Julani

Lutani pa vo ve mukati

 MUTU 71

Afarisi Angususkana ndi Munthu yo Wenga Wachibulumutiya

Afarisi Angususkana ndi Munthu yo Wenga Wachibulumutiya

YOHANE 9:19-41

  • AFARISI ANGUSUSKANA NDI MUNTHU YO WENGA WACHIBULUMUTIYA

  • ALONGOZGI A VISOPA ŴENGA “ACHIBULUMUTIYA”

Afarisi anguzomereza cha kuti Yesu wanguchizga munthu yo wanguwa wachibulumutiya. Mwaviyo, yiwu angudana apapi a munthu mwenuyu kuti aŵafumbi. Apapi ŵaki aziŵanga kuti nkhani iyi yatingi yichitiskengi kuti ‘asezgeki musinagogi.’ (Yohane 9:22) Asani angusezgeka, vatingi vichitiskengi kuti alekengi kucheza kweniso kuchita malonda ndi Ayuda anyawu.

Afarisi anguŵafumba mafumbu ngaŵi apapi ŵaki kuti: “Kumbi uyu ndi mwana winu yo mukamba kuti wanguwa wachibulumutiya? Sonu vaŵa wuli kuti wayambi kuwona?” Yiwu angumuka kuti: “Tiziŵa kuti iyu ndi mwana widu kweniso kuti wanguwa wachibulumutiya. Kweni tiziŵa cha vo vachitika kuti wayambi kuwona. Yo wamubanuwa masu, isi titimuziŵa cha.” Chinanga kuti mwana wawu wanguŵakambiya vo vinguchitika, kweni yiwu angumuka mwakuchenje kuti: “Mufumbeni, ndi mura. Wakambengi yija.”—Yohane 9:19-21.

Afarisi angudana munthu yo wenga wachibulumutiya ndipu angumuwofyeza kuti Yesu amusaniya ndi mulandu. Yiwu angukambiya munthu uyu kuti: “Kankhuska Chiuta. Isi tiziŵa kuti munthu uyu ngwakubuda.” Pakususka vo yiwu akambanga, munthu yo wangukamba kuti: “Kwali ngwakubuda, ini ndiziŵa cha.” Iyu wangukamba so kuti: “Cho ini ndiziŵa ntchakuti ndawonanga cha, kweni sonu ndiwona.”—Yohane 9:24, 25.

Chifukwa chakuti Afarisi akhumbanga cha kuti nkhani iyi yimaliyi penapa, angukamba kuti: “Wachitanji nawi? Wabanuwa wuli masu ngaku?” Munthu uyu wangumuka mwachiganga kuti: “Ndakukambiyani kali kweni mutuvwa cha. Mukhumba kuvwanji so? Kumbi namwi mukhumba kuja akusambira ŵaki?” Wati wakamba mazu ngenanga, Afarisi angukwiya ukongwa ndipu angumukambiya kuti: “Yiwi ndiwi wakusambira wa munthu mweniyo, kweni isi te akusambira aku Mozesi. Tiziŵa kuti Chiuta wangulongoro ndi Mozesi, kweni munthu uyu tiziŵaku cha ko wakutuliya.”—Yohane 9:26-29.

Munthu yo wanguzizwa ukongwa ndi vo Afarisi angukamba ndipu wanguŵakambiya kuti: “Vakuziziswa limu kuti muziŵaku cha ko wakutuliya, kweni munthu yo, wabanuwa masu ngangu.” Pavuli paki, munthu uyu wanguŵakambiya fundu yambula kususkika yakukwaskana ndi ŵanthu wo Chiuta watuvwa mapempheru ngawu kweniso wo watiŵazomereza. Iyu wanguti: “Tiziŵa kuti Chiuta watiŵavwisiya cha ŵanthu akubuda, kweni asani munthu watopa Chiuta ndi kuchita khumbu laki, mweniyo ndiyu watimuvwisiya. Chijaliyi techendavwepu kuti munthu munyaki wabanuwa masu nga munthu yo wanguwa wachibulumutiya.” Pakumaliya, munthu uyu wangukamba kuti: “Asani munthu uyu wangutuliya kwaku Chiuta cha, watingi wachitengi kanthu cha.”—Yohane 9:30-33.

Chifukwa chakuti angutondeka kususka vo munthu uyu wangukamba, Afarisi angumunyoza kuti: “Wamunthu wakuti ukuwiya mu ubudi pe, mbwenu ungatisambiza?” Pavuli paki, angumutuzga musinagogi.—Yohane 9:34.

Yesu wati wavwa vo vinguchitika, wangukumana ndi munthu mwenuyu ndipu wangumufumba kuti: “Kumbi we ndi chivwanu mu Mwana wa munthu?” Munthu mwenuyu wangumuka Yesu kuti: “Munthu yo ndiyani ada, kuti nani ndije ndi chivwanu mwaku iyu?” Yesu wangumusimikiziya kuti: “Wamuwona, ndipu ndi mweniyo walongoro nawi.”—Yohane 9:35-37.

Munthu yo wangumuka kuti: “Ambuya, ndavwana mwaku iyu.” Iyu wangugwadiya Yesu kulongo kuti wamutumbikanga kweniso wenga ndi chivwanu. Pavuli paki, Yesu wangukamba kuti: “Chifukwa cheruzgu cho ndikuziya mucharu ndi ichi, kuti ŵanthu wo aleka kuwona, awoni ndipuso kuti wo awona, aje achibulumutiya.”—Yohane 9:38, 39.

Afarisi wo ŵengapu pa nyengu iyi, ajiwonanga kuti ŵenga achibulumutiya cha. Kweni aŵanaŵananga kuti Yesu wakambanga yiwu, kuti aŵalongozganga uheni ŵanthu. Mwaviyo, angujiŵikiya kuvuli ndipu angufumba kuti: “Isi nasi te achibulumutiya?” Yesu wanguŵakambiya kuti: “Asani mwenga achibulumutiya, mwatingi muŵengevi ubudi. Kweni sonu mukamba kuti, ‘Tiwona.’ Ubudi winu umalengi cha.” (Yohane 9:40, 41) Asani yiwu ŵengavi udindu wakusambiza Ayisirayeli, vatingi viŵengi vakuvwika kukana Yesu kuti ndi Mesiya. Kweni chifukwa chakuti aliziŵanga umampha Dangu, kukana Yesu wenga ubudi ukulu.