Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  January 2017

“Gomeza Yehova Ndipu Chita Cho Ntchamampha”

“Gomeza Yehova Ndipu Chita Cho Ntchamampha”

“Gomeza Yehova ndipu chita cho ntchamampha . . . ndipu chita vinthu mwakugomezeka.”SUMU 37:3.

SUMU: 49, 18

1. Kumbi Yehova wakutilenga ndi malusu ngapade nanga?

YEHOVA wakutilenga ndi malusu ngapade. Iyu wakutipasa lusu la kuŵanaŵana lo lititiwovya kumalana ndi masuzgu ndipuso kuziŵa vo tikhumba kuzichita kunthazi. (Nthanthi 2:11) Wakutipasa so nthazi zo zititiwovya kuchita vo tiŵanaŵana ndi kuvifiska. (Ŵaf. 2:13) Iyu wakutilenga ndi njuŵi kuti tipambanisengi pakati pa chamampha ndi chiheni ndipu yititiwovya kuti tileki kuchita ubudi kweniso tinozgi vinthu asani tabuda.—Ŵar. 2:15.

2. Kumbi Yehova wakhumba kuti tingagwirisiyengi wuli ntchitu malusu ngidu?

2 Yehova wakhumba kuti tigwirisiyengi ntchitu umampha malusu ngidu. Chifukwa wuli? Chifukwa chakuti watitiyanja ndipu waziŵa kuti tikondwa asani titingagwirisiya ntchitu. Kuziya m’Mazu ngaki, Yehova watitikambiya kuti asani tingagwirisiyengi ntchitu umampha, vinthu vitiyendiyengi. Mwakuyeruzgiyapu, m’Malemba Ngachiheberi tiŵerenga kuti: “Vo munthu waphamphu wakhumba kuchita, vitimuyende umampha” ndipu “chechosi cho janja laku  lasaniya kuti lichiti, uchichiti ndi nthazi zaku zosi.” (Nthanthi 21:5; Wak. 9:10) M’Malemba Ngachigiriki Ngachikhristu, mwe ulongozgi wakuti: “Asani te ndi mwaŵi, tiyeni tichitiyi wosi vamampha,” ndipu “pakuti weyosi wakupasika mphasu, yigwirisiyeni ntchitu pakuteŵetiyana.” (Ŵag. 6:10; 1 Pet. 4:10) Ivi vilongo kuti Yehova wakhumba kuti tichitengi vosi vo tingafiska kuti tiyanduwi limoza ndi anyidu.

3. Kumbi ndi vinthu nivi vo titondeka kuchita?

3 Yehova waziŵa kuti pe vinthu vinyaki vo titondeka kuchita. Tingatuzgapu cha kuleka kufikapu, ubudi pamwenga nyifwa ndipuso tingaŵasankhiya cha anyidu vinthu chifukwa weyosi we ndi wanangwa wakusankha yija. (1 Ŵakar. 8:46) Chinanga tingaja ndi zeru zinandi wuli, tingayanana cha ndi Yehova chifukwa te nge ŵana kwaku iyu.—Yes. 55:9.

Asani mukumana ndi masuzgu, “mugomezengi Yehova ndi kuchita cho ntchamampha”

4. Kumbi tikambisanengenji munkhani iyi?

4 Nyengu zosi tikhumbika kuthemba Yehova kuti ndiyu watilongozgengi, watiwovyengi ndipuso watichitiyengi vinthu vo pakutija tingachita cha. Chinanga kuti ve viyo, titenere kuyesesa kuchitapu kanthu mu nthowa yakwenere kuti timalani ndi masuzgu ndipuso tiwovyi anyidu. (Ŵerengani Sumu 37:3.) Tingakamba kuti, tikhumbika ‘kugomeza Yehova ndi kuchita cho ntchamampha,’ tikhumbika so ‘kuchita vinthu mwakugomezeka.’ Pa nkhani yeniyi, tiyeni tikambisani vo tingasambira kwaku Nowa, Davidi ndi ateŵeti anyaki akugomezeka wo anguthemba Yehova ndipu anguchitapu kanthu mu nthowa yakwenere kuti amalani ndi masuzgu. Nge mo tiwoniyengi, yiwu aziŵanga vo atingi achitengi cha ndi vo atingi achitengi ndipu pavuli paki anguchitapu kanthu.

