Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda  |  Na. 6 2016

Kakoŵa

Vo Tisambira ku Viyuni

Vo Tisambira ku Viyuni

“Fumba, . . . viyuni va mude ndipu vikukambiyengi. Ndiyani pa vosi ivi yo waleka kuziŵa kuti janja laku Yehova ndilu lachita venivi?”—Jobu 12:7, 9.

VYAKA vakujumpha 3,000 kuvuli uku, Jobu wanguziŵa kuti tingasambira vinandi vakukwaskana ndi Chiuta ku viyuni. Kweni vo viyuni ivi vichita, tingavigwirisiya ntchitu pakukonkhosa ntharika kweniso vakuyeruzgiyapu. Nkhani zinandi zakukwaskana ndi viyuni zo zikambika m’Bayibolu, zititisambiza kukhumbika kwa umoyu kweniso ubwezi widu ndi Chiuta. Tiyeni tiwonepu vakuyeruzgiyapu vimanavi.

KUMBI AKAŴERUŴERU AZENGA PANI VIZIMBU?

Kaŵeruŵeru

Ŵanthu wo ajanga mu Yerusalemu aŵaziŵanga umampha akaŵeruŵeru chifukwa azenganga vizimbu mumphepeti mwa nyumba zawu. Anyaki azenganga vizimbu munyumba yakusopiyamu yo Solomoni wanguzenga. Akaŵeruŵeru wo azenganga vizimbu mu nyumba yakusopiyamu asaniyanga malu ngamampha ngakuleriyamu ŵana ŵawu, kwambula kutimbanyizika.

Mwana waku Kora yo wangulembaku Sumu chaputala 84, wateŵetiyanga mu nyumba yakusopiyamu sabata yimoza pa myezi 6 yeyosi. Iyu wanguwona vizimbu venivi, ndipu wakhumbisisanga kuja nge kaŵeruŵeru yo wajanga mu nyumba yaku Yehova. Iyu wanguti: “Yehova wamaŵanja, chihema chinu chikulu ntchakutowa! Umoyu wangu wosi ukhumbisisa, hinya, uzinduka chifukwa chakukhumbira kuja mubalaza laku Yehova.  . . Yehova wamaŵanja, Fumu yangu kweniso Chiuta wangu, chinanga nkhayuni kasaniya pakuja kwenikuwa, ndipu kaŵeruŵeru watijizenge chizimbu. Mwenimo waphwere ŵana ŵaki pafupi ndi guŵa linu la sembi.” (Sumu 84:1-3) Kumbi nasi pamoza ndi ŵana ŵidu, tilongo kuti tiwonga kweniso tikhumbisisa kuwungana ndi ŵanthu aku Chiuta nyengu zosi?—Sumu 26:8, 12.

KAKOŴA WAZIŴA NYENGU YAKI

Mchimi Yeremiya wangulemba kuti: ‘Kakoŵa yo waphuluruka mude waziŵa nyengu yaki.’ Iyu waziŵanga kuti akakoŵa ajumphanga mu Charu Chakulayizgika. Mu chipwepwi, akakoŵa akujumpha 300,000 asama kutuwa ku Africa kuluta kunkhondi kwa Europe ndipu ajumpha mu Dambu la Yordane. Mu chihanya, akakoŵa aziŵa kuti nyengu yakwana yakuwere ku malu ngo atayiya mazira. Mwakuyanana ndi viyuni vinyaki vo visama, akakoŵa ‘asunga nyengu yawu yakuwere.’—Yeremiya 8:7.

Buku linyaki likamba kuti: “Chakuziziswa ukongwa ndi viyuni vo visama ntchakuti palivi yo wativituma kuti visami.” (Collins Atlas of Bird Migration) Yehova Chiuta wakupasa viyuni vo visama zeru zakuziŵiya nyengu yo vitenere kusamiya pe. Kweni ŵanthu wakuŵapasa zeru zakuziŵiya nyengu zakupambanapambana. (Luka 12:54-56) Mwakupambana ndi zeru zo ze ndi kakoŵa, zeru zaku Chiuta zitovya taŵanthu kuziŵa kuti vinthu vo vichitika mu nyengu yo tilimu vimiyanji. Ayisraele a munyengu yaku Yeremiya, atoliyangaku kanthu cha po Yehova waŵatcheŵesanga. Chiuta wangukamba vo vinguchitisa  kuti achiti viyo. Iyu wanguti: “Yiwu akana mazu ngaku Yehova, nanga ndi zeru wuli zo ŵe nazu?”—Yeremiya 8:9.

Mazuŵa nganu, te ndi ukaboni wakukwana wakulongo kuti tija mu nyengu yo Bayibolu likamba kuti ndi “mazuŵa ngakumaliya.” (2 Timote 3:1-5) Kumbi mujengi nge kakoŵa ndi kuziŵa ‘nyengu’ yo tilimu?

