Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  July 2016

Tiwonga Chiuta Chifukwa Watitilongo Wezi Ukulu

Tiwonga Chiuta Chifukwa Watitilongo Wezi Ukulu

Tosi ‘tilonde . . . wezi ukulu mwakuwerezgawerezga.’—YOH. 1:16.

SUMU: 1, 13

1, 2. (a) Konkhosani ntharika yaku Yesu ya mweneku wa munda. (b) Kumbi ntharika iyi yilongo wuli kuti mweneku wa munda wenga wakupasa kweniso wa wezi?

MUNTHU munyaki wanguchelera mlenjilenji kumsika kuchipenja aganyu kuti akagwiri ntchitu kumunda waki wa mphereska. Ŵanthu wo wangusaniya anguzomera mtengu wo wanguŵatchaja ndipu anguluta kuchigwira ntchitu. Kweni mweneku wa munda wakhumbanga antchitu anandi. Mwaviyo, wanguwere kumsika kananandi waka kuti wakalembi ntchitu ŵanthu anyaki ndipu wosi wanguŵakambiya ndalama zo waŵapasengi. Ndimazulu wanguŵadaniya pamoza a ntchitu wosi kuti waŵalipiri. Iyu wanguŵapasa malipiru ngakuyanana, kaya munthu wangugwira ntchitu maora nganandi pamwenga ora limoza. Wo angwamba kugwira ntchitu ŵati avwa ivi, angudandawula ukongwa. Mweneku wa munda wangumuka kuti: ‘Asi munguzomera malipiru ngo ndingukamba? Asi nde ndi mazaza kupasa antchitu ŵangu vo ndakhumba? Pamwenga muchita sanji chifukwa chakuti nde wamampha?’—Mat. 20:1-15.

 2 Ntharika yaku Yesu yititikumbusa jalidu limoza laku Yehova lo lizumbulika kanandi m’Bayibolu. Jalidu ili ndi “wezi ukulu.” (Ŵerengani 2 Ŵakorinte 6:1.) Ŵanthu wo angugwira ntchitu ora limoza ŵenga akwenere cha kulonde malipiru ngosi, kweni mweneku wa munda wanguŵalongo wezi ukulu. Pakukamba za mazu ngakuti “wezi ukulu,” munthu munyaki wangukamba kuti: “Mazu yanga ngang’anamuwa kupasika chinthu cho chitikuyenere cha pamwenga cho waleka kuchigwiliya ntchitu.”

MPHASU YO YEHOVA WAKUTIPASA

3, 4. Ntchifukwa wuli Yehova wakutilongo wezi ukulu, ndipu wakutilongo wuli?

3 Malemba ngakamba za “mphasu ya wezi ukulu yo Chiuta wakutipasa.” (Ŵaef. 3:7) Ntchifukwa wuli Yehova wakutipasa “mphasu” yeniyi ndipu wanguyipereka wuli? Asani tafiskanga ndendende vosi vo Yehova wakhumba, mphanyi isi te akwenere kulonde wezi waki. Kweni titondeka kuchita viyo. Fumu ya zeru Solomoni yingulemba kuti: “Palivi munthu murunji pacharu chapasi yo wachita vamampha pe kwambula kubuda.” (Wak. 7:20) Wakutumika Paulo nayu wangukamba kuti: “Wosi mbakubuda ndipu mbakupereŵere pa unkhankhu waku Chiuta.” Wangukamba so kuti: “Mphotu ya ubudi ndi nyifwa.” (Ŵar. 3:23; 6:23a) Mwaviyo, isi te akwenere nyifwa.

4 Kweni Yehova watitiyanja ukongwa. Ndichu chifukwa chaki wangutuma “Mwana waki wapade” kuti wazitifwiyi. Yapa wakutilongo wezi ukulu. (Yoh. 3:16) Paulo wangukamba kuti Yesu “sonu wavwalikika unkhankhu ndi ulemu chifukwa chakusuzika mpaka nyifwa, mwakuti ndi wezi ukulu waku Chiuta walaŵi nyifwa m’ malu mwa munthu weyosi.” (Ŵah. 2:9) “Mphasu yo Chiuta wapereka ndi umoyu wamuyaya kuporote mwaku Khristu Yesu Ambuyafwi.”—Ŵar. 6:23b.

5, 6. Kumbi ntchinthu wuli cho chichitika asani tiwusika ndi (a) ubudi? (b) wezi ukulu?

