Julani

Lutani pa vo ve mukati

 MUTU 77

Yesu Wangupereka Ulongozgi pa Nkhani ya Chuma

Yesu Wangupereka Ulongozgi pa Nkhani ya Chuma

LUKA 12:1-34

  • NTHARIKA YA MUNTHU WACHUMA

  • YESU WANGUKAMBA ZA ACHAHOLI NDIPUSO MALUŴA

  • “KAMSKAMBU KAMANA” KO KAZAMUSERE MU UFUMU

Pa nyengu yo Yesu waryanga chakurya kunyumba ya Mfarisi, gulu la ŵanthu anandi linguwungana pabwalu pa nyumba. Venivi ndivu so vinguchitika pa nyengu yo wenga ku Galileya. (Mariko 1:33; 2:2; 3:9) Ku Yudeya kwenuku, ŵanthu anandi akhumbanga kuti amuwoni kweniso kuvwa vo iyu wasambizanga. Yiwu angulongo kuti ŵenga ndi maŵanaŵanu ngakupambana ndi ngo Afarisi wo Yesu waryanga nawu limoza chakurya ŵenga nangu.

Mazu ngakwamba ngo Yesu wangukamba ngenga ngakukhumbika ukongwa kwa akusambira ŵaki. Iyu wanguti: “Tcheŵani ndi chakutupisa cha Afarisi, cho chimiya uryarya.” Yapa ndipu Yesu wakambapu kali mazu ngakutcheŵesa ngenanga. Kweni wanguwona kuti ulongozgi wenuwu wenga wakukhumbika ukongwa chifukwa cha vo wanguwona pa nyengu yo waryanga chakurya limoza ndi Afarisi. (Luka 12:1; Mariko 8:15) Afarisi achitanga vinthu nge kuti mbakugomezgeka kwaku Chiuta kuti abisi vinthu viheni vo achitanga. Kweni Yesu wanguwona kuti vinthu viheni vo achitanga vakhumbikanga kuwoneke pakweru. Mwaviyo, Yesu wangukamba kuti: “Palivi chinthu chakubisika umampha cho chazamuleka kuvumbulika, ndipuso palivi chisisi cho chazamuleka kuziŵika.”—Luka 12:2.

Viwoneka kuti ŵanthu anandi wo anguza kwaku Yesu ŵenga a ku Yudeya ndipu ŵenga ŵechendavwepu Yesu wachisambiza ku Galileya. Ndichu chifukwa chaki Yesu wanguwerezapu so fundu zo wangusambiza kukwambiriya. Iyu wanguchiska ŵanthu wosi wo amuvwisiyanga kuti: “Mungaŵawopanga cha wo abaya liŵavu pe kwambula kuchita chinthu chinyaki chechosi chakujumpha yapa.” (Luka 12:4) Nge po wangusambiziya pakwamba, wangukonkhoska chifukwa cho akusambira ŵaki atenere kugomezga Chiuta kuti waŵaphweriyengi. Yiwu akhumbikanga so kulonde Mwana wa munthu kweniso kuziŵa kuti Chiuta wangaŵawovya.—Mateyu 10:19, 20, 26-33; 12:31, 32.

Pavuli paki, munthu munyaki yo wenga mu gulu la ŵanthu ŵenaŵa, wangukambiya Yesu kuti: “Msambizi, mukambiyeni mubali wangu kuti tigaŵani chihara.” (Luka 12:13) Dangu lakambanga kuti mwana munthulumi wakwamba, wakhumbikanga kulonde vigaŵa viŵi va chihara. Venivi vawovyanga kuti ŵana wo alekengi kupindana asani agaŵana chihara. (Marangu 21:17) Kweni viwoneka kuti munthu mwenuyu wakhumbanga kulonde vinthu vinandi kujumpha pa vo wakhumbikanga kulonde. Yesu wangukana kuchitapu kanthu pa nkhani yeniyi. Iyu wanguti: “Wamunthu yiwi, ndiyani yo wakundisankha kuja wakweruzga pamwenga wakugaŵa chihara chinu?”—Luka 12:14.

