Julani

Lutani pa vo ve mukati

 MUTU 80

Mliska Wamampha Kweniso Makhola Ngaŵi nga Mbereri

Mliska Wamampha Kweniso Makhola Ngaŵi nga Mbereri

YOHANE 10:1-21

  • YESU WANGUKAMBA VAKUKWASKANA NDI MLISKA WAMAMPHA KWENISO MAKHOLA NGAŴI NGA MBERERI

Pa nyengu yo Yesu walutirizganga kusambiza ŵanthu ku Yudeya, wangukamba nkhani yakukwaskana ndi mbereri kweniso makhola ngaŵi. Ŵanthu wo amuvwisiyanga angusuzgika cha kuvwisa nkhani yeniyi chinanga kuti wangugwiriskiya ntchitu ntharika pakuŵasambiza. Ayuda akumbukanga mazu ngo Davidi wangukamba ngakuti: “Yehova ndi Mliska wangu. Ndisoŵengi kanthu cha. Iyu watindigoneka m’malu ngo mwe uteka wakubiriŵira umampha.” (Sumu 23:1, 2) Mu sumu yinyaki, Davidi wangukambiya mtundu wa Ayisirayeli kuti: “Tiyeni tigwadi pamasu paku Yehova yo wakutipanga. Chifukwa iyu ndi Chiuta widu ndipu isi te ŵanthu wo tiryiskika uteka wakubiriŵira umampha ndi iyu.” (Sumu 95:6, 7) Venivi vilongo kuti Ayisirayeli wo ŵenga pasi pa Dangu, ŵenga nge mskambu wa mbereri.

Tingakamba kuti Ayisirayeli wo adanika kuti “mbereri” ŵenga “mukhola” chifukwa chakuti ŵenga pasi pa phanganu la Dangu laku Mozesi. Dangu lagwiranga ntchitu nge mpanda chifukwa laŵachitiskanga kuti alekengi kuchita mijalidu yiheni, yo ŵanthu amitundu yinyaki wo ŵenga pasi pa Dangu ili cha achitanga. Chinanga kuti venga viyo, Ayisirayeli anyaki achitiyanga nkhaza Ayisirayeli anyawu wo ŵenga mbereri zaku Chiuta. Mwaviyo, Yesu wangukamba kuti: “Nditikuneneskiyani kuti yo wasere mukhola la mbereri kwambula kuziya pakhomu, kweni wasere mwakuchita kukwera pamalu panyaki, ndi munkhungu ndipuso ngwakuphanga. Kweni yo waselere pakhomu, ndiyu mliska wa mbereri zo.”—Yohane 10:1, 2.

Ŵanthu angwamba kuŵanaŵaniya ŵanthu wo ajikambanga kuti yiwu ndiwu Mesiya pamwenga Khristu. Ŵanthu ŵenaŵa ŵenga nge ankhungu kweniso akuphanga. Mwaviyo, ŵanthu akhumbikanga cha kulondo ŵanthu akugaruka ŵenaŵa. M’malu mwaki akhumbikanga kulondo “mliska wa mbereri” yo Yesu wangukamba kuti:

“Mulinda wapakhomu la khola watimujuliya ndipu mbereri zituvwa mazu ngaki. Wadana mbereri zaki mwakuzizumbuwa mazina ndipu watizituzgiya kubwalu. Asani mbereri zaki wazituzgiya kubwalu, waluta panthazi pa mbereri ndipu zitimulondo chifukwa chakuti ziziŵa mazu ngaki. Mulendu zimulondongepu cha, kweni zimuthaŵengi chifukwa chakuti ziziŵa cha mazu nga alendu.”—Yohane 10:3-5.

