Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda  |  Na. 6 2016

 NKHANI YA PAPEJI LAKWAMBA | VIWONA VO VITITIWOVYA KUZIŴA WO ŴE KUCHANYA

Viwona Vakukwaskana ndi Wo ŵe Kuchanya

Viwona Vakukwaskana ndi Wo ŵe Kuchanya

M’Bayibolu mwe viwona vakupambanapambana vo vititiwovya kuziŵa vinthu vo ve kuchanya. Titikupemphani kuti muŵerengi umampha viwona venivi. Vinthu vinyaki vo vikambika mu viwona ivi vimiya vinthu chayivu cha. Chinanga kuti ve viyo, vingakuwovyani kuziŵa wo ŵe kuchanya kweniso mo yiwu angakuwovyiyani.

YEHOVA NGWAPACHANYA UKONGWA

“Mpandu wachifumu wenga pamalu ngaki kuchanya, ndipu munthu munyaki wanguja pa mpandu wenuwu. Yo wangujapu wawonekanga nge mwa wa jasipa ndipuso nge mwa uyera wakuzirwa ukongwa. Ndipu chiŵingavuwa chakuwoneka nge mwa wa emarodi chinguzunguliya mpandu wenuwu.”—Chivumbuzi 4:2, 3.

“Penga ukweru ukulu wo ungumuzunguliya. Ukweru uwu wawonekanga nge chiŵingavuwa mumtambu pa zuŵa la vuwa yikulu. Umu ndimu ukweru ukulu wo ungumuzunguliya wawonekiyanga. Wawonekanga nge unkhankhu waku Yehova.”—Ezekiele 1:27, 28.

Vo wakutumika Yohane kweniso mchimi Ezekiele anguwona, vilongo unkhankhu waku Yehova, yo ndi Chiuta Wapachanya Ukongwa. Yiwu anguwona mya yakutowa, chiŵingavuwa ndi mpandu wachifumu. Ivi vititiwovya kuziŵa kuti ko Yehova waja nkhwakutowa ukongwa, nkhwamampha ndipuso kwe chimangu.

Vo Yohane ndi Ezekiele anguwona vakukwaskana ndi Chiuta viyanana ndi mazu ngo wakulemba sumu wangukamba. Iyu wanguti: “Yehova ndi mura ndipu wakhumbika kumuthamika ukongwa. Iyu ngwakuchitisa mantha kuphara achiuta anyaki wosi. Achiuta wosi a ŵanthu amitundu yinyaki mbambula fundu. Kweni Yehova ndiyu wakupanga kuchanya. Po pe iyu pe ulemu ndi unkhankhu. Nthazi ndi kutowa ve munyumba yaki yakupaturika.”—Sumu 96:4-6.

Chinanga kuti Yehova Ngwapachanya Ukongwa, kweni watitipempha kuti tipempherengi kwaku iyu ndipu watitisimikiziya kuti watitivwisiya. (Sumu 65:2) Chiuta watitiyanja ndipuso watitiŵanaŵaniya ukongwa. Ndichu chifukwa chaki, wakutumika Yohane wangukamba kuti: “Chiuta ntchanju.”—1 Yohane 4:8.

YESU WE KUJANJA LAMARYI LAKU CHIUTA

“[Stefano] wanguzazika ndi mzimu wakupaturika, ndipu wanguwona unkhankhu waku Chiuta kweniso waku Yesu yo wanguma kujanja lamaryi laku Chiuta. Iyu wanguti: ‘Awonani! Ndiwona kuti kuchanya kwajulika ndipuso Mwana wa munthu wama kujanja lamaryi laku Chiuta.’”—Machitidu 7:55, 56.

Kwati kwaja kamanavi kuti Stefano wawoni chiwona ichi, Yesu wangubayika ndi alongozgi achiyuda wo Stefano wakambanga nawu pa nyengu iyi. Chiwona ichi chingusimikiziya kuti Yesu ngwamoyu ndipuso kuti wanguyuskika ndi kutumbikika. Wakutumika  Paulo wangukamba so nkhani yeniyi kuti: “[Yehova] wanguyuska [Yesu] kutuwa kwa akufwa ndipu wangumujarika kujanja laki lamaryi kumalu ngakuchanya, kutali ukongwa ndi boma lelosi, ufumu, nthazi, umbuya ndi zina lelosi lo likudanika, mu nyengu yinu pe cha, kweniso mu nyengu yo yituza.”—Ŵaefesu 1:20, 21.

