Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Uthenga Wamampha Wakutuliya Kwaku Chiuta

 Sambiru 9

Vo Mungachita Kuti Banja Linu Lije Lalikondwa

Vo Mungachita Kuti Banja Linu Lije Lalikondwa

1. Kumbi kutorana mwakwenere kutovya wuli kuti banja lije lalikondwa?

Uthenga wamampha utuliya kwaku Yehova, “Chiuta walikondwa,” yo wakhumba kuti mabanja ngajengi mwalikondwa. (1 Timote 1:11, NW) Iyu ndiyu wakwambiska nthengwa. Kutorana mwakwenere nkhwakovya chifukwa chakuti ŵana awiya ndi kukuliya pa malu ngakwenere. Akhristu atenere kulondo marangu nga kwawu pa nkhani yakulembeska nthengwa.Ŵerengani Luka 2:1, 4, 5

Kumbi Chiuta watiyiwona wuli nthengwa? Iyu wakhumba kuti munthurumi ndi munthukazi wo atorana ajaliyi limoza kwa umoyu wawu wosi. Yehova wakhumba kuti ŵanthu akutorana ajengi akugomezgeka kwa munyawu yo akutorana nayu. (Ŵahebere 13:4) Iyu watinkha ukongwa kupatana. (Malaki 2:16) Kweni iyu wazomerezga kuti Akhristu angamaliska nthengwa ndi kuto pamwenga kuyirwa so asani munthu yo akutorana nayu wachita ureŵi.Ŵerengani Mateyu 19:3-6, 9.

2. Kumbi ŵanthu akutorana atenere kukambiskana ndi kulongorana nkharu wuli?

Yehova wakulenga anthurumi ndi anthukazi kuti awovyanengi mu nthengwa. (Chiyambo 2:18) Nge mutu wa banja, munthurumi watenere kuja panthazi pa nkhani yakuphwere banja laki mwakuliŵavu ndipuso mwauzimu. Watenere kwanja muwolu waki ndi mtima wosi. Munthurumi ndi munthukazi atenere kwanjana ndi kutumbikana. Kuti nthengwa yawu yije yalikondwa, wosi ŵaŵi atenere kusambira kugowokerana chifukwa chakuti wosi mbambula kufikapu.Ŵerengani Ŵaefesu 4:31, 32; 5:22-25, 33; 1 Petro 3:7.

3. Kumbi mutenere kupatukana asani nthengwa yinu njambula likondwa?

Asani mukumana ndi masuzgu mu nthengwa yinu, mosi mwaŵaŵi mutenere kwesesa kuti muchitiranengi vinthu mwachanju.  (1 Ŵakorinte 13:4, 5) Mazu ngaku Chiuta ngazomerezgapu cha kuti ŵanthu apatukanengi nge nthowa yakumaliskiya masuzgu ngo ŵanthu wosi akumana nangu mu nthengwa.Ŵerengani 1 Ŵakorinte 7:10-13.

4. Mwaŵana, kumbi Chiuta wakhumba kuti muchitengenji?

Yehova wakhumba kuti mukondwengi. Iyu wakukupaskani ulongozgi wamampha ukongwa wo ungakuwovyani kuti mukondwi ndi unamana winu. Wakhumba kuti imwi musambiri vinandi kutuliya ku vinthu vo apapi ŵinu akumana navu pa umoyu wawu kweniso zeru zawu. (Ŵakolose 3:20) Yehova wakhumba so kuti imwi mukondwengi chifukwa chakuteŵete Mulengi winu ndi Mwana waki.Ŵerengani Wakutaula 11:9–12:1; Mateyu 19:13-15; 21:15, 16.

5. Mwapapi, kumbi mutenere kuchitanji kuti ŵana ŵinu akondwengi?

Mutenere kugwira nchitu mwaphamphu kuti musaniriyi ŵana ŵinu chakurya, pakuja ndi vakuvwala. (1 Timote 5:8) Kweni kuti ŵana ŵinu akondwengi, mutenere so kuŵasambiza kwanja Chiuta ndi kusambira kwaku iyu. (Ŵaefesu 6:4) Asani ŵana ŵinu awona kuti imwi mutanja Chiuta, kuŵengi kwambula kusuzga kuti nawu amuyanjengi. Asani mugwiriskiya nchitu Mazu ngaku Chiuta pakuŵalunguchizga, ŵana ŵinu asuzgikengi cha kukuvwiyani.Ŵerengani Marangu 6:4-7; Nthanthi 22:6.

Ŵana ayanduwa so ukongwa asani mutiŵalumba. Mutenere so kuŵalunguchizga ndi kuŵachenya. Ivi vitiŵavikiriya ku vinthu vo vingaŵachitiska kuti alekengi kukondwa. (Nthanthi 22:15) Kweni mungaŵachenyanga mwaphuzu pamwenga mwankhaza cha.Ŵerengani Ŵakolose 3:21.

Akaboni aku Yehova ŵe ndi mabuku nganandi ngo ngakupangikiya kuti ngawovyengi apapi ndi ŵana. Fundu za m’mabuku yanga zituliya m’Bayibolo.Ŵerengani Sumu 19:7, 11.

 

Ziŵani Vinandi

BANJA LINU LIKHOZA KUJA LALIKONDWA

Muthembengi Chiuta Kuti Nthengwa Yinu Yije Yalikondwa

Kugwiriskiya nchitu mafumbu ngaŵi ngambula kusuzga, kungakuwovyani kuti nthengwa yinu yije yalikondwa.

BANJA LINU LIKHOZA KUJA LALIKONDWA

Mo Mungamaliskiya Masuzgu

Kukambiskana umampha kungawovya kuti nthengwa yije yakukho kweniso yalikondwa m’malu mwakuja yakuwayawaya ndipuso yambula likondwa.

Kumbi Bayibolo Lisambizanji Weniukongwa?

Vo Mungachita Kuti Umoyu wa Banja Linu Uje Walikondwa

Anthurumi akuto, anthukazi akuyirwa, apapi ndipuso ŵana atenere kuchita vinthu nge mo Yesu wachitiyanga. Kumbi tisambiranji kwaku iyu?