Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda  |  Na. 1 2016

 BAYIBOLU LISINTHA ŴANTHU

Ndiwovyeni Kuti Ndije Mwachimangu Kweniso Mwalikondwa Kwa Chaka Chimoza Pe

Ndiwovyeni Kuti Ndije Mwachimangu Kweniso Mwalikondwa Kwa Chaka Chimoza Pe
  • NDIKUWA MU: 1971

  • CHARU CHO NDIKUWIYA: FRANCE

  • MBIRI YANGU: NDENGA WANDEWU, MUREŴI NDIPUSO NDAMWANGA NDI KUGULISA MUNKHWALA WAKUTIMBANYIZA WONGU

UMOYU WANGU WAKALI:

Apapi ŵangu ndi mzichi wangu ajanga mumuzi wa Tellancourt kuvuma kwa charu cha France. Ada ŵenga a ku France ndipu ama ŵenga a ku Italy. Panyengu yo ndenga ndi vyaka 8, tingusamiya kumalu nganyaki ko kwajanga ŵanthu akavu mumsumba wa Rome ku Italy. Tajanga mwakusuzika ukongwa. Apapi ŵangu ayambananga ukongwa chifukwa cha masuzu nga ndalama.

Ndati ndakwanisa vyaka 15, ama angundikambiya kuti ndituwepu panyumba kuti nkhajengi ndi mabwezi ngangu. Ndingutuwapu panyumba ndipu ndazangaku pa kanyengu. Ndingwamba kucheza ndi ŵanthu aheni. Zuŵa linyaki munthu munyaki yo wawonekanga nge watindikhumbiya vamampha wangundipasa munkhwala wakutimbanyiza wongu. Ndingulonda chifukwa ndakhumbanga kuti ndiwonekengi nge mura. Kutuliya nyengu yeniyi ndingwamba kugwiriskiya ntchitu munkhwala wakutimbanyiza wongu ndipuso kuchita ureŵi. Kanandi ndachichizgikanga kuchita ureŵi. Umoyu ndawuwonanga kuti ngwakuzirwa cha ndipu nyifwa ndayiwopanga cha. Ndasoŵanga munthu wakucheza nayu. Ndati ndafika vyaka 16, ndingumwa moŵa unandi ndipu ndingujiponya mnyanja kuti ndifwi. Ndingujipweteka ukongwa ndipu ndingukomoka kwa mazuŵa ngatatu.

Ndingwamba kuwona kuti umoyu ngwakukhumbika kweni ndachitanga ndewu kweniso ndenga wachinyengu. Ndagonananga ndi ŵanthu, ndaŵadikisanga munyumba zawu ndipu pavuli paki ndaŵabiyanga katundu yosi wakuzirwa yo ndasaniya munyumba. Gulu la vigeŵenga landitumanga kuti ndigulisengi munkhwala wakutimbanyiza wongu m’charu chosi cha Italy. Kanandi ndakolekanga ndi apolisi. Palivi chazeru cho ndachitanga pa umoyu wangu ndipu ndachitanga ŵaka chechosi cho ndakhumba. Kweni ndaziŵanga kuti Chiuta wenga ndi chilatu pakundilenga. Ndinguromba kwaku Chiuta kuti wandiwovyi kuja mwachimangu kweniso mwalikondwa kwa chaka chimoza pe.

MO BAYIBOLU LINGUSINTHIYA UMOYU WANGU:

Ndati ndakwanisa vyaka 24 ndinguŵanaŵana kuti ndisamiyi ku England. Umoyu wangu wenga pangozi chifukwa chakuti ndayanjananga ndi ŵanthu wo agwiriskiyanga ntchitu munkhwala wakutimbanyiza wongu. Ndechendanyamuki, ndinguluta dankha kwa ama kuti nkhaŵawoni. Ndati ndafika ndinguzizwa ukongwa kuwona Annunziato Lugarà kuti wakambiya ama vo Bayibolu likamba. * Chifukwa chakuti ndamuziŵanga kuti nchigeŵenga,  ndinguchita mantha ukongwa ndipu ndingumufumba chifukwa cho waziya. Wangundikambiya kuti wakusintha ndipu sonu ndi Kaboni waku Yehova. Ndipu wangundipempha kuti ndikakumani ndi Akaboni asani ndafika ku England. Ndinguzomera kuti ndamukumana nawu. Kweni ndati ndafika, ndingwamba so kuchita vinthu viheni vo ndachitanga kali.

