Julani

Lutani pa vo ve mukati

 MUTU 2

Yesu Wangutumbikika Wechendaweku

Yesu Wangutumbikika Wechendaweku

LUKA 1:34-56

  • MARIYA WANGULUTA KUCHICHEZA KWA MUBALI WAKI ELIZABETI

Gabiriyeli wangukambiya Mariya kuti wazamubala mwana yo wazakumupaska zina lakuti Yesu, kweniso yo wazamuwusa nge Fumu kwamuyaya. Wati wamukambiya venivi, Mariya wangumufumba kuti: “Pakuti ini ndechendagonanepu ndi munthulumi, vingachitika wuli venivi?”—Luka 1:34.

Gabiriyeli wangumuka kuti: “Mzimu wakupaturika uzengi paku yiwi ndipu nthazi ya Wapachanya Limu yazakukubenekere. Mwaviyo, yo wazamuwaku wazamudanika kuti wakupaturika, Mwana waku Chiuta.”—Luka 1:35.

Panyaki kuti Gabiriyeli wawovyi Mariya kuzomera uthenga uwu, wangumukambiya so kuti: “Awona! Elizabeti mubali waku, yo wadanikanga kuti chumba, we ndi nthumbu ya mwana munthulumi ya myezi 6 chinanga kuti ngwakukota. Ve viyo chifukwa vo Chiuta wakamba vitondeka cha.”—Luka 1:36, 37.

Vo Mariya wangumuka vilongo kuti wanguzomera vo Gabiriyeli wangukamba. Iyu wangumuka kuti: “Awonani! Nde kapolu munthukazi waku Yehova! Vichitiki kwaku ini mwakukoliyana ndi mazu nginu.”—Luka 1:38.

Gabiriyeli wati waluta, Mariya wangusoka kuti wakachezi kwaku Elizabeti, muwolu waku Zekariya. Elizabeti wajanga kuchigaŵa cha mapiri nga ku Yudeya, kufupi ndi tawuni ya Yerusalemu. Mariya wangwenda mazuŵa ngatatu pamwenga nganayi kutuwa kwawu ku Nazareti.

Mariya wati wafika kunyumba kwaku Zekariya, wangutawuza mubali waki Elizabeti. Pa nyengu iyi, Elizabeti wanguzazika ndi mzimu wakupaturika ndipu wangukambiya Mariya kuti: “Ndiwi wakutumbikika pakati pa anthukazi ndipuso ntchakutumbikika chipasu cho che mumoyu mwaku! Nde ndi mwaŵi ukongwa ini, kuti nyina wa Mbuyangu wazi kwaku ini! Awona! Ndati ndavwa ŵaka moni waku, mwana yo we mumoyu mwangu wavuluvunthuka chifukwa cha likondwa.”—Luka 1:42-44.

Mariya wangukondwa ukongwa, ndipu wangumuka kuti: “Umoyu wangu ukuzga Yehova, ndipu mtima wangu ulekengi cha kukondwa mwaku Chiuta, Mtaski wangu, chifukwa wakumbuka kapolu waki munthukazi wapasi ukongwa. Pakuti kwamba sonu migonezi yosi ya ŵanthu yazamukamba kuti nde wakutumbikika. Chifukwa Wanthazi wandichitiya vinthu vikulu.” Chinanga kuti Mariya wangutumbikika, kweni iyu wangupereka unkhankhu wosi kwaku Chiuta. Ndipu wangukamba kuti: “Zina laki ndakupaturika. Ndipu mu migonezi yosi wachitiya lisungu ŵanthu wo atimuwopa.”—Luka 1:46-50.

Mariya wangulutirizga kuthamika Chiuta. Ndipu wangukamba mazu nga uchimi ngakuti: “Iyu wachita vinthu mwanthazi ndi janja laki; ndipu wambininiska ŵanthu a mitima yakujikuzga. Wasisa ŵanthu amazaza pa mipandu yawu ya ufumu ndipu wakweza ŵanthu apasi. Ŵanthu anja waŵagutisa ndi vinthu vamampha ndipu achuma waŵaweza kwambula kanthu. Iyu wawovya mteŵeti waki Isirayeli, ndipu chifukwa cha lisungu laki wamukumbuka kwamuyaya nge mo wangukambiya apapi ŵidu akali, Abrahamu kweniso ŵana ŵaki.”—Luka 1:51-55.

Mariya wanguja kunyumba kwaku Elizabeti kwa myezi pafufupi yitatu. Panyaki wakhumbanga kuwovya Elizabeti chifukwa wenga pafupi kubala. Vakukondwesa ukongwa kuti anthukazi akugomezgeka ŵenaŵa wo ŵenga ndi nthumbu mwakuwovyeka ndi Chiuta, ŵenga pamoza pa nyengu nge iyi!

Yesu wangutumbikika nadi chinanga mphanyengu yo wenga wechendaweku. Elizabeti wangumudana kuti “Mbuyangu,” ndipu Mariya wati wamutawuzga, mwana yo wenga mumoyu mwaku Elizabeti ‘wanguvuluvunthuka chifukwa cha likondwa.’ Ivi vakupambana ndi mo ŵanthu anyaki anguchitiya ndi Mariya ndipuso mwana waki nge mo tiwoniyengi.