Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  July 2016

Mupharazgengi Uthenga Wamampha wa Wezi Ukulu Waku Chiuta

Mupharazgengi Uthenga Wamampha wa Wezi Ukulu Waku Chiuta

“Kuchitiya ukaboni mwakukwana uthenga wamampha wa wezi ukulu waku Chiuta.”—MAC. 20:24.

SUMU: 10, 25

1, 2. Kumbi wakutumika Paulo wangulongo wuli kuti wawonganga Chiuta chifukwa cha wezi waki ukulu?

WAKUTUMIKA Paulo wangukamba kuti: “Wezi ukulu [waku Chiuta] wo wakundilongo ukuwa pawaka cha.” (Ŵerengani 1 Ŵakorinte 15:9, 10.) Paulo waziŵanga umampha kuti wenga wakwenere cha kuti Chiuta wamuchitiyi lisungu chifukwa pakwamba wasuzanga Akhristu.

2 Wepafupi kufwa, Paulo wangulembe Timote kuti: “Ndiwonga Khristu Yesu Ambuyafwi, yo wangundipasa nthazi chifukwa wanguwona kuti ndini wakugomezeka, ndipu wangundipasa uteŵeti.” (1 Tim. 1:12-14) Kumbi Chiuta wangumupasa uteŵeti nuwu? Paulo wangukambiya ŵara a mpingu wa Efesu kuti: “Umoyu wangu nditiwuwona kuti ngwakukhumbika cha kwaku ini. Chinthu chakuzirwa kwaku ini ntchakuti ndimalizi kutchimbiya maphara ndi uteŵeti wo ndingulonde kwa Ambuya Yesu. Ndikhumba  waka kuchitiya ukaboni mwakukwana uthenga wamampha wa wezi ukulu waku Chiuta.”Mac. 20:24.

3. Kumbi Paulo wangupasika uteŵeti nuwu wapade? (Wonani chithuzi cho che papeji 26.)

3 Kumbi Paulo wapharazganga “uthenga wamampha” nuwu wo walongonga wezi ukulu waku Yehova? Paulo wangukambiya Akhristu a ku Efesu kuti: “Mukuvwa kuti ndikupasika uteŵeti wakuti ndikuwovyeni kuyanduwa ndi wezi ukulu waku Chiuta.” (Ŵaef. 3:1, 2) Paulo wangupasika ntchitu yakupharazga uthenga wamampha ku ŵanthu amitundu yinyaki kuti nawu aje mugulu la ŵanthu wo amuwusa ndi Khristu mu Ufumu waku Chiuta. (Ŵerengani Ŵaefesu 3:5-8.) Paulo wangulongo chakuwoniyapu chamampha kwa Akhristu mazuŵa nganu pa nkhani yakulimbikiya uteŵeti. Wangulongo so kuti wezi ukulu waku Chiuta ukuwa “pawaka cha.”

KUMBI WEZI UKULU WAKU CHIUTA UTIKUCHISKANI KUTI MUCHITENGENJI?

4, 5. Ntchifukwa wuli tingakamba kuti “uthenga wamampha wa Ufumu” uyanana waka ndi uthenga wamampha wa “wezi ukulu waku Chiuta”?

4 Mu nyengu yinu yakumaliya, ŵanthu aku Yehova apasika ntchitu yakupharazga “uthenga wamampha uwu wa Ufumu, . . . kuti uje ukaboni ku ŵanthu a mitundu yosi.” (Mat. 24:14) Kweniso, uthenga wo tipharazga ndi “uthenga wamampha wa wezi ukulu waku Chiuta.” Tikamba viyo chifukwa vitumbiku vosi vo tazamulonde mu Ufumu waku Chiuta tazakuvilonde chifukwa cha lisungu laki lo watilongo kuziya mwaku Khristu. (Ŵaef. 1:3) Kumbi tiwonga wezi ukulu waku Yehova mwakulimbikiya kupharazga nge mo Paulo wachitiyanga?—Ŵerengani Ŵaroma 1:14-16.

5 Mu nkhani yaluta, tingusambira mo isi taŵanthu ambula kufikapu tiyanduliya ndi wezi ukulu waku Yehova wo watiwulongo munthowa zakupambanapambana. Mwaviyo, te ndi udindu wakukambiya ŵanthu wosi mo Yehova walongore chanju chaki ndipuso mo angayanduliya ndi chanju chenichi. Kumbi ndi nthowa nizi zo Chiuta walongore wezi waki ukulu zo titenere kukambiya ŵanthu?

