Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Weriyani Kwaku Yehova

 CHIGAŴA 4

Kujimba Mulandu—‘Nditoweseni ku Ubudi Wangu’

Kujimba Mulandu—‘Nditoweseni ku Ubudi Wangu’

“Ntchitu yo ndingwamba kugwira yinguwovya kuti banja lidu lisaniyengi vinthu vinandi kweni yandichitiskanga kuti ndichitengi vinthu vambula kwenere. Ndingwamba kukondwere nawu maholidi, ndachitangaku vandali ndipuso ndakanga kuvisopa. Ndinguleka kuwungana ndi Akaboni aku Yehova kwa vyaka 40. Chifukwa chakuti ndinguleka kuwungana kwa vyaka vinandi, ndawonanga kuti Yehova wangandigowoke cha. Ndaŵanaŵananga kuti ndini wakunanga ukongwa chifukwa ndaziŵanga uneneska kweni ndingusankhiya dala kuchita vinthu vambula kwenere.”—Martha.

KUJIMBA mulandu kungachitiska kuti tileki kuluta panthazi. Fumu Davidi yingulemba kuti: ‘Maubudi ngangu ngajumpha mutu wangu, ndavuka nangu nge ndi katundu muzitu.’ (Sumu 38:4) Akhristu anyaki atijimba ukongwa mulandu chifukwa cha vinthu vo akunangiska ndipu awona kuti Yehova wangaŵagowoke cha. (2 Ŵakorinte 2:7) Kumbi venivi vauneneska? Chinanga kuti mukuchita ubudi ukulu, Yehova wangakugowokiyani ndipu mungaja so nayu paubwezi.

‘Tiyeni Tikambiskani’

Yehova watiŵalondere ŵanthu wo alapa. Iyu watiŵawovya. Muntharika ya mwana wakusakaza, Yesu wanguyeruzgiya Yehova ndi da wachanju yo mwana waki wangutuwapu panyumba ndipu wanguchija umoyu wambula kukondwesa. Pati pajumpha nyengu, mwana yo wanguŵanaŵana kuti wawere so kunyumba. ‘[Mwana yo] weche kutali, awiski angumuwona, ndipu anguchita chitima, pavuli paki angumutchimbiliya ndi kumuvumbatiya ndipu angumufyofyontha.’ (Luka 15:11-20) Kumbi namwi mukhumba so kuja pa ubwezi ndi Yehova kweni muwona kuti ‘mweche kutali’ ndi iyu? Mwakuyanana ndi da yo we muntharika yaku Yesu, Yehova wangakugowokiyani chifukwa chakuti watikuyanjani. Iyu ngwakunozgeka kukulondiyani so.

Nanga wuli asani muŵanaŵana kuti maubudi nginu ngakulu ukongwa pamwenga nganandi ndipu Yehova wangakugowokiyani cha? Ŵanaŵaniyani vo iyu wakamba pa Yesaya 1:18: ‘Yehova watiti, “Zaningi sonu, tiyeni tikambiskani ndipu ini ndikuwovyeningi kuti tije so pa ubwezi.” “Chinanga maubudi nginu ngangaŵa ngakutchesama wuli, ngaŵengi ngatuŵa nge nyankhuŵinda, chinanga ngangaŵa ngakuti tchee nge nkhama, ngasandukengi nge weya wa mbereri.”’ Yehova wangatondeka cha kukugowokiyani chinanga kuti maubudi nginu ngangawoneka nge maŵanga ngakuthimbiriya pa chakuvwala chituŵa.

Yehova wakhumba cha kuti mulutirizgi kujimba mulandu. Kumbi mungachita wuli kuti muje ndi njuŵi yamampha chifukwa chakuti Chiuta wakugowokiyani? Wonani vinthu viŵi vo Fumu Davidi yinguchita. Chakwamba, iyu yinguti: ‘Ndisumuwengi maubudi ngangu kwaku Yehova.’ (Sumu 32:5) Kumbukani kuti Yehova wakukupemphani kali kuti murombi kwaku iyu ndipuso kuti ‘wakambiskani’ namwi. Zomerani kukambiskana nayu. Musumuliyeni maubudi nginu ndipu mukambiyeni mo muvwiya. Davidi wati wabuda, wangukambiya Yehova kuti: ‘Nditoweseni ku ubudi wangu. . . . Mtima wakusweka ndi wakupe, Imwi Chiuta, muwukanengi cha.’—Sumu 51:2, 17.