5 Kumbi vingwenda wuli kuti ŵanthu aje akubuda kweniso afwengi? Bayibolu likamba kuti: “Chifukwa cha kubuda kwa munthu yumoza [Adamu] nyifwa yinguwusa nge fumu” pa ŵana ŵaki. (Ŵar. 5:12, 14, 17) Kweni chakukondwesa ntchakuti tingasankha kuleka kuwusika ndi ubudi. Asani tigomeza sembi yakuwombo yaku Khristu, ndikwesa tiwusika ndi wezi ukulu waku Yehova. Ntchifukwa wuli tikamba viyo? “Po ubudi ungusazikiyaku, wezi ukulu nawu ungusazikiyaku ukongwa. Chifukwa wuli? Kuti nge mo ubudi unguwusiya nge fumu pamoza ndi nyifwa, mwakuyanana ŵaka wezi ukulu nawu uwusi nge fumu kuziya mu urunji, kulongoze ku umoyu wamuyaya kuporote mwaku Yesu Khristu.”—Ŵar. 5:20, 21.

6 Chinanga kuti teche akubuda, tikhumbika cha kuwusika ndi ubudi. Asani tabuda, titenere kupempha Yehova kuti watigowoke. Paulo wangutcheŵesa Akhristu kuti: “Ubudi ungaŵanga ndi mazaza cha paku imwi, chifukwa mwe pasi pa dangu cha, kweni pasi pa wezi ukulu.” (Ŵar. 6:14) Mwaviyo, tiwusika ndi wezi ukulu. Kumbi tiyanduwa wuli ndi wezi ukulu waku Chiuta? Paulo wangukamba kuti: “Wezi ukulu waku Chiuta . . . utitisambiza kuti tikani mijalidu yo iyu watinkhana nayu ndipuso kuti tikani makhumbiru nga charu, kweni kuti tiŵi azeru, arunji ndipuso akujipereka pakusopa Chiuta mu nyengu iyi.”—Tito 2:11, 12.

 WEZI UKULU “ULONGOREKA MUNTHOWA ZAKUPAMBANAPAMBANA”

7, 8. Kumbi mazu ngakuti wezi ukulu waku Yehova “ulongoreka munthowa zakupambanapambana” ngang’anamuwanji? (Wonani vithuzi vo ve papeji 21.)

7 Wakutumika Paulo wangukamba kuti: “Nge mo weyosi wakulonde mphasu, muteŵetiyanengi nayu nge ateŵeti amampha wo akulonde wezi ukulu waku Chiuta, wo ulongoreka munthowa zakupambanapambana.” (1 Pet. 4:10) Kumbi mazu yanga ngang’anamuwanji? Ngang’anamuwa kuti masuzgu ngosi ngo tingakumana nangu, Yehova wangatiwovya kukunthiyapu. (1 Pet. 1:6) Nyengu zosi Chiuta watipasengi vinthu vo tikhumbika kuti timalani ndi chiyesu cho takumana nachu.

8 Kukamba unenesa, wezi ukulu waku Yehova ulongoreka munthowa zakupambanapambana. Wakutumika Yohane wangulemba kuti: “Pakuti we ndi vinandi ukongwa, nasi talonde wezi ukulu mwakuwerezgawerezga.” (Yoh. 1:16) Tilonde vitumbiku vinandi chifukwa chakuti Yehova watitilongo wezi waki munthowa zakupambanapambana. Tiyeni tikambisani vinyaki mwa vitumbiku ivi.

9. Kumbi tiyanduwa wuli ndi wezi ukulu waku Yehova, ndipu tingalongo wuli kuti tiwonga wezi waki?

9 Yehova watitigowoke maubudi ngidu. Chifukwa cha wezi waki ukulu, Yehova watitigowoke maubudi ngidu asani talapa kweniso asani titesesa kuti tileki kuŵanaŵana vinthu viheni. (Ŵerengani 1 Yohane 1:8, 9.) Titenere kumuwonga Chiuta ndi kumutumbika chifukwa cha lisungu laki. Paulo wangulembe Akhristu akusankhika kuti: “[Yehova] wakutitaska ku ulamuliru wa mdima ndi kutitole ku ufumu wa Mwana waki wakwanjiwa. Kuporote mwa mwana mwenuyu, tikufwatulika ndi sembi yakuwombo ndi kugowokereka maubudi ngidu.” (Ŵakol. 1:13, 14) Tilonde vitumbiku vinyaki vinandi chifukwa cha kugowokereka maubudi ngidu.

