Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  July 2017

Yehova ‘Wakuwovyeni Kuti Mufiski Vosi vo Mukhumba Kuchita’

Yehova ‘Wakuwovyeni Kuti Mufiski Vosi vo Mukhumba Kuchita’

“Kondwa mwaku Yehova ndipu wakupasengi vo mtima waku ukhumba.”—Sumu 37:4.

SUMU: 11, 141

1. Kumbi ndi vinthu nivi vo achinyamata atenere kuŵanaŵaniya, nanga ntchifukwa wuli atenere cha kufipa mtima ukongwa? (Wonani chithuzi cho che pachanya.)

ACHINYAMATA mungazomereza kuti munthu wechendayambi ulendu wakhumbika kunozgeke. Umoyu wenge ulendu. Mutenere kunozgeke mweche achinyamata vo mwazamuchita kunthazi. Kukamba uneneska kusankha vo mukhumba kuchita kungaŵa kwakusuzga. Msungwana munyaki zina laki Heather wangukamba kuti: “Vakuchitisa mantha chifukwa ukhumbika kusankha vo uchitengi pa umoyu waku wosi.” Kweni mungachitanga mantha cha. Yehova wangukambiya ŵanthu ŵaki kuti: “Ungachitanga mantha cha, chifukwa nde nawi. Ungafipanga mtima cha pakuti ndini Chiuta waku. Ndikukhwimisengi, hinya, ndikuwovyengi.”—Yes. 41:10.

2. Kumbi muziŵa wuli kuti Yehova wakhumba kuti muzikondwi kunthazi?

2 Yehova wakhumba kuti musankhi mwazeru vo mwazamuchita kunthazi. (Wak. 12:1; Mat. 6:20) Iyu wakhumba kuti mukondwengi. Vinthu vakutowa vo muwona, kuliya kwa vinthu muchilengedu ndipuso kunowa kwa vakurya vilongo kuti Yehova wakhumba kuti mukondwengi. Kweniso watitiphwerere ndi kutisambiza kuti tijengi ndi umoyu wamampha.  Ŵanthu wo akana ulongozgi waku Yehova watiŵakambiya kuti: “Musankha vinthu vambula kundikondwesa. . . . Awonani! Ateŵeti ŵangu akakondwanga, kweni imwi mukalengeskekanga. Awonani! Ateŵeti ŵangu akakambulanga ndi likondwa chifukwa cha mtima wawu wamampha.” (Yes. 65:12-14) Yehova watumbikika asani ŵanthu ŵaki asankha vinthu mwazeru.—Nthanthi 27:11.

VO VINGAKUPASANI LIKONDWA

3. Kumbi Yehova wakhumba kuti muchitengenji?

3 Kumbi Yehova wakhumba kuti muchitengenji? Iyu wangulenga ŵanthu kuti akondwengi chifukwa chakumuziŵa ndipuso kumuteŵete mwakugomezgeka. (Sumu 128:1; Mat. 5:3) Ivi vakupambana ndi mo wakulenge nyama. Izu zigutiskika ŵaka ndi kurya, kumwa ndipuso kubalana. Chiuta wakhumba kuti mukondwengi ndi vo mukhumba kuchita pa umoyu winu kuluska mo nyama zichitiya. Mulengi winu ndi Chiuta wachanju kweniso walikondwa yo wakulenga ŵanthu “muchikozgu chaki.” (2 Ŵakor. 13:11; 1 Tim. 1:11; Chiy. 1:27) Mukondwengi asani muchitengi vo Chiuta widu wachanju wakhumba. Kumbi imwi vikukuchitikiyanipu vo vikambika pa lemba ili, lo likamba kuti: “Kupaska kuchitiska kuti munthu wakondwengi ukongwa kuluska kulonde”? (Mac. 20:35) Ivi vakukhumbika ukongwa pa umoyu wa ŵanthu. Mwaviyo, Yehova wakhumba kuti vo mukhumba kuchita vilongongi kuti mutanja iyu ndi anyinu.—Ŵerengani Mateyu 22:36-39.

4, 5. Kumbi Yesu wakondwanga ndi vinthu nivi?

