Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  December 2016

Kumbi Mukumbuka?

Kumbi Mukumbuka?

Kumbi mukuŵerenga magazini ngosi nga Chigongwi cha Alinda ngo ngatuwa pambula kuswera yapa? Asani ndi viyo, wonani asani mungamuka mafumbu yanga:

Kumbi ndi mitundu niyi ya ubudi yo Yesu wangukamba yo yikoliyana ndi ulongozgi wa pa Mateyu 18:15-17?

Yesu wakambanga nkhani zo ŵanthu angazimalisa pakuŵija mwakukambisana. Asani nkhani yo atondeka kuyimalisa ndikuti ubudi wo ngukulu ndipu ngwakwenere kuti munthu wasezgeki. Mwakuyeruzgiyapu, kukamba boza pamwenga kubiya munthu.—w16.05, papeji 7.

Kumbi mungachitanji kuti muyanduwengi asani muŵerenga Bayibolu?

Mungachita vinthu ivi: Muŵerengengi pa nyengu yo muleka kuŵanaŵana vinthu vinyaki, saniyani fundu zo musambirapu zo mungazigwirisiya ntchitu ndipu mujifumbengi mafumbu nge yanga: ‘Kumbi fundu iyi ndingayigwilisiya wuli ntchitu kuti ndiwovyi anyangu?’ ndipu fufuzani nkhani yo mumabuku ngo mwenangu.—w16.05, papeji 24-26.

Kumbi nkhunanga Mkhristu kuliya chinanga kuti wagomeza kuti kwazamuja chiyuka?

Kugomeza kuti akufwa azamuyuka ndiku cha kuchitisa Mkhristu kuti waleki kuja ndi chitima. Abrahamu wanguliya Sara wati wafwa. (Chiy. 23:2) Asani pajumpha nyengu, chitima chimalaku.—wp16.3, papeji 4.

Kumbi munthu yo we ndi kakuyikamu inki ka mlembi ndi anthurumi 6 wo apinga vidya wo akambika mu Ezekiele chaputala 9 amiyanji?

Tikusambira kuti amiya gulu la nkhondu lakuchanya lo lingugwilaku ntchitu yakubwanganduwa Yerusalemu ndipuso lo lazamugwilaku ntchitu yakutuzapu charu chiheni pa nkhondu ya Aramagedoni. Uchimi wenuwu ufiskika so mazuŵa nganu, munthu yo we ndi kakuyikamu inki wamiya Yesu Khristu. Iyu watiŵalemba chisimikizu ŵanthu wo azamutaskika.—w16.06, papeji 16-17.

Kumbi ndi masuzgu nanga ngo Bayibolu lakumana nangu chinanga kuti lilipu mpaka sonu?

(1) Bayibolu latingi livundengi chifukwa chakuti alilembanga pa mapepala ngakupangika ndi gumbwa kweniso pa vikopa. (2) alongozgi andali ndi avisopa alisuskanga ndipu anguyesesa kuti lileki kusanirika ndipuso (3) anyaki akhumbanga kusintha uthenga waki.—wp16.4, papeji 4-7.

Kumbi ndi vinthu nivi vo Mkhristu wangachita kuti waje ndi umoyu wambula kukhumba vinandi?

Ziŵani vo mukhumbika ukongwa ndipuso lekani kugula vinthu vambula kukhumbika. Pangani bajeti yo mungakwanisa. Tayani vinthu vo mulivi navu ntchitu kweniso wezani ngongoli zosi. Mugwirengi ntchitu yakulembeka kwa maora ngamanavi ndipu wonani mo mungasaziyaku uteŵeti winu.—w16.07, papeji 10.

Kumbi ndi vinthu nivi vo Bayibolu likamba kuti vamampha ukongwa kuluska golidi pamwenga siliva?

Lemba la Jobu 28:12, 15 lilongo kuti zeru zakutuliya kwaku Chiuta ziluska golidi pamwenga siliva. Po mutesesa kuzifufuza, yesesani kujiyuyuwa ndipuso kuja ndi chivwanu chakukho.—w16.08, papeji 18-19.

Kumbi nkhwakwenere mubali kusunga mwembi mazuŵa nganu?

Mu vyaru vinyaki ŵanthu awona kuti palivi suzgu munthurumi kusunga mwembi umana wo watiwuphwere umampha kweniso wo ungaleka kutondekesa ŵanthu kuvwisiya uthenga wa Ufumu. Chinanga kuti ve viyo, abali anyaki angasankha kuleka kusunga mwembi. (1 Ŵakor. 8:9) Muvyaru pamwenga muvigaŵa vinyaki, ŵanthu awona kuti Akhristu akhumbika cha kusunga mwembi.—w16.09, papeji 21.

Ntchifukwa wuli tikhumbika kugomezga kuti Davidi wangubaya Goliati?

Goliati wenga mutali masentimita 15 kujumpha munthu yo waziŵika kuti ndi mutali ukongwa mazuŵa nganu. Nkhani zakali zo zikonkhoska za nyumba yaku Davidi ndipuso vo Yesu wangukamba, vilongo kuti Davidi wenga munthu chayiyu. Fundu zo zikulembeka zikoliyana ndi malu ngo vinthu venivi vinguchitikiya.—wp16.5, papeji 13.

Kumbi kuziŵa vinthu, kuwamu ndipuso zeru vipambana wuli?

Munthu yo waziŵa vinthu, waziŵa ŵaka fundu zinandi. Munthu yo ngwakuwamu, wawona mo fundu yinyaki yikoliyana ndi yinyaki. Penipo munthu yo we ndi zeru, wagwirisiya ntchitu umampha kuziŵa vinthu ndi kuwamu.—w16.10, papeji 18.