PO TIJA MUCHARU CHO MUCHITIKA VINTHU VIHENI

5. Konkhosani vo Nowa wangukumana navu.

5 Nowa wajanga mucharu cho “chinguzaza ndi vinthu va nkhaza” kweniso mijalidu ya ureŵi. (Chiy. 6:4, 9-13) Iyu waziŵanga kuti Yehova watuzgengepu charu chiheni. Chinanga kuti venga viyo, Nowa watenere kuti wasuzgikanga mbwenu maŵanaŵanu ndi vinthu viheni vo ŵanthu ambula kopa Chiuta achitanga. Iyu waziŵanga kuti penga vinthu vinyaki vo watingi wachitengi cha kweni penga vinyaki vo watingi wachitengi.

Asani mususkika po mupharazga (Wonani ndimi 6-9)

6, 7. (a) Ndi vinthu nivi vo Nowa watingi wachitengi cha? (b) Kumbi vo vichitika mazuŵa nganu viyanana wuli ndi vo vachitikanga munyengu yaku Nowa?

6 Vo Nowa watingi wachitengi cha: Chinanga  kuti Nowa wangupharazga mwakugomezeka uthenga wacheruzgu wakutuliya kwaku Yehova, waŵachichizganga cha ŵanthu aheni kuti avwisiyi uthenga wo wapharazganga. Pengavi cho watingi wachitengi kuti Chigumula chizi mwaliŵi. Nowa wakhumbikanga kugomeza kuti Yehova wafiskengi layizgu laki lakuti watuzgengepu vinthu viheni ndipu wachitengi venivi pa nyengu yakwenere.—Chiy. 6:17.

7 Nasi tija mucharu cho muchitika vinthu vinandi viheni kweni tiziŵa kuti Yehova walayizga kuti wavituzgengepu. (1 Yoh. 2:17) Pasonu panu, tingaŵachichizga cha ŵanthu kuti avwisiyi “uthenga wamampha wa Ufumu.” Ndipu palivi cho tingachita kuti “chisuzgu chikulu” chiyambi mwaliŵi. (Mat. 24:14, 21) Nge Nowa, titenere kuja ndi chivwanu chakukho kuti pambula kuswera yapa, Chiuta wachitengepu kanthu. (Sumu 37:10, 11) Tigomeza ndi mtima wosi kuti Yehova wazomerezengi cha kuti umaliru wa charu chiheni ichi, ujumphi pa nyengu yo iyu wakuŵika.—Hab. 2:3.

8. Kumbi Nowa wangulongo wuli kuti waŵikanga maŵanaŵanu pa vinthu vo watingi wachitengi? (Wonani chithuzi cho che papeji 7.)

8 Vo Nowa watingi wachitengi: M’malu mwakuchita mphwayi chifukwa cha vinthu vo watingi wachitengi cha, Nowa waŵanaŵaniyanga vo watingi wachitengi. Nge “mupharazgi wa urunji,” Nowa wangupharazga mwakugomezeka uthenga wacheruzgu wo wangupasika. (2 Pet. 2:5) Tikayika cha kuti vo wanguchita, vingumuwovya kuti walutirizi kuja ndi chivwanu chakukho. Kusazgiyapu pa kupharazga, iyu wangugwirisiya ntchitu nthazi kweniso zeru kuti wafiski ntchitu yakukhoma chingaraŵa yo Chiuta wangumupasa.—Ŵerengani Ŵahebere 11:7.

