Julani

Lutani pa vo ve mukati

 MUTU 66

Vo Vinguchitika Yesu we ku Yerusalemu Kuchichita Phwandu la Mahema

Vo Vinguchitika Yesu we ku Yerusalemu Kuchichita Phwandu la Mahema

YOHANE 7:11-32

  • YESU WANGUSAMBIZA ŴANTHU MUNYUMBA YAKUSOPIYAMU

Yesu waziŵikanga ndi ŵanthu anandi kutuliya pa nyengu yo wangubatizikiya. Ayuda anandi angumuwona wachichita vakuziziswa ndipu nkhani yakukwaskana ndi vo Yesu wachitanga yinguwanda peposi. Pa nyengu iyi, wenga ku Yerusalemu kuchichita Phwandu la Mahema (pamwenga Misasa) ndipu ŵanthu anandi amupenjanga.

Ŵanthu akambanga vinthu vakupambana pa nkhani yaku Yesu. Anyaki akambanga kuti: “Ndi munthu wamampha.” Kweni anyaki akambanga kuti: “Ndi munthu wamampha cha. Walandizga ŵanthu.” (Yohane 7:12) Ŵanthu anandi akambanga nkhani yeniyi mazuŵa ngakwambiriya nga phwandu lenili. Chinanga kuti venga viyo, pengavi munthu yumoza yo wenga ndi chiganga kuti wakambi vakukwaskana ndi Yesu pagulu la ŵanthu, chifukwa weyosi wachitanga mantha ndi vo alongozgi Achiyuda atingi achitengi asani anguŵavwa.

Pati pajumpha mazuŵa ngamanavi kutuliya po phwandu lingwambiya, gulu la ŵanthu linguwona Yesu we kunyumba yakusopiyamu. Ayuda anandi anguzizwa ukongwa ndi mo iyu wasambiziyanga. Yiwu anguzizwa chifukwa chakuti Yesu wangulutaku cha kumasukulu nga arabi. Mwaviyo, yiwu angwamba kufumba kuti: “Munthu uyu watingaziŵa wuli Malemba penipo kusukulu wakulutaku cha?”—Yohane 7:15.

Yesu wangukamba kuti: “Vo ndisambiza vangu cha kweni vaku mweniyo wakundituma. Weyosi yo wakhumba kuchita khumbu Laki, waziŵengi asani vo ndisambiza vakutuliya kwaku Chiuta pamwenga ndilongoro va mumaŵanaŵanu mwangu.” (Yohane 7:16, 17) Vo Yesu wasambizanga vakoliyananga ndi Dangu laku Chiuta. Mwaviyo, viwoneke limu kuti Yesu wakhumbanga cha kuti ŵanthu aperekengi unkhankhu kwaku iyu kweni kwaku Chiuta.

Pavuli paki, Yesu wangukamba kuti: “Asi Mozesi wangukupaskani Dangu? Kweni palivi chinanga njumoza waku yimwi yo wavwiya Dangu. Ntchifukwa wuli mukhumba kundibaya?” Kweni ŵanthu anyaki wo angutuliya ku vigaŵa vinyaki aziŵanga cha kuti pe ŵanthu anyaki wo akhumba kubaya Yesu. Yiwu awonanga kuti vambula kuvwika kuti munthu munyaki wangaja ndi maŵanaŵanu ngakukhumba kubaya msambizi wamampha nge Yesu. Mwaviyo, aŵanaŵananga kuti Yesu we ndi suzgu linyaki ndipu angukamba kuti: “We ndi chiŵanda yiwi! Ndiyani yo wakhumba kukubaya?”—Yohane 7:19, 20.

Chaka chimoza ndi hafu kuvuli, alongozgi Achiyuda akhumbanga kubaya Yesu chifukwa chakuti wanguchizga munthu pa zuŵa la Sabata. Mwaviyo, pa nyengu iyi, Yesu wangususka maŵanaŵanu ngawu ngaheni kweniso wangulongo kuti ŵenga ŵanthu ambula lisungu. Iyu wangukonkhoska kuti Dangu lazomerezanga kuti mwana munthulumi wadumuliki pa zuŵa la 8, chinanga kuti zuŵa lo lingaŵa la Sabata. Pavuli paki, wangufumba kuti: “Asani munthu wadumulika pa zuŵa la sabata kuti Dangu laku Mozesi lileki kusweka, sonu kumbi mwandikwiyiya chifukwa chakuti ndikuchizga munthu pa zuŵa la sabata? Lekani kuyeruzga chifukwa cha kawonekeru ka kubwalu, kweni muyeruzgengi ndi cheruzgu chaurunji.”—Yohane 7:23, 24.

Ŵanthu a ku Yerusalemu wo aziŵanga nkhani yeniyi, angukamba kuti: “Asi munthu uyu ndiyu [akulamuliya] apenja kumubaya? Kweni wonani! walongoro pakweru ndipu palivi yo watimukambiyapu chechosi. Kumbi alongozgi asimikiza kuti ndi Khristu nadi?” Ntchifukwa wuli ŵanthu alekanga kugomezga kuti Yesu ndiyu Khristu? Yiwu akambanga kuti: “Isi tiziŵa ko munthu uyu watuliya, kweni asani Khristu waza palivi yo wazamuziŵa ko watuliya.”—Yohane 7:25-27.

We kunyumba yakusopiyamu kwenuku, Yesu wangumuka ŵanthu ŵenaŵa kuti: “Mutindiziŵa ndipu ko ndituliya muziŵaku. Ndikuza mwakukhumba kwangu cha, kweni Mweniyo wakundituma waliku nadi, ndipu yimwi mutimuziŵa cha. Ini nditimuziŵa, chifukwa ndikuza kuzimiya iyu, ndipu Iyu ndiyu wakundituma.” (Yohane 7:28, 29) Yiwu ŵati ŵavwa vo Yesu wangukamba, akhumbanga kumuko kuti amuŵiki mujeri pamwenga kumubaya. Kweni vo yiwu akhumbanga kuchita vingutondeka chifukwa nyengu yakuti wafwiyi yenga yechendakwani.

Chinanga kuti venga viyo, ŵanthu anandi amugomezganga Yesu. Iyu wangwenda pamaji, wangulekeska mphepu, wanguryiska ŵanthu masawuzandi mwakuziziswa  ndi viŵandi vimanavi kweniso somba. Iyu wachizganga so ŵanthu wo atamanga, ŵanthu akupunduka, ambula kuwona, wo ŵenga ndi makhati kweniso wayuskanga akufwa. Chifukwa cha venivi, ŵanthu wo ŵenga ndi chivwanu mwaku iyu akambanga kuti: “Asani Khristu waza, kumbi wazamuchita visimikizu vakujumpha vo munthu uyu wachita?”—Yohane 7:31.

Afarisi ndi ŵara ŵa asembi ŵati ŵavwa gulu la ŵanthu lichikamba venivi, angutuma asilikali kuti akako Yesu.