LUKA 13:1-21

  • YESU WANGUSAMBIZA ŴANTHU MWAKUGWIRISKIYA NTCHITU NGOZI ZIŴI ZO ZINGUCHITIKA

  • YESU WANGUCHIZGA MUNTHUKAZI WAKUPUNDUKA PA SABATA

Yesu wanguyesesa munthowa zakupambanapambana kuchiska ŵanthu kuti aje pa ubwezi ndi Chiuta. Iyu wati wakambiskana ndi ŵanthu wo anguwungana pabwalu pa nyumba ya Mfarisi, panguchitika so chinthu chinyaki.

Ŵanthu anyaki angukamba za ngozi yo yinguchitika. Angukamba vakukwaskana ndi “Agalileya wo Pilato [Pontiyo yo wenga Nduna yachiroma] wangusazga ndopa zawu ndi sembi zawu.” (Luka 13:1) Kumbi Pilato wanguchita nyengu niyi venivi?

Panyaki iyu wanguchita venivi pa nyengu yo Ayuda anandi anguchita viwoneseru chifukwa cha vo Pilato wanguchita. Iyu wangugwiriskiya ntchitu ndalama za munyumba yakusopiyamu pakuzenga ngalandi zo mwayendanga maji kuti ngafikengi mu Yerusalemu. Kuti Pilato wato ndalama zenizi, watenere kuti wangukoliyana ndi ŵanthu wo ŵenga ndi udindu panyumba yakusopiyamu. Ŵanthu wo akambanga za ngozi yeniyi, atenere kuti awonanga kuti Agalileya wo angufwa pa ngozi yeniyi, angulangika chifukwa cha vinthu viheni vo achitanga. Kweni Yesu wangususka vo yiwu akambanga.

Yesu wanguŵafumba kuti: “Kumbi muŵanaŵana kuti Agalileya ŵenaŵa ŵenga akubuda ukongwa kuluska Agalileya anyaki wosi chifukwa chakuti venivi vinguŵachitikiya?” Yesu wangukamba kuti venga viyo cha. Iyu wangugwiriskiya ntchitu chakuchitika chenichi pakutcheŵesa Ayuda kuti: “Asani muleka kulapa, namwi mwazamubayika nge yiwu.” (Luka 13:2, 3) Pavuli paki, Yesu wangukonkhoska ngozi yinyaki yo yingayananaku ndi ngozi yo yinguchitika pakuzenga ngalandi za maji. Iyu wangufumba kuti:

“Muŵanaŵana kuti ŵanthu 18, wo chinyumba chitali cha ku Silowamu chinguŵawiya ndi kuŵabaya, ŵenga akunanga ukongwa kuluska ŵanthu anyaki wosi wo aja ku Yerusalemu?” (Luka 13:4) Gulu la ŵanthu ŵenaŵa, lawonanga kuti ŵanthu yaŵa angufwa chifukwa cha vinthu viheni vo achitanga. Yapa, Yesu wangususka so vo yiwu akambanga. Yesu wanguziŵa kuti “nyengu ndipuso vinthu vamabuchibuchi” vichitika ndipu venivi ndivu vitenere kuti vinguchitiska ngozi yeniyi. (Wakutaula 9:11) Kweni ŵanthu akhumbikanga kusambirapu kanthu pa vinthu vo vinguchitika. Yesu wangukamba kuti: “Asani muleka kulapa namwi mwazamubayika nge yiwu.” (Luka 13:5) Kweni ntchifukwa wuli Yesu wanguwereza so kukamba fundu yeniyi pa nyengu iyi?