Kusazgapu pakukonkhosa kuti Yesu wakupasika udindu wapachanya, Malemba ngalongo so kuti iyu watitiŵanaŵaniya ukongwa nge mo Yehova wachitiya. Pa nyengu yo wenga pacharu chapasi, Yesu wanguchizga ŵanthu wo atamanga, akupunduka ndi kuyuska ŵanthu akufwa. Chifukwa cha nyifwa yaki, Yesu wangulongo kuti watanja ukongwa Chiuta ndi ŵanthu. (Ŵaefesu 2:4, 5) Mwakuwovyeka ndi Chiuta, pambula kuswera Yesu walongongi nthazi zaki mwakupereka vitumbiku ku ŵanthu wosi akuvwiya pacharu chapasi.

ANGELU ATEŴETE CHIUTA

“[Ini mchimi Danyele] ndingulutiriza kuleresa mpaka mipandu yachifumu yinguŵikika pamalu ngaki ndipu Wamazuŵa Nganandi [Yehova] wanguja pasi. . . . Ateŵeti 1 miliyoni amuteŵetiyanga zuŵa lelosi, ndipuso anyaki 100 miliyoni amanga pamasu paki.”—Danyele 7:9, 10.

Mu chiwona ichi, Danyele wanguwona mungelu yumoza cha, kweni wanguwona angelu anandi. Ichi chitenere kuti chenga chiwona chakuziziswa ukongwa! Angelu tingaŵawona cha, kweni ŵe ndi zeru ukongwa, nthazi ndi unkhankhu. Magulu nga angelu ngasazgapu aserafi ndi akerubi. Bayibolu lizumbuwa angelu maulendu ngakujumpha 250.

Chiuta wangwamba kulenga angelu wechendalengi ŵanthu. Angelu akujapu cha pacharu chapasi. Yehova wachilenga charu chapasi, yiwu awonanga ndipu angukondwa ukongwa.—Jobu 38:4-7.

Angelu akugomezeka ateŵete Chiuta mu nthowa zinandi. Mwakuyeruzgiyapu, yiwu agwiraku ntchitu yakukhumbika ukongwa yo yichitika mazuŵa nganu. Ntchitu iyi njakupharazga uthenga wa Ufumu waku Chiuta. (Mateyu 24:14) Ivi vinguziŵika mu chiwona cho wakutumika Yohane wanguwona. Iyu wangulemba kuti: “Ndinguwona mungelu munyaki wachiphuluruka mude, ndipu wenga ndi uthenga wamampha wamuyaya kuti wakawupharazgi ku ŵanthu wo aja pacharu chapasi, ndi ku charu chechosi, fuku lelosi,  chineneru chechosi ndi mtundu wewosi.” (Chivumbuzi 14:6) Kali angelu alongoronga ndi ŵanthu, kweni mazuŵa nganu cha. Chinanga kuti ve viyo, yiwu alongozga ŵanthu kuti akapharazgi uthenga wamampha ku ŵanthu a mtima wamampha.

SATANA WALANDIZGA ŴANTHU ANANDI

“Ndipu kuchanya kungubuka nkhondu: Mikayeli [Yesu Khristu] ndi angelu ŵaki anguchita nkhondu ndi chinjoka. Chinjoka nachu ndi angelu ŵaki chinguchita nkhondu. Kweni chingupunda cha, ndipuso malu ngawu ngangusanirika so cha kuchanya. Mwaviyo, chinguponyeka pasi chinjoka chikulu, njoka yakali, yo yidanika kuti Dyaboli ndi Satana, yo walandizga charu chosi. Wanguponyeka pacharu chapasi ndipu angelu ŵaki nawu anguponyeka nayu limoza.”—Chivumbuzi 12:7-9.

Nyengu yinyaki kuchanya kwengavi chimangu. Ŵanthu ŵati alengeka waka, mungelu munyaki wakhumbanga kuti ŵanthu asopengi iyu. Mwaviyo, iyu wangugarukiya Yehova ndipu wanguja Satana, zina lo ling’anamuwa “Wakususka.” Pavuli paki, angelu anyaki nawu angugarukiya Yehova ndipu angwamba kuziŵika kuti viŵanda. Yiwu achita vinthu viheni ukongwa, asuska Yehova ndipuso achitisa ŵanthu anandi kuti aleki kulondo fundu zaku Yehova.