10. Kumbi tiyanduwa wuli chifukwa cha wezi ukulu waku Chiuta?

10 Te pa chimangu ndi Chiuta. Pa nyengu yo tawangaku, tenga arwani aku Chiuta chifukwa cha ubudi wo tikuhara. Paulo wangukamba kuti: “Po tenga arwani, tinguyanjana so ndi Chiuta kuporote mu nyifwa ya Mwana waki.” (Ŵar. 5:10) Chifukwa cha sembi yaku Yesu, tikwanjana so ndi Yehova kung’anamuwa kuti te nayu pa chimangu. Paulo wangukonkhoska kuti fundu iyi yikoliyana ndi wezi ukulu waku Yehova. Iyu wangukambiya abali ŵaki akusankhika kuti: “Pakuti sonu tayeseka arunji chifukwa cha chivwanu, tiyeni tije pa chimangu ndi Chiuta kuporote mwa Ambuyafwi Yesu Khristu. Chifukwa sonu te ndi chivwanu mwaku Yesu, nthowa yatijulikiya kuti tilonde wezi ukulu wo sonu tilonde.” (Ŵar. 5:1, 2) Ili ndi thumbiku likulu ukongwa.

Mo Chiuta walongore wezi waki ukulu: Kuvwa uthenga wamampha (Wonani ndimi 11)

11. Kumbi akusankhika atovya wuli “a mbereri zinyaki” kuti aje arunji?

11 Tija arunji. Tosi tikuwa ambula urunji. Kweni Mchimi Danyele wangukambiya limu kuti mu nyengu yakumaliya, “ŵanthu azeru” kung’anamuwa akusankhika wo ŵeche pacharu chapasi, ‘azamuwovya ŵanthu anandi kuti aje arunji.’ (Ŵerengani Danyele 12:3.) Yiwu awovya ŵanthu anandi “a mbereri zinyaki” kuti aje arunji kuporote mu ntchitu yakupharazga ndi kusambiza. (Yoh. 10:16) Ivi vichitika chifukwa cha wezi ukulu waku Yehova. Paulo wangukamba kuti: “Ŵanthu aja arunji pamasu paku Chiuta chifukwa cha sembi yo Khristu Yesu wakupereka kuti waŵawombo. Ndipu ichi ntchawanangwa cho Chiuta wakupereka chifukwa cha wezi waki ukulu.”—Ŵar. 3:23, 24.

Kuromba kwaku Chiuta (Wonani ndimi 12)

12. Kumbi pe kukoliyana wuli pakati pa rombu ndi wezi ukulu waku Chiuta?

 12 Tiromba kwaku Chiuta. Chifukwa cha wezi waki ukulu, tingaromba kwaku Yehova. Paulo wanguti mpandu waku Yehova ndi “mpandu wa wezi ukulu” ndipu wangutipempha kuti tinderengi ku mpandu uwu “ndi wanangwa wakulongoro.” (Ŵah. 4:16a) Yehova watipasa mwaŵi uwu kuziya mwa Mwana waki. “Kuporote mwaku iyu, te ndi wanangwa wakulongoro ndipu ndi chigomezu tifikiya Chiuta chifukwa te ndi chivwanu mwaku Yesu.” (Ŵaef. 3:12) Kuromba kwaku Yehova ndi nthowa nadi yapade yo walongore kuti we ndi wezi ukulu.

Kuwovyeka pa nyengu yakwenere (Wonani ndimi 13)

13. Kumbi tiwovyeka wuli pa nyengu yakwenere chifukwa cha wezi ukulu?

13 Tiwovyeka pa nyengu yakwenere. Paulo watitichiska kuti tirombengi kwaku Yehova nyengu zosi ndi chilatu chakuti “tilonde lisungu ndi kusaniya wezi ukulu vo vingatiwovya pa nyengu yakwenere.” (Ŵah. 4:16b) Asani takumana ndi masuzgu, tingaromba kwaku Yehova kuti watiwovyi. Chinanga kuti te ambula kwenere Yehova wamuka rombu lidu. Kanandi wachita viyo kuporote mwa Akhristu anyidu kuti “tije achiganga ndi kukamba kuti: ‘Yehova ndiyu watindiwovya, ndiwopengi cha. Munthu wangachitanji nani?’”—Ŵah. 13:6.

14. Kumbi tiyanduwa wuli ndi wezi ukulu waku Yehova?

14 Mitima yidu yipembuzgika. Chifukwa Yehova we ndi wezi ukulu, watitipembuzga asani takumana ndi masuzgu. (Sumu 51:17) Paulo wangulembe Akhristu a ku Atesalonika wo atombozekanga kuti: “Ambuyafwi Yesu Khristu ndi Chiuta Awuskefwi, wo angutanja ndi kutipembuzga kwamuyaya ndi chilindiza chamampha kuporote mu wezi ukulu, apembuzgi mitima yinu ndi kukupasani nthazi.” (2 Ŵat. 2:16, 17) Tipembuzgika ukongwa kuziŵa kuti Yehova watitiwovya chifukwa cha lisungu laki.