Yesu wanguchita viyo, chifukwa cha mo vinthu venge ku malu ngo wachitiyanga uteŵeti waki. Iyu wangukonkhoska ntharika yinyaki yakuti: “Munthu munyaki wenga ndi chimiti cha mkuyu mumunda waki wa mphereska. Ndipu wanguza kuziwonamu vipasu kweni wangusaniyamu chipasu chechosi cha. Sonu wangukambiya wakuphwere munda wa mphereska kuti, ‘Kwa vyaka vitatu ndaja ndichiza kuziwonamu vipasu va mkuyu kweni ndisaniyamu chechosi cha. Uchiteme pasi! Chimala ŵaka malu!’ Iyu wangumumuka kuti, ‘Ambuya, chilekeni dankha kwa chaka chimoza ndichikumbiyi mumphepeti ndi kudamu manyowa. Asani chazipasa vipasu mbwenu ve umampha, kweni asani cha, mbwenu muzichiteme pasi.’”—Luka 13:6-9.

Kwa vyaka vakujumpha vitatu, Yesu wanguyesesa kuwovya Ayuda kuti aje ndi chivwanu. Kweni ŵenga Ayuda amanavi ŵaka wo anguja akusambira ŵaki ndipu akusambira ŵenaŵa ndiwu tingakamba kuti ŵenga nge vipasu va ntchitu yaki. Sonu, m’chaka cha chinayi cha uteŵeti waki, Yesu wanguyesesa kusazgiyaku uteŵeti waki. Iyu wapharazganga ndipuso wasambizanga ŵanthu mwaphamphu muchigaŵa cha Yudeya ndi Pereya. Venivi, vayanananga ŵaka ndi kukumba kweniso kudira manyowa mumphepeti mwa chimiti cha mkuyu cho chamiyanga Ayuda. Kumbi ndi vinthu wuli vo vinguchitika pavuli paki? Ayuda amanavi ŵaka ndiwu  anguvwisiya uthenga waki. Kweni mtundu wosi wa Ayuda ungukana kulapa ndipu vinguchitiska kuti alindizgengi ŵaka kubayika.

Pati pajumpha ŵaka mazuŵa ngamanavi, ŵanthu anandi angulongo so kuti avwiyanga cha vo Yesu wasambizanga. Pa zuŵa la Sabata, Yesu wasambizanga musinagogi. We musinagogi mwenuyu, Yesu wanguwona munthukazi munyaki yo wangugoŵeka msana chifukwa cha mzimu uheni wo ungumutamisa kwa vyaka 18. Chifukwa cha lisungu, Yesu wangukambiya munthukazi mwenuyu kuti: “Wamunthukazi yiwi, wafwatulika ku nthenda yaku.” (Luka 13:12) Yesu wanguŵika manja ngaki pa munthukazi yo ndipu nyengu yeniyo, iyu wangunyoloka ndi kwamba kukankhuska Chiuta.

Mulongozgi wa sinagogi, wangukwiya ukongwa wati wawona venivi ndipu wangukamba kuti: “Pe mazuŵa 6 ngakugwiriya ntchitu, ngenanga ndingu muzengi kuti muzichizgiki, pa Sabata cha!” (Luka 13:14) Mulongozgi uyu, wasuskanga cha kuti Yesu we ndi nthazi zakuchizgiya ŵanthu. M’malu mwaki, wasuskanga ŵanthu chifukwa chakuti azanga kuzichizgika pa zuŵa la Sabata. Kweni Yesu wangumuka munthu mwenuyu mwambula kubisa kuti: “Akunyenga yimwi, ndiyani waku yimwi yo wangaleka kufwatuwa ng’ombi yaki pamwenga bulu waki mukhola pa zuŵa la Sabata ndi kuluta navu kuti vikamwi maji? Kumbi ntchakwenere cha kuti munthukazi uyu yo ndi mwana waku Abrahamu mweniyo Satana wangumumanga kwa vyaka 18, wafwatuliki ku mphingu iyi pa zuŵa la Sabata?”—Luka 13:15, 16.

Ŵanthu wo asuskanga Yesu anguchita soni kweni gulu la ŵanthu lingukondwa chifukwa cha vinthu vamampha vo Yesu wachitanga. Pavuli paki, Yesu wanguwerezapu so kukamba ntharika ziŵi zakukwaskana ndi Ufumu, zo wangukonkhoska pakwamba pa nyengu yo wenga muboti ku Nyanja ya Galileya.—Mateyu 13:31-33; Luka 13:18-21.