Julani

Lutani pa vo ve mukati

 MUTU 96

Yesu Wangumuka Wakulamuliya Wachinyamata yo Wenga Wachuma

Yesu Wangumuka Wakulamuliya Wachinyamata yo Wenga Wachuma

Pa nyengu yo Yesu wenga ku Pereya pa ulendu waki wakuluta ku Yerusalemu, mnyamata munyaki wachuma wangumutchimbiriya, ndipu wangugwada panthazi paki. Iyu wenga “yumoza wa alongozgi” ndipu watenere kuti wenga mulongozgi wa sinagogi, pamwenga wenga yumoza wa Mphara Yikulu ya Milandu. Iyu wangufumba Yesu kuti: “Msambizi wamampha, kumbi ndikhumbika kuchitanji kuti ndizilonde umoyu wamuyaya?”—Luka 8:41; 18:18; 24:20.

Yesu wangumuka kuti: “Ntchifukwa wuli utindidana kuti wamampha? Wamampha walipu yumoza pe, yo ndi Chiuta.” (Luka 18:19) Yapa, viwoneka kuti munthu mwenuyu wangugwiriskiya ntchitu zina la udindu lakuti “Msambizi Wamampha” mwamwambu ŵaka chifukwa ndivu so asambizi a Chiyuda achitanga. Chinanga kuti Yesu wasambizanga umampha, kweni wakhumbanga kuti munthu uyu waziŵi kuti ndi Chiuta pe yo watenere kudanika kuti “Wamampha.”

Yesu wangumukambiya kuti: “Sonu asani ukhumba kuzilonde umoyu, lutirizga kusunga marangu.” Munthu mwenuyu wangufumba Yesu kuti: “Marangu nanga?” Yesu wangukamba marangu 5 ngo ngasanirika mu Marangu 10. Marangu ngenanga ngakambanga za kubaya, kuchita chigololu, kuba, kupereka ukaboni waboza kweniso kutumbika apapi. Pavuli paki, Yesu wangusazgiyapu dangu lakukhumbika ukongwa lakuti: “Uyanjengi munyaku nge mo utijiyanjiya wamweni.”—Mateyu 19:17-19.

Munthu uyu wangumuka Yesu kuti: “Ndaja ndichisunga marangu ngosi ngenanga; sonu ntchinthu wuli so cho nditondeka kuchita?” (Mateyu 19:20) Panyaki iyu wawonanga kuti wakhumbika kuchita vinthu vinyaki vamampha kweniso vapachanya ukongwa kuti wazisaniyi umoyu wamuyaya. Yesu wati wawona kuti munthu mwenuyu wapemphanga ndi mtima wosi, “wangumuyanja ukongwa.” (Mariko 10:21) Chinanga kuti venga viyo, munthu mwenuyu wenga ndi suzgu yinyaki yo yamutimbanyizganga.

Munthu uyu, wayanjanga ukongwa vinthu vo wenga navu. Mwaviyo, Yesu wangumukambiya kuti: “Pe chinthu chimoza cho ukhumbika kuchita. Luta ukagulisi vinthu vosi vo wenavu ndipu ndalama zaki ukapaski akavu. Asani wachita viyo, uŵengi ndi chuma kuchanya ndipu ukazi kuti uzije wakusambira wangu.” Iyu wakhumbikanga kugaŵiya ŵanthu akavu ndalama zaki, wo atingi amuweziyengi  cha. Pavuli paki, watingi wajengi wakusambira waku Yesu. Kweni munthu uyu wanguguŵa ukongwa ndi vo Yesu wangumukambiya ndipu wangutuwapu we ndi chitima. Chifukwa chakuti iyu wayanjanga ukongwa chuma chaki kweniso “katundu munandi” yo wenga nayu, wangutondeka kuwona chuma chakuzirwa. (Mariko 10:21, 22) Yesu wangukamba kuti: “Vazamukuŵa vakusuzga ukongwa kuti ŵanthu wo ŵe ndi ndalama azisere mu Ufumu waku Chiuta!”—Luka 18:24.