4 Yesu Khristu ntchakuwoniyapu chamampha kwaku imwi achinyamata. Tikayika cha kuti iyu weche mwana waseŵenga ndipuso wakondwanga. Mazu ngaku Chiuta ngakamba kuti pe “nyengu yakuseka . . . ndi nyengu yakuvina.” (Wak. 3:4) Yesu wenga so pa ubwezi wamampha ndi Yehova chifukwa wasambiranga Malemba. Pa nyengu yo wenga ndi vyaka 12, asambizi wo ŵenga pa nyumba yakusopiyamu anguzizwa “ndi zeru zaki ndipuso mo wamukiyanga mafumbu.”—Luka 2:42, 46, 47.

5 Yesu wati wakuwa wakondwanga pa umoyu waki. Ntchinthu wuli chamukondwesanga? Iyu waziŵanga kuti pa vinthu vo Chiuta wakhumbanga kuti wachiti, wakhumbikanga so ‘kupharazga uthenga wamampha kwa akavu . . . kweniso kuti achibulumutiya ayambi kuwona.’ (Luka 4:18) Yesu wakondwanga kuchita vo Chiuta wakhumbanga. Lemba la Sumu 40:8, likonkhosa mo iyu wavwiya kuti: “Ndikondwa kuchita khumbu linu, Chiuta wangu, dangu linu le mumtima mwangu.” Yesu wayanjanga kusambiza ŵanthu za Awisi akuchanya. (Ŵerengani Luka 10:21.) Yesu wati wasambiza munthukazi za kusopa kwa uneneska, wangukambiya akusambira ŵaki kuti: “Chakurya changu nkhuchita khumbu laku yo wakundituma ndi kumaliza ntchitu yaki.” (Yoh. 4:31-34) Kwanja Chiuta ndi ŵanthu ndiku Yesu wakondwanga naku. Namwi mukondwengi asani muchitengi viyo.

6. Ntchifukwa wuli mukhumbika kukambisana ndi Akhristu wo ateŵete Yehova kwa nyengu yitali vo mukhumba kuzichita kunthazi?

6 Akhristu anandi angwamba kuchita upayiniya ŵeche achinyamata ndipu akondwanga. Mungachita umampha kukambisana ndi anyaki mwaku yiwu. Bayibolu likamba kuti: “Vo munthu wakhumba kuchita vingafiskika cha asani palivi kukambisana kweni vifiskika asani pe ŵanthu anandi akulunguchizga.” (Nthanthi 15:22) Yiwu akukambiyeningi kuti asani muchitengi uteŵeti wa nyengu zosi, musambirengi vinandi vo vikuwovyeningi pa umoyu winu wosi. Yesu wati wasambizika ndi Awisi kuchanya, wangulutiriza kusambira po wachitanga uteŵeti waki pacharu chapasi. Mwakuyeruzgiyapu, iyu wakondwanga asani wawona kuti ŵanthu avwisiya uthenga wamampha ndipuso wakondwanga asani walutiriza kugomezgeka pa nyengu yo wayesekanga. (Ŵerengani Yesaya 50:4; Ŵah. 5:8; 12:2) Tiyeni tikambisani vigaŵa va uteŵeti wa nyengu zosi vo vingakukondwesani.

NTCHITU YAKUSAMBIZA ŴANTHU NJAKUKHUMBIKA UKONGWA

7. Ntchifukwa wuli achinyamata anandi akondwa kusambiza ŵanthu?

7 Yesu wangukamba kuti, “lutani mukasambizengi ŵanthu . . . kuti aje akusambira.” (Mat. 28:19, 20) Asani mukhumba kugwiraku ntchitu  yakusambiza ŵanthu ndikuti musankhengi ntchitu yamampha ukongwa yo yingachitisa kuti Chiuta wathamikiki. Nge mo viliri ndi ntchitu zinyaki, pajumpha nyengu yitali kuti munthu waje ndi lusu. Timothy yo wangwamba kuchita upayiniya po wenga ndi vyaka 19, wangukamba kuti: “Nditanja kuteŵete Yehova nyengu zosi chifukwa ndi nthowa yo ndilongole kuti nditimuyanja. Pakwamba ndatondekanga kwambisa sambiru la Bayibolu. Kweni ndati ndaluta ku chigaŵa chinyaki ndingwambisa masambiru nganandi pechendajumphi mwezi umoza. Yumoza mwa ŵanthu wo ndasambiranga nawu Bayibolu wangwamba kuza ku Nyumba ya Ufumu. Ndati ndamaliza Sukulu ya Abali Ambula Kuto Yakusambiza Bayibolo, * angundikambiya kuti nkhateŵetiyengi kuchigaŵa chinyaki ndipu kwenuku ndigwambisa masambiru nga Bayibolu nganayi. Nditanja kusambiza ŵanthu ndipu ndiwona kuti mzimu wakupaturika utiŵawovya kusintha mijalidu yawu.”—1 Ŵat. 2:19.

