Julani

Lutani pa vo ve mukati

 MUTU 29

Kumbi Kwenga Kunanga Kuchita Ntchitu Zamampha pa Zuŵa la Sabata?

Kumbi Kwenga Kunanga Kuchita Ntchitu Zamampha pa Zuŵa la Sabata?

YOHANE 5:1-16

  • YESU WANGUPHARAZGA KU YUDEYA

  • YESU WANGUCHIZGA MUNTHU PAFUPI NDI THAŴALI

Yesu wanguchita vinthu vinandi ku Galileya. Kweni iyu wakhumbanga kupharazga ku Galileya pe cha, ndichu chifukwa chaki wangukamba kuti: “Nditenere so kuchipharazga uthenga wamampha wa Ufumu waku Chiuta ku matawuni nganyaki.” Mwaviyo, iyu wangulutirizga “kupharazga mumasinagogi nga ku Yudeya.” (Luka 4:43, 44) Iyi yenga nyengu yamampha chifukwa nyengu ya phwandu la Pasika yo wachitikanga ku Yerusalemu yenga pafupi.

Mabuku nga Uthenga Wamampha ngakonkhoska vinandi cha vo Yesu wanguchita wachipharazga ku Yudeya, kweni ngakonkhoska ukongwa vo wanguchita ku Galileya. Chinanga kuti ŵanthu anandi ku Yudeya avwisiyanga cha vo iyu wasambizanga, Yesu wanguleka cha kupharazga mwaphamphu kweniso kuchitiya ŵanthu vinthu vamampha kwekosi ko iyu walutanga.

Pavuli paki, Yesu wanguluta ku tawuni ya Yerusalemu, yo yenga likulu la Yudeya kuti wakachiti nawu phwandu la Pasika wa mu 31 C.E. Ku Yerusalemu pa Geti la Mbereri, kwenga thaŵali lo laziŵikanga kuti Betizata. Ŵanthu anandi wo atamanga, ambula kuwona kweniso akupunduka azanga ku thaŵali lenili. Ŵanthu ŵenaŵa azanga kwenuku chifukwa agomezganga kuti angachira asani abila mumaji ngamuthaŵali asani ngavunduka.

Zuŵa ili lenga la Sabata ndipu Yesu wati wafika wanguwona munthu munyaki yo wangutama kwa vyaka 38. Yesu wangumufumba kuti: “Kumbi ukhumba kuchira?” Iyu wangumuka kuti: “Ada, ndilivi munthu wakuti wandibizgi muthaŵali umu asani maji ngavunduka. Kweni asani ndiluta kuti nkhabiremu, mbwenu munyaki wadanjiyapu.”—Yohane 5:6, 7.

Yesu wangukamba mazu ngo nganguziziswa munthu yo watamanga kweniso ŵanthu anyaki wo ŵengapu. Iyu wanguti: “Soka, nyamuwa mphasa zaku, lutanga.” (Yohane 5:8) Munthu yo wanguchita nadi vo Yesu wangumukambiya. Nyengu yeniyo, wanguchizgika ndipu wangunyamuwa mphasa zaki ndi kwamba kwenda.

M’malu mwakuti akondwi ndi vinthu vamampha vo vinguchitika, Ayuda angwamba kukambiya munthu yo mwakumuyeruzga kuti: “Ili ndi zuŵa la Sabata ndipu ntchakwenere cha kuti unyamuwi mphasa.” Iyu wangumuka kuti: “Munthu yo wandichizga ndiyu wandikambiya kuti, ‘Nyamuwa mphasa zaku, lutanga.’” (Yohane 5:10, 11) Ayuda ŵenaŵa akhumbanga kusaniya vifukwa munthu yo wachizganga ŵanthu pa zuŵa la Sabata.

Pakukhumba kuziŵa munthu yo wangumuchizga, Ayuda angumufumba kuti: “Ndiyani mweniyo wakukambiya kuti, ‘Zinyamuwi, lutanga’?” Yiwu angumufumba viyo chifukwa pa nyengu iyi, Yesu ‘wangusere muchigulu cha ŵanthu,’ kweniso munthu yo waliziŵanga cha zina laku Yesu. (Yohane 5:12, 13) Kweni munthu uyu wangukumana so ndi Yesu munyumba yakusopiyamu, ndipu sonu wangumuziŵa umampha munthu yo wangumuchizga pa thaŵali.

Munthu mwenuyu wangukumana so ndi Ayuda wo angumufumba za munthu yo wangumuchizga, ndipu wanguŵakambiya kuti ndi Yesu. Ŵati ŵavwa venivi, yiwu anguluta kwaku Yesu. Kumbi yiwu anguluta kuti akaziŵi cho chamuchitiskanga kuti wachitengi vakuziziswa venivi? Awa. M’malu mwaki, akhumbanga kumusaniya ndi mulandu wakuti wachita vinthu vamampha pa zuŵa la Sabata. Ndipu angwamba kumusuzga chifukwa cha nkhani yeniyi.