Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  February 2017

Vo Akuŵerenga Afumba

Vo Akuŵerenga Afumba

Wakutumika Paulo wangulemba kuti, Yehova “wazomerezengi cha kuti muyeseki mpaka kutondeka kukunthiyapu.” (1 Ŵakor. 10:13) Kumbi venivi ving’anamuwa kuti Yehova waziŵiya limu mayeseru ngo tingakunthiyapu ndipu pavuli paki, wasankha ngo tikumanengi nangu?

Wonani vo anyaki akamba chifukwa chakuja ndi maŵanaŵanu ngaviyo. Mubali munyaki yo mwana waki munthurumi wakujibaya, wangufumba kuti: ‘Kumbi Yehova wanguziŵiya limu kuti ini ndi muwolu wangu tazamufiska kukunthiyapu nyifwa ya mwana widu? Kumbi venivi vinguchitika chifukwa chakuti Chiuta waziŵanga kuti tingakunthiyapu?’ Kumbi pe chifukwa chakuvwika chakugomeze kuti Yehova waseleriyapu pa vinthu vosi vo vititichitikiya pa umoyu widu?

Tati taŵanaŵaniya so mazu ngo Paulo wangukamba, ngo ngakulembeka pa 1 Ŵakorinte 10:13, vatichitisa kuziŵa fundu yakuti: Palivi chifukwa cha m’Malemba chakugomeze kuti Yehova waziŵiya limu vo tingakunthiyapu ndipu wasankha mayeseru ngakuti tikumani nangu. Tiyeni tiwoni vifukwa vinayi vo tingakambiya viyo.

Chakwamba, Yehova wakupasa ŵanthu wanangwa wakusankha. Iyu wakhumba kuti tisankhengi tija vo tingachita pa umoyu widu. (Mar. 30:19, 20; Yos. 24:15) Asani tasankha umampha, Yehova walongozgengi kayenderu kidu. (Nthanthi 16:9) Kweni asani tasankha uheni, tikumanengi ndi masuzgu. (Ŵag. 6:7) Mwaviyo, asani Yehova ndiyu wasankha mayeseru ngakuti tikumani nangu, ndikuti watitilonda wanangwa wakusankha.

Chachiŵi, Yehova watitivikiliya cha ku ‘nyengu ndipuso vinthu vamabuchibuchi.’ (Wak. 9:11) Ngozi zikuluzikulu zo panyaki zingazisa masuzgu ngakulu, zingachitika chifukwa chakuti te pa malu ngaheni kweniso tafikapu pa nyengu yiheni. Yesu wangukamba za ŵanthu 18 wo angufwa chimati chati chaŵawiya ndipu wangulongo kuti lenga khumbu laku Chiuta cha kuti ngozi yeniyi yichitiki. (Luka 13:1-5) Asani kwachitika ngozi, mbumampha cha kukamba kuti Chiuta wanguziŵiya limu ŵanthu wo atingi afwengi ndi wo atingi ajengi ndi umoyu.

Chachitatu, nkhani yakuja wakugomezeka yikwaska weyosi. Kumbukani kuti Satana wangukamba kuti ateŵeti wosi aku Yehova angalutiriza cha kuja akugomezeka asani akumana ndi mayeseru. (Jobu 1:9-11; 2:4; Chiv. 12:10) Asani Yehova wativikiliyanga ku masuzgu nganyaki chifukwa chakuti wanguziŵa kuti tingakunthiyapu cha, kumbi vatingi vilongongi  cha kuti Satana waneneskanga kuti titeŵete Chiuta pa nyengu yo vinthu vititiyende umampha?

Chachinayi, Yehova wakhumbika kuziŵiya limu chechosi cha cho chitichitikiyengi. Asani Chiuta wasankhiya limu mayeseru ngo tikumanengi nangu, ndikuti watenere kuziŵiya limu vosi vo vitichitikiyengi kunthazi. Kweni maŵanaŵanu ngenanga ngakoliyana cha ndi Malemba. Mbuneneska kuti Chiuta wangaziŵiya limu vinthu vamunthazi. (Yes. 46:10) Bayibolu lilongo kuti iyu wachita kusankha vinthu vo wakhumba kuviziŵiya limu. (Chiy. 18:20, 21; 22:12) Iyu watumbika wanangwa widu chifukwa wagwirisiya ntchitu umampha nthazi zaki zakuziŵiya limu vinthu. Venivi ndivu tingakhumba kuti Chiuta watichitiyengi chifukwa watumbika wanangwa widu ndipuso nyengu zosi mijalidu yaki watiyigwirisiya ntchitu mu nthowa yamampha.—Mar. 32:4; 2 Ŵakor. 3:17.

