Julani

Lutani pa vo ve mukati

 MUTU 60

Khristu Wangusambuka Ndipu Wanguwoneke mu Unkhankhu Waki

Khristu Wangusambuka Ndipu Wanguwoneke mu Unkhankhu Waki

MATEYU 16:28–17:13 MARIKO 9:1-13 LUKA 9:27-36

  • AKUTUMIKA ANGUWONA YESU WACHISAMBUKA

  • AKUTUMIKA ANGUVWA MAZU NGAKU CHIUTA

Pa nyengu yo Yesu wasambizanga ŵanthu muchigaŵa cha Kayisareya wa ku Filipi cho chenga pa mtunda wa makilomita 25 kutuwa ku Phiri la Herimoni, wangukambiya akutumika ŵaki kuti: “Nditikuneneskiyani kuti pe anyaki wo ama panu, wo afwengi cha mpaka po awone dankha Mwana wa munthu wachiza mu Ufumu waki.”—Mateyu 16:28.

Akusambira atenere kuti ajifumbanga kuti Yesu wang’anamuwanganji. Pati pajumpha mazuŵa ngamanavi, Yesu wanguto akutumika ŵaki atatu, Peturo, Yakobe ndi Yohane ndipu wanguluta nawu paphiri litali. Panyaki nyengu iyi wenga usiku. Tikamba viyo chifukwa chakuti akutumika ŵaki ŵenaŵa asiwanga. Yesu wachipemphera, wangusambuka akutumika ŵaki achiwona. Yiwu anguwona kuti chisku chaku Yesu chingugabuka nge lumwi, ndipu malaya ngaki ngakubwalu nganguŵala ukongwa nge ukweru kweniso ngenga ngatuŵa ukongwa.

Pavuli paki, panguwoneka so ŵanthu anyaki ŵaŵi, “Mozesi ndi Eliya.” Yiwu angwamba kukambiskana ndi Yesu vakukwaskana ndi ‘ulendu waki wo unguja kamanavi kuchitika ku Yerusalemu.’ (Luka 9:30, 31) Ulendu wenuwu wang’anamuwanga nyifwa yaku Yesu kweniso kuyuskika kwaki vo iyu wangukambiya akusambira ŵaki. (Mateyu 16:21) Vo yiwu akambiskananga vingulongo kuti nyifwa yaku Yesu yenga yakukhumbika ukongwa. Venivi vapambananga ukongwa ndi vo Peturo wapemphanga Yesu kuti wachiti.

Pa nyengu iyi, akutumika ŵenaŵa anguzizwa ukongwa ndi vo awonanga kweniso kuvwa chifukwa tulu to ŵenga natu tingumaliya limu. Chinanga kuti chenga chiwona, Peturo wawonanga nge kuti vinthu vo vichitika nadi ndipu wangukamba kuti: “Rabi, mwachita umampha kuza nasi kunu. Sonu wuli tijinthi mahema ngatatu panu? Limoza linu, limoza laku Mozesi ndipu linyaki laku Eliya.” (Mariko 9:5) Kumbi Peturo wakhumbanga kuzenga mahema kuti chiwona chenichi chilutiriyi?

Peturo weche kulongoro, mtambu wakuŵala unguŵabenekere ndipu mumtambu wo mungutuwa mazu ngakuti: “Uyu ndi Mwana wangu, mweniyo nditimuyanja, yo watindikondwesa. Muvwiyeni.” Akutumika aku Yesu ŵati ŵavwa mazu ngaku Chiuta, anguchita mantha ukongwa ndipu anguwa kavunama. Kweni Yesu wanguŵakambiya kuti: “Sokani. Mungawopanga cha.” (Mateyu 17:5-7) Ŵati ayunuka, anguwonapu munthu weyosi cha kweni Yesu pe chifukwa chiwona ndipu chamala. Kwati kwacha, yiwu angusika muphiri ndipu Yesu wanguŵalamula kuti: “Mungakambiyanga munthu weyosi cha chiwona ichi, mpaka po Mwana wa munthu wayuskikiya.”—Mateyu 17:9.

Akutumika aku Yesu ŵati awona Eliya muchiwona, angufumba Yesu kuti: “Ntchifukwa wuli alembi akamba kuti Eliya watenere kuza dankha?” Yesu wanguŵamuka kuti: “Eliya wakuza kali, ndipu angumuziŵa cha.” (Mateyu 17:10-12) Wachikamba mazu yanga, Yesu wakambanga zaku Yohane Mubatizi yo wangufiska udindu wo Eliya wenga nawu. Yohane wangunozga nthowa yaku Khristu nge mo Eliya wangunozge nthowa yaku Elisha.

Yesu kweniso akutumika ŵaki wo anguwona chiwona chenichi anguchiskika ukongwa. Chiwona chenichi chalongonga unkhankhu wo Khristu wazamuja nawu mu Ufumu waki. Nge mo Yesu wangulayizgiya, akutumika ŵenaŵa anguwona “Mwana wa munthu wachiza mu Ufumu waki.” (Mateyu 16:28) Pa nyengu yo ŵenga ku phiri, yiwu ‘angujiwone ŵija ukulu waki.’ Chinanga kuti Afarisi akhumbanga chisimikizu chakulongo kuti Yesu ndi Fumu yakusankhika ndi Chiuta, kweni Yesu wanguŵapaska chisimikizu chechosi cha. Kweni akusambira aku Yesu anguwona Yesu wachisambuka vo vingufiska ma uchimi nga Ufumu. Ndichu chifukwa chaki wakutumika Peturo wangulemba kuti: “Te ndi mazu nga uchimi ngakusimikizika ukongwa.”—2 Peturo 1:16-19.