Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Weriyani Kwaku Yehova

 CHIGAŴA 1

‘Ndipenjengi Mbereri Yakusoŵa’

‘Ndipenjengi Mbereri Yakusoŵa’

Tiyeruzgiyi kuti mbereri yalanda. Iyu yaryanga uteka ndi mbereri zinyaki kweni pavuli paki yatuwapu pa gulu la zinyaki ndipu yasanirika kuti ye yija. Kumalu ko yili, kulivi muliska kweniso mbereri zinyaki. Kutamba kufipa. Mbereri yeniyi ye kudondu ko kwe nyama zakofya zo zitendatenda ndipu palivi wakuti wayivikiriyi. Pakumaliya, yituvwa mazu nga muliska waki, yo watiyitchimbiriya, watiyinyamuwa, watiyivunga pamalaya ngaki ndipu waluta nayu kunyumba.

YEHOVA watijikonkhoska mwakuwerezgawerezga kuti we nge muliska mwenuyu. Iyu watitisimikizgiya m’Mazu ngaki kuti: ‘Ini ndamweni ndipenjengi mbereri zangu, ndipu ndiziphweriyengi.’Ezekiele 34:11, 12.

‘Mbereri zo Nditiziphwere’

Kumbi mbereri zaku Yehova mbayani? Tingakamba kuti mbereri zaku Yehova mbanthu wo atimuyanja ndipuso atimusopa. Bayibolu likamba kuti: ‘Tiyeni tikotami ndi kumusopa; tiyeni tigwadi pamasu paku Yehova, Mulengi widu! Chifukwa iyu ndi Chiuta widu, ndipu isi te ŵanthu a uliska waki, ndipuso mbereri zo watiziphwere.’ (Sumu 95:6, 7) Nge mo mbereri chayizu zilondore muliska, ateŵeti aku Yehova mbakunozgeka kulondo Muliska wawu. Kumbi yiwu anangiska cha? Ateŵeti aku Chiuta anangiska nyengu zinyaki. Yiwu aja nge ‘mbereri zakupalanyika,’ ‘mbereri zakutayika’ kweniso ‘mbereri zakulanda.’ (Ezekiele 34:12; Mateyu 15:24; 1 Petro 2:25) Chinanga kuti vingaŵa viyo, Yehova wawona kuti munthu yo walanda wangawerere.

 Kumbi imwi muwona kuti Yehova weche Muliska winu? Kumbi Yehova walongo wuli kuti ndi Muliska mazuŵa nganu? Tiyeni tiwoni nthowa zitatu izi:

Watitiryiska kuti tije nayu pa ubwezi wakukho. Yehova wakamba kuti: ‘Ndiziliskengi uteka wamampha. Zigonengi pasi mucharu cha uteka wamampha, ndipu ziryengi uteka wamampha.’ (Ezekiele 34:14) Nyengu zosi Yehova watitipaska chakurya chamampha chakupambanapambana pa nyengu yaki, cho chititiwovya kuti tijengi nayu pa ubwezi. Kumbi mukumbukapu nkhani yeyosi yakuchiska yo munguŵerenga mumabuku ngidu, yo munguvwisiya pa unganu pamwenga vidiyo yo yingukuwovyani? Kumbi weniwo wenga ukaboni cha wakuti Yehova watikuŵanaŵaniyani?

Watitivikiliya kweniso watitiwovya. Yehova walayizga kuti: ‘Ndipenjengi mbereri yakusoŵa, ndimangengi yo yapwetekeka, yakulopwa ndiyipaskengi nthazi.’ (Ezekiele 34:16) Yehova watiŵapaska nthazi wo alopwa pamwenga asuzgika maŵanaŵanu chifukwa cha vinthu vo vaŵachitikiya. Nyengu zinyaki angaguŵiskika ndi Akhristu anyawu kweni Yehova watiŵawovya kuti ayambi so kukondwa. Ndipu waweza wo asoŵa kweniso watovya wo asuzgika maŵanaŵanu chifukwa cha vo anangiska.

Watitiŵanaŵaniya. Yehova wakamba kuti: ‘Ndizitaskengi mumalu ngosi ngo zikuparanyikiya. Ndipenjengi mbereri yakusoŵa.’ (Ezekiele 34:12, 16) Yehova wawona kuti mbereri yo yalanda yingasintha. Iyu waziŵa asani mbereri yalanda, watiyipenja ndipu wakondwa asani wayisaniya. (Mateyu 18:12-14) Yehova wadana ateŵeti ŵaki kuti ‘mbereri zangu, mbereri zo nditiziphwere.’ (Ezekiele 34:31) Namwi mwe mugulu la mbereri zenizi.

Yehova wawona kuti mbereri yo yalanda yingasintha. Iyu wakondwa asani wayisaniya

‘Nozgani so Vinthu Kuti Viŵi nge mo Venge Kali’

Nchifukwa wuli Yehova watikupenjani ndipuso kukupemphani kuti muwere kwaku iyu? Chifukwa wakhumba kuti mukondwengi. Iyu walayizga mbereri zaki kuti ‘vitumbiku vikaziwiyanga nge vuwa.’ (Ezekiele 34:26) Venivi vichitika nadi. Ndipu vikukuchitikiyanipu kali.

Kumbukani vo vakuchitikiyaningi muchisambira vakukwaskana ndi Yehova. Mwakuyeruzgiyapu, kumbi munguvwa wuli mwati mwasambira kakwamba uneneska wakukwaskana ndi zina laku Chiuta kweniso vo wakhumba kuzichitiya ŵanthu? Kumbi mukumbuka mo mwachiskikiyanga chifukwa cha kuwungana ndi Akhristu anyinu pa maunganu ngadera kweniso ngachigaŵa? Pa nyengu yo mungupharazgiya munthu yo wakhumbisiskanga kusambira, kumbi mungukondwa cha muchiwere kunyumba kwinu?

Mungayamba so kukondwa. Ateŵeti aku Chiuta a mu nyengu yakali anguromba kuti: ‘Tiweziyeni kwaku imwi, Yehova, ndipu tiweriyengi kwaku imwi mwaliŵi. Nozgani so vinthu kuti viŵi nge mo venge kali.’ (Chitenje 5:21) Yehova wangumuka rombu lenili. Ŵanthu ŵaki anguwere kwaku iyu ndipu angwamba so kumuteŵete mwakukondwa. (Nehemiya 8:17) Iyu wachitengi so viyo ndi yimwi.

Chinanga kuti ve viyo, kuwere kwaku Yehova nkhwakusuzga. Wonani vinthu vinyaki vo vingakutondekeskani kuwere kwaku Yehova ndipuso vo mungachita kuti vinthu venivi vileki kukutondekeskani.