Chachiŵi, Davidi wanguwovyeka ndi Chiuta kuporote mwa mchimi Natani. (2 Samuele 12:13) Mazuŵa nganu, Yehova wagwiriskiya ntchitu ŵara mumpingu wo akusambizika kuti awovyengi ŵanthu wo alapa kuti aje so pa ubwezi ndi Yehova.  Asani mwaluta kwa ŵara kuti akakuwovyeni, yiwu amugwiriskiya ntchitu Malemba ndipu akukurombiyani kutuliya pasi pa mtima kuti muleki kujimba mulandu, mujiwonengi mwakwenere kweniso kuti muje so pa ubwezi ndi Chiuta.—Yakobe 5:14-16.

Yehova wakhumba kuti mukondwengi chifukwa chakuja ndi njuŵi yamampha

‘Ngwakutumbikika Munthu yo Wagowokeleka Mphulupulu Zaki’

Mungaŵanaŵana kuti kusumuwa maubudi nginu kwaku Yehova Chiuta ndipuso kuluta kwa ŵara vingaŵa vinthu vakusuzga ukongwa. Viwoneka kuti Davidi nayu waŵanaŵananga viyo. Iyu ‘wanguja cheti’ kwakanyengu kwambula kusumuwa maubudi ngaki. (Sumu 32:3) Kweni pavuli paki, wanguwona kuti mbumampha kusumuwa maubudi ngaki ndi kusintha jalidu laki.

Davidi wati wasumuwa maubudi ngaki wanguyanduwa ukongwa chifukwa wangwamba so kukondwa. Iyu wangulemba kuti: ‘Ngwakutumbikika munthu yo wagowokeleka mphulupulu zaki, yo maubudi ngaki ngagowokeleka.’ (Sumu 32:1) Iyu wanguromba so kuti: ‘Yehova, julani milomu yangu, ndipu mulomu wangu ukutumbikeningi.’ (Sumu 51:15) Chifukwa chakuti Davidi wanguleka kujimba mulandu, wanguwonga Chiuta chifukwa chakumugowoke ndipu wakambiyangaku anyaki vakukwaskana ndi Yehova.

Yehova wakhumba kuti mukondwengi chifukwa chakuja ndi njuŵi yamampha. Wapenja kuti mukambiyengeku ŵanthu anyaki vakukwaskana ndi iyu kweniso malayizgu ngaki. Wakhumba kuti muchitengi viyo mwakutuliya pasi pamtima, mwakukondwa kweniso mwambula kujimba mulandu. (Sumu 65:1-4) Kumbukani kuti iyu wakhumba kuti ‘maubudi nginu ngasisitiki, kuti nyengu zakusisipuwa zizi kutuwa kwaku Yehova.’Machitidu 3:19.

Ivi ndivu vinguchitikiya Martha. Iyu wangukamba kuti: “Mwana wangu munthurumi wanditumiziyanga magazini nga Chigongwi cha Alinda ndi Galamukani! Kamanakamana ndingwamba so kuja pa ubwezi ndi Yehova. Pa nyengu yo ndaweriyanga kwaku Yehova, ndingusuzgika ukongwa kuti ndimupemphi kuti wandigowoke maubudi ngo ndinguchita. Pavuli paki, ndinguromba kwaku Chiuta kuti wandigowoke. Nkhwakusuzga kugomezga kuti pangujumpha vyaka 40 ndechendawere kwaku Yehova. Vo vingundichitikiya vilongo kuti chinanga pangajumpha vyaka vinandi wuli, munthu wangayamba so kuteŵete Chiuta ndipu wangayanjika so ndi iyu.”