Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  October 2017

Yosefi Waku Arimatiya Wanguchita Mantha Cha

Yosefi Waku Arimatiya Wanguchita Mantha Cha

YOSEFI WA KU ARIMATIYA waziŵanga cha kuti wangachita wuli kuti wakakumani ndi nduna ya Aroma. Pontiyo Pilato waziŵikanga kuti wenga wakusuzga ukongwa. Kweni kuti Yesu waŵikiki mwa ulemu, munthu munyaki wakhumbikanga kupempha thupi laki kwaku Pontiyo Pilato . Yosefi waŵanaŵananga kuti kuŵengi kwakusuzga kuchikumana ndi Pilato kweni ndimu venge cha. Wati wavwa kutuliya kwa msilikali kuti Yesu wafwa, Pilato wanguzomerezga Yosefi kuti wakato thupi laku Yesu. Chinanga kuti Yosefi wenga ndi chitima, wanguluta kumalu ngo Yesu angumubayiya.—Marko 15:42-45.

  • Kumbi Yosefi waku Arimatiya wenga yani?

  • Kumbi iyu waziŵananga wuli ndi Yesu?

  • Ntchifukwa wuli mukhumbika kuziŵa nkhani yaki?

 YUMOZA WA MUWUPU WA SANIHEDIRINI

Uthenga wamampha waku Marko ukamba kuti Yosefi wenga “wakuziŵika umampha wa mu Mphara Yikulu ya Milandu.” Mphara Yikulu ya milandu yo yikambika yapa, ndi Sanihedirini lo lenga khoti likulu la Ayuda ndipuso wupu wo walongozganga. (Marko 15:1, 43) Chifukwa chakuti Yosefi wenga yumoza wa muwupu wa mphala ya marangu, penga pambula kusuzga kuchikumana ndi Pilato. Mwaviyo, vakuziziswa cha kuti Yosefi wenga wakukhupuka.—Mat. 27:57.

Kumbi mukamba mwambula mantha kuti ndimwi wakusambira waku Yesu?

Wupu wa Sanihedirini wamutinkhanga ukongwa Yesu. Wupu wenuwu wapenjanga nthowa yakuti umubayiyi. Kweni Bayibolu likamba kuti Yosefi wenga “munthu wamampha kweniso murunji.” (Luka 23:50) Mwakupambana ndi arara anandi a mu wupu wa Sanihedirini, iyu wachitanga vinthu mwa uneneska, wenga ndi mijalidu yamampha ndipu wayesesanga kuvwiya marangu ngaku Chiuta. Yosefi “walindizganga Ufumu waku Chiuta,” vo vilongo chifukwa cho wangujaliya wakusambira waku Yesu. (Marko 15:43; Mat. 27:57) Panyaki Yosefi wayanjanga uthenga waku Yesu chifukwa chakuti wakhumbanga urunji ndipuso uneneska.

WAKUSAMBIRA YO WAZIŴIKANGA CHA

Lemba la Yohane 19:38, likamba kuti Yosefi “wenga wakusambira waku Yesu kweni wambula kuziŵika ku ŵanthu chifukwa chakopa Ayuda.” Kumbi iyu wachitanga mantha ndi vinthu wuli? Iyu waziŵanga kuti Ayuda atinkhanga Yesu ndipu weyosi yo wamugomezganga wasezgekanga musinagogi. (Yoh. 7:45-49; 9:22) Munthu yo wasezgeka, wanyozekanga, achezanga nayu cha ndipu Ayuda anyaki amuwonanga nge kuti ndi Myuda so cha. Ivi vinguchitisa kuti Yosefi wawopi kukamba pakweru kuti wagomezga Yesu. Asani wanguchita viyo atingi amulondengi udindu waki ndipu watingi watumbikikengi so cha.