Akusambira aku Yesu anguzizwa ukongwa ndi mazu ngenanga kweniso mazu ngo Yesu wangukamba pavuli paki. Iyu wanguti: “Ntchipusu kuti ngamila yisere pajisu la zingani, kuluska kuti munthu wachuma wasere mu Ufumu waku Chiuta.” Venivi vinguchitiska kuti akusambira ŵaki afumbi kuti: “Sonu ndiyani yo wangataskika?” Kumbi ving’anamuwa kuti palivi munthu weyosi yo wangataskika? Yesu wangulereska akusambira ŵaki ndipu wanguŵamuka kuti: “Vinthu vo ŵanthu angatondeka kuchita, Chiuta wangatondeka cha.”—Luka 18:25-27.

Pavuli paki, Peturo wangukambiya Yesu kuti iyu ndi akusambira anyaki angusankha mwakupambana ndi vo munthu wachuma wangusankha. Iyu wangukamba kuti: “Awonani! Taleka vinthu vosi ndi kulondo yimwi, nanga ntchinthu wuli cho tisaniyengi?” Yesu wangukamba vitumbiku vo yiwu azamusaniya chifukwa cha kuja akusambira ŵaki. Iyu wanguŵakambiya kuti: “Nditikuneneskiyani, mu nyengu yakulenga so, asani Mwana wa munthu wazija pampandu waki wa unkhankhu, yimwi mwaja muchindilondo, mwazamuja mumipandu 12, kweruzga mafuku 12 nga Isirayeli.”—Mateyu 19:27, 28.

Yapa, Yesu waŵanaŵaniyanga va kunthazi mu nyengu ya kulenga so vinthu pacharu chapasi kuti vizije nge po venge pakwamba mumunda wa Edeni. Peturo ndi akusambira anyaki azamuja ndi mwaŵi wakulamuliya charu chapasi cha Paradayisu limoza ndi Yesu. Wenuwu ndi mwaŵi wapachanya ukongwa kuphara vinthu vosi vo yiwu angusiya!

Vitumbiku vo akusambira aku Yesu atingi alondiyengi, venga va kunthazi pe cha. Yiwu angwamba kulonde vitumbiku vinyaki nyengu yeniyo. Yesu wanguŵakambiya kuti: “Palivi munthu yo waleka nyumba, muwolu waki, avurwa ŵaki, aku ŵaki kweniso apapi ŵaki chifukwa cha Ufumu waku Chiuta, yo wangatondeka kulonde vinthu vinandi mu nyengu yinu kweniso umoyu wamuyaya mu mugonezi wo utuza.”—Luka 18:29, 30.

Kukamba uneneska, kwekosi ko akusambira aku Yesu alutanga, asaniyanga abali ŵawu wo asopanga nawu limoza. Ubali wenuwu wenga wakuzirwa ukongwa kweniso waŵachitiskanga kuti akoliyanengi ukongwa kuphara mo ŵanthu a banja limoza achitiya. Kweni vakupaska chitima kuti mnyamata wakulamuliya yo wenga wachuma wangutaya mwaŵi wakusaniya vitumbiku venivi kweniso mwaŵi wakuchilamuliya limoza ndi Yesu mu Ufumu waku Chiuta.

Yesu wangulutirizga kukamba kuti: “Kweni ŵanthu anandi wo ŵe kukwamba, azamuja kukumaliya, ndipu wo ŵe kukumaliya, azamuja kukwamba.” (Mateyu 19:30) Kumbi iyu wang’anamuwanganji wachikamba mazu ngenanga?

Wakulamuliya wachinyamata yuwa, wenga mugulu la ŵanthu wo ŵenga “kukwamba” chifukwa wenga yumoza wa alongozgi a Chiyuda. Munthu mwenuyu, watingi wajengi wakusambira waku Yesu kweniso watingi wachitengi vinthu vinandi vamampha chifukwa chakuti walondonga marangu ngaku Chiuta. Kweni iyu wanguŵika chuma kweniso vinthu vo wenga navu pakwamba. Mwakupambana ndi munthu mwenuyu, ŵanthu anyaki wo awonekanga kuti mbambula kuzirwa awonanga kuti vo Yesu wasambizanga venga vauneneska kweniso awonanga kuti vinthu venivi vazakuŵawovya kusaniya umoyu wamuyaya. Munthowa yinyaki tingakamba kuti pakwamba ŵenga “kukumaliya” kweni sonu anguja “kukwamba.” Ndipu alindizganga kuzija pa mipandu yachifumu pamoza ndi Yesu ndi kulamuliya charu chapasi cha Paradayisu.