8. Kumbi achinyamata anandi achikhristu achita wuli kuti agwireku mwakukwana ntchitu yakusambiza ŵanthu?

8 Akhristu anyaki achinyamata asambira chineneru chinyaki. Mwakuyeruzgiyapu, Jacob wa ku North America wangulemba kuti: “Pa nyengu yo ndenga ndi vyaka 7, anyangu anandi mukilasi alongoronga Chivyetinamu. Ndakhumbanga kuŵakambiya zaku Yehova. Mwaviyo, pati pajumpha nyengu ndingwamba kusambira chineneru chawu. Ndayananisanga Magazini nga Chigongwi cha Alinda nga Chingelezi ndi nga Chivyetinamu ndipu ndinguziŵa vinandi. Ndingwamba so kuyanjana ndi abali wo ŵenga mumpingu wapafupi wa Chivyetinamu. Ndati ndafika vyaka 18, ndingwamba kuchita upayiniya. Pavuli paki, ndingusere Sukulu ya Abali Ambula Kuto Yakusambiza Bayibolo. Venivi vingundiwovya kuti ndifiski kuchita upayiniya ndipu mura ndini pe mukagulu ka Chivyetinamu. Ŵanthu anandi a ku Vietnam azizwa kuti ndikusambira chineneru chawu. Yiwu atindidaniya kunyumba kwawu ndipu kanandi ndisambira nawu Bayibolu. Anyaki mwa ŵanthu ŵenaŵa akubatizika.”—Yeruzgiyani ndi Machitidu 2:7, 8.

9. Kumbi ntchitu yakusambiza ŵanthu yititiwovya wuli?

9 Kusambiza ŵanthu Bayibolu kutitiwovya kugwira ntchitu umampha, kukambisana umampha ndi ŵanthu, kuleka kuchita mantha ndipuso kuja ndi lusu. (Nthanthi 21:5; 2 Tim. 2:24) Ntchitu iyi njakukondwesa ukongwa chifukwa yititiwovya kuti tingaziŵi umampha malemba ngo ngangatiwovya kuja ndi chivwanu. Tisambira so mo tingagwiriya ntchitu ndi Yehova.—1 Ŵakor. 3:9.

10. Kumbi mungachita wuli kuti mukondwengi chinanga kuti muchigaŵa chinu mungaŵa ŵanthu amanavi wo avwisiya uthenga wamampha?

10 Mutenere kukondwa ndi ntchitu yakusambiza ŵanthu Bayibolu chinanga kuti muchigaŵa chinu mungaŵa ŵanthu amanavi wo avwisiya. Tigwira limoza ntchitu yeniyi ndi Akhristu anyidu ndipu tosi tifufuziya limoza kuti tisaniyi ŵanthu a mtima wamampha. Chinanga kuti mubali pamwenga muzichi yumoza ndiyu wangasaniya munthu yo pavuli paki wangabatizika, tosi tigwiriya limoza ntchitu yakufufuza ndipuso tosi titenere kukondwa. Mwakuyeruzgiyapu, Brandon wanguchita upayiniya kwa vyaka 9 muchigaŵa cho ŵanthu amanavi ndiwu avwisiyanga. Iyu wangukamba kuti: “Nditanja kupharazga uthenga wamampha chifukwa ndivu Yehova wakutikambiya kuti tichitengi. Ndingwamba kuchita upayiniya ndati ndamaliza ŵaka sukulu. Nditanja kuchiska achinyamata mumpingu widu ndipu ndikondwa asani aluta panthazi. Ndati ndamaliza Sukulu ya Abali Ambula Kuto Yakusambiza Bayibolo, angundikambiya kuti nkhachitengi upayiniya. Mbuneneska kuti pa ŵanthu wo ndasambiranga nawu palivi munthu yo wakubatizikapu kweni anyangu akusambizapu ŵanthu mpaka kubatizika. Chinanga kuti ve viyo, ndikondwa kuti ndingusankha kugwiraku ntchitu yakusambiza ŵanthu Bayibolu.”—Wak. 11:6.

