LUKA 17:20-37

  •  

  • NTCHINTHU WULI CHO CHAZAMUCHITIKA PA ZUŴA LO YESU WAZAMUVUMBULIKA?

Yesu watenere kuti wenga weche ku Samariya pamwenga ku Galileya. Sonu Afarisi angwamba kumufumba nyengu yo Ufumu waku Chiuta uziyengi. Yiwu aŵanaŵananga kuti asani Ufumu waza, kwazamuchitika phwandu likulu kweniso vinthu vapade. Kweni Yesu wangukamba kuti: “Ufumu waku Chiuta uzengi mu nthowa yakuti ŵanthu wosi azichiti kuwuwona cha; pamwenga kuti ŵanthu azichiti kukamba kuti, ‘Wonani kunu!’ pamwenga, ‘Kuwa!’ Chifukwa awonani! Ufumu waku Chiuta we pakati pinu.”—Luka 17:20, 21.

Ŵanthu anyaki angaŵanaŵana kuti Ufumu wo Yesu wakambanga ulamuliya mumitima ya ateŵeti aku Chiuta. Chinanga kuti panyengu iyi Yesu wakambanga ndi Afarisi kweni Ufumu uwu wenga mumitima yawu cha. M’malu mwaki, Yesu wachikamba kuti Ufumu we pakati pawu wang’anamuwanga kuti Fumu yakusankhika ya Ufumu waku Chiuta yo ndi Yesu, yenga nawu pamoza.—Mateyu 21:5.

Afarisi ŵati aluta, Yesu wangukambiya akusambira ŵaki fundu zinyaki zakukwaskana ndi kuza kwa Ufumu. Pakukamba za vinthu vo vazamuchitika asani waziyamba kulamuliya, Yesu wangukambiya akusambira ŵaki kuti: “Mazuŵa ngatuza penipo mwazamukhumbira kuwona limoza la mazuŵa nga Mwana wa munthu, kweni mwazakuliwona cha.” (Luka 17:22) Yesu wangulongo kuti Mwana wa munthu wazamuyamba kulamuliya nge Fumu kunthazi. Nyengu yeniyi yechendafiki, akusambira anyaki akhumbisiskanga kuziŵa nyengu yo Ufumu wenuwu watingi uziyengi. Kweni yiwu akhumbikanga kulindizga mpaka po yakwaniya nyengu yo Chiuta wakusankha kuti Mwana wa munthu waziyi.

Yesu wangulutirizga kukamba kuti: “Ŵanthu azakukukambiyani kuti, ‘Wonani kuwa!’ pamwenga, ‘Wonani kunu!’ Mungazilutangaku cha pamwenga kuŵalondo. Chifukwa nge mo limphezi ling’animiya kutuwa kuchigaŵa chinyaki cha kuchanya kufika kuchigaŵa chinyaki cha kuchanya, ndimu so vazamuŵiya mu zuŵa la Mwana wa munthu.” (Luka 17:23, 24) Ntchinthu wuli cho chazamuwovya akusambira aku Yesu kuti aleki kulondo ŵanthu wo apusika kuti ndiwu Mesiya? Yesu wangukamba kuti kuza kwaku Mesiya wauneneska kwazamuyanana ndi limphezi lo ling’anima pa malu ngakulu. Mwaviyo, ŵanthu wosi wo ŵe masu, azamusuzgika cha kuziŵa kuti Ufumu waku Chiuta wayamba kulamuliya.

Pavuli paki, Yesu wangukamba kuti vinthu vo vazamuchitika kunthazi vazamuyanana ŵaka ndi vo ŵanthu achitanga mu nyengu yakali. Iyu wanguti: “Nge mo venge mu mazuŵa ngaku Nowa, ndimu so vazamuŵiya mu mazuŵa nga Mwana wa munthu . . . Vazamuja so nge mo venge mu mazuŵa ngaku Loti, pakuti ŵanthu aryanga, amwanga, agulanga, agulisanga, apandanga ndipuso azenganga. Kweni pa zuŵa lo Loti wangutuliyamu mu Sodomu, motu ndi mya yamotu vinguwa nge vuwa kutuwa kuchanya ndipu vinguŵananga wosi. Ndimu so vazamuŵiya pa zuŵa lo Mwana wa munthu wazamuvumbulika.”—Luka 17:26-30.

Ŵanthu a mu nyengu yaku Nowa ndi Loti achitanga vinthu vakupambanapambana nge kurya, kumwa, kugula, kugulisa vinthu, kulima kweniso kuzenga nyumba. Kweni Yesu wang’anamuwanga kuti ŵanthu ŵenaŵa angubayika chifukwa cha vinthu venivi cha. Tikamba viyo chifukwa chakuti Nowa kweniso Loti ndi mabanja ngawu achitangaku vinyaki mwa vinthu venivi. Kweni ŵanthu wo angubayika, achitanga vinthu venivi kwambula  kuŵanaŵaniya vo Chiuta wakhumba ndipu venivi vaŵachitiskanga kuti aleki kuziŵa kuti aja m’mazuŵa ngakumaliya. Ivi vinguchitiska kuti Yesu watcheŵesi akusambira ŵaki kuti akhumbika kuŵanaŵaniya khumbu laku Chiuta, kweniso atenere kuchita vinthu vo vingawovya kuti khumbu laki lifiskiki. Mwaviyo, Yesu wanguŵalongo vo angachita kuti azitaskiki pa nyengu yo Chiuta wazamunanga ŵanthu wosi aheni kunthazi.

Akusambira aku Yesu akhumbikanga cha kutimbanyizgika ndi vinthu va m’charu vo ‘angusiya kuvuli.’ Yesu wangukamba kuti: “Pa zuŵa lo, munthu yo we pachanya pa nyumba ndipu katundu waki we munyumba, wangazisikanga cha kuti wakato katundu waki, kweniso munthu yo we kumunda wangaziweriyanga ku vinthu vo wasiya kuvuli cha. Kumbukani muwolu waku Loti.” (Luka 17:31, 32) Muwolu waku Loti wangusambuka chiduli cha mche.

Yesu wangulutirizga kukambiya akusambira ŵaki mo vinthu vazamuŵiya pa nyengu yo Mwana wa munthu wazamuyamba kulamuliya nge Fumu. Iyu wangukamba kuti: “Mu usiku weniwo, ŵanthu ŵaŵi azamugona pabedi limoza, yumoza wazamutoleka, kweni munyaki wazamujowoleka.” (Luka 17:34) Venivi vilongo kuti ŵanthu anyaki azamutaskika kweni anyaki azamujowoleka, kung’anamuwa kuti azamubayika.

Chifukwa cha vo Yesu wangukamba, akusambira ŵaki angumufumba kuti: “Nunkhu Ambuya?” Yesu wangumuka kuti: “Ko kwe thupi, nkhwazi zazamuwungana kweniko.” (Luka 17:37) Akusambira anyaki azamuwona patali nge mo nkhwazi yichitiya. Yiwu azakumuziŵa Khristu wauneneska yo ndi Mwana wa munthu, ndipu azakumulondo. Pa nyengu yeniyi, Yesu wazamusambiza akusambira ŵaki uneneska wo upaska umoyu ku ŵanthu wo ŵe ndi chivwanu.