Julani

Lutani pa vo ve mukati

 MUTU 57

Yesu Wanguchizga Msungwana Kweniso Munthu Wambula Kuvwa ndi Kuŵereŵeta

Yesu Wanguchizga Msungwana Kweniso Munthu Wambula Kuvwa ndi Kuŵereŵeta

MATEYU 15:21-31 MARIKO 7:24-37

  • YESU WANGUCHIZGA MWANA WA MUNTHUKAZI WAKU FONIKE

  • YESU WANGUCHIZGA MUNTHU WAMBULA KUVWA KWENISO KUŴEREŴETA

Yesu wati wasuska midawuku yakujikondwesa yo Afarisi achitanga, iyu ndi akusambira ŵaki angutuwaku ku Kaperenao. Yiwu angwenda ulendu wa makilomita nganandi kuluta kunkhondi chakuzambwi kwa vigaŵa va Turo ndi Sidoni mu charu cha Fonike.

Yesu wati wafika ku Fonike, wangusere munyumba kweni wakhumbanga cha kuti ŵanthu aziŵi kuti waza kwenuku. Chinanga kuti wanguchita viyo, ŵanthu anguziŵa kuti iyu waza. Munthukazi munyaki wachigiriki yo wanguwiya mucharu cha Fonike, wanguluta kwaku Yesu ndipu wangwamba kumupempha kuti: “Ndichitiyeni lisungu Ambuya, Mwana waku Davidi. Mwana wangu munthukazi wasuzgika ukongwa ndi chiŵanda.”—Mateyu 15:22; Mariko 7:26.

Pati pajumpha nyengu yimanavi, akusambira aku Yesu angumukambiya kuti: “Mukambiyeni wakengi chifukwa walutirizga mbwenu kudaniriza muvuli mwidu.” Yesu pakumuka akusambira ŵaki wangukonkhoska chifukwa cho walekiyanga kumuka munthukazi mwenuyu. Iyu wanguti: “Ndikutumika ku munthu munyaki weyosi cha, kweni kuti ndizipenji mbereri zakusoŵa za nyumba yaku Isirayeli.” Munthukazi uyu wanguleka cha kudana Yesu. Mwaviyo, wanguza pafupi ndikugwada panthazi paku Yesu ndipu wangumupempha kuti: “Ambuya, ndiwovyeni!”—Mateyu 15:23-25.

Pakukhumba kuyesa chivwanu cha munthukazi mwenuyu, Yesu wangukonkhoska mo Ayuda awoniyanga ŵanthu a mitundu yinyaki. Iyu wangukamba kuti: “Ntchakwenere cha kuto chakurya cha ŵana kuponye tana ta galu.” (Mateyu 15:26) Pakukamba “tana ta galu,” Yesu wangulongo mo iyu wawoniyanga ŵanthu wo ŵenga Ayuda cha. Mo chisku chaki chawonekiyanga kweniso mazu ngalisungu ngo walongolonga, ngalongonga so mo iyu wavwiyanga nadi mumtima waki.

M’malu mwakuguŵa ndi vo Yesu wangukamba, munthukazi uyu wanguziŵa vo Ayuda achitanga ndi ŵanthu a mitundu yinyaki ndipu wangukamba mwakujiyuyuwa kuti: “Hinya Ambuya, kweni asi tana ta galu titurya malivuvu ngo ngambotoka pasi kutuliya pathebulu la ambuyawu!” Yesu wanguziŵa kuti munthukazi uyu wenga ndi mtima wamampha ndipu wangukamba kuti: “Wamunthukazi yiwi, we ndi chivwanu chikulu ukongwa. Vo ukhumba vichitiki nge mo ukhumbiya.” (Mateyu 15:27, 28) Vo iyu wakhumbanga vinguchitika nadi chinanga kuti mwana waki wenga kutali. Munthukazi uyu wati wafika kunyumba wangusaniya kuti mwana waki munthukazi wagona pabedi. ‘Chiŵanda cho wenga nachu chingutuwamu’ ndipu wanguchiriya limu.—Mariko 7:30.

Yesu ndi akusambira ŵaki angutuwaku kuchigaŵa cha Fonike ndipu alutanga ku chigaŵa cha Dekapoli. Yiwu atenere kuti angumbuka Msinji wa Yorodani chakunkhondi kwa Nyanja ya Galileya. Ŵati afika ku Dekapoli, angukwera pachanya pa phiri kweni gulu la ŵanthu linguŵasaniya kwenuko. Ŵanthu ŵenaŵa anguza kwaku Yesu ndi ŵanthu akupunduka, vilima, achibulumutiya kweniso ambuwu. Yiwu anguŵika ŵanthu ŵenaŵa pa malundi ngaku Yesu ndipu iyu wanguŵachizga. Ŵanthu yaŵa anguzizwa ukongwa ndipu angukankhuska Chiuta waku Isirayeli.

Yesu wangumuvwiya lisungu ukongwa munthu yo watondekanga kuvwa ndi kuŵereŵeta. Ŵanaŵaniyani ŵaka mo munthu uyu wavwiyanga pachigulu cha ŵanthu. Panyaki chifukwa chakuwona mo munthu uyu wavwiyanga, Yesu wangumutuzgapu pa gulu la ŵanthu. Ŵati afika kwaku ŵija, Yesu wangulongo vo wakhumbanga kumuchitiya. Yesu wangusereza vikumbu vaki mumakutu nga munthu mwenuyu ndipu wati wafunya mata pasi, wanguko lilimi la munthu mwenuyu. Pavuli paki, Yesu wangulereska kuchanya ndipu wangukamba mazu ngakuti, “Efata,” kung’anamuwa kuti, “Julika.” Yesu wati wakamba viyo, makutu nga munthu mwenuyu ngangujulika ndipuso wangwamba kuŵereŵeta. Yesu wakhumbanga cha kuti ŵanthu aziŵi venivi chifukwa wakhumbanga kuti ŵanthu amugomezgengi chifukwa cha vo awona kweniso kuvwa ŵija.—Mariko 7:32-36.

Ŵanthu anandi “anguzizwa ukongwa” ndi nthazi zaku Yesu zo wachizgiyanga ŵanthu. Yiwu angukamba kuti: “Vinthu vosi wativichita umampha. Chinanga mbanthu ambula kuvwa, watiŵachitiska kuti avwengi ndipu ambula kuŵereŵeta, aŵereŵeta.”—Mariko 7:37.