Kukwambiriya, Yohane Mubatizi yo wenga nge mulinda wapakhomu wangukamba kuti Ayisirayeli wo ŵenga nge mbereri pasi pa Dangu, akhumbikanga kulondo Yesu. Ndipu sonu, ŵanthu anyaki ku Galileya ndi ku Yudeya ko wenga pa nyengu iyi, anguvwa mazu ngaku Yesu. Kumbi iyu watingi ‘wazituzgiyengi’ nunkhu? Nanga ntchinthu wuli cho chatingi chichitikengi chifukwa chakuti amulondonga? Ŵanthu anyaki wo anguvwa ntharika yeniyi yo Yesu wangukamba, aziŵanga cha vo vatingi vichitikengi chifukwa “anguvwisa cha vo waŵakambiyanga.”—Yohane 10:6.

Yesu wangukonkhoska kuti: “Nditikuneneskiyani kuti, ini ndini khomu la mbereri. Wosi wo atuza nge kuti ndini, mbankhungu ndipuso mbakuphanga, kweni mbereri zitiŵavwiya cha. Ini ndini khomu. Weyosi yo wasere mukhola kuziya mwaku ini, wazamutaskika. Iyu waserengi mukati ndi kutuwamu, ndipu wasaniyengi uteka wakubiriŵira umampha.”—Yohane 10:7-9.

Yapa, Yesu wangukamba nkhani yinyaki yasonu. Ŵanthu wo amuvwisiyanga aziŵanga kuti iyu wenga khomu la phanganu la Dangu cha, lo lingujaku kwa vyaka mahandiredi nganandi. Mwaviyo, watenere kuti wakambanga kuti mbereri zo ‘wazituziyanga kubwalu’ zachiserenga mukhola linyaki. Kumbi zachichitanganji mukhola lenili?

Yesu wangulutirizga kukonkhoska vakukwaskana ndi udindu waki. Iyu wanguti: “Ndikuza kuti yiwu aje ndi umoyu ndipu aje nawu unandi. Ini ndini mliska wamampha, mliska wamampha wapereka umoyu waki chifukwa cha mbereri.” (Yohane 10:10, 11) Pa nyengu iyi, ndipu Yesu waŵachiskapu kali akusambira ŵaki. Iyu wanguti: “Yimwi a kamskambu kamana mungawopanga cha, pakuti Awusemwi akondwa kukupaskani Ufumu.” (Luka 12:32) Mwaviyo, wosi wo ŵe mugulu la “kamskambu kamana” ndiwu Yesu wazakuŵasereza mukhola linyaki. Venivi vazamuchitiska kuti yiwu akaje ‘ndi umoyu ndipu akaje nawu unandi.’ Kuja mugulu la kamskambu kenaka ndi mwaŵi ukulu ukongwa!

Yesu wanguyileke penapa cha nkhani yeniyi. Iyu wangukamba kuti: “Nde ndi mbereri zinyaki, kweni zakhola  ili cha. Zenizo nazu ndizengi nazu, zivwengi mazu ngangu, ndipu zijengi mskambu umoza kweniso zijengi ndi mliska yumoza.” (Yohane 10:16) “Mbereri zinyaki” zenizi, “zakhola ili cha.” Kweni zakhola linyaki ndipu zakupambana ndi “kamskambu kamana” ko kamusere Ufumu wakuchanya. Makhola ngaŵi nga mbereri zenizi ngakupambana. Chinanga kuti ve viyo, mbereri za m’makhola ngosi ngaŵi zazamuyanduwa ndi udindu wo Yesu wenawu. Iyu wanguti: “Ada atindiyanja chifukwa chakuti ndipereka umoyu wangu.”—Yohane 10:17.

Ŵanthu anandi ŵati ŵavwa vo Yesu wangukamba anguti: “We ndi chiŵanda ndipuso wazunguliya mutu.” Kweni ŵanthu anyaki angulongo kuti avwisiyanga vo Yesu wasambizanga ndipu akhumbisiskanga kulondo Mliska Wamampha. Yiwu angukamba kuti: “Munthu yo we ndi chiŵanda wangakamba cha mazu yanga. Kumbi chiŵanda chingajula masu nga ŵanthu achibulumutiya?” (Yohane 10:20, 21) Mwambula kukayika, ŵanthu ŵenaŵa akambanga munthu yo wanguwa wachibulumutiya yo Yesu wangumuchizga.