MUPHARAZGENGI UTHENGA WAMAMPHA WA SEMBI YAKUWOMBO

6, 7. Ntchifukwa wuli tingakamba kuti tipharazga uthenga wamampha wa wezi ukulu waku Chiuta asani tikambiyaku ŵanthu za sembi yakuwombo?

6 Mazuŵa nganu, ŵanthu anandi njuŵi yawu yitiŵasuza cha asani abuda. Mwaviyo, aziŵa cha kuti akhumbikiya sembi kuti yiŵawombo. Kweni ŵanthu anandi awona kuti akondwa cha chifukwa cha vinthu viheni vo achita. Asani akambisana ndi Akaboni aku Yehova ndipu aziŵiya kuti ubudi ntchinthu wuli, mo utitikwasiya, ndipuso vo titenere kuchita kuti tiwomboreki ku ukapolu wa ubudi. Ŵanthu a mtima wamampha akondwa asani aziŵa kuti Yehova wangutuma Mwana waki pacharu chapasi kuti wazitiwombo ku ubudi ndi nyifwa. Chiuta wanguchita ivi chifukwa cha chanju chaki chikulu ndi wezi waki ukulu.—1 Yoh. 4:9, 10.

7 Pakukamba za Mwana wakwanjiwa waku Yehova, Paulo wangukamba kuti: “Kuporote mwaku [Yesu] tafwatulika ndi sembi yakuwombo kuziya mu ndopa zaki, ndipu tikugowokereka maubudi ngidu mwakukoliyana ndi chuma cha wezi [ukulu waku Yehova].” (Ŵaef. 1:7) Sembi yakuwombo yaku Khristu mbukaboni ukulu wakuti Chiuta watitiyanja ndipu yilongo ukulu wa wezi Waki. Mtima  uzika kuziŵa kuti asani tigomeza ndopa zaku Yesu, Chiuta watitigowoke maubudi ngidu ndipu tija ndi njuŵi yamampha. (Ŵah. 9:14) Uwu mbuthenga wamampha nadi wo titenere kukambiyaku anyidu.

WOVYANI ŴANTHU KUTI AJE PA UBWEZI NDI CHIUTA

8. Ntchifukwa wuli ŵanthu akubuda akhumbika kwanjana so ndi Chiuta?

8 Te ndi udindu wakukambiya anyidu kuti angaja pa ubwezi ndi Mulengi wawu. Ŵanthu wo aleka kugomeza sembi yaku Yesu, Chiuta watiŵawona kuti mbarwani ŵaki. Wakutumika Yohane wangulemba kuti: “Munthu yo wavwana mu Mwana, we ndi umoyu wamuyaya, ndipu munthu yo waleka kuvwiya Mwana, wazakuwuwona cha umoyu, kweni ukari waku Chiuta ujaliriya paku iyu.” (Yoh. 3:36) Ntchakukondwesa ukongwa kuti sembi yaku Khristu yititovya kuti tiyanjani so ndi Chiuta. Paulo wangukamba kuti: “Imwi mwenga kutali ndipuso mwenga arwani chifukwa maŵanaŵanu nginu ngenga pa ntchitu ziheni. Sonu wakuyanjanisani kuziya mu liŵavu la nyama la mwana waki yo wangufwa.”—Ŵakol. 1:21, 22.

9, 10. (a) Kumbi Khristu wangupereka ntchitu wuli kwa abali ŵaki akusankhika? (b) Kumbi a “mbereri zinyaki” atiŵawovya wuli abali akusankhika?

9 Khristu wapereka “uteŵeti wakuyanjanisa” kwa abali ŵaki akusankhika wo ŵe pacharu chapasi. Pakukamba za uteŵeti uwu, Paulo wangulembe Akhristu akusankhika a mu nyengu ya akutumika kuti: “Kweni vinthu vosi vituwa kwaku Chiuta yo wakutiyanjanisa kwaku iyu kuporote mwaku Khristu ndipu wakutipasa uteŵeti wakuyanjanisa. Uteŵeti waki ngwakuti tipharazgi kuti Chiuta wayanjanisanga charu kwaku iyu kuziya mwaku Khristu kwambula kukumbuka maubudi ngawu, ndipu wakutipasa uthenga wakuyanjanisa. Mwaviyo, ndisi akazembi m’malu mwaku Khristu, nge kuti Chiuta waŵeyere kuziya mwaku isi. Pakuŵa m’malu mwaku Khristu, tipempha kuti: ‘Yanjanani so ndi Chiuta.’”—2 Ŵakor. 5:18-20.