9. Kumbi tingalondo wuli chakuwoniyapu chaku Nowa?

9 Nge Nowa, nasi titesesa ‘kuchita vinandi mu ntchitu ya Ambuya.’ (1 Ŵakor. 15:58) Vinthu vo tichita visazgapu kuzenga ndi kunozga malu ngakusopiyapu, kuwovya pa maunganu ngadera ndi ngachigaŵa pamwenga kugwira ntchitu pa ofesi ya nthambi ndipuso pa ofesi yakufwatuliyaku mabuku. Kuluska vosi, tigwira mwaphamphu ntchitu yakupharazga ndipu tiziŵa kuti yititiwovya kuja ndi chivwanu chakukho pa vinthu vo tilindiza kunthazi. Muzichi munyaki wanguti: “Asani ukambiyaku ŵanthu za vitumbiku vo Ufumu waku Chiuta uzisengi, vitikuwovya kuziŵa kuti wo utiŵapharazgiya alivi chilindiza ndipu awona kuti masuzgu ngawu ngangamala cha.” Kukamba uneneska, kupharazga kutitichiska kuti  tigomezengi kuti kunthazi vinthu visinthengi ndipu kutitiwovya kuti tingalekanga cha kuchita maphara ngakuchilonde umoyu.—1 Ŵakor. 9:24.

ASANI TABUDA

10. Konkhosani vo Davidi wanguchita.

10 Yehova wangukamba kuti Davidi wenga “munthu wa pamtima [paki].” (Mac. 13:22) Iyu wenga wakugomezeka pa umoyu waki kweni nyengu yinyaki wanguchita ubudi ukulu. Iyu wanguchita chigololu ndi Betesheba. Kusazgiyapu pa venivi, wakhumbanga kubisa ubudi waki ndipu wangunozga kuti Uriya murumu waku Betesheba, wakabayiki ku nkhondu. Fumu Davidi yingupasa Uriya kalata yo mwenga uthenga wakuti wakabayiki. (2 Sam. 11:1-21) Pavuli paki, ubudi waki ungusumulika. (Marko 4:22) Kumbi wanguchita wuli ubudi waki wati wasumulika?

Maubudi ngakali (Wonani ndimi 11-14)

11, 12. (a) Ntchinthu wuli cho Davidi watingi wachitengi cha wati wabuda? (b) Asani talapa ubudi ukulu wo tinguchita, kumbi tikhumbika kugomeza kuti Yehova wachitengenji?

11 Vo Davidi watingi wachitengi cha: Davidi watingi waviweziyengi vuli cha vo wanguchita. Iyu watingi wangagwenthengi cha masuzgu ngo wangukumana nangu chifukwa cha vo wanguchita. Nganyaki mwa masuzgu ngenanga nganguŵapu kwa umoyu waki wosi. (2 Sam. 12:10-12, 14) Ndichu chifukwa chaki wakhumbikanga chivwanu. Davidi wakhumbikanga kugomeza kuti chifukwa chakuti wangulapa ndi mtima wosi, Yehova wamugowokiyengi ndipuso wamuwovyengi kukunthiyapu masuzgu ngo watingi wakumanengi nangu.

12 Tosi tibuda chifukwa chakuti ndisi ambula kufikapu. Maubudi nganyaki ngakulu kuluska nganyaki. Nganyaki tingangaweze vuli cha tangachita kali. Mwaviyo, asani takumana ndi masuzgu chifukwa cha ubudi wo tachita, tingakhumbika ŵaka kukunthiyapu masuzgu ngo kwa umoyu widu wosi. (Ŵag. 6:7) Tikhumbika kugomeza layizgu laku Chiuta lakuti asani talapa, watiwovyengi kukunthiyapu chinanga kuti masuzgu ngo tangayamba tija.—Ŵerengani Yesaya 1:18, 19; Machitidu 3:19.