Kumbi mazu ngaku Paulo ngakuti: “Chiuta . . . wazomerezengi cha kuti muyeseki mpaka kutondeka kukunthiyapu” ngang’anamuwanji? (1 Ŵakor. 10:13) Pa lemba ili, Paulo wakonkhosa vo Yehova wachita pa nyengu yo takumana ndi mayeseru. Vo wakutumika mwenuyu wangukamba, vititisimikiziya kuti chinanga tingakumana ndi mayeseru wuli pa umoyu widu, Yehova watiwovyengi asani titimugomeza. (Sumu 55:22) Paulo wangukamba mazu ngakupembuzga ngenanga chifukwa cha fundu ziŵi izi:

Fundu yakwamba, mayeseru ngo tikumana nangu ndi ngo “munthu weyosi wakumana nangu.” Mayeseru ngo tikumana nangu, anyidu nawu akumana nangu. Mwaviyo, tingatondeka cha kukunthiyapu asani tigomeza Chiuta. (1 Pet. 5:8, 9) Pa 1 Ŵakorinte 10:13, Paulo wakambanga za mayeseru ngo Ayisraele angukumana nangu muchipululu. (1 Ŵakor. 10:6-11) Mayeseru ngenanga, ŵanthu wosi akumananga nangu ndipu Ayisraele akugomezeka atingi atondekengi cha kukunthiyapu. Paulo wangukamba kanayi kuti “anyaki mwa ŵanthu ŵenaŵa” anguvwiya cha. Chakupasa chitima ntchakuti Ayisraele anyaki anguleka kugomeza Chiuta ndipu achitanga vinthu viheni.

Fundu yachiŵi, “Chiuta ngwakugomezeka.” Mo Chiuta wachitiyanga vinthu ndi ŵanthu ŵaki, vilongo kuti watiŵayanja ukongwa “wo atimuyanja ndi kusunga marangu ngaki.” (Mar. 7:9) Vilongo so kuti nyengu zosi Chiuta wafiska vo walayizga. (Yos. 23:14) Chifukwa chakuti mu nyengu yakali wangugomezeka, ŵanthu wo atimuyanja kweniso wo atimuvwiya atenere kugomeza kuti wazamufiska vinthu viŵi vo ve mu layizgu laki kwambula kuphwere kanthu za mayeseru ngo angakumana nangu. (1) Iyu wazomerezengi cha kuti suzgu yeyosi yo angakumana nayu yikuwi mpaka kufika pakuti atondeki kukunthiyapu ndipuso (2) “iyu . . . waperekengi nthowa” yakuti yiŵawovyi.

Yehova “watitipembuzga mu mayeseru ngidu ngosi”

Kumbi Yehova watiŵapasa wuli nthowa ŵanthu wo atimugomeza asani akumana ndi mayeseru? Mbuneneska kuti asani wangakhumba wangatuzapu mayeseru. Chinanga kuti vingaŵa viyo, kumbukani vo Paulo wangukamba kuti: “Iyu [Yehova] waperekengi nthowa kuti mufiski kukunthiyapu.” Ndichu chifukwa chaki nyengu zinandi iyu wapereka “nthowa” mwakutipasa vo tikhumbikiya kuti tifiski kukunthiyapu. Wonani nthowa zinyaki zo Yehova wagwirisiya ntchitu kuti watiwovyi.

  • Iyu “watitipembuzga mu mayeseru ngidu ngosi.” (2 Ŵakor. 1:3, 4) Yehova wangachitisa maŵanaŵanu ngidu ndipuso mtima widu kuti vijalikiskiki kuziya m’Mazu ngaki, mzimu utuŵa kweniso chakurya cho kapolu wakugomezeka watitipasa.—Mat. 24:45; Yoh. 14:16; Ŵar. 15:4.

  • Iyu wangatilongozga ndi mzimu utuŵa. (Yoh. 14:26) Asani takumana ndi mayeseru, mzimu ungatiwovya kuti tikumbukengi nkhani ndi fundu za m’Bayibolu ndipu pavuli paki, tingaziŵa vo titenere kuchita.

  • Iyu wangagwirisiya ntchitu angelu kuti atiwovyi.—Ŵah. 1:14.

  • Iyu wangagwirisiya ntchitu Akhristu anyidu kuti atichiski kuziya mu vo angakamba kweniso kuchita.—Ŵakol. 4:11.

Kumbi tingakamba kuti mazu ngaku Paulo ngo nge pa 1 Ŵakorinte 10:13, ngang’anamuwanji? Yehova watitisankhiya cha mayeseru ngo tikumana nangu. Asani takumana ndi mayeseru tikhumbika kuziŵa kuti: Asani tigomeza Yehova ndi mtima wosi, iyu wazomerezengi cha kuti mayeseru ngo ngafiki pakuti titondeki kukunthiyapu. Nyengu zosi watipasengi nthowa kuti tifiski kukunthiyapu. Fundu yeniyi njakuchiska ukongwa!