10 A “mbereri zinyaki” nawu awona kuti ndi mwaŵi kuwovya abali akusankhika pa ntchitu yakupharazga. (Yoh. 10:16) Pakuti a “mbereri zinyaki” ateŵete nge nthumi zaku Khristu, yiwu ndiwu achita ntchitu yikulu yakusambiza ŵanthu uneneska ndi kuŵawovya kuti aje pa ubwezi ndi Yehova. Ichi ntchigaŵa chakukhumbika ukongwa cha ntchitu yakuchitiya ukaboni uthenga wamampha wa wezi ukulu waku Chiuta.

MUPHARAZGENGI UTHENGA WAMAMPHA WAKUTI CHIUTA WATUVWA MAROMBU

11, 12. Ntchifukwa wuli tingakamba kuti mbuthenga wamampha ku ŵanthu kuziŵa kuti angaromba kwaku Yehova?

11 Ŵanthu anandi aromba chifukwa atuvwa umampha mumtima, kweni agomeza cha kuti Chiuta watuvwa marombu ngawu. Yiwu atenere kuziŵa kuti Yehova ‘watuvwa rombu.’ Davidi wangulemba kuti: “Imwi wakuvwa rombu, ŵanthu amitundu yosi azengi kwaku imwi. Vakulakwa vangu vandikuliya, kweni imwi muwundiya maubudi ngidu.”—Sumu 65:2, 3.

12 Yesu wangukambiya akusambira ŵaki kuti: “Chechosi cho mungapempha mu zina langu, ndazamuchita.” (Yoh. 14:14) Mazu ngakuti “chechosi” ngang’anamuwa chosi cho chikoliyana ndi khumbu laku Yehova. Yohane watitisimikiziya kuti: “Ichi ntchigomezu cho tenachu mwaku iyu, kuti chechosi cho tingapempha mwakukoliyana ndi khumbu  laki, watitivwa.” (1 Yoh. 5:14) Ntchinthu chamampha ukongwa kusambiza ŵanthu kuti pempheru litovya munthu kuvwa waka umampha mumtima cha, kweni ndi nthowa yakundelere ku ‘mpandu waku Yehova wa wezi ukulu.’ (Ŵah. 4:16) Asani titiŵasambiza kuti apempherengi kwaku Chiuta, munthowa yakwenere ndi kupempha vinthu vakwenere, tingaŵawovya kuti aje pa ubwezi ndi Yehova ndipu iyu waŵapembuzgengi pa nyengu ya masuzu.—Sumu 4:1; 145:18.

WEZI UKULU WAKU CHIUTA MU CHARU CHIFYA

13, 14. (a) Kumbi Akhristu akusankhika azamuchita uteŵeti nuwu kunthazi? (b) Kumbi azakuŵawovya wuli ŵanthu?

13 Wezi ukulu waku Yehova umaliyengi mu charu chinu cha, kweni wazamulongoreka so mu charu chifya. Paulo wangukamba kuti Chiuta wakupereka uteŵeti wapade kwa a 144,000, wo amuwusa ndi Khristu kuchanya. Wanguti: “Kweni Chiuta ngwalisungu ukongwa, ndipu chifukwa cha chanju chaki chikulu cho wakutilongo, wakutisambusa amoyu pamoza ndi Khristu, chinanga ndi po tenga akufwa chifukwa cha ubudi. Mwataskika chifukwa cha wezi waki ukulu. Kweniso, wangutiyusiya pamoza ndi kutijalika pamoza mu malu ngakuchanya pakuti te akukoliyana ndi Khristu Yesu, kuti mu mugonezi wo utuza wazilongo chuma cha wezi waki ukulu, po wazakutichitiya vinthu vamampha isi te akukoliyana ndi Khristu Yesu.”—Ŵaef. 2:4-7.

14 Kukamba unenesa, vakusuza kuŵanaŵaniya mo vinthu vo Yehova wanoze Akhristu akusankhika vazamuŵiya asani ayamba kuwusa ndi Khristu kuchanya. (Luka 22:28-30; Ŵaf. 3:20, 21; 1 Yoh. 3:2) Yehova ‘wazakuŵalongo chuma cha wezi waki ukulu.’ Yiwu amupanga “Yerusalemu Mufya,” mwali waku Khristu. (Chiv. 3:12; 17:14; 21:2, 9, 10) Azamugwira ntchitu ndi Yesu ‘yakuchiza mitundu.’ Azamuwovya ŵanthu akuvwiya kuti afwatuki ku ukapolu wa ubudi ndi nyifwa ndi kuja akufikapu.—Ŵerengani Chivumbuzi 22:1, 2, 17.

