Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Weriyani Kwaku Yehova

 CHIGAŴA 2

Kufipa Mtima—‘Tisuzgika mu Nthowa Zakupambanapambana’

Kufipa Mtima—‘Tisuzgika mu Nthowa Zakupambanapambana’

“Tati taja mu nthengwa ndi murumu wangu kwa vyaka 25, nthengwa yidu yingumala. Ŵana ŵangu anguleka uneneska. Ndingwamba kutama matenda ngakulungakulu. Pavuli paki ndingwamba kusuzgika maŵanaŵanu. Ndawonanga kuti masuzgu ngangu ngenga nganandi ukongwa ndipu pengavi cho ndatingi ndichitengi. Ndinguleka kuwungana ndipu ndingulopwa.”—June.

MUNTHU weyosi wafipa mtima, chinanga mbanthu aku Chiuta viyo. Wakulemba sumu wakukamba kuti: ‘Maŵanaŵanu ngenga nganandi mumtima mwangu.’ (Sumu 94:19) Yesu wangukamba kuti m’mazuŵa ngakumaliya, kwazamukuŵa kwakusuzga kuteŵete Yehova chifukwa cha vinthu vakufipiska mtima vo tikumanengi navu pa umoyu. (Luka 21:34) Kumbi namwi muwona viyo? Kumbi mufipa mtima chifukwa cha kusoŵa kwa ndalama, masuzgu nga mubanja pamwenga matenda? Kumbi Yehova wangakuwovyani wuli kuti mukunthiyepu?

‘Nthazi yo Yiluska yo Te Nayu’

Tikhumbika chovyu kuti timalani ndi vinthu vo vititifipiska mtima. Wakutumika Paulo wakulemba kuti: ‘Tisuzgika mu nthowa zakupambanapambana. Titimbanyizgika . . .  titwesulika pasi.’ Iyu wangukamba so kuti ‘tifyekeka kweni mpaka kutondeka kutukuluka cha,’ ‘tisoŵe limu pakuthaŵiya cha,’ ndipuso ‘tinangika cha.’ Nchinthu wuli cho chititiwovya kukunthiyapu? Yehova Chiuta wanthazizosi watitipaska ‘nthazi yo yiluska yo te nayu.’2 Ŵakorinte 4:7-9.

Kumbukani mo munguwovyeke ndi ‘nthazi yo yiluska yo te nayu.’ Kumbi mukumbuka mo nkhani yakuchiska yingukuwovyiyani kuziŵa kuti Yehova watikuyanjani? Kumbi kukambiyaku ŵanthu za layizgu laku Yehova la umoyu wamuyaya mu Paradayisu, kungukuwovyani cha kuti muje ndi chivwanu chakukho? Asani tiwungana ndi Akhristu anyidu ndipuso tipharazgiya ŵanthu vo tigomezga, tilonde nthazi yo yititiwovya kukunthiyapu vinthu vakufipiska mtima vo vititichitikiya ndipu tija ndi chimangu mumtima cho chititiwovya kuteŵete Yehova mwakukondwa.

‘Laŵani Ndipu Muwonengi Kuti Yehova Ngwamampha’

Kukamba uneneska, nyengu zinyaki mungawona kuti mukhumbika kuchita vinthu vinandi pa nyengu yimoza. Mwakuyeruzgiyapu, Yehova wakhumba kuti tipenjengi dankha Ufumu waki kweniso kuchita vinthu vo vingatiwovya kuja nayu pa ubwezi. (Mateyu 6:33; Luka 13:24) Kweni wuli asani mususkika ndi ŵanthu a mubanja linu pamwenga anyinu, mutama panyaki mutondeka kuchita vinthu vinyaki chifukwa cha masuzgu nga mubanja? Nanga wuli asani mugwira ntchitu yo yitikumaliyani nyengu kweniso nthazi ndipu mutondeka kuwungana? Chifukwa chakuti mukhumbika kuchita vinthu vinandi pa nyengu yimoza, mungafipa mtima kuti mufiskengi cha. Ndipu nyengu zinyaki mungaŵanaŵana kuti Yehova wakhumba kuti muchitengi vinthu vo mungatondeka kufiska.

