Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Uthenga Wamampha Wakutuliya Kwaku Chiuta

 Sambiru 3

Kumbi Uthenga Wamampha Ukutuliya Nadi Kwaku Chiuta?

Kumbi Uthenga Wamampha Ukutuliya Nadi Kwaku Chiuta?

1. Kumbi Ndiyani Wakulemba Bayibolo?

Uthenga wamampha wakuti ŵanthu azamuja pacharu chapasi kwamuyaya ukulembeka m’Bayibolo. (Sumu 37:29) Bayibolo likupangika ndi mabuku ngamanangamana 66. Chiuta wangugwiriskiya nchitu ŵanthu akugomezgeka akukwana 40 kuti alembi mabuku yanga. Mabuku ngakwamba 5, ngangulembeka ndi Mosese ndipu pajumpha vyaka pafufupi 3,500 kutuliya po wakulembe. Buku lakumaliya lingulembeka ndi wakutumika Yohane ndipu pajumpha vyaka pafufupi 1,900 kutuliya po likulembeke. Kumbi ŵanthu wo akulemba Bayibolo angulemba maŵanaŵanu ngaku yani? Chiuta wangugwiriskiya nchitu mzimu utuŵa kuti uŵawovyi. (2 Samuele 23:2) Yiwu angulemba maŵanaŵanu ngawu cha kweni ngaku Chiuta. Mwaviyo, Chiuta ndiyu Wakulemba Bayibolo.Ŵerengani 2 Timote 3:16; 2 Petro 1:20, 21.

2. Kumbi tingasimikizga wuli kuti Bayibolo likutuliya kwaku Chiuta?

Tiziŵa kuti Bayibolo likutuliya kwaku Chiuta chifukwa chakuti likukonkhoska umampha ukongwa vo vazamuchitika kunthazi. Palivi munthu weyosi yo wangachita ivi. (Yoswa 23:14) Chiuta Wanthazizosi pe ndiyu wangaziŵa vo vazamuchitikiya ŵanthu kunthazi.Ŵerengani Yesaya 42:9; 46:10.

Buku lakutuliya kwaku Chiuta litenere kuja nadi lapade. Mabayibolo ngakujumpha 2 biliyoni ngakupharazgika mu vineneru vakujumpha 450. Chinanga kuti Bayibolo ndakali, kweni vo likamba viyanana ukongwa ndi vo asayansi akamba mazuŵa nganu. Kweniso ŵanthu 40 wo  akulemba Bayibolo akulemba vakususkana cha. * Kweniso, Bayibolo lititikambiya kuti Chiuta wauneneska watitiyanja ukongwa. Ndipuso Bayibolo leche ndi nthazi zo zisintha umoyu wa ŵanthu. Fundu izi zichitiska kuti ŵanthu anandi avwanengi kuti Bayibolo ndi Mazu ngaku Chiuta nadi.Ŵerengani 1 Ŵatesalonika 2:13.

3. Kumbi ndi uthenga wuli wo we m’Bayibolo?

Bayibolo likonkhoska uthenga wamampha wakuti Chiuta we nawu ndi chilatu chamampha mtundu wa ŵanthu. Malemba ngatitikonkhoske vo vinguchitika kuti ŵanthu atayi mwaŵi wakuja mu paradayisu, kweniso mo paradayisu wazamuwezgekiyapu.Ŵerengani Chivumbuzi 21:4, 5.

Mu Mazu ngaku Chiuta musanirika so marangu, fundu zo ŵanthu angayende kweniso ulongozgi. Kweniso Bayibolo le ndi vakuwoniyapu vo vilongo mo Chiuta wachitiya ndi ŵanthu. Vakuwoniyapu ivi vititiwovya kuziŵa umunthu waku Chiuta. Pa chifukwa ichi, Bayibolo lingakuwovyani kumuziŵa umampha Chiuta. Likonkhoska vo mungachita kuti muje nayu pa ubwezi.Ŵerengani Sumu 19:7, 11; Yakobe 2:23; 4:8.

4. Mungachita wuli kuti muvwisengi vo Bayibolo likamba?

Kabuku yaka kakuwovyeningi kuti mulivwisi umampha Bayibolo mwakugwiriskiya nchitu nthowa yo Yesu wagwiriskiyanga nchitu. Iyu wayanjanga kugwiriskiya nchitu Malemba ndi ‘kungang’anamuliya.’Ŵerengani Luka 24:27, 45.

Uthenga wamampha wakutuwa kwaku Chiuta ngwakukondweska ukongwa kuphara chinthu chechosi. Kweni pe ŵanthu amanavi ŵaka wo aleka kuwuyanja ndipu anyaki akwiya kuvwa uthenga uwu. Kweni imwi mungagongowanga cha. Chilindizga chinu chakuzija ndi umoyu wamuyaya chithemba pa kuziŵa Chiuta.Ŵerengani Yohane 17:3.

 

^ ndimi 7 Wonani kabuku kakuti Buku la Anthu Onse.

Ziŵani Vinandi

Kumbi Bayibolo Lisambizanji Weniukongwa?

Bayibolo Ndi Buku Lakutuwa Kwaku Chiuta

Kumbi Bayibolo lingakuwovyani wuli kuti mumalani ndi masuzu? Nchifukwa wuli tingagomezga mauchimi ngaki?

Kumbi Bayibolo Lisambizanji Weniukongwa?

Kumbi Uneneska Wakukamba Vaku Chiuta Ngwakuti Wuli?

Kumbi muŵanaŵana kuti Chiuta watikuphweriyani? Ziŵani mijalidu yaki ndipuso vo mungachita kuti mundere kufupi ndi iyu.