15. Kumbi tilindizanji chifukwa cha wezi ukulu waku Chiuta?

 15 Tilindiza umoyu wamuyaya. Chifukwa te akubuda, tingaŵa ndi chilindiza cha kwambula chovyu chaku Yehova. (Ŵerengani Sumu 49:7, 8.) Kweni Yehova watitipasa chilindiza chamampha ukongwa. Yesu wangulayizga akusambira ŵaki kuti: “Chifukwa ili ndi khumbu la Ada, kuti weyosi yo waziŵa Mwana ndipuso waja ndi chivwanu mwaku iyu walonde umoyu wamuyaya ndipu ndazakumuyuska pa zuŵa lakumaliya.” (Yoh. 6:40) Mwaviyo, tilindiza umoyu wamuyaya chifukwa cha wezi ukulu waku Chiuta. Paulo wanguyiziŵa fundu iyi. Iyu wangukamba kuti: “Chiuta walongo wezi waki ukulu kuti ŵanthu a mitundu yosi ataskiki.”—Tito 2:11.

TINGACHITIYANGA DALA UBUDI CHA CHIFUKWA CHA WEZI UKULU WAKU CHIUTA

16. Kumbi Akhristu anyaki akwamba asaniliyangapu mwaŵi wuli pa wezi ukulu waku Chiuta?

16 Chinanga kuti tilonde vitumbiku vinandi chifukwa cha wezi ukulu waku Yehova, tingaŵanaŵananga cha kuti Yehova wazomereza waka vevosi. Akhristu anyaki akwamba ‘asaniriyangapu mwaŵi pa wezi . . . waku Chiuta widu kuti achitengi jalidu liheni mwambula soni.’ (Yuda 4) Akhristu ambula kugomezeka ŵenaŵa awonanga kuti angachita uheni wewosi chifukwa Yehova waŵagowokiyengi. Chiheni ukongwa ntchakuti anyenganga so abali ndi azichi kuti nawu achitengi vo yiwu achitanga. Munthu yo wachitanga ivi ‘wakwiyisanga mzimu wa wezi ukulu waku Chiuta.’ Ndimu so viliri mazuŵa nganu.—Ŵah. 10:29.

17. Kumbi Petro wangupereka ulongozgi wuli?

17 Mazuŵa nganu, Satana walandizga Akhristu anyaki kuŵanaŵana kuti angapanga vinthu viheni kwambula kulangika chifukwa chakuti Yehova ngwalisungu. Chinanga kuti Yehova wagowoke munthu yo walapa, kweni wakhumba kuti tiyesesengi kulimbana ndi vinthu viheni vo tichita. Iyu wangutuma Petro kulemba kuti: “Viyo imwi mwaŵakwanjiwa, chifukwa mwaziŵiya limu ivi, chenjeni kuti muleki kulandizgika pamoza nawu mu ubudi wa ŵanthu aheni ndi kutondeka kuŵa akukho. Kweni lutirizgani kulonde wezi ukulu ndipuso kuziŵa Fumu ndi Mtaski widu Yesu Khristu.”—2 Pet. 3:17, 18.

UDINDU WO TE NAWU CHIFUKWA CHA WEZI UKULU WAKU CHIUTA

18. Kumbi te ndi udindu wuli chifukwa cha wezi ukulu waku Chiuta?

18 Chifukwa chakuti Yehova watitilongo wezi ukulu, nasi titenere kugwiriskiya ntchitu mphasu zo tenazu kuthamika Chiuta ndi kuteŵete anyidu. Kumbi tingachita wuli ivi? Paulo wangukamba kuti: “Pakuti te ndi mphasu zakupambana mwakukoliyana ndi wezi ukulu wo ukupasika kwaku isi, . . .” Kwali mbuteŵeti, tiyeni tichiti uteŵeti uwu, yo wasambiza, walutirizi kusambiza kwaki; yo wachiska, walutirizi kuchiska; . . . yo walongo lisungu, wachiti viyo mwakukondwa.” (Ŵar. 12:6-8) Mwaviyo, pakuti Yehova watitilongo wezi ukulu, nasi te ndi udindu wakupharazgiya ŵanthu, kuŵasambiza Bayibolu, kuchiska Akhristu anyidu ndi kugowoke weyosi yo watinangiya.

19. Kumbi sabata yamawa tazamukambisananji?

19 Chifukwa chakuti Chiuta watitiyanja, titenere kuchita vosi vo tingafiska kuti ‘tichitiyi ukaboni mwakukwana uthenga wamampha wa lisungu likulu laku Chiuta.’ (Mac. 20:24) Tazamukambisana nkhani yeniyi sabata yamawa.