Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda  |  Na. 6 2016

 NKHANI YA PAPEJI LAKWAMBA | VIWONA VO VITITIWOVYA KUZIŴA WO ŴE KUCHANYA

Vo Ŵanthu Akamba pa Nkhani ya Wo ŵe Kuchanya

Vo Ŵanthu Akamba pa Nkhani ya Wo ŵe Kuchanya

Kumbi mukujifumbapu kuti, kumbi kuchanya kuwoneka wuli ndipu kwe ayani? Asani ndi viyo, ndimwi pe cha. Kwa vyaka masawuzandi, ŵanthu aŵanaŵana vinthu vakupambanapambana pa nkhani iyi. Anyaki agomeza kuti kuchanya kuja apapi ŵidu wo akufwa ndipu tikhumbika kuŵasopa. Ŵanthu anyaki aŵanaŵana kuti ndi malu ngakukondwesa kweniso ngakuvikilirika ko kuja angelu kweniso ŵanthu amampha wo akufwa. Penipo anyaki agomeza kuti kuchanya kuja achiuta mamiliyoni nganandi.

Ŵanthu anandi akamba kuti tingaziŵa cha kuti kuchanya kwenji chifukwa palivi yo wakutuwa kuchanya. Kweni ivi vaboza. Yesu Khristu wajanga kuchanya wechendazi pacharu chapasi. Iyu wangukambiya alongozgi avisopa mwambula kubisa kuti: “Ndaza kutuliya kuchanya kuzichita khumbu langu cha kweni kuzichita khumbu laku yo wakundituma.” Mwaviyo, Yesu wangukambiya akusambira ŵaki vo wanguwona ndi masu kuti: “Munyumba ya Ada mwe malu nganandi ngakujamu.”—Yohane 6:38; 14:2.

Chiuta ndiyu Awisi aku Yesu, ndipu zina laki ndi Yehova. ‘Nyumba’ yaku Yehova ye kuchanya. (Sumu 83:18) Mwaviyo, Yehova Chiuta ndi Yesu Khristu ndiwu pe wo angatikonkhose umampha vinthu vo ve kuchanya. Yiwu akuvumbuwa vinthu vinandi vo ve kuchanya kuziya muviwona vo angulongo ŵanthu akugomezeka.

Nkhani yo ye papeji 4 yikonkhosa Malemba ngo ngakamba za viwona vakupambanapambana vo ŵanthu anyaki anguwona. Asani muŵerenga nkhani iyi, mutenere kukumbuka kuti vinthu vo ve kuchanya mungaviwona cha pamwenga kuviko. Kweni Chiuta wakutikonkhose vinthu venivi mu nthowa yakuti isi tingavwa m’malu mwakukonkhosa mu nthowa yo tingaleka kuvwa. Viwona venivi vikuwovyeningi kuziŵa wo aja kuchanya ko kwe “malu nganandi ngakujamu.