Julani

Lutani pa vo ve mukati

 MUTU 94

Kukhumbika kwa Pempheru Kweniso Kujiyuyuwa

Kukhumbika kwa Pempheru Kweniso Kujiyuyuwa

LUKA 18:1-14

  • NTHARIKA YA CHOKO CHA PHAMPHU

  • NTHARIKA YA MFARISI NDI WAKUSONKHESA MSONKHU

Yesu wanguŵakambiyapu kali akusambira ŵaki ntharika yakuti akhumbika kupemphera nyengu zosi. (Luka 11:5-13) Pa nyengu iyi, Yesu watenere kuti wenga ku Samariya pamwenga ku Galileya, ndipu wanguwerezapu so kukonkhoska nkhani yakuti apempherengi nyengu zosi. Iyu wanguchita ivi mwakukamba ntharika yinyaki yakuti:

“Mutawuni yinyaki mwenga wakweruzga yo wawopanga Chiuta cha ndipuso watumbikanga munthu weyosi cha. Mutawuni yeniyi mwenga so munthukazi yo wenga choko ndipu walutanga kaŵikaŵi kwa wakweruzga yo ndi kukamba kuti, ‘Muwonesesi kuti mwayeruzga mwaurunji pakati paku ini ndi munthu yo nde nayu ndi mulandu.’ Pakwamba wakweruzga yo wakhumbanga cha, kweni pavuli paki, mumtima mwaki wangukamba kuti, ‘Chinanga kuti nditopa Chiuta cha ndipuso nditumbika munthu weyosi cha, kweni pakuti munthukazi uyu walutirizga kundisuzga, ndiwonesesengi kuti ndayeruzga mulandu waki mwaurunji kuti waleki kulutirizga kuza kwaku ini ndi kundisuzga ndi vo wakhumba.’”—Luka 18:2-5.

Yesu wangukonkhoska ntharika yeniyi kuti: “Wonani vo wakweruzga uyu wangukamba chinanga kuti wenga wambula urunji! Sonu kumbi Chiuta wangatondeka kuwonesesa kuti urunji wachitikiya akusankhika ŵaki wo atimuliriya msana ndi usiku chinanga kuti waja wakuzizipizga kwaku yiwu?” (Luka 18:6, 7) Kumbi Yesu wangulongo kuti Awisi ŵe ndi mijalidu wuli?

Yapa, Yesu wang’anamuwanga kuti Yehova Chiuta wayanana ndi wakweruzga wambula urunji cha. Kweni fundu yaki yenga yakuti: Asani wakweruzga wambula urunji wanguwovya choko cho chingulutirizga kumupempha, mwambula kukayika, Chiuta wangaleka cha kuwovya munthu weyosi yo walutirizga kumupempha. Iyu ndi murunji kweniso ngwamampha, ndipu wamuka mapempheru nga ŵanthu wo apemphera nyengu zosi. Tikamba viyo chifukwa cha vo Yesu wangukamba kuti: “Nditikuneneskiyani kuti [Chiuta] wawonesesengi kuti urunji waŵachitikiya mwaliŵi.”—Luka 18:8.

Kanandi, ŵanthu ambula udindu kweniso akavu ayeruzgika mwambula urunji, kweni ŵanthu wo ŵe ndi udindu kweniso akukhupuka atiŵayanjiya. Kweni Chiuta wachita viyo cha. Asani nyengu yazikwana, iyu wazamuwonesesa kuti ŵanthu aheni alangika ndipu ateŵeti ŵaki alonde umoyu wamuyaya.

Kumbi mbayani mazuŵa nganu wo ŵe ndi chivwanu chakuyanana ndi cha choko? Kumbi mbanthu alinga wo agomezga kuti Chiuta “wawonesesengi kuti urunji waŵachitikiya mwaliŵi”? Yesu wati wakamba ŵaka ntharika ya kukhumbika kwa kupemphera nyengu zosi, wangukambiya akusambira ŵaki kuti akhumbikanga kuja ndi chivwanu asani apemphera. Iyu wanguti: “Asani Mwana wa munthu waziza, kumbi wazamusaniya chivwanu pacharu chapasi?” (Luka 18:8) Vo Yesu wangukamba vilongo kuti pa nyengu yo iyu waziyengi, ŵanthu anandi azamuŵavi chivwanu.

Ŵanthu anyaki wo avwisiyanga Yesu, ajiwonanga kuti ŵe ndi chivwanu chakukho. Ŵanthu ŵenaŵa agomezganga kuti yiwu mbarunji kuluska anyawu. Mwaviyo, Yesu wanguŵakambiya ntharika yakuti:

“Ŵanthu ŵaŵi angukwere kunyumba yakusopiyamu kuchipemphera. Munyaki wenga Mfarisi ndipu munyaki wenga wakusonkhesa msonkhu. Mfarisi wangusoka ndi kwamba kupemphera mumtima mwaki kuti, ‘Chiuta, nditikuwongani kuti ini ndiyanana cha ndi ŵanthu anyaki wosi wo mbakuphanga, ambula urunji, achigololu pamwenga nge wakusonkhesa msonkhu uyu. Ini ndifunga kaŵi sabata yeyosi ndipuso ndipereka chatchumi pa vinthu vosi vo ndisaniya.’”—Luka 18:10-12.

Ŵanthu anandi aziŵanga kuti Afarisi ajiwonesanga kuti mbarunji. Yiwu achitanga viyo kuti akondwesi  ŵanthu. Kanandi, Afarisi ayanjanga kufunga pa Mandi ndi pa Chinayi chifukwa mazuŵa ngenanga kwajanga msika ndipu yiwu akhumbanga kuti ŵanthu anandi akaŵawonengi. Afarisi ŵenaŵa awonesesanga kuti apereka chatchumi chinanga tingaja timbewu timanatimana. (Luka 11:42) Myezi yimanavi kuvuli, yiwu angukamba mo awoniyanga ŵanthu wo awonekanga kuti mbambula kuzirwa. Anguti: “Kweni ŵanthu ambula kuziŵa Dangu yaŵa [mwakukoliyana ndi mo Afarisi aŵawoniyanga] mbakutembeka.”—Yohane 7:49.

Yesu wangulutirizga kukamba ntharika yaki kuti: “Kweni wakusonkhesa msonkhu wanguma chapataliku ndipu wakhumbanga cha chinanga nkhulereska kuchanya kweni wajipumanga pa chifuŵa ndi kukamba kuti, ‘Chiuta, ndichitiyeni lisungu, nde munthu wakubuda.’” Kukamba uneneska, wakusonkhesa msonkhu wangujiyuyuwa ndipu wanguzomereza vinthu vo wanangisanga. Ndipu Yesu wangumaliza kukamba ntharika yeniyi kuti: “Nditikukambiyani kuti munthu uyu wachisikiya kunyumba kwaki wenga murunji kuluska Mfarisi. Chifukwa weyosi yo watijikuzga wayuyulikengi, ndipu weyosi yo watijiyuyuwa, wakwezekengi.”—Luka 18:13, 14.

Yapa, Yesu wangulongo kuti kujiyuyuwa nkhwakukhumbika ukongwa. Ulongozgi wenuwu wenga wakukhumbika ukongwa kwa akusambira ŵaki. Yiwu angukuliya muchigaŵa cho mwenga Afarisi wo ajiwonanga kuti mbarunji, kweniso achitiskanga ŵanthu kuti awonengi kuti kuja ndi udindu nkhwakukhumbika ukongwa. Ndipu ulongozgi wenuwu ngwakovya so ukongwa ku ŵanthu wosi wo alondo Yesu.