Yosefi ndiyu pe cha yo wachitanga mantha. Mwakukoliyana ndi Yohane 12:42, “anandi kusazgapu akuwusa anguvwana mwaku iyu [Yesu] kweni angumuzomerezga cha chifukwa cha Afarisi, kuti aleki kusezgeka musinagogi.” Yumoza mwa ŵanthu yaŵa wenga Nikodemo yo wenga so mu wupu wa Sanihedirini.—Yoh. 3:1-10; 7:50-52.

Yosefi wenga wakusambira waku Yesu kweni wajiziŵikisanga cha ku ŵanthu. Kuchita viyo kwenga kwakofya chifukwa Yesu wangukamba kuti: “Weyosi yo watindizomera pa masu pa ŵanthu, nani ndazakumuzomera pa masu pa Ada wo ŵe kuchanya. Kweni weyosi yo watindikana pa masu pa ŵanthu, nani ndazakumukana pa masu pa Ada wo ŵe kuchanya.” (Mat. 10:32, 33) Yosefi wangumukana cha Yesu kweni wachitanga mantha kuti wajisumuwi. Kumbi ndimu viliri ndi imwi?

Yosefi wanguchita chinthu chamampha chifukwa Bayibolu likamba kuti wanguzomerezgaku cha vo khoti la Sanihedirini lingupangana kuti Yesu wabayiki. (Luka 23:51) Panyaki nge mo anyaki akambiya, pa nyengu yo Yesu amumbanga mulandu Yosefi pengavi. Mwemosi mo venge, Yosefi watingi wakondwengi cha kuwona vinthu vambula urunji  vo vachitikiyanga Yesu. Kweni patingi paŵengevi vo watingi wachitengi.

WANGUCHITA MANTHA CHA

Yesu wati wafwa, Yosefi wangulongo kuti wengavi mantha ndipu wanguwovya akusambira aku Yesu. Vo wanguchita vikambika pa Marko 15:43 kuti: “Iyu wanguchita chiganga kuluta kwaku Pilato kuchipempha thupi laku Yesu.”

Viwoneka nge kuti Yosefi wengapu po Yesu wafwanga chifukwa chakuti Pilato wechendaziŵi kuti Yesu wafwa, ndipu iyu waziŵa kali. Ndichu chifukwa chaki po Yosefi wafumbanga za thupi laku Yesu, “Pilato wakayikanga kuti Yesu wafwa kali.” (Marko 15:44) Asani Yosefi wanguwona Yesu wachifwa pa chimiti chakutombozgekiyapu, kumbi vo wanguwona ndivu vingumuwovya kusanda mtima waki kuti wajiziŵikiski kuti wenga wakusambira waku Yesu? Panyaki venga nadi viyo. Mosi mo venge, Yosefi wanguchitapu kanthu. Sonu watingi wachitengi so mantha cha kukamba kuti ngwakusambira waku Yesu.

YOSEFI WANGUŴIKA YESU

Dangu la Ayuda lakambanga kuti ŵanthu wo ayeruzgikanga kuti akabayiki, akhumbikanga kuŵikika lumwi lechendasere. (Mar. 21:22, 23) Aroma nawu akambanga kuti ŵanthu wo abayika chifukwa chakuti ŵenga vigaŵenga, viŵanda vawu avisiyanga pachimiti cho aŵapayikapu kuti vivundiyi penipo pamwenga wosi aŵaponyanga muzenji limoza. Kweni Yosefi wakhumbanga cha kuti venivi ndivu vimuchitikiyi Yesu. Kufupi ndi ko Yesu wangubayikiya, kwenga muwunda waku Yosefi wo wanguwusema ŵaka. Muwunda wenuwu wenga wufya. Ivi vilongo kuti Yosefi wangutuwaku pambula kuswera  ku Arimatiya * kuluta ku Yerusalemu. Iyu wakhumbanga kugwirisiya ntchitu malu ngenanga kuti aziŵikengeku ŵanthu a mubanja laki. (Luka 23:53; Yoh. 19:41) Chifukwa chakuti Yosefi wangupereka kwaku Yesu muwunda waki wo atingi azimuŵikengemu kunthazi, wangulongo kuti wenga wakupaska ndipuso wangufiska uchimi wo wakambanga kuti Mesiya wazamuŵikika “limoza ndi akukhupuka.”—Yes. 53:5, 8, 9.