15, 16. Kumbi Yehova wazamulongo wuli wezi ukulu kwa a “mbereri zinyaki” kunthazi?

15 Pa Ŵaefesu 2:7, tiŵerenga kuti wezi ukulu waku Chiuta wazamulongoreka “mu mugonezi wo utuza.” Tikayika cha kuti mu charu chifya Yehova wazamulongo “chuma cha wezi waki ukulu.” (Luka 18:29, 30) Chimoza chaki nkhuyusa ŵanthu ku “Masanu.” (Jobu 14:13-15; Yoh. 5:28, 29) Ŵanthu akugomezeka wo angufwa Khristu wechendafwi kweniso a “mbereri zinyaki” wo atufwa ŵe akugomezeka mazuŵa nganu ngakumaliya, azamuyuka kuti azilutirizi kuteŵete Yehova.

16 Ŵanthu anandi wo akufwa kwambula kuziŵa Chiuta, nawu azamuyusika. Yiwu azamupasika mwaŵi wakuvwiya muwusu waku Yehova. Yohane wanguti: “Ndinguwona akufwa, akulu ndi amana, ŵama panthazi pa mpandu wachifumu, ndipu mipukutu yingujulika. Kweni mpukutu unyaki ungujulika, uwu ndi mpukutu wa umoyu. Akufwa anguyeruzika mwakukoliyana ndi ntchitu zawu zo zingulembeka mumipukutu. Ndipu nyanja yingupereka akufwa wo ŵenga mwenimo, ndipu nyifwa ndi Masanu vingupereka akufwa wo ŵenga mwenimo, ndipu weyosi wanguyeruzika mwakukoliyana ndi ntchitu zaki.” (Chiv. 20:12, 13) Ŵanthu wo azamuyuka azamukhumbika kusambira mo angagwirisiya ntchitu fundu zaku Chiuta zo zisanirika m’Bayibolu. Kweniso, azamukhumbika kuvwiya ulongozi ufya wo wazamukuŵa  “mumipukutu.” Mipukutu iyi yazamukuŵa ndi ulongozi waku Yehova wa mo ŵanthu angajaliya mu charu chifya. Ulongozi ufya wenuwu ndi nthowa yinyaki yo Yehova wazamulongore wezi waki ukulu.

LUTIRIZANI KUPHARAZGA UTHENGA WAMAMPHA

17. Kumbi titenere kukumbukanji asani tipharazga?

17 Po umaliru uŵandika, ntchitu yidu nkhupharazga uthenga wamampha wa Ufumu. (Marko 13:10) Uthenga wamampha ulongo wezi ukulu waku Yehova. Titenere kukumbuka fundu iyi asani tipharazga. Tipharazga kuti tithamiki Yehova. Tingamuthamika asani tikambiya ŵanthu kuti vosi vo iyu walayizga mu charu chifya vilongo wezi waki ukulu.

Jani “ateŵeti amampha wo akulonde wezi ukulu waku Chiuta.”—1 Pet. 4:10 (Wonani ndimi 17-19)

18, 19. Kumbi tithamika wuli wezi ukulu waku Yehova?

18 Asani tipharazgiya anyidu, tikhumbika kuŵakonkhose kuti asani Khristu wayamba kuwusa, ŵanthu azamuyanduwa ukongwa ndi sembi yaki ndipu kamana ndi kamana azamuja akufikapu. Bayibolu likamba kuti: “Chilengedu chazamufwatulika ku ukapolu wa kuvunda ndi kuja ndi wanangwa wa unkhankhu wa ŵana aku Chiuta.” (Ŵar. 8:21) Ivi vazamuchitika chifukwa cha wezi ukulu waku Yehova.

19 Te ndi mwaŵi wakukambiya ŵanthu layizu lo lisanirika pa Chivumbuzi 21:4, 5. Pakamba kuti: “[Chiuta] wazamuleska masozi ngosi mu masu ngawu, ndipu nyifwa yazamuŵaku so cha, chinanga nkhuliya, chinanga nkhukuta, chinanga mburwirwi kuti vazamuŵaku so cha. Vinthu vakali valutapu.” Yehova yo waja pa mpandu wachifumu wanguti: “Wonani! Ndipanga vinthu vosi kuti vije vifya.” Wangukamba so kuti: “Lemba, pakuti mazu yanga ngakugomezgeka ndipuso ngaunenesa.” Asani tilimbikiya kukambiya anyidu uthenga wamampha, tithamika nadi wezi ukulu waku Yehova.