Julani

Lutani pa vo ve mukati

 MUTU 44

Yesu Wangulekeska Chimphepu Panyanja

Yesu Wangulekeska Chimphepu Panyanja

MATEYU 8:18, 23-27 MARIKO 4:35-41 LUKA 8:22-25

  • YESU WANGULEKESKA CHIMPHEPU PA NYANJA YA GALILEYA

Yesu watenere kuti wanguvuka ukongwa chifukwa cha ntchitu yakusambiza ŵanthu yo wangugwira zuŵa losi. Mwaviyo, ndi mazulu pa zuŵa lenilo, wangukambiya akusambira ŵaki kuti atuweku ku Kaperenao. Iyu wangukamba kuti: “Tiyeni tiyambukiyi kusirya linyaki.”—Mariko 4:35.

Kuvuma kwa Nyanja ya Galileya kwenga chigaŵa chinyaki cho chadanikanga kuti Agerasa. Chigaŵa chenichi chaziŵikanga so kuti Dekapoli. Matawuni nga Dekapoli ndiku kwenga likulu la chisopa kweniso midawuku ya Agiriki chinanga kuti Ayuda anandi ajanga kwenuku.

Ŵanthu anguziŵa kuti Yesu watuwaku ku Kaperenao. Pa nyengu iyi, penga maboti nganyaki ngo ngalutanga kusirya linyaki la nyanja. (Mariko 4:36) Ndipu kuchifika sirya linyaki, penga pafupi. Nyanja ya Galileya ndi nyanja yikulu yo ye ndi maji ngambula mche. Nyanja yeniyi, ye ndi makilomita pafufupi 21 mu utali, ndipu mu ufupi ye ndi makilomita pafufupi 12, kweni nja ndimba.

Chinanga kuti Yesu wenga wakufikapu, kweni pa zuŵa ili wanguvuka chifukwa cha ntchitu yakupharazga yo wangugwira. Mwaviyo, ŵati akwera muboti iyu wangunyekeza mutu waki papilu ndipu wangugona.

Chinanga kuti akutumika ŵaki anandi aziŵanga kwendesa maboti panyanja kweni pa ulendu uwu angusuzgika ukongwa. Nyanja ya Galileya yenga pakati pa mapiri ndipu chifukwa cha venivi kanandi maji nga panyanja yeniyi ngafundanga. Nyengu zinyaki, mphepu yakuzizira yo yatuwanga ku mapiri yakumananga ndi maji ngakufunda nga panyanja ndipu venivi vachitiskanga kuti panyanja pachitiki chimphepu chikulu mwamabuchibuchi. Ivi ndivu vinguchitika pa zuŵa ili ndipu mayiŵa ngatalingatali ngatchayanga boti. Boti ili, lingwamba “kuzaza maji ndipu linguja kamanavi kubira.” (Luka 8:23) Kweni vosi ivi vichichitika, ndipu Yesu wagona.

Chinanga kuti nyengu yinyaki akusambira aku Yesu angukumanapu ndi mphepu zikuluzikulu panyanja, kweni pa nyengu iyi angutondeka kuvuŵa boti lo angukwera kuti akafiki ku mtunda. Chifukwa cha mantha, yiwu anguyuska Yesu ndipu angumukambiya kuti: “Ambuya, titaskeni, titufwa!” (Mateyu 8:25) Yapa, akusambira aku Yesu achitanga mantha kuti abirengi.

Yesu wati wayuka, wangukambiya akutumika kuti; “Ntchifukwa wuli muchita mantha mwaŵanthu achivwanu chimana yimwi?” (Mateyu 8:26) Pavuli paki, Yesu wangulamula chimphepu cho chenga panyanja kuti: “Leka! Ja cheti!” (Mariko 4:39) Chimphepu cho chinguleka ndipu nyanja yingugona. (Mariko ndi Luka angulemba nkhani yakukondwesa yeniyi kweni angwamba kukonkhoska kuti Yesu wangulekeska chimphepu panyanja mwakuziziswa. Pavuli paki, angukonkhoska kuti akusambira ŵenga ndi chivwanu chimana.)

Aŵanaŵaniyani mo akusambira ŵaki anguvwiya Yesu wati wachita chakuziziswa chenichi. Yiwu anguwona kuti chimphepu cho chenga panyanja chinguleka ndipu nyanja yingugone limu. Venivi vinguŵachitiska mantha ukongwa. Ndipu angwamba kukambiskana kuti: “Ndi munthu wamtundu wuli uyu? Chinanga ndi mphepu kweniso nyanja vitimuvwiya.” Pavuli paki, yiwu angufika umampha kusirya linyaki la nyanja. (Mariko 4:41–5:1) Viwoneka so kuti ŵanthu anyaki wo ŵenga ndi maboti panyanja, angusuzgika cha kuwere kuzambwi kwa nyanja ko angutuliya.

Vakuchiska ukongwa kuziŵa kuti mwana waku Chiuta we ndi nthazi pa vinthu va m’chilengedu. Asani waziyamba kulamuliya charu chapasi mu Ufumu waki, ŵanthu wosi azamuja mwakuvikilirika kweniso mwambula mantha chifukwa pazamuŵavi ngozi za chilengedu.