NKHWAZI YIWONA PATALI UKONGWA

Nkhwazi

Nkhwazi zizumbulika maulendu nganandi m’Bayibolu ndipu zisanirika ukongwa mu Charu Chakulayizgika. Asani nkhwazi ye mu chizimbu chaki, ‘masu ngaki ngaleresa kutali kuti yipenji chakurya.’ (Jobu 39:27-29) Yiwona patali ukongwa mwakuti yingawona kalulu yo we pa mtunda wa 1 kilomita.

Nge mo nkhwazi ‘yiwone chinthu patali,’ Yehova nayu waziŵa vinthu vo vichitikengi kunthazi. Mwaviyo, Yehova Chiuta wangukamba kuti: “Kutuwa pakwamba ndikambiya limu vo vazamuchitika, kwamba kali ukongwa ndikambiya limu vinthu vechendachitiki.” (Yesaya 46:10) Asani tivwiya ulongozgi waku Yehova, tingapinduwa ndi zeru zaki zakuziŵa vinthu vo vichitikengi kunthazi.—Yesaya 48:17, 18.

Bayibolu liyeruzgiya ŵanthu wo agomeza Chiuta ndi nkhwazi. Likamba kuti: “Wo agomeza Yehova azamusaniya so nthazi. Aphulurukengi ndi mapapa nge mo nkhwazi yichitiya.” (Yesaya 40:31) Nkhwazi yigwirisiya ntchitu mphepu yakufunda yo yikwera muchanya kuti yifiski kuphuluruka liŵiliŵi. Asani yafika po pe mphepu yeniyi, yitambasuwa mapapa ngaki ndipu yiphuluruka mwakuzunguliya mphepu yeniyi. Pavuli paki, yiphulurukiya muchanya ukongwa. Mwaviyo, nkhwazi yithemba nthazi zaki cha kuti yiphulurukengi liŵiliŵi kweniso mtunda utali. Mwakuyanana waka, ŵanthu wo agomeza Yehova akhumbika kuthemba iyu kuti waŵapasi “nthazi yo yiluska yo te nayu.”—2 Ŵakorinte 4:7, 8.

“MO NYAKHUTU WAWUNGANISKIYA ŴANA ŴAKI”

Nyakhutu ndi ŵana ŵaki

Kwati kwaja kamanavi kuti wabayiki, Yesu wanguleresa tawuni ya Ayuda ndi kukamba kuti: “Yerusalemu, Yerusalemu, iwi wakubaya achimi ndi wakuponya mya ŵanthu wo atumika kwaku iwi. Ini ndakhumbanga kuwunganiska pamoza ŵana ŵaku kananandi waka nge mo nyakhutu wawunganiskiya ŵana ŵaki kusi kwa mapapa ngaki! Kweni iwi ungukana.”—Mateyu 23:37.

Viyuni vitanja so kuvikiriya ŵana ŵaki. Viyuni vo vitayiya pasi, nge nyakhutu viwonesesa kuti kulivi chirwani. Asani nyakhutu wawona kaŵandu, waliya kuti watcheŵesi tiŵana taki. Pavuli paki, tiŵana titchimbiya mwaliŵi ndi kubisama kusi kwa mapapa ngaki. Ku mapapa ngaki, tiŵana to tisambira waka kuphuluruka tingabisamaku asani kwe lumwi ndipuso vuwa. Mwakuyanana waka, Yesu wakhumbanga kuvikiriya ŵanthu wo ajanga mu Yerusalemu kuti aje pa ubwezi wakukho ndi Yehova. Mazuŵa nganu, Yesu watitidana kuti tiluti kwaku iyu kuti watipumuzi kweniso kuti wativikiriyi ku vinthu vo vititifipisa mtima pa umoyu widu.—Mateyu 11:28, 29.

Kukamba uneneska, tingasambira vinandi ku viyuni. Asani muwona vo viyuni ivi vichita, mukumbukengi Malemba ngo ngakonkhosa viyuni venivi. Kaŵeruŵeru wakuwovyeningi kukhumbisisa kuja munyumba yaku Yehova, ko kung’anamuwa kuwungana nyengu zosi. Mugomezengi Chiuta kuti ndiyu wakupaseningi nthazi kuti muphulurukengi nge mo nkhwazi yichitiya. Zani kwaku Yesu kuti musambiri uneneska wo ungakuvikiriyani nge mo nyakhutu wachitiya ndi tiŵana taki. Ndipu kakoŵa wakukumbuseningi kuti mujengi masu ndi kuziŵa kuti vinthu vo vichitika mu nyengu yo tilimu vimiyanji.

Ziŵani Vinandi

UTHENGA WAMAMPHA WAKUTULIYA KWAKU CHIUTA

Kumbi Mungaja Wuli pa Ubwezi ndi Chiuta?

Ziŵani asani Chiuta watuvwa marombu ngosi, mo tingarombe kweniso vo tingachita kuti tije pa ubwezi ndi Chiuta.