13. Kumbi Davidi wanguchita wuli kuti waje so pa ubwezi ndi Yehova?

13 Vo Davidi watingi wachitengi: Davidi wakhumbanga kuja so pa ubwezi ndi Yehova. Iyu wanguzomereza ulongozgi wo Yehova wangumupasa kuporote mwaku Natani yo wenga mchimi. (2 Sam. 12:13) Davidi wanguromba kwaku Yehova, wangusumuwa maubudi ngaki ndipu wangulongo kuti wakhumbanga ndi mtima wosi kuti Yehova wayambi so kumuyanja. (Sumu 51:1-17) M’malu mwakuŵanaŵana kuti palivi cho wangachita, wangusambirapu kanthu pa vo wangunangisa. Iyu wanguchita so cha maubudi ngakulungakulu ngenanga. Pati pajumpha vyaka, Davidi wangufwa wakugomezeka ndipu Yehova wanguluwa cha kugomezeka kwaki.—Ŵah. 11:32-34.

14. Kumbi tingasambiranji kwaku Davidi?

14 Kumbi tingasambiranji kwaku Davidi? Asani tachita ubudi ukulu, titenere kukambiya Yehova vo tabuda, kulapa kutuliya pasi pa mtima ndipuso kumupempha kuti watigowoke. (1 Yoh. 1:9) Titenere so kukambiya ŵara wo angatiwovya kuti tije pa ubwezi wamampha ndi Yehova. (Ŵerengani Yakobe 5:14-16.) Asani tizomera chovyu cho Yehova watipasa, tilongo kuti tigomeza layizgu laki lakuti watichizgengi ndi kutigowoke. Pavuli paki, titenere kusambirapu kanthu pa maubudi ngo tachita, kulutiriza kuteŵete Yehova ndipuso kuja ndi chigomezu pa vo watilayizga kunthazi.—Ŵah. 12:12, 13.

PA VAKUCHITIKA VINYAKI

Kutama (Wonani ndimi 15)

15. Kumbi tingasambiranji kwaku Hana?

15 Mwakuyanana ŵaka, mungaŵanaŵaniya so ateŵeti anyaki a munyengu yakali wo angugomeza Yehova ndipu anguchitapu kanthu pa vo angukumana navu. Mwakuyeruzgiyapu, Hana watingi wayimalisengi yija cha suzgu yakuleka kubala. Iyu wangugomeza Yehova kuti wamupembuzgengi ndipu wanguleka cha kuluta kuchisopa ku  chihema ndi kumukambiya vo venga mumtima mwaki. (1 Sam. 1:9-11) Kumbi chenichi ntchakuwoniyapu chamampha cha kwaku isi? Asani tisuzgika ndi matenda pamwenga masuzgu nganyaki ngo tiwona kuti tingamalana nangu cha tija, titimuponye Yehova chifukwa tigomeza kuti watitiphwere. (1 Pet. 5:6, 7) Ndipu tichita vosi vo tingafiska kuti tiyanduwengi ndi maunganu nga mpingu ndipuso vinthu vinyaki vo Yehova watipasa.—Ŵah. 10:24, 25.

Mwana yo walanda (Wonani ndimi 16)

16. Kumbi apapi angasambiranji kwaku Samuele yo wenga wakukota?

16 Nanga apapi wo ŵana ŵawu alanda? Samuele yo wenga wakukota, wanguŵachichizga cha ŵana ŵaki kuti alondongi fundu za urunji zo wanguŵasambiza. (1 Sam. 8:1-3) Iyu wangusiliya Yehova nkhani yo. Samuele wangulutiriza kuja wakugomezeka kweniso kuchita vinthu vakukondwesa Yehova, Awisi akuchanya. (Nthanthi 27:11) Venivi ndivu so vichitikiya apapi achikhristu mazuŵa nganu. Yiwu agomeza kuti nge mo anguchitiya ada a muntharika ya mwana wakusakaza, Yehova ngwakunozgeka kulonde ŵanthu wo angubuda ndipu alapa. (Luka 15:20) Pa nyengu yeniyi, yiwu alutiriza kuja akugomezeka kwaku Yehova ndipu agomeza kuti vo achita, viwovyengi kuti ŵana ŵawu awere mugulu laki.