Ziŵani kuti Yehova watitivwisa. Iyu wakhumba kuti tichitengi vo tingafiska. Ndipu waziŵa kuti pato nyengu kuti timalani ndi masuzgu kweniso vinthu vo vititifipiska mtima.—Sumu 103:13, 14.

Mwakuyeruzgiyapu, ŵanaŵaniyani mo Yehova wanguwovye mchimi Eliya. Nyengu yinyaki Eliya wanguguŵa kweniso wanguchita mantha ndipu wanguthaŵiya ku bozwa. Kumbi Yehova wangumukalipiya ndipuso kumulamula kuti wawere ku uteŵeti waki?  Awa. Yehova wangutumiza mungelu kaŵi, kuti wakayuski Eliya ndi kumupaska chakurya. Chinanga kuti venga viyo, pati pajumpha mazuŵa 40, Eliya wenga weche ndi mantha kweniso wafipanga mtima. Kumbi Yehova wanguchitanji so kuti wamuwovyi? Chakwamba, wangumulongo ukaboni wakuti wamuvikiliyengi. Chachiŵi, wangumuchiska mwakukambiskana nayu ‘mwakuzika.’ Pakumaliya, wangumukambiya kuti penga ŵanthu anandi wo ateŵetiyanga Chiuta mwakugomezgeka. Pavuli paki, Eliya wangwamba so kuteŵete Yehova mwaphamphu. (1 Ŵakaronga 19:1-19) Kumbi tisambiranjipu? Pa nyengu yo Eliya wangufipa mtima ukongwa, Yehova wanguchita nayu vinthu mwakuzizipizga kweniso mwalisungu. Yehova wakusintha cha. Iyu watitiŵanaŵaniya nge mo wanguchitiya ndi Eliya.

Asani mukhumba kwamba so kuteŵete Yehova, chitani vo mungafiska. Vo muchitengi sonu mungaviyeruzgiyanga ndi vo mwachitanga kali cha. Mwakuyeruzgiyapu, asani munthu yo wachitanga maphara ngakutchimbiya waleka kuyesere kwa myezi pamwenga vyaka ndipu wakhumba so kwamba kuchita maphara, kumbi wangatchimbiya nge mo wachitiyanga kali? Awa. Iyu watamba kuchita vinthu vimanavimana vo vitimuwovya kuti wayambi kuchita vinthu nge mo wachitiyanga kali. Akhristu ŵenge ŵanthu wo achita maphara ngakutchimbiya. Yiwu atchimbiya ŵe ndi chilatu. (1 Ŵakorinte 9:24-27) Mwaviyo, kuti muyambi so kuteŵete Yehova yesani kuja ndi chilatu cho sonu mungafiska. Mwakuyeruzgiyapu, mungaja ndi chilatu chakuti mulutengi ku mawunganu. Mupempheni Yehova kuti wakuwovyeni kufiska chilatu chenichi. Asani mwayamba so kuluta ku mawunganu, ‘mumulaŵengi ndipu muwonengi kuti Yehova ngwamampha.’ (Sumu 34:8) Kumbukani kuti chechosi cho mungachita kuti mulongo kuti mutanja Yehova, kaya chingaŵa chimana wuli, iyu wakondwengi nachu.Luka 21:1-4.

Yehova wakhumba kuti tichitengi vo tingafiska

“Chovyu cho Ndalindizganga”

Kumbi Yehova wangumuwovya wuli muzichi June kuti wawere so kwaku iyu? June wangukamba kuti: “Ndingulutirizga kuromba kwaku Yehova kuti wandiwovyi. Pavuli paki, mkumwana wangu wangundikambiya kuti mudera lo ndajanga muchitikengi unganu wadera. Ndinguŵanaŵana kuti ndiluteku zuŵa limoza. Ndingukondwa ukongwa kuti ndinguwungana so ndi ŵanthu aku Yehova! Unganu wenuwu wenga chovyu cho ndalindizganga. Ndikondwa kuti ndikwamba so kuteŵete Yehova. Sonu ndiyanduwa vinthu vinandi ndipu ndiziŵa kuti ndikhumbika kuzomera chovyu cho abali ndi azichi angandipaska. Ndiwonga kuti ndikuwere mugulu laku Yehova nyengu yeche ŵaka.”