampha cha.

Mungapusisikanga cha! Mazu ngaku Chiuta ngangakuwovyani. Mwakuyeruzgiyapu, pa nkhani yakukoliyana ndi abali pamwenga azichi, Bayibolu lititichiska kuti tilutirizgi “kugowokiyana ndi mtima wosi” kweniso kuti timalisengi nkhani mwaliŵi. (Ŵakol. 3:13, 14; Mat. 5:23, 24) Bayibolu likamba kuti tingajipatuwanga cha ku mpingu. (Nthanthi 18:1) Mukhumbika kujisanda kuti muziŵi asani mwe akunozgeka kukana nkhani zaboza zaku Satana. Jifumbeni kuti: ‘Kumbi ndinguchita wuli mubali pamwenga mzichi wati wandikwiyiska? Kumbi ndinguyende mzimu wacharu pamwenga waku Chiuta?’—Ŵag. 5:16-26; Ŵaef. 2:2, 3.

MUNGAZOMEREZANGA CHA KUTI CHIVWANU CHINU CHIDEWEZEKI

Msilikali yo waleka kugomezga mulongozgi waki wangarwa umampha cha nkhondu. Arwani angakamba nkhani zaboza zo zingachitisa kuti msilikali waleki kugomezga mulongozgi waki. Yiwu angakamba kuti: “Mungaŵagomezganga cha alongozgi ŵinu!” ndipu “Mungazomerezganga cha kuti akuserezeni mumasuzgu!” Kuti vo akamba viwonekengi nge vauneneska, yiwu asaniriyapu mwaŵi asani alongozgi yaŵa anangisa chinthu chinyaki. Venivi ndivu Satana wachita. Iyu wayesesa kuti tileki kugomezga ŵanthu wo Yehova waŵaŵika kuti atilongozgengi.

Kumbi mungajivikiliya wuli? Mungatuwangamu cha mu gulu laku Yehova ndipu  muwovyengi wo iyu waŵaŵika kuti alongozgengi, chinanga kuti mbambula kufikapu. (1 Ŵat. 5:12, 13) Maŵanaŵanu nginu ngangasukunyikanga liŵi cha asani mwavwa uthenga waboza wakutuliya ku ŵanthu akugaruka pamwenga ŵanthu anyaki, chinanga kuti vo angakamba vingawoneka nge vauneneska. (2 Ŵat. 2:2; Tito 1:10) Mugwirisiyengi ntchitu ulongozgi wo Paulo wangukambiya Timote. Mutenere kulutirizga kugomezga uneneska wo mukusambira ndipu mungaluwanga cha ŵanthu wo akukusambizani. (2 Tim. 3:14, 15) Pe vifukwa vinandi vakugomezge nthowa yo Yehova wagwirisiya ntchitu pakutisambiza uneneska. Iyu wagwirisiya ntchitu nthowa iyi kwa vyaka pafupifupi 100.—Mat. 24:45-47; Ŵah. 13:7, 17.

MUNGAWERIYANGA VULI CHA CHIFUKWA CHA MANTHA

Satana wangagwirisiya so ntchitu nthowa yinyaki kuti wakupusiseni. Iyu wangakuwofyezani. Buku linyaki likamba kuti kuwofyeza ndi nthowa “yimoza yakali ukongwa yakupusisiya” ŵanthu (Easily Led—A History of Propaganda). Mwakuyeruzgiyapu, Pulofesa munyaki wa ku Britain zina laki Philip M. Taylor, wanguti Asiriya awofyezanga arwani ŵawu ndi kukamba nkhani zaboza kuti aŵalamuliyengi. Satana wangagwirisiya ntchitu kopa ŵanthu, kopa kutombozgeka, kopa nyifwa pamwenga kopa vinthu vinyaki kuti wakulamuliyeningi kweniso kuti muwere vuli pakuteŵete Yehova.—Yes. 8:12; Yer. 42:11; Ŵah. 2:15.

Mungamuzomerezanga cha Satana kuti wakugongoweseni pamwenga kuti muleki kuja akugomezgeka chifukwa cha mantha. Yesu wanguti: “Ungaŵawopanga cha wo abaya liŵavu pe kwambula kuchita chinthu chinyaki chechosi chakujumpha yapa.” (Luka 12:4) Mutenere kugomezga ndi mtima wosi layizgu laku Yehova lakuti wakuvikiliyeningi, wakupaseningi ‘nthazi yakujumpha yo mutuŵa nayu’ ndipuso wakuwovyeningi kumalana ndi vosi vo Satana wangachita kuti wakuwofyezeni ndi chilatu chakuti mutheri.—2 Ŵakor. 4:7-9; 1 Pet. 3:14.

Nyengu zinyaki mungagongowa pamwenga kuchita mantha. Kweni mutenere kukumbuka vo Yehova wangukamba pakuchiska Yoswa. Iyu wanguti: “Uŵi wanthazi ndipu ukhwimi mtima. Ungawopanga cha pamwenga kuchita mantha, chifukwa Yehova Chiuta waku we nawi kwekosi ko ulutengi.” (Yos. 1:9) Asani mwayamba kufipa mtima, mukambiyengi Yehova vosi vo vitikufipisani mtima. Ziŵani kuti ‘chimangu chaku Chiuta . . . chivikiliyengi mtima winu ndi maŵanaŵanu nginu’ kuti muje ndi nthazi zakukaniya maboza ngosi ngaku Satana.—Ŵaf. 4:6, 7, 13.

Kumbi mukumbuka maboza ngo Rabishake, yo wangutumika ndi fumu ya Asiriya, wangukambiya ŵanthu aku Chiuta? Iyu wanguŵakambiya kuti, ‘Palivi cho chingakuvikiliyani kwa Asiriya. Chinanga ndi Chiuta winu Yehova, palivi cho wangakuchitiyani.’ Iyu wangukamba so kuti: ‘Yehova ndiyu watikambiya kuti tinangi charu ichi.’ Kumbi Yehova wangumukanji? Iyu wangukambiya Hezekiya kuti: “Ungawopanga cha chifukwa cha mazu ngo wavwa, . . . ngo ateŵeti a fumu ya Asiriya andinyoza nangu.” (2 Ŵakar. 18:22-25; 19:6) Iyu wangutumiza mungelu yo wangubaya asilikali a Asiriya 185,000 usiku umoza!—2 Ŵakar. 19:35.

JANI AZERU NDIPU MUVWIYENGI YEHOVA NYENGU ZOSI

Kumbi mukuwoneliyapu vidiyo yo munthu munyaki waziŵanga cha kuti wapusisika? Kumbi mungulongoro mwija mumtima kuti: ‘Kuŵagomezga cha! Atikupusika.’ Ŵanaŵaniyani kuti angelu nawu atikukambiyani kuti: “Ungapusisikanga cha ndi maboza ngaku Satana!”

Mwaviyo, mungavwiyanga cha nkhani zaboza zaku Satana. (Nthanthi 26:24, 25) Muvwiyengi Yehova ndi kumugomezga mu vosi vo muchita. (Nthanthi 3:5-7) Iyu watikuyanjani ndipu watikupemphani kuti: “Uje wazeru wamwana wangu, ndipu ukondwesi mtima wangu.” (Nthanthi 27:11) Asani muchitengi viyo, muvikiliyengi maŵanaŵanu nginu!