Ndalama zimana (Wonani ndimi 17)

17. Ntchifukwa wuli chakuwoniyapu cha choko chikavu ntchakuchiska?

17 Ŵanaŵaniyani so choko chikavu cho chengaku munyengu yaku Yesu. (Ŵerengani Luka 21:1-4.) Munthukazi mwenuyu watingi wachitengepu kanthu cha pa vinthu vachinyengu vo vachitikanga pa nyumba yakusopiyamu. (Mat. 21:12, 13) Iyu watenere kuti wengavi nthowa yakuti wasaniriyi ndalama zinandi. Chinanga kuti venga viyo, wangupereka mwakukhumba yija “timatambala tiŵi” to ‘wenga natu kuti timuwovyi.’ Munthukazi wakugomezeka mwenuyu, wangulongo kuti wagomezanga Yehova ndi mtima wosi. Iyu waziŵanga kuti asani wadanjizga kuteŵete Yehova, wamupasengi vakukhumbika pa umoyu waki. Mwaviyo, chifukwa chakuti wenga ndi chigomezu wangupereka ndalama zo wenga nazu kuti wawovyi pa kusopa kwa uneneska ko Chiuta wangujalikiska. Mwakuyanana ŵaka, tigomeza kuti asani tidanjizengi Ufumu, Yehova wawonesesengi kuti te ndi vinthu vo tikhumbika pa umoyu.—Mat. 6:33.

18. Kambani chakuwoniyapu cha muteŵeti waku Chiuta wa mazuŵa nganu yo wanguwona vinthu mwakwenere.

18 Akhristu anyidu anandi mazuŵa nganu alongo kuti agomeza Yehova ndipu achitapu kanthu mu nthowa yakwenere pa vo akumana navu. Ŵanaŵaniyani mubali Malcolm, yo wenga wakugomezeka mpaka po wangufwiya mu 2015. Iyu ndi muwolu waki anguteŵete Yehova kwa vyaka vinandi ndipu nyengu zinyaki vinthu vaŵayendiyanga umampha kweni nyengu zinyaki vaŵayendiyanga umampha cha. Iyu wanguti: “Nyengu zinyaki uziŵa cha vo vikuchitikiyengi ndipu ukumana ndi vinthu vakusuzga pa umoyu. Kweni Yehova watumbika ŵanthu wo atimugomeza.” Malcolm wangukamba fundu yakovya yakuti, “Mukhumbika kuyesesa kuromba ndipuso kuja ndi phamphu pa ntchitu yaku Yehova. Lekani kuŵanaŵaniya vo mungatondeka kuchita kweni vo mungachita.” *

19. (a) Ntchifukwa wuli lemba lidu la chaka cha 2017 ndakwenere? (b) Kumbi mungaligwirisiya wuli ntchitu pa umoyu winu?

19 Po vinthu mucharu ichi ‘vilutiriya kunangika’ tingakumana ndi masuzgu ngakulu ukongwa. (2 Tim. 3:1, 13) Mwaviyo, kuluska mo tachitiyanga kali, sonu tikhumbika cha kuŵanaŵana kuti palivi cho tingachita chifukwa cha masuzgu ngo tikumana nangu. M’malu mwaki, po tigomeza Yehova ndi mtima wosi, titenere kuyesesa kuŵanaŵaniya vo tingafiska kuchita. Mwakukoliyana ndi fundu yeniyi, mphakwenere kuti lemba lidu la chaka cha 2017 ndakuti: “Gomeza Yehova ndipu chita cho ntchamampha”!—Sumu 37:3.

Lemba lidu la chaka cha 2017: “Gomeza Yehova Ndipu Chita Cho Ntchamampha”—Sumu 37:3.

^ ndimi 18 Wonani Chigongwi cha Alinda cha Chichewa cha October 15, 2013, papeji 17-20.