Kumbi pe chechosi cho mutichiwona kuti ntchakukhumbika ukongwa kuluska ubwezi winu ndi Yehova?

Mabuku ngosi nganayi nga uthenga wamampha ngakamba kuti, ŵati atuzgapu liŵavu laku Yesu pachimiti chakutombozgekiyapu, Yosefi wangulikulunga musalu yamampha ndi kuchiliŵika mumuwunda waki. (Mat. 27:59-61; Marko 15:46, 47; Luka 23:53, 55; Yoh. 19:38-40) Munthu yumoza yo wazumbulika kuti wanguwovya Yosefi, wenga Nikodemo. Iyu wanguza ndi mure kweniso aloye. Chifukwa chakuti ŵanthu yaŵa ŵenga ndi maudindu, vakukayikisa kuti angunyamuwa ŵija liŵavu laku Yesu. Viwoneka kuti angukambiya ateŵeti ŵawu kuti ndiwu anyamuwi ndipuso kuchiŵika. Chinanga kuti venga viyo, ntchitu yo ŵanthu ŵaŵi yaŵa angugwira yenga ntchitu yikulu. Munthu yo wakonga chiŵanda mu nyengu yakali, wajanga wakufipiskika kwa mazuŵa 7, ndipu vosi vo wakonga vajanga vakufipiskika. (Maŵ. 19:11; Hag. 2:13) Yiwu akhumbikanga kujipatuwa pa sabata yosi ya Phaska, aleki kuchitaku nawu chechosi chakukwaskana ndi Phaska ndipuso aleki kukondweriyaku. (Maŵ. 9:6) Yosefi watingi watinkhikengi ndi anyaki chifukwa chakunozga muwunda waku Yesu. Kweni pa nyengu iyi iyu wenga wakunozgeka kukumana ndi suzgu lelosi chifukwa chakumupaska Yesu malu nga ulemu ngakuti waŵikikemu kweniso chifukwa chakulongo pakweru kuti wenga wakusambira waku Khristu.

KUMBI NKHANI YAKU YOSEFI YINGUMALA WULI?

Bayibolu likambapu so cha zaku Yosefi, pavuli pa uthenga wamampha wo wakonkhosanga za kuŵikika kwaku Yesu. Ivi vichitisa kuti paje fumbu lakuti: Kumbi iyu wangumaliya pani? Tingakamba kuti tiziŵa cha. Mwakukoliyana ndi vo takonkhoska, panyaki kunthazi wangukamba pakweru kuti wenga wakusambira waku Yesu. Vitenere kuti venga viyo chifukwa pa nyengu yo Yosefi wayesekanga, iyu wanguchita vinthu mwambula mantha ndipuso chivwanu chaki chingukho. Ivi vingulongo kuti wangusintha.

Nkhani iyi yichitisa kuti paje fumbu lo weyosi wangachita umampha kuliŵanaŵaniya lakuti: Kumbi tiwona kuti vinthu nge udindu, ntchitu, katundu yo te nayu, banja lidu pamwenga wanangwa wo te nawu wakuchita vo tikhumba, ndivu vakukhumbika ukongwa kuluska ubwezi widu ndi Yehova?

^ ndimi 18 Tawuni ya Arimatiya panyaki ndiyu yaziŵikanga kuti Rama, yo sonu yiziŵika kuti Rentis (Rantis). Ku Rama ndiku kwenga kwaki kwaku Samuele, ndipu tawuni yeniyi ye pa mtunda wa makilomita 35 kunkhondi cha ku zambwi kwa Yerusalemu.—1 Sam. 1:19, 20.