Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  April 2016

Kumbi Uteŵeti Winu we nge Dungwi?

Kumbi Uteŵeti Winu we nge Dungwi?

UTEŴETI widu ngwakukhumbika ukongwa. Kweni mbanthu wosi cha wo awona viyo. Chinanga kuti ŵanthu anyaki avwisiya uthenga wa m’Bayibolu, kweni ndi wosi cha wo awona kuti kusambira Mazu Ngaku Chiuta nkhwakukhumbika.

Umu ndimu ve nge ndi Gavin yo wangwamba kuwungana kweni wakananga kusambira Bayibolu. Iyu wangukamba kuti: “Ndaziŵanga vinthu vinandi cha mu Bayibolu. Mwaviyo, ndakhumbanga cha kuti ŵanthu aziŵi kuti nditiliziŵisisa cha Bayibolu. Ndawopanga kuti ŵanthu angandipulusa. Kweniso ndawonanga kuti vinditangwanisengi.” Kumbi muwona wuli? Kumbi Gavin wangusintha cha? Awa! Ŵanaŵaniyani mo Bayibolu lingawovye munthu. Yehova wangukambiya ŵanthu ŵaki akali kuti kuti: “Mazu ngangu ngasikengi nge ndi dungwi, nge ndi vuwa yakuwaza pa uteka.” (Mar. 31:19, 30; 32:2) Vo dungwi lichita vilongo mo tingawovye ŵanthu a mitundu yosi mu uteŵeti.1 Tim. 2:3, 4.

 KUMBI UTEŴETI WE NGE DUNGWI MU NTHOWA WULI?

Dungwi lituwa kamanakamana. Dungwi lipangika kamanakamana kutuwa ku mvuchi wo we mude. Mazu ngaku Yehova ‘ngangusika nge ndi dungwi’ mu nthowa yakuti wakambanga mwalisungu kweniso mwakuŵanaŵaniya ŵanthu ŵaki. Tiyeza Yehova asani titumbika maŵanaŵanu nga anyidu. Tichiska so ŵanthu kuti aŵanaŵanengi ndi kusankha ŵija vakuchita. Asani tichita viyo, mazu ngidu ngatiŵafika pa mtima ŵanthu ndipuso uteŵeti widu uja waphindu ukongwa.

Dungwi lisisipuwa. Uteŵeti widu usisipuwa anyidu asani tiŵanaŵaniya nthowa zakupambanapambana zo tingaŵawovye kuti aziŵi vinandi. Gavin yo tamuzumbuwa kali wanguchichizika cha kuti wazomeri kusambira Bayibolu. M’malu mwaki, M’bali Chris yo wangukumana nayu pakwamba wangugwirisiya ntchitu nthowa zakupambanapambana kuti Gavin wazomeri kusambira Bayibolu. Mwakuyeruziyapu, Chris wangukambiya Gavin kuti mu Bayibolu mwe uthenga wakuzirwa, ndipu asani wangawuziŵa vingamuwovya kuvwisa vo tisambira ku mawunganu. Pavuli paki, Chris wangukambiya Gavin kuti mauchimi nga m’Bayibolu ndingu ngangumuwovya iyu kusimikiza kuti Bayibolu ndaunenesa. Ivi vinguchitisa kuti akambisani mauchimi nganandi ndi kufiskika kwaki. Gavin wanguchiskika ukongwa ndi nkhani zenizi ndipu pavuli paki wanguzomera kusambira Bayibolu.

Dungwi ndakukhumbika ku vamoyu. Mu charu cha Yisraele mwe nyengu yakotcha ukongwa. Pa nyengu iyi, vuwa yitunya cha kwa myezi yinandi. Kwambula muzizi wa dungwi, vimiti ndi uteka vifota ndi kufwa. Nge mo Yehova wangukambiya, mazuŵa nganu kwe nja yauzimu. (Amosi 8:11) Iyu wangukamba kuti Akhristu akusankhika azamuja nge “dungwi lakutuwa kwaku Yehova” penipo apharazga uthenga wa Ufumu pamoza ndi a “mbereri zinyaki.” (Mika 5:7; Yoh. 10:16) Uthenga wo tipharazga ntchigaŵa cha vinthu vo Yehova wapereka kuti wawovyi ŵanthu wo apenja unenesa. Kumbi tiwona kuti uthenga uwu ngwakukhumbika?

Dungwi ndi thumbiku lakutuwa kwaku Yehova. (Mar. 33:13) Uteŵeti widu ungaja thumbiku ku ŵanthu wo azomera kusambira. Gavin wangutumbikika. Chifukwa chakusambira Bayibolu, iyu wangumukika mafumbu ngosi ngo wenga nangu. Wanguluta panthazi ukongwa ndipu wangubatizika. Sonu iyu ndi muwolu waki Joyce akondwa kupharazgiya limoza uthenga wamampha wa Ufumu.

Akaboni aku Yehova apharazga uthenga wa Ufumu pacharu chosi

UTEŴETI WINU NGWAKUZIRWA

Kuŵanaŵaniya vo dungwi lichita kungatiwovya kuti tiwonengi kuti kupharazga nkhwakukhumbika ukongwa. Chifukwa wuli? Kadonthu kamoza ka dungwi kangagwira ntchitu yikulu cha, kweni madonthu nganandi ngatovya kuti pacharu paje muzizi. Mwakuyanana waka, asani tipharazga tingawona kuti tichita vimana. Kweni vo ta Akaboni tosi tichita vitovya kuti tichitiyi ukaboni “ku mitundu yosi.” (Mat. 24:14) Kumbi uteŵeti widu uŵengi thumbiku lakutuwa kwaku Yehova kwa anyidu? Uŵengi thumbiku asani uthenga wo tipharazga we nge dungwi lo lituwa kamanakamana, lichiska ndipuso ndakukhumbika ku vamoyu.