Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  October 2017

Lisungu lo Mkhristu Munyaki Wangulongo

Lisungu lo Mkhristu Munyaki Wangulongo

AWISI aku John ŵenga Akaboni ndipu angubatizika cha m’ma 1950. Yiwu ajanga mutawuni yimana ya ku Gujarat ku India. John ndi azichi ŵaki atatu ndi avurwa ŵaki ŵaŵi limoza ndi anyinawu wo ŵenga Akatolika akujipereka, asuskanga vo awisewu agomezganga.

Zuŵa linyaki awisi aku John angumukambiya kuti wakapereki nevulupu ku munyawu waku mpingu. Zuŵa lenili ndi mulenji, John wangujicheka chikumbu po wajulanga chithini. Chifukwa wakhumbanga kuvwiya awisi, wangumanga chikumbu ndi kasalu ndipu wangwenda pasi kuchipereka nevulupu.

John wati wafika ko awisi angumutuma, muwolu wa munthu yo angumutumaku, yo so wenga Kaboni waku Yehova ndiyu wangulonde nevulupu. Iyu wanguwona kuti John wangupwetekeka pachikumbu ndipu wangumuwovya. Iyu wangumusuka chilonda ndi munkhwala ndi kumangapu bandeji. Pavuli paki, wangumupangiya ti ndipu pa nyengu iyi wakambisananga nayu nkhani za m’Bayibolu.

John wangwamba kusintha mo wawoniyanga Akaboni aku Yehova ndipu wangumufumba nkhani ziŵi zo awisi ndi iyu apambananga. Iyu wakhumbanga kuziŵa asani Yesu ndi Chiuta ndipuso asani mphakwenere Akhristu kupemphera kwaku Mariya. Pakuti muwolu wa munthu yo wachiziŵanga chineneru cho John walongoronga cha Chigujarati, wangumuka mafumbu ngaki kutuliya m’Bayibolu ndipu wangumupaska kabuku ka “Uthenga Uwu Wamampha wa Ufumu” (This Good News of the Kingdom).

Wati waŵerenga kabuku yaka, John wanguvwa nge kuti kenga kakwamba kuvwa uthenga wa m’Bayibolu. Iyu wanguluta ku wasembi ndipu wangumufumba mafumbu ngeninga ngaŵi. Wasembi yo wangukwiya ukongwa ndipu wangumuhucha ndi Bayibolu ndi kukamba kuti: “Ndiwi Satana! Ndilongo m’Bayibolu po akulemba kuti Yesu ndi Chiuta cha. Ndilongo po akulemba kuti tingamusopanga cha Mariya. Ndilongo!” John wanguzizwa ndi vo wasembi wanguchita ndipu wangumukambiya kuti, “Mwazakuliwona so cha lundi langu mutchalitchi la Katolika.” Ndivu nadi wanguchita!

John wangwamba kusambira ndi Akaboni ndipu wanguzomera kusopa kwa uneneska. Iyu wangwamba kuteŵete Yehova. Mukuluta kwa nyengu abali ŵaki anyaki nawu angusambira uneneska. Mazuŵa nganu John weche ndi bamba pa chikumbu po wangujicheka vyaka pafupi 60 vajumpha. Iyu weche kukumbuka lisungu lo Mkhristu munyaki wangumulongo, lo linguchitisa kuti wasambiri uneneska.—2 Ŵakor. 6:4, 6.