Zuŵa linyaki ndingukumana ndi Kaboni wagaŵiyanga magazini nga Chigongwi cha Alinda ndi Galamukani! mumsewu unyaki ku London. Ndati ndakumbuka vo tingupangana ndi Annunziato, ndingumupempha kuti wandisambizengi Bayibolu.

Vo ndingusambira m’Bayibolu vingundikondwesa ukongwa. Mwakuyeruzgiyapu, ndingukondwa ukongwa ndi fundu yakukwaskana ndi Chiuta yo ye palemba la 1 Yohane 1:9 yakuti: “Chiuta ngwakugomezeka kweniso ndi murunji, mwaviyo asani tazomereza maubudi ngidu, iyu watigowokiyengi ndi kutitowesa ku ntchitu zosi ziheni.” Ndingukwaskika ukongwa ndi vo lemba ili likamba chifukwa ndajiwonanga kuti nde wakufipisika ndi vo ndachitanga. Ndati ndayamba ŵaka kusambira, ndingwamba kuluta ku Nyumba ya Ufumu ya Akaboni aku Yehova. Ndati ndafika angundilondere umampha ukongwa. Ndinguwona kuti atanjana ukongwa ndipu nyengu zosi ndakhumbiranga kusaniya ŵanthu aviyo. Ivi vingundichitisa kuti ndisere mpingu wenuwu.

Ndingusuzika cha kuleka kugwiriskiya ntchitu munkhwala wakutimbanyiza wongu, ndipuso ureŵi, kweni vingundisuza kuti ndisinthi mijalidu yangu yinyaki. Ndakhumbikanga kwamba kuchita vinthu mwaulemu ndi ŵanthu kweniso kuŵaŵanaŵaniya. Ndeche ndi mijalidu yinyaki yiheni yo ndikhumbika kusintha. Kweni Yehova wandiwovya kuti ndisinthi mijalidu yinyaki. Ndati ndasambira Bayibolu kwa myezi 6 ndingubatizika ndipu ndinguja Kaboni waku Yehova. Ndingubatizika mu chaka cha 1997.

MO NDAYANDULIYA:

Ndati ndabatizika ndingutorana ndi Barbara. Nayuso ndipu wabatizika ŵaka. Yo wenga mubwezi wangu wakali wati wawona mo ndingusinthiya, nayuso wangwamba kusambira Bayibolu. Pati pajumpha nyengu, wangubatizika limoza ndi mzichi waki. Pavuli paki, aku ŵawu ŵa agogu anthukazi wo ŵenga ndi vyaka 80 angwamba kusambira Bayibolu ndipu angubatizika.

Sonu nditeŵete nge mura m’mpingu ndipu nyengu zosi ini ndi muwolu wangu tisambiza Bayibolu ŵanthu aku Italy wo aja ku London. Nyengu zinyaki ndisuzgika maŵanaŵanu asani ndakumbuka vo ndachitanga kali, kweni muwolu wangu ndiyu watindiwovya ukongwa. Ini ndi muwolu wangu titanjana ukongwa kweniso ndikusaniya Ada achanju wo ndapenjanga nyengu zosi. Ndingupempha Chiuta kuti wandiwovyi kuja mwachimangu kweniso mwalikondwa kwa chaka chimoza pe kweni wandiwovya kusaniya likondwa lambula kumala!

Ini ndi muwolu wangu titanjana ukongwa kweniso ndikusaniya Ada achanju wo ndapenjanga nyengu zosi

^ ndimi 10 Wonani nkhani yamutu wakuti, “Bayibolu Lisintha Ŵanthu—Ndinkayenda ndi Mfuti Kulikonse,” yakukambika ndi Annunziato Lugarà, mu Chigongwi cha Alinda cha Chichewa cha July 1, 2014, peji 8 mpaka 9.