Julani

Lutani pa vo ve mukati

 MUTU 7

Akusanda Nyenyezi Anguluta Kuchiwona Yesu

Akusanda Nyenyezi Anguluta Kuchiwona Yesu

MATEYU 2:1-12

  • “NYENYEZI” YINGUŴALONGOZGE KU YERUSALEMU NDIPU PAVULI PAKI KWAKU YESU

Ŵanthu anyaki angutuwa Kuvuma kuti aziwoni Yesu. Ŵanthu ŵenaŵa ŵenga akusanda nyenyezi. Yiwu asambiranga mo nyenyezi zitende ndipu agomezganga kuti asani achita viyo angaziŵiya limu vinthu vo vichitikengi pa umoyu wa munthu. (Yesaya 47:13) Zuŵa linyaki po ŵenga kwawu Kuvuma, anguwona “nyenyezi.” Ŵati ayiwona, angwamba kuyilondo ndipu angwenda mtunda utali ukongwa. Nyenyezi iyi yinguŵalongozge ku Betelehemu cha, kweni ku Yerusalemu.

Akusanda nyenyezi ŵati afika ku Yerusalemu, angufumba kuti: “Kumbi ye pani fumu ya Ayuda yo yawaku? Chifukwa tawona nyenyezi yaki te Kuvuma, ndipu taza kuti tiziyigwadiyi.”—Mateyu 2:1, 2.

Fumu Herodi yo yalamuliyanga Yerusalemu yati yavwa venivi, yingukwiya ukongwa. Mwaviyo, yingudana ŵara ŵa asembi ndipuso alongozgi achisopa Achiyuda ndipu yinguŵafumba ko Khristu watingi waziwiyengi. Yiwu angumuka mwakukoliyana ndi Malemba kuti: “Ku Betelehemu.” (Mateyu 2:5; Mika 5:2) Herodi wangudana akusanda nyenyezi mwachisisi ndipu wanguŵakambiya kuti: “Lutani kamupenjeni mwana yo, asani mwachimusaniya muzindikambiyi, kuti nani nkhamugwadiyi.” (Mateyu 2:8) Kweni Herodi wapenjanga kuti wakamubayi asani wamusaniya.

Akusanda nyenyezi ŵati asoka, “nyenyezi” yo anguwona pa nyengu yo ŵenga kwawu Kuvuma yayendanga panthazi pawu. Nyenyezi iyi yenga yaku Chiuta cha, kweni viwoneka kuti walipu yo wanguyituma. Akusanda nyenyezi anguyilondo mpaka po yinguchima muchanya panyumba yo Yosefi, Mariya ndi mwana wawu ajanga.

Akusanda nyenyezi angusere munyumba ndipu angusaniya Mariya ndi mwana waki Yesu. Pavuli paki, yiwu angumugwadiya. Ndipu angumupaska mphasu nge golidi, libani ndi mule. Ŵati agona usiku, Chiuta wanguŵatcheŵeska mu malotu kuti angaweriyanga so kwaku Herodi cha. Mwaviyo, yiwu angupitiya nthowa yinyaki pakuwere kwawu.

Kumbi ndiyani yo wangutuma “nyenyezi” yo yingulongozga akusanda nyenyezi? Kumbukani kuti yingwamba kuŵalongezge ku Betelehemu ko kwenga Yesu cha. Kweni yingwamba kuŵalozge ku Yerusalemu, ko angukumana ndi Herodi yo wapenjanga kubaya Yesu. Ndipu watingi wamubayengi nadi asani Chiuta wanguleka kusereriyapu, ndi kutcheŵeska akusanda nyenyezi kuti angamukambiyanga cha Herodi ko kwenga Yesu. Viwoneke limu kuti nyenyezi iyi yingutuwa kwaku Satana, murwani waku Chiuta. Iyu wakhumbanga kubaya Yesu, ndipu wangugwiriskiya ntchitu nthowa yeniyi kuti wafiski vo wapenjanga.