Satana ndi viŵanda vaki achita vinthu viheni kweniso mbankhaza. Yiwu mbarwani ŵidu ndipu ndiwu achitisa masuzgu nganandi pacharu chapasi. Mwakuyeruzgiyapu, Satana wangubaya viŵetu ndi ateŵeti aku Jobu. Pavuli paki, wangubaya ŵana 10 aku Jobu ndi ‘chimphepu chikulu’ cho chinguwisa nyumba yo ŵengamu. Pakumaliya, Satana wangupweteka Jobu ndi ‘vilonda vakuŵaŵa ukongwa kutuwa ku phazi mpaka pa mutu waki.’—Jobu 1:7-19; 2:7.

Kweni pambula kuswera, Satana wabayikengi. Kutuliya po wanguponyeke pacharu chapasi, iyu waziŵa kuti waja ndi “kanyengu kamanavi.” (Chivumbuzi 12:12) Palivi chamampha cho Satana walindiza. Ivi vakukondwesa ukongwa!

ŴANTHU WO ALUTA KUCHANYA

‘Yesu wakugula ŵanthu kutuwa mu fuku lelosi, chineneru chechosi, mtundu wewosi ndi charu chechosi kuti ateŵete Chiuta. Ndipu wakuŵasambusa kuti aje mafumu ndi asembi aku Chiuta widu, ndipu azamulamuliya charu chapasi nge mafumu.’—Chivumbuzi 5:9, 10.

Nge mo Yesu wanguyuskikiya ndi kuluta kuchanya, pe so ŵanthu anyaki wo ayuskika ndi kuluta kuchanya. Yesu wangukambiya akusambira ŵaki akugomezeka kuti: “Ndiluta kuchikunozgiyani malu. Ndipuso, . . . ndizengi so kuzikutoliyani kwidu, kuti ko kwe ini, namwi mukaje kweniko.”—Yohane 14:2, 3.

Pe chifukwa cho ŵanthu anyaki alutiya kuchanya. Yiwu amulamuliya limoza ndi Yesu mu Ufumu waku  Chiuta. Ufumu uwu wazamulamuliya charu chosi chapasi kweniso kuzisa vitumbiku ku ŵanthu. Ufumu wenuwu ndiwu Yesu wangukambiya akusambira ŵaki kuti awupempheriyengi. Iyu wanguti: “Ada ŵidu akuchanya, zina linu lipaturiki. Ufumu winu uzi. Khumbu linu lichitiki, kuchanya kweniso pacharu chapasi.”—Mateyu 6:9, 10.

KUMBI WO ALUTA KUCHANYA AMUCHITANJI?

“[Ini wakutumika Yohane] ndinguvwa mazu nganthazi kutuwa ku mpandu wachifumu ngakuti: ‘Wonani! Chihema chaku Chiuta che pakati pa ŵanthu, . . . wazamuleska masozi ngosi mu masu ngawu, ndipu nyifwa yazamuŵapu so cha, chinanga nkhuliya, chinanga nkhukuta, chinanga mburwirwi kuti vazamuŵapu so cha. Vinthu vakali valutapu.’”—Chivumbuzi 21:3, 4.

Chiwona ichi chikonkhosa vinthu vo vazamuchitika mu Ufumu waku Chiuta, wo wakulamuliya waki ndi Yesu kweniso ŵanthu wo aluta kuchanya. Pa nyengu iyi, Ufumu waku Chiuta wazamutuzgapu ulamuliru waku Satana ndi kusintha charu kuja paradayisu. Vinthu vosi vo vichitisa kuti ŵanthu asuzgikengi vazamumala. Nyifwa nayu kwazamuŵavi.

Nanga ntchinthu wuli cho chazamuchitikiya ŵanthu mabiliyoni wo aluta kuchanya cha asani ŵafwa? Kunthazi, azamuyuskika ndipu azamuja ndi umoyu wamuyaya mu Paradayisu pacharu chapasi.—Luka 23:43.

Viwona ivi vititisimikiziya kuti Yehova Chiuta, Mwana waki Yesu Khristu, angelu akugomezeka ndipuso ŵanthu wo akugurika pacharu chapasi atitiŵanaŵaniya ukongwa kweniso akhumba kuti tikondwengi. Kuti muziŵi vinandi vo azamuchita kunthazi, kambisanani ndi Akaboni aku Yehova pamwenga lutani pa webusayiti yidu ya www.jw.org/tog, ndi kupanga dawunilodi buku lakuti, Kumbi Tingasambiranji m’Bayibolu?