VO VINGACHITIKA ASANI MUNGASANKHIYA LIMU VAKUCHITA

11. Kumbi ndi ntchitu niyi yinyaki yakupaturika yo achinyamata akondwa nayu?

11 Tingateŵete Yehova mu nthowa zakupambanapambana. Mwakuyeruzgiyapu, achinyamata  anandi atovya pa ntchitu yakuzenga. Pakhumbika Nyumba za Ufumu zinandi kuti zizengeki. Ntchitu iyi mbuteŵeti wakupaturika wo ukankhuska Chiuta ndipu yingakuwovyani kuti mukondwengi. Nge mo ziliri ntchitu zinyaki zakupaturika, tikondwa kugwira ntchitu limoza ndi Akhristu anyidu. Tisambira so vinandi pa ntchitu yakuzenga chifukwa yititisambiza kuwona kuti umoyu ngwakupaturika, yititiwovya kugwira ntchitu mwaphamphu kweniso kuti tikoliyanengi ndi wo alongozga.

Wo achita uteŵeti wa nyengu zosi asaniya vitumbiku vinandi (Wonani ndimi 11-13)

12. Kumbi munthu waja ndi mwaŵi wakuchita mauteŵeti nanga asani wachita upayiniya?

12 Mubali munyaki zina laki Kevin, wangukamba kuti: “Kwambiya pa unamana ndakhumbanga kuzichita uteŵeti wa nyengu zosi. Ndingwamba kuchita upayiniya nde ndi vyaka 19. Kuti ndisaniyengi vinthu vakukhumbika pa umoyu, ndagwiranga ntchitu mazuŵa ngamanavi kwa mubali yo wagwiranga ntchitu yakuzenga nyumba. Ndingusambira kukhoma nyumba, kuŵika mawindu ndi visasa. Pavuli paki, ndingwamba kugwira ntchitu ndi kagulu ka abali ko kazenga so Nyumba za Ufumu ndi nyumba za abali zo zawa asani kwachitika ngozi zachilengedu. Ndati ndavwa kuti ku South Africa kukhumbika ŵanthu wo aziŵa kuzenga, ndingulembiyaku kalata ndipu angundidana kuti ndiluti. Sonu nde kunu ku Africa ndipu asani tamaliza kuzenga Nyumba ya Ufumu kwa masabata kudera linyaki tiluta so kunyaki. Abali ndi azichi wo ndigwira nawu ntchitu yeniyi tija nge ŵanthu a mubanja limoza. Tija nyumba yimoza, tisambira limoza Bayibolu ndipuso kugwira ntchitu limoza. Ndikondwa kupharazgiya limoza ndi abali kweniso azichi a muchigaŵa cho ndigwiraku ntchitu pa nyengu yo. Vo ndakhumbanga ndeche mwana kuti ndizichiti kunthazi, vandikondwesa mu nthowa zo ndinguziŵanaŵanapu cha.”

13. Ntchifukwa wuli achinyamata akondwa asani ateŵete pa Beteli?

13 Anyaki wo afiska vo akhumbanga, sonu ateŵete Yehova pa Beteli. Kuteŵete pa Beteli ndi nthowa yimoza yakukondwesa chifukwa chechosi  cho uchita, uchitiya Yehova. Banja la Beteli litovya pakupereka chakurya cho Yehova watitipasa. Dustin yo wateŵete pa Beteli wanguti: “Pa nyengu yo ndenga ndi vyaka 9, ndakhumbanga kuzichita uteŵeti wa nyengu zosi. Ndati ndamaliza sukulu ndingwamba upayiniya. Pati pajumpha chaka ndi hafu, angundidana kuti nkhateŵetiyengi pa Beteli. Kwenuku ndingusambira kugwirisiya ntchitu makina ngakusindikiziya mabuku ndipu pavuli paki ndagwiranga ntchitu mu dipatimenti ya makompyuta.” Kunu ku Beteli, ndikondwa kuwona kuti ntchitu yakusambiza ŵanthu yapacharu chosi yiluta panthazi. Nditanja kuteŵete kunu chifukwa vo tichita vitovya ŵanthu kuziŵa Yehova.”

KUMBI IMWI MUKHUMBA KUZICHITANJI KUNTHAZI?

14. Kumbi mungachita wuli kuti muyambi uteŵeti wa nyengu zosi?

14 Kumbi mungachita wuli kuti muyambi uteŵeti wa nyengu zosi? Kuja ndi mijalidu yamampha yachikhristu kungakuwovyani kuti muchiti vinandi pakuteŵete Yehova. Mwaviyo, musambirengi Mazu ngaku Chiuta nyengu zosi, muŵanaŵaniyengi pa vo mwasambira kuti muziŵi vo ving’anamuwa ndipu muyesesengi kumuka pa maunganu kuti mulongongi chivwanu chinu. Pa nyengu yo mwe pa sukulu ndi nyengu yamampha yakusambiriya malusu ngo ngangakuwovyani kuti muje mupharazgi wa uthenga wamampha. Pa nyengu iyi, mungasambira kukambisana ndi ŵanthu mwalusu mwakuŵafumba maŵanaŵanu ngawu ndi kuvwisiya vo amuka. Mungachita so umampha kuti mugwirengeku ntchitu pa mpingu nge kutowesa ndi kunozga Nyumba ya Ufumu. Yehova wakondwa kugwirisiya ntchitu ŵanthu akujiyuyuwa ndipuso wo akhumbisisa kumuteŵete. (Ŵerengani Sumu 110:3; Mac. 6:1-3) Wakutumika Paulo wangupempha Timote kuti wachitengi nayu uteŵeti wa umishonale chifukwa “abali . . . akambanga vinthu vamampha vakukwaskana ndi iyu.”—Mac. 16:1-5.

15. Kumbi mungachita wuli kuti muzisaniyengi vinthu vakukhumbika pa umoyu?

15 Wo achita uteŵeti wa nyengu zosi akhumbika vinthu vakuŵawovya pa umoyu wawu. (Mac. 18:2, 3) Panyaki angasambira ntchitu yinyaki yamanja yo yingaziŵawovya pa nyengu yo azamuchita upayiniya. Asani mukhumba kusankha vo mukhumba kuchita, mungafumba wakuwonere dera pamwenga apayiniya anyaki a mudera linu. Mungaŵafumba ntchitu yo yingawovya munthu kuti wafiski kuchita upayiniya. Nge mo Bayibolu likambiya tikhumbika ‘kupereka kwaku Yehova chechosi cho tichita, ndipu vo tikhumba kuchita vitiyendiyengi umampha.’—Nthanthi 16:3; 20:18.

16. Kumbi kuteŵete Yehova mweche achinyamata kungakuwovyani wuli kuti muzifiski maudindu nganyaki kunthazi?

16 Mutenere kuziŵa kuti Yehova wakhumba kuti ‘mukoleski’ vinthu vamampha vo mwazamusaniya kunthazi. (Ŵerengani 1 Timote 6:18, 19.) Kuchita uteŵeti wa nyengu zosi kungakuwovyani kuti muje Mkhristu wakukhwima chifukwa mupharazgengi ndi wo achita uteŵeti wa nyengu zosi. Anandi awona kuti kwamba kuteŵete Yehova ŵeche achinyamata kwaŵawovya so kuti aje ndi mabanja ngamampha. Kanandi wo achitanga upayiniya ŵeche ndato pamwenga kuyirwa, alutiriza kuchita upayiniya ndi munthu yo atorana nayu.—Ŵar. 16:3, 4.

17, 18. Ntchifukwa wuli vo mukhumba vikhumbika kutuliya mumtima?

17 Vo mukhumba kuchita vikhumbika kutuliya mumtima. Pakukamba zaku Yehova lemba la Sumu 20:4 likamba kuti: “Wakupaseni vo mtima winu ukhumba ndi kukuwovyani kuti mufiski vosi vo mukhumba kuchita.” Mwaviyo, ŵanaŵaniyani vo mukhumba kuchita pa umoyu winu. Ŵanaŵaniyani so vo Yehova wachita mu nyengu yidu yinu ndipuso vo imwi mungachita kuti muwovyi vo iyu wachita. Pavuli paki chitani vo vingamukondwesa.

18 Asani muteŵete Yehova nyengu zosi mukondwengi chifukwa ndi nthowa yo mungalongole kuti mutimutumbika. Bayibolu likamba kuti, “kondwani mwaku Yehova ndipu wakupaseningi vo mtima winu ukhumba.”—Sumu 37:4.

^ ndimi 7 Sonu yidanika kuti Sukulu ya Apharazgi a Ufumu.