Pavuli paki, Yesu wangutcheŵesa ŵanthu wosi kuti: “Jani masu ndipu phweriyani ndi mbunu yamtundu wewosi, chifukwa chinanga munthu wangaŵa ndi vinthu vinandi, umoyu waki utuliya mu vinthu vo wenavu cha.” (Luka 12:15) Kaya munthu wangaja ndi chuma chinandi wuli, kweni asani pajumpha nyengu watufwa ndipu wasiya vinthu vosi. Pakusimikiziya fundu yeniyi, Yesu wangukamba ntharika yambula kuluwika yo yilongo kukhumbika kwakuja ndi zina lamampha pa masu paku Chiuta. Iyu wanguti:

“Munda wa munthu wachuma ungupasa umampha. Sonu wangwamba kuŵanaŵana kuti, ‘Sonu ndichitenji pakuti ndilivi kwakusunga vo ndakolora?’ Iyu wangukamba kuti, ‘Ndichitengi ivi: Ndiwisiyengi pasi nkhokwi zangu, ndizengengi zinyaki zikuluzikulu ndipu mwenimo ndimu ndisungengi vosi vo ndakolora kweniso vinthu vangu vosi. Ndikambiyengi umoyu wangu kuti: “We ndi vinthu vinandi vamampha vo visungikengi kwa vyaka vinandi; ungasuzgikanga cha, yirya, yimwa ndipu ujikondwesi wamweni.”’ Kweni Chiuta wangumukambiya kuti, ‘Wakupusa yiwi, usiku weniwunu umoyu waku awukhumbengi. Sonu ndiyani yo wajengi ndi vinthu vo wasunga?’ Viyo ndimu so viŵiya ndi munthu yo watijisungiya chuma kweni ndi mukavu kwaku Chiuta.”—Luka 12:16-21.

Akusambira aku Yesu ndipuso ŵanthu anyaki wo amuvwisiyanga, nyengu yinyaki nawu atingi aŵikengi maŵanaŵanu ngawu ngosi pa kupenja ndi kusunga chuma chinandi. Kupenja vinthu vinandi vakukhumbika pa umoyu naku, kwatingi kuŵatimbanyizgengi pakuteŵete Yehova. Mwaviyo, Yesu wanguwerezapu so ulongozgi wakukhumbika ukongwa wo wangusambiza pa Upharazgi waki wa Paphiri, pafufupi chaka ndi hafu kuvuli. Iyu wanguti:

 “Lekani kufipiya mtima umoyu winu kuti muryengenji pamwenga liŵavu linu kuti muvwalengenji. . . . Ŵanaŵaniyani achaholi: Amija mbewu cha pamwenga kuvuna, alivi nyumba yakusungiyamu mbewu pamwenga nkhokwi; kweni Chiuta watiŵaryisa. Asi yimwi mwe akuzirwa ukongwa kuluska viyuni? . . . Ŵanaŵaniyani mo maluŵa ngamudondu ngakuliya. Ngagwira ntchitu cha pamwenga kuluka salu, kweni nditikukambiyani kuti chinanga ndi Solomoni mu unkhankhu waki wosi wakuvwalapu cha malaya ngakutowa nge maluŵa yanga. . . . Sonu lekani kufipa mtima kuti muryengenji kweniso mumwengenji, ndipuso lekani kusuzgika maŵanaŵanu. . . . Awusemwi aziŵa kuti yimwi mukhumbika vinthu venivi . . . Lutirizgani kupenja Ufumu waki, ndipu vinthu venivi visazgikiyengeku kwaku yimwi.”—Luka 12:22-31; Mateyu 6:25-33.

Kumbi mbayani wo akhumbika kupenja Ufumu waku Chiuta? Yesu wangukamba kuti ŵanthu amanavi akugomezgeka wo adanika kuti a “kamskambu kamana” ndiwu akhumbika kupenja Ufumu. Pavuli paki chiŵerengeru cha ŵanthu ŵenaŵa chinguziŵika kuti alipu 144,000. Kumbi yiwu alindizganji kunthazi? Yesu wakuŵasimikiziya kuti: “Awusemwi akondwa kukupaskani Ufumu.” Ŵanthu ŵenaŵa, aŵika maŵanaŵanu ngawu pa kupenja chuma cha m’charu cha, cho ankhungu angaba. M’malu mwaki, aŵika mtima wawu wosi pa “chuma chambula kumala kuchanya,” ko amulamuliya limoza ndi